গম্ উপদেজ্ 27 - Chakma Bible

¹ এজেত্তে কেল্যে পৌইদ্যেনে বাড়্‌বো ন-গোজ্য, কিত্তে কন্ দিন কি অবঅ সিয়েন তুই হবর্ ন-পাজ্।

² অন্য জনে তরে নাঙ্ গিনোক্, তঅ নিজো মুয়োনে ন-গোরোক্; অয়, অন্য জনে সিয়েন গোরোক্।

³ পাত্তরুন্ গুয়োর্ আর কোরোলীগানিয়ো গুয়োর্, মাত্তর্ বাজে মান্‌‌জ্যরে রাগ্ তুলি দিলে তে সেই দ্বিয়েনত্তুন্অ গুয়োর্ অবঅ।

⁴ রাগ্ জিনিস্‌‌চান চিৎনপুজ্যে আর দাঙর্ বান পানি ধোক্ক্যেন্, মাত্তর্ ইংসে-নিন্দে মুজুঙোত্ কনজনে থিয়্যেই থেই ন-পারে।

⁵ কনজনে যুনি তরে কোচ্‌‌পান অদচ সিয়েন ফগদাং ন-গরে, তাত্তুন্ বরং কনজনে যুনি তরে গমেডালে দুজ্‌‌ছান দেগেই দুয়োন সিয়েন গম্।

⁶ শত্রুয়ে বোউত্ চুমি পারন, মাত্তর্ সমাজ্যের্ দিয়্যে আঘাদত্ বিশ্বেজ্ আঘে।

⁷ যিবে পেট্‌‌তো ভরা মধুয়ো গম্ ন-পায়, মাত্তর্ যিবের পেট্ পুরে তাইদু তিদেগান্‌অ মিদে লাঘে।

⁸ পেগো বাহ্ ইরি দিয়্যে ঘুরি বেড়েয়্যে পেক্কো যেধোক্ক্যেন্, ঘর্ ইরি দিয়্যে ঘুরি বেড়েয়্যে মানুচ্চোয়ো সেধোক্ক্যেন্।

⁹ তুম্বাজ্ তেল আর আগর্‌বাট্টি্‌‌বো মনানরে হুজি রাগায়; ঠিগ্ সেধোক্ক্যেন সমাজ্যের্ দিয়্যে উবদেজ্ সমাজ্যে ইদু মিদে লাগে।

¹⁰ নিজোর বা বাবঅ সমাজ্যেবোরে ছাড়ি ন-দুয়ো; দজাত্ পড়িলে ভেইয়ো ঘরত্ ন-যেয়ো; দূরোত্ থেইয়্যে ভেইয়োত্তুন্ কায়-কুরে পাড়াল্যেগুন্ গম্।

¹¹ মঅ পুয়োবো, তুই জ্ঞানবলা অ আর মঅ মনানরে হুজি গর্; সেক্কে যিগুনে মরে ঈচ্ গরন্ তারারে মুই জোব্ দি পারিম্।

¹² উজিয়ার মান্‌‌জ্যে দজা দেগিনে আশ্রয় নেযান্, মাত্তর্ ভুল্ মান্‌‌জ্যে দজা দেগিনে যাহ্ ধরন্ আর সিয়েনত্তে সাজা পান্।

¹³ যে মান্‌‌জ্যে বিদেশী মান্‌‌জ্যর জামিন অয় তা পজাক্কানি নেযা; যে মান্‌‌জ্যে অন্য কনঅ দেজ মান্‌‌জ্যর জামিন অয় তারে বন্ধগী জিনিস ইজেবে রাগা।

¹⁴ যে মানুচ্চো বেন্যেপোত্যে উদিনে রঅ ছাড়িনে তা পাড়াল্যেগুনোরে বর্ দে সিয়েন অভিশাব্ বিলিনে ধুরি নেযা পুরিবো।

¹⁵ কোল্-কোজ্যে গুরিয়্যে মোগ্ আর ঝড় দিনোত্ টপ্ টপ্ গুরি পানি পড়ানা- দুনোগান্ এক্কুই।

¹⁶ বোইয়্যেরানরে যেধোক্ক্যেন্ লুগেই ন-পারে, আর ডেন্ আঢ্‌‌তোই লাগেয়্যে তুম্বাজ্ তেল বাজ্‌ছান্ যেধোক্ক্যেন লুগেই ন-পারে, সেধোক্ক্যেন্ কোল্ বাজেয়্যে মিলেরেয়ো লুগেই ন-পারে।

¹⁷ লুয়োরে যেধোক্ক্যেন্ লুয়োই ধারায়, সেধোক্ক্যেন্ এক্কো আর এক্কোর জিংকানিগানরে কামর্ যগাজ্যে গুরি দে।

¹⁸ যে মানুচ্চো ডোমোর গাজরে যত্তন্ গরে তে তার ফলুন্ হেবঅ; যে তা গিরোজ্‌‌সোরে সেবা গরে তে সর্মান পেবঅ।

¹⁹ পানিত্ যেধোক্ক্যেন্ মুয়ো চেঙারাগান দেগা যায়, সেধোক্ক্যেন্ অন্য একজনর খাচ্চ্যত্ চেইনে নিজোর খাচ্চ্যত্তান্ বুঝো যায়।

²⁰ গোর জাগা আর নরগর্ যেধোক্ক্যেন কনদিন্অ ঈল্ ন-অয়, সেধোক্ক্যেন্ মান্‌‌জ্য চোগোর্‌‌অ ঈল্ ন-অয়।

²¹ রূবো পোরোক্ক্যে চেবাত্তে গোলেবার পিলে আঘে, আর সনাত্তে চুলো আঘে, মাত্তর্ মান্‌জ্যে যে বাঈনীগান্ পায় সিয়েন্দোই তারে পোরোক্ক্যে গরা অয়।

²² বাজে-বিবেক্ মান্‌‌‌‌জ্যরে যুনিয়ো শোজ্যলোই হামানদিস্তালোই গুড়ি গরা অয়, তো তার ভুলানে তারে ছাড়ি ন-যেবঅ।

²³ তঅ ছাগল-ভেড়াগুনোর অবস্থা তুই গমেডালে হবর্ রাগা, আর তর য়েমান পালুনো ইন্দি মনান্ দিচ্;

²⁴ কিত্তে ধনান্ জিংকানিবর্ নয়, আর মুকুট্‌তো বংশর পর বংশ টিগি ন-থায়।

²⁵ খেদত্তুন্ যেক্কে খেড়ানি কাবি ফেলা অবঅ আর নূয়ো ঘাস উদিবো আর মুড়োত্তুন্ ঘাস কাবিনে আনা অবঅ,

²⁶ সেক্কে ভেড়া ছঅগুনে তঅ কাবড়ানি যুক্কুলেবাক্, আর ছাগলুনে নুয়ো ভুইয়োর্ দাম্ দিবাক্;

²⁷ ইয়েনি বাদেয়ো তর আর তঅ গিরিত্তে তুই যগাজ্যে দুধ পেবে; তর্ গাবুজ্যে চাগরানীগুনেয়ো সিয়েনি হেইনে পক্তামক্তা অবাক্।