গম্ উপদেজ্ 5 - Chakma Bible

বেশ্যে পৌইদ্যেনে উজিয়ার কধা

¹ মর্ পুয়োবো, মুই যে জ্ঞানর কধা কঙর্ সিয়েন গমেডালে শুন্; মঅ বিচেরবুদ্ধির্ কধানি শুন্।

² সেক্কে তুই গম্-ভান্ন্যেই বুঝিবার খেমতাগান রোক্ষ্যে গুরি পারিবে, আর তঅ মুয়োনত্তুন্ জ্ঞানর কধা বার্ অবঅ।

³ বেশ্যেমিলেবোর ঠুদোত্তুন্ যেন মধু ঝুরি পড়ে, তা কধাবাত্তানি তেলত্তুন্ বেশ্ নরম;

⁴ মাত্তর্ সিয়েনর শেজ্ ফল অয় বিষো ধোক্ক্যেন্ তিদে, দ্বিকিত্তেদি ধার্ দিয়্যে ছুরি ধোক্ক্যেন ধারেয়্যে।

⁵ তা পথ্‌তান মরণ জাগাত্ লাম্মেগোই, সিয়েন উজু গুরি যেইয়্যে মরণ জাগান ইন্দি।

⁶ জিংকানির ইন্দি যেবার পধ কধা তে চিদে চজ্জায়ো ন-গরে; তা আঢিবার পথ্‌তান বেঙা, মাত্তর্ তে সিয়েন হবর্ ন-পায়।

⁷ মঅ পুয়োগুন, এবেরা মঅ কধাগান শুনো, মুই যিয়েন কঙর্ সিয়েনত্তুন্ এক্কেনায়ো ন-লড়িবা।

⁸ সেই মিলেবোত্তুন্ তঅ টেঙানি দূরোত্ তঅ, তা ঘর দোরান ইদুয়ো ন-যেচ্;

⁹ যুনি যাচ্ সালে তর্ গাবুরো বলান্ অন্যগুনো ইদু দি দিবে আর তঅ আয়ুগান দি দিবে চিৎ নপুজ্যে মানুচ্চুনোরে।

¹⁰ সেক্কে ন-চিন্যে মানুচ্চুনে তঅ ধন-সোম্বোত্তিগানি ভোগ গুরিবাক্, আর তঅ কামর্ ফলুন যেবাক্ অন্য মানুচ্চুনো ঘরত্।

¹¹ জিংকানির শেজত্ যেক্কেনে তঅ কিয়্যে আর য়েরাগান ভস্ত অবঅ সেক্কেনে তুই আবিলেচ্ হেবে।

¹² তুই কবে, “হায়! মুই শাজন্ গরানাগান্ ঘিনেয়োং, মঅ মনানে বুদুলিবার কধাগান ঈচ্ গোজ্যে।

¹³ মঅ মাস্তরুনো কধা মুই ন-শুনোং, যিগুনে মরে শিক্ষ্যে দুয়োন তারা কধা মুই কান ন-পাদং।

¹⁴ সমাজ মানুচ্চুনো আঢত্ পুরিনে মুই পেরায় মুরি যাঙর্।”

নিজো মোক্কো ইদু হুজি অনা

¹⁵ তর্ নিজোর তুবেয়্যে পানিত্তুন্ তুই পানি হাহ্; তর্ নিজো কূয়োবোর লগেলগ্ পানি হাহ্।

¹⁶ তর্ নিজো পয়নালাবোর্ পানিগান কিত্তে বারেদি পুরিবো? তর্ নালা পানিগান কিত্তে পদথ্ পুরিবো?

¹⁷ তঅ পুয়ো-ছাগুন তর্ গায় গায় থোক্, বেশ্যেমিলেগুনোর সিয়েনত্ ভাগ ন-থোক্,

¹⁸ তঅ পয়নালাবো ইদু বর্ দুয়োং, তঅ গাবুজ্যে মোক্কোরে নিইনে তুই রঙ্গ-ফুত্তি গর্।

¹⁹ সেই কোচ্‌পেইয়্যে মিলেবো, অমকদ দোল্ মিলেবো; তা বুক্কো তরে নিত্য হুজি রাগোক্, তুই নিত্য তা কোচ্‌পানালোই মিলেমিলি গুরি থেচ্।

²⁰ মঅ পুয়োবো, কিত্তে তুই বেশ্যে মিলেবোলোই রঙ্গ-ফুত্তি গুরি থেবে? তা বুগোত্ কিত্তে তুই বেড়েকোরে ধুরিবে?

²¹ মানুচ্চুনোর্ আঢাউদো উগুরে লগেপ্রভু চোগ্ রাগেয়্যে; তারার বেক্ পথ্‌তানি তে পোরোক্ষ্যে গুরি দে।

²² পাজি মানুচ্চো তা ভান্ন্যেই কামর ফালত্ পড়ে, তে নিজো পাপ দুড়িত্ বানা হায়।

²³ শাজনর্ অভাবে তে মুরি যায়; নিজোর্ অমকদ ভুলোর কারনে তে তা পথ্‌তানত্ থির্ ন-থায়।