গম্ উপদেজ্ 6 - Chakma Bible

ভুলো পৌইদ্যেনে উজিয়ার কধা

¹ মঅ পুয়োবো, তুই যুনি কারঅ জাবিন্ ওই থাচ্, অন্যজনর্ জাবিন্ অবাত্তে আত্ মিলেই থাচ্,

² যিয়েনি কোইয়োচ্ যুনি তা ফালত্ পড়চ্, যুনি তঅ মুয়ো কধালোই ধরা হাচ্,

³ তো মঅ পুয়োবো, তুই যেক্কেনে অন্যগুনো ইদু ধরা পোজ্যস্, সেক্কে নিজোরে ছাড়ি নেযেবাত্তে এ কামানি গর্- তাইদু যেইনে নিজেই চিগোন্ অ, তারে কোজোলি গর্,

⁴ তঅ চোগ্‌কুনোরে ঘুম যেবাত্তে ন-দিচ্, চোগো পাদানিরে চোগ্ কাদিবাত্তে ন-দিচ্।

⁵ শিগেরী আঢত্তুন্ উরিঙো ধোক্ক্যেন্ গুরি, পেগো শিগেরীত্তুন পেগো ধোক্ক্যেন্ গুরি তুই নিজোরে ছাড়েই নেযা।

⁶ ও আল্‌সিয়্যে, তুই পিগিড়েবো ইদু যাহ্, তা আঢাউদো দেগিনে জ্ঞানবলা অ।

⁷ তারে উগুম গুরিবার কনজন নেই, তা উগুরে কনঅ পরিচালগ বা শাজন্‌গুরিয়্যে নেই;

⁸ তো তে হরান্যেত্ তা হানাগান তুবেই রাগায় আর ফসল কাবিবার অক্তত্ হানা তগায়।

⁹ ও আল্‌সিয়্যে, আর কয়দিন তুই পরি থেবে? কক্কেনে ঘুমোত্তুন্ উদিবে?

¹⁰ তুই কোই থাচ্, “আর এক্কেনা ঘুম, আর এক্কেনা ঘুমোর্ ভাব, জিরেবাত্তে আর এক্কেনা আত্তানি বোজেই রাগাং।”

¹¹ মাত্তর্ বার্ বার্ গর্বা এলে বা আত্যের্‌লোই সাজি থেইয়্যে ডাগেদ আঢত্ পড়িলে যেধোক্ক্যেন্ অভাব এজে, ঠিগ্ সেধোক্ক্যেন্ গুরি তর্‌অ অভাব এবঅ।

¹² যে মানুচ্চো জঘন্য আর পাজি তে ভান্ন্যেই কধা মুয়োত্ গুরিনে ঘুরি ঘুরি বেড়ায়;

¹³ তে চোগেদি ইজিরে গরে, টেঙোই ইংগিদ্ দে, আঙুল্লোই দেগায়,

¹⁴ বজং মনে নিত্য কুজুরোমি গরে আর যাগুলুক্ বাজায়।

¹⁵ সেনত্তে আদিক্ক্যেন্‌গুরি তা উগুরে দজা এবঅ; যে কনঅ সময়োত্ তে ভস্ত ওই যেবঅ, তে আর্ উদি ন-পারিবো।

¹⁶ লগেপ্রভু কমেদি সাততান্ জিনিস ঘিনেই সিয়েনি তাইদু জঘন্য:

¹⁷ বার্বো বার্বো চোগ, মিজেকধা কোইয়্যে জিলান্, গম্ মান্‌জ্যরে খুন্‌গোজ্যে যে আঢ্‌তানি,

¹⁸ কুজুরোমিলোই ভরা মনান্, অন্যেয় কাম গুরিবাত্তে ধাবা যেইয়্যে টেঙানি,

¹⁹ মিজে কধা কোইয়্যে মিজে সাক্ষি, আর ভেইয়্যে ভেইয়্যে যাগুলুক্ বাজেয়্যে মানুচ্।

বেশ্যে পৌইদ্যেনে উজিয়ার কধা

²⁰ মঅ পুয়োবো, তুই তঅ বাবঅ উগুমান পালা, আর মাবোর দিয়্যে শিক্ষ্যেনি পুরি ন-ফেলেচ্।

²¹ জনমত্তে তঅ মনত্ সিয়েনি গাঢেই রাগা, তঅ গত্তনাত্ সিয়েনি বানি রাগা।

²² আঢিবার সময়োত্ সিয়েনিয়ে তরে পথ্ দেগেব, ঘুমেবার সময়োত্ তরে চুগি দিবো আর জাগিলে তঅ সমারে কধা কবঅ;

²³ কিত্তে এ উগুমানি চেরাগ ধোক্ক্যেন, এ শিক্ষ্যেগানি পহর্ ধোক্ক্যেন্, আর অমকদ গেইল্ দিইনে শাজন্ গরানা অলঅ জিংকানির পথ্‌তান।

²⁴ ইয়েনি তরে বজং মিলেগুনো আঢত্তুন্ রোক্ষ্যে গুরিবো, রোক্ষ্যে গুরিবো ভান্ন্যেই পধেদি যেইয়্যে মিলেগুনোর মিদে মিদে কধানিত্তুন্।

²⁵ তা দোলান্ চেইনে তুই লুভ্ ন-গুরিচ্, তা চোগো পাদাত্ তুই নিজোরে বন্দি অবাত্তে ন-দিচ্;

²⁶ কিত্তে বেশ্যেবো যেরেদি তরে হানা দুঘোত্ ফেলেব, আর বেশ্যেবো তঅ দোল্ জিংকানিগান শিগের্ গুরিবো।

²⁷ যুনি কনজনে আগুন তুলি লোইনে নিজো করত্ রাগান সালে কি তা কাবড়ান পুড়ি ন-যেবঅ?

²⁸ যুনি কনজনে জোল্ জোল্যে আঙারা উগুরে আঢন্ সালে কি তা টেঙান্ পুড়ি ন-যেবঅ?

²⁹ যে মানুচ্চো অন্য মোগো ইদু যায় তা দজাগান্ এবাবোত্যে অয়; যে সেই মিলেবোরে ধরে তাত্তুন্ সাজা পাহ্ পড়িবো।

³⁰ হেই ন-পেইনে ভুগ্ মারেবাত্তে যে চুর্ গরে, সেই চুর্‌বোরে মান্‌জ্যে ঘিনাইদে চোগেদি ন-দেগন্।

³¹ তো যেক্কেনে তে ধরা পুরিবো সেক্কেনে অয়ত তারে সাতগুন ফিরেই দিয়্যে পুরিবো, অয়ত তা ঘরর্ বেক ধনানিয়ো তারে দি দিয়্যে পুরিবো।

³² যে সিনেলী গরে তার বুদ্ধির অভাব আঘে; তে সিয়েনি গুরিনে নিজোরে ভস্ত গরে।

³³ তা ভাগ্যত্ আগেদে আঘাত আর অগমান্, তা দুর্নামানি কনদিন্‌অ ঢাগা ন-যেবঅ;

³⁴ কিত্তে মনর্ জ্বালাগানে নেগর্ দর্‌গরেপারে রাগ্‌কানরে জাগেই দে; হেনা সুজিবার অক্তত্ তে কনঅ দোয়্যে ন-দেগেব।

³⁵ কনঅ ক্ষতিপূরণ তে মানি ন-লবঅ, ভালোক্কুন্ ঘুষ্ দিলেয়ো তে হুজি ন-অবঅ।