গম্ উপদেজ্ 30 - Chakma Bible

আগূরোর কধা

¹ গোজেনর দিয়্যে কধা যাকির পুয়ো আগূরে ইথীয়েল ইদু, অয়, ইথীয়েল আর উকল ইদু কোইয়্যে।

² ঘেচ্চেক্‌‌গুরি মুই মানুচ্ অলেয়ো মঅ বুদ্ধিগান য়েমান ধোক্ক্যেন্; মান্‌‌জ্যর যে বিচের বুদ্ধিগান আঘে সিয়েন্‌অ মর্ নেই।

³ মুই জ্ঞান ন-পাং; পবিত্র গোজেন পৌইদ্যেনে মর্ কনঅ জ্ঞান নেই।

⁴ কন্না স্বর্গত্ উঠ্যেগোই আর কন্না লামি এচ্চ্যে? আদ্‌‌তোই মুঠ্ গুরিনে কন্না বোইয়্যের ধোজ্যে? কন্না নিজো কাবড় ভিদিরে বেক্ পানিগান তুবেই রাগেয়্যে? পিত্‌‌থিমীর চেরোকিত্তে শেজ্ দুযিগান কন্না থিদেবর্ গোজ্যে? তা নাঙান্ আর পুয়োবো নাঙান্ কি? যুনি তুই হবর্ পাজ্ সালে সিয়েনি মরে কঅ।

⁵ গোজেনর বেক্ কধানি খাটি বিলিনে প্রমান্ ওইয়্যে; যিগুনে তাইদু আশ্রয় নেযান্ তে তারার ঢাল্ অয়।

⁶ তা কধানি সমারে অন্য কনঅ কধা ন-মিজেবা; মিজেলে তে তঅ দুষ্‌‌ছান দেগেই দিবো, আর তুই মিজে কধা কোইয়্যে বিলিনে প্রমান্ অবঅ।

⁷ ও লগেপ্রভু, দ্বিয়েন জিনিস মুই তত্তুন্ চাং; মুই বাঁজি থাগদে তুই সিয়েন মরে দিবাত্তে অস্বিগের্ ন-গুরিচ্-

⁸ ছলনা আর মিজে কধা কনা মত্তুন্ দূরোত্ রাগা, মরে নাঢা বা তাগোয়্যে ন-গুরিচ্। যে হানাগান মর্ লাগিবো বানা সিয়েন মরে দিচ্,

⁹ সিয়েন ন-অলে অয়ত মর্ বেশ্ থেবঅ আর মুই তরে অস্বিগের্ গুরিনে কোম্, “লগেপ্রভু কন্না?” বা মুই নাঢা ওইনে চুর্ গুরিম আর মুই গোজেনর নাঙান্ অসর্মান গুরিম।

¹⁰ গিরোজ ইদু চাগরর্ দুন্নাম ন-গোজ্য, সিয়েন গুরিলে সে চাগর্‌‌বো তরে অভিশাব্ দিবো আর তুই দুষি অবে।

¹¹ এবাবোত্যে বোউত্ মানুচ্ আগন্ যিগুনে এধোক্ক্যেন্- তারা বাবরে অভিশাব্ দুয়োন আর মাবোর্ মংগল ন-চান্,

¹² তারা নিজো চোগেদি খাটি অদচ কজরাত্তুন্ সিজি ন-অন্,

¹³ তারার চোগ্‌কুন বাড়্‌‌বো, তারার রিনি চানাগান্অ বেদোক্ক্যেন্,

¹⁴ তারার দাত্‌‌তুন যেন তলোয়ার আর মারিগান যেন ছুরি ধোক্ক্যেন্, যেনে তারা পিত্‌‌থিমীত্তুন্ দুঘি মানুচ্চুনোরে আর মান্‌‌জ্য ভিদিরেত্তুন্ অভাবীগুনোরে গিলিক্ গুরি পারন।

¹⁵ জোঁকর দ্বিবে ঝি আগন্, তারা “দে, দে” কোই কোই রঅ ছাড়ন্। তিনেন্ জিনিস আঘে যিয়েন কনদিন্‌অ ঈল্ ন-অয়, আজলে চেরান্ জিনিজে কনদিন্‌অ ন-কয়, “যগাজ্যে ওইয়্যে”-

