গম্ উপদেজ্ 31 - Chakma Bible

রাজা লমূয়েলর কধা

¹ রাজা লমূয়েলর কোইয়্যে কধা, অত্তাৎ গোজেনর দিয়্যে যে কধানি তা মাবো তারে শিক্ষ্যে দিয়্যে।

² মঅ পুয়োবো, ও মর্ পেদত্তুন্ নিগিল্যে পুয়োবো, ও মর্ মানত্ গোজ্যে পুয়োবো, তরে কি কোম্?

³ মিলেগুনো উগুরে তর্ বলান্ ক্ষয় ন-গুরিচ্; রাজাগুনোরে যিয়েনিলোই ভস্ত গরে সিয়েনি ইদু নিজোরে ন-দিচ্।

⁴ ও লমূয়েল, রাজাগুনোর তপ্পে, অয়, রাজাগুনোর তপ্পে আংগুর-রস হানা যগাজ্যে নয়; মদ্ হেবাত্তে চানা শাজন্‌গুরিয়্যেগুনোর তপ্পে যগাজ্যে নয়।

⁵ মদ্ হেইনে তারা সুদোমানি ভুলি যেই পারন্, আর অত্যেচারিতগুনো উগুরে অন্যেয় বিচের গুরি পারন্।

⁶ যিগুনে মুরি যাদন্ তারারে মদ্ দে। যিগুনোর মনত্ দুঘ আঘে তারারে আংগুরো-রস দে;

⁷ তারা সিয়েন হেইনে তারার অভাব কধা ভুলি যাদোক্, তারার দুঘ্‌‌কানি আর্ মনত্ ন-থোক্।

⁸ ও লমূয়েল, যিগুনে নিজোর তপ্পে কধা কোই ন-পারন্ তুই তারার ওইনে কধা কঅ; অসহায় মানুচ্চুনোর অধিকার রোক্ষ্যে গুরিবাত্তে তুই কধা কঅ।

⁹ জুরো গুরি ন-থেচ্, ন্যায় বিচের গর্; দুঃখী আর অভাবীগুনোর অধিকার রোক্ষ্যে গর্।

গুণবলা মিলে পৌইদ্যেনে

¹⁰ গম্ আর গুণবলা মিলে কন্না পেই পারে? প্রবাল পাত্তরত্তুন্অ তা দামান বোউত্ বেশ্।

¹¹ তা উগুরে তা নেক্কো পুরোপুরি বিশ্বেজ্ গরে; তা নেক্কোর চেরোকিত্তেত্তুন্ লাভ অয়।

¹² তা জিংকানির বেক্ সময়ানত্ তে নেক্কোরে গমেডালে রাগায়, ক্ষতি ন-গরে।

¹³ তে ভেড়া ছাগল কেশ্ আর মসীনা বেঈ লোইনে হুজি মনে নিজোর আঢে কাম্ গরে।

¹⁴ তে বেবসা গুরিয়্যেগুনোর জাহাজ ধোক্ক্যেন্ দূরোত্তুন্ তা হেবার জিনিসছানি আনে।

¹⁵ আন্ধার থাগদে তে উদে; তে পরিবার মানুচ্চুনোরে হানার বেবস্থা গরে আর চাগরানীগুনোরে হানা ভাগ্ গুরি দে।

¹⁶ কনঅ ভুই কিনিবার আগেদি তে সিয়েন চেইচাই চিন্তে গরে আর সে পরেদি সিয়েন কিনে; তার নিজো আয়ত্তুন্ তে আংগুর-ক্ষেত্ গরে।

¹⁷ তে দরমর গুরিনে কমর্ বানি কামত্ আদ্ দে আর অমকদ কাম্ গরে।

¹⁸ তে দেগে, তা কাম গরানাত্তুন্ লাভ জদবদে এজের্; রেদোত্‌অ তা বাত্তিবো জ্বলে।

¹⁹ আঢ্‌‌তোই তে সুদো কাবেদে টাকুগান ঘুরায় আর আঙুল্লোই সুদোগানি কাবে।

²⁰ দুঘি মানুচ্চুনোত্তে তা আঢ্‌‌তান খুলো; তে অভাবীগুনো ইন্দি আঢ্‌‌তান বাবেই দে।

²¹ বরফ্ পড়িলেয়ো পরিবারত্তে তার কনঅ দর্ নেই, কিত্তে তারা বেক্কুনে মংগা রাঙা কাবড় উরোন্।

²² বিচ্চোনত্তে তে চাদর্ বানায়; তে নিজেয়ো মসীনার কাবড় আর মংগা বিগুনো রঙর্ কাবড় উরে।

²³ তা নেক্কো শঅর গেদোত্ সর্মান পায়; তে সিদু দেজর বুড়ো নেতাগুনো সমারে বজে।

²⁴ সে মিলেবো মসীনার পোজাক্ বানেইনে বিজি দে; কমরত্ বানেদে কাবড়ানি তে বেবসায়িগুনোরে যোগেই দে।

²⁵ খেমতা আর সর্মানান অলঅ তার পোজাক্; ভবিচ্চদর দিনুনো কধা ভাবিনে তার কনঅ চিদে-চজ্জা ন-অয়।

²⁶ তে বুদ্ধি গুরিনে কধা কয়; কোচ্‌‌পানার মনভাব্‌‌পোই তে উগুম্ দে।

²⁷ তা পরিবারর চেরোকিত্তেন্দি তে খিয়েল্ রাগায়; তে কাম গুরিনে খায়।

²⁸ তার ঝি-পুয়োগুনে তারে বেক্কুনো মুজুঙোত্ বর্ পেইয়্যে কন্; তা নেক্কোয়ো তারে নাঙ্ গিনিনে কয়,

²⁹ “বোউত্ মিলে তারার কাবিদ্যেঙানি দেগেয়োন্, মাত্তর্ তুই তারারে বেক্কুনোরে ছাড়ি যেইয়োচ্।”

³⁰ দোল্ বেবহার ছলনা গুরি পারে, দোলান্ জিংকানিবর্ নয়, মাত্তর্ যে মিলেবো লগেপ্রভুরে ভোক্তি গুরিনে দরায় তে বাঈনী গরা খায়।

³¹ তা কামর্ পাওনা সর্মান তারে দুয়ো; শঅর গেদোত্ তা কামানিয়ে তারে বাঈনী গোরোক্।