গম্ উপদেজ্ 28 - Chakma Bible

¹ কনজনে ন-লোড়েলেয়ো পাজি মান্‌‌জ্যে ধেই যান, মাত্তর্ গোজেন ভক্ত মান্‌‌জ্যে সিংহ ধোক্ক্যেন্ ন-দোরেয়্যেগুরি বজত্তি গরে।

² দেজ মানুচ্চুনোর ভান্ন্যেয়র্ কারনে বোউত্ শাজন্‌গুরিয়্যে অন্, মাত্তর্ জ্ঞানী আর বুদ্ধিবলা শাজন্ গুরিয়্যে সুদোমান ঠিগ্ রাগায়।

³ যে নাঢা মানুচ্চুনোর নেতা নাঢা মানুচ্চুনো উগুরে অত্যেচার গরে তে এমন ঝড়র্ নালা ধোক্ক্যেন্ যিয়েনর পরেদি আর কনঅ খেত্‌‌খেত্তি ন-থায়।

⁴ যিগুনে লগেপ্রভুর সুদোমানি ছাড়ন্ তারা পাজিগুনোরে নাঙ্ গিনোন্, মাত্তর্ যিগুনে সিয়েনি মানন্ তারা পাজিগুনোর বিরুদ্ধে যান।

⁵ বজং মানুচ্চুনে ন্যায়বিচের পৌইদ্যেনে ন-বুঝোন্, মাত্তর্ যিগুনে লগেপ্রভুর আওজ্ মজিম্ চলন্ তারার গম-ভান্ন্যেই বুঝিবার খেমতা আগে।

⁶ যে তাগোয়্যে মানুচ্চো বেঙা পধেদি যায় তাত্তুন্ বরং সে নাঢা মানুচ্চো গম্ যে গমেডালে আঢাউদো গরে।

⁷ যে পুয়োবো সুদোমানি মানে তে বুদ্ধিবলা, মাত্তর্ যে পুয়োবো পেদুক্কুনোর সমাজ্যে তে তা বাব্‌‌পোর অসর্মান আনে।

⁸ যে কনঅ বাবোত্যে সুদি টেঙালোই যে মানুচ্চো তার ধনান্ বাড়ায়, তে সিগুন এমন একজনত্তে তুবোই যে নাঢাগুনো উগুরে দোয়্যেলু।

⁹ লগেপ্রভুর সুদোমানির কধা যুনি কনজনে শুনিনেয়ো ন-শুনোন্, সালে তার তবনাগান গ্রাজ্য ন-অয়।

¹⁰ গম্ মানুচ্চুনোরে যে ভান্ন্যেই পধেদি নেযায় তে তার নিজো গাদ্‌‌তোত্ পুরিবো, মাত্তর্ যিগুনে নিদ্দুযি তারার মংগল্ অবঅ।

¹¹ তাগোয়্যে মানুচ্চো তা নিজোর চোগেদি জ্ঞানী, মাত্তর্ যে নাঢা মানুচ্চোর বিচের বুদ্ধি আঘে তে সেই তাগোয়্যে মানুচ্চোর আজল্ অবস্থাগান বুঝি পারে।

¹² গোজেন ভক্ত মানুচ্চুনোর আঢত্ খেমতা গেলে বেক্কুনোর ভালেদি অয়, মাত্তর্ পাজিগুনোর আঢত্ খেমতা গেলে মানুচ্চুনোরে তোগেইনে পাহ্ ন-যায়।

¹³ যে মানুচ্চো নিজোর পাপ গুমুরোত্ রাগায় তার ভালেদি ন-অয়, মাত্তর্ যে সিয়েনি স্বিগের্ গুরিনে ছাড়ি দে তে দোয়্যে পায়।

¹⁴ যে মানুচ্চো অন্যেয় গুরিবাত্তে নিত্য দরায় তে বর্ পেইয়্যে, মাত্তর্ যে তার মনানরে চিৎ ন-পুজ্যে গরে আর অন্যেয় গুরিবাত্তে ন-দরায় তে দজাত্ পড়ে।

¹⁵ গুজুরি উদেদে সিংহবো আর আক্রমন গুরিয়্যে ভালুক্কো যেধোক্ক্যেন্, সেধোক্ক্যেন্ সেই পাজি মানুচ্চো যে নাঢা মানুচ্চুনোর শাজন্ গুরিয়্যে অয়।

¹⁶ যে শাজন্ গুরিয়্যেবোর বিচের বুদ্ধি নেই তে অমকদ অত্যেচার গরে; যে শাজন্ গুরিয়্যেবো লুভ গরানা ঘিনেই তে ভালোক্‌দিন বাঁজি থায়।

¹⁷ যে মানুচ্চো খুন্ গুরিনে চিদে গত্তে গত্তে দুখ্ পার্ ন-মরানা সং তে ধেই ধেই বেড়ায়; কনজনে তারে সাহায্য ন-গোরোক্।

¹⁸ যিবের চলাফিরেত্ নিদ্দুষি তে গমেডালে থায়, মাত্তর্ যে মানুচ্চো বেঙা পধেদি যায় তে আদিক্ক্যেন্‌গুরি পুরিবো।

¹⁹ যে মানুচ্চো নিজো ভুইয়োত্ কাম্ গরে তার বোউত্ হেবার-দেবার থায়, মাত্তর্ যে ভান্ন্যেয়র্ পধেদি যায় তার অমকদ অভাব অয়।

²⁰ বিশ্বেজি মান্‌‌জ্যে বোউত্ বর্ পান, মাত্তর্ যে ধনী অবাত্তে আওজ্ গরে তে সাজা পেবদে পেবঅ।

²¹ বিচেরত্ কার তপ্পে নেযানা ঠিগ্ নয়; যে সিয়েনি গরে তে এক কট্টা রুটিত্তেয়ো অন্যেয় গুরি পারে।

²² যে মানুচ্চো লুভি তে তাগোয়্যে অবাত্তে হিজে-হিচ্চ্যে বাজায়, মাত্তর্ তে হবর্ ন-পায় অভাব্‌পানে তাত্তে বাজ্জেই আঘে।

²³ যে মানুচ্চো চাম্‌‌চাগিরি কধা কয় তাত্তুন্ বরং যে সংশোধনর কধা কয় তে যেরেদি বেশ্ সর্মান পায়।

²⁴ যে কনঅ জনে মা-বাবঅ জিনিস চুর্ গুরিনে কন্দে, “ইয়েন অন্যেয় নয়,” তে ভস্ত গুরিয়্যেবোর্ সমাজ্যে।

²⁵ যে মানুচ্চো লুভি তে কোল্-কোজ্যে বাজেই দে, মাত্তর্ যে লগেপ্রভু উগুরে বিশ্বেজ্ গরে তার ভালেদি অয়।

²⁶ যে নিজো জ্ঞান উগুরে নির্ভর গরে তে বিবেচনা নেইয়্যে, মাত্তর্ যে গোজেনর দিয়্যে বুদ্ধির পধেদি চলে তে গমেডালে থায়।

²⁷ যে মানুচ্চো নাঢা মান্‌‌জ্যরে দান গরে তার অভাব ন-অয়, মাত্তর্ যে তারারে দেগিনেয়ো ন-দেগেত্তে দগ্ থায় তে বোউত অভিশাব্ কুড়োয়।

²⁸ পাজি মানুচ্চুনো আঢত্ খেমতা গেলে মানুচ্চুনে লুগোন্, মাত্তর্ সেই পাজিগুনে ভস্ত অলে গোজেন ভক্ত মানুচ্চুন্ বাড়িবাক্।