¹⁶ গোর জাগা, ভাজ্ মিলে, ভুই, যিয়েনি কনদিন্‌অ পানিলোই ঈল্ ন-অয়, আর আগুন, যিয়েনি কনদিন্‌অ ন-কয়, “যগাজ্যে ওইয়্যে।”

¹⁷ যে চোগ্‌‌কুনে বাবরে ঠাট্টা গরন্ আর মাবোর বাধ্য অবাত্তে ঈচ্ গুরিনে অস্বিগের্ গরন্, সে চোগ্‌‌কুন কলগ কবাগুনে কুদি কাদায় নিগিলে দিবাক্, আর শকুন ছঅগুনে সিগুন হেই ফেলেবাক্।

¹⁸ তিনেন্ জিনিস মইদু অমকদ আমক্ লাগে, আজলে চেরান্ জিনিস মুই বুঝি ন-পারং-

¹⁹ কেধোক্ক্যেন্ গুরিনে ঈগল পেক্কো আগাজত্ উড়ে, কেধোক্ক্যেন্ গুরিনে সাপ্পো পাত্তর উগুরে আঢে, কেধোক্ক্যেন্ গুরিনে জাহাজ্‌‌ছান দাঙর্ সাগরত্ যায়, কেধোক্ক্যেন গুরিনে গাবুজ্যে মরদ আর গাবুজ্যে মিলে মিজেনার কারনে জিংকানি শুরু অয়।

²⁰ বেশ্যে মিলের বেবহার মুই বুঝি ন-পারং; তে বেশ্যে গরানার পরেদি গাদিগাদাই কইদ্যে, “মুই দঅ কনঅ অন্যেয় ন-গরং।”

²¹ পিত্‌‌থিমীগান তিনেন্ জিনিজোর্ ভরে গির্‌গিরেই, আজলে চেরানর্ ভর্ তে সোজ্য গুরি ন-পারে-

²² চাগর্‌‌বো যেক্কেনে তে রাজা অয়, চিগোন মন মানুচ্ যেক্কেনে তে পেট্ ভুরিনে খায়,

²³ ঈচ্ গরা হেইয়্যে মিলে যেক্কেনে তে মোগোর্ অধিকার পায়, আর চাগরানিবো যেক্কেনে তে গিরোজ জাগায়ান পায়।

²⁴ পিত্‌‌থিমীত্ চেরান্ জিনিস চিগোন, তো সিয়েনি অমকদ জ্ঞানেদি ভর্‌‌পুনং-

²⁵ পিগিরে এমন এক্কো জাদর্ প্রানি যিগুনোর বল্ খুব কম্, তো হরান্যেত্ তারা হানা তুবেই রাগান্;

²⁶ শাফন এমন এক জাদর্ প্রানি যিগুনোর খেমতা অমকদ কম্, তো উজু পাত্তর উগুরে তারা ঘর্ বানান্;

²⁷ পুগ্-যুগ্‌‌‌‌কুনোর রাজা নেই, তো তারা সুর্ গুরিনে উজেই যান্;

²⁸ টোগ্‌‌টোগি আঢ্‌‌তোই ধরা যায়, তো তে রাজা ঘরত্ থায়।

²⁹ তিনেন্ জিনিস আঘে যিগুনে বাঈনী গুরিনে টেঙানি ফেলান্, আজলে চেরান্ জিনিস বাঈনী গুরিনে আঢে-

³⁰ সিংহ, যিবে য়েমানুনো ভিদিরে বোলী আর কনঅ য়েমান মুজুঙোত্তুন্ ধেই ন-যায়;

³¹ বুগ্ ফুলেইনে আদি যেইয়্যে রাদাকুরো, পাদা ছাগল, আর সৈন্যদল্লোই ঘিজ্যে রাজা।

³² যুনি তুই নিজোরে দাঙর্ গুরি তুলিনে ভুল্ গরচ্ বা অন্যগুনো বিরুদ্ধে কুসল্লা গরচ্, সালে আঢ্‌‌তান মুয়োনত্ নাঢি দে।

³³ দুধোত্তুন্ যেধোক্ক্যেন্ মাখন নিগিলে, নাগ মুজুরিলে যেধোক্ক্যেন্ লো নিগিলে, সেধোক্ক্যেন রাগ্‌‌কানরে ফুলেই তুলিলে কোল্-কোজ্যে অয়।