গম্ উপদেজ্ 23 - Chakma Bible

¹ তুই যেক্কে শাজন্‌গুরিয়্যেবো লগে হেবাত্তে বুজিবে, সেক্কে তঅ মুজুঙোত্ কি আঘে সিয়েন গমেডালে খিয়েল্ গুরিবে।

² যুনি তুই পেটুক্ অচ্ সালে উজিয়ার্! তুই নিজোরে দোঙেই রাগেইনে হেচ্।

³ তার্ মংগা মংগা হানাগানিত্ লুভ্ ন-গুরিচ্, কিত্তে সে হানাগানি দেনার্ পিজেদি আগেদে শাজন্ গুরিয়্যেবোর্ কনঅ উদ্দেশ্য।

(৭)

⁴ ধন পেবাত্তে হিজে-হিচ্যে ন-ওইয়ো; এ পৌইদ্যেনে তঅ বুদ্ধিগান উগুরে বিশ্বেজ্ ন-গুরিচ্।

⁵ ধন-সোম্বোত্তি ইন্দি একবার রিনি চেলে দেগিবে সিয়েনি আর্ নেই, কিয়া সিয়েনিত্ পুয়োর্ গেজেব আর ঈগল ধোক্ক্যেন আগাজত্ উড়ি যেবঅ।

(৮)

⁶ লুভি মান্‌জ্যর হানা ন-হেয়ো; তার মংগা মংগা হানাগানি হেবাত্তে ন-চেয়ো;

⁷ কিয়া তে এমন্ মানুচ্ যে নিত্য তা হানাগানর দামান কধা ভাবে। তে তরে কয়, “হানা-দানা গর্,” মাত্তর্ তে মনেদি-মুয়োদি এক নয়।

⁸ যিয়েনি তুই হেইয়োচ্ সিয়েনি তুই উগুলি ফেলেবে, আর তর্ বাঈনী গরানাগান মিজে ওই যেবঅ।

(৯)

⁹ বিবেচনা নেইয়্যে মান্‌জ্য ইদু কধা ন-কোইয়ো; তঅ কধাগানত্ যে জ্ঞানান্ আঘে সিয়েন তে ঈচ্ গুরিবো।

(১০)

¹⁰ দুযিগানর পুরোনা চিহ্নো-পাত্তর্ তুই সোরেই ন-দিচ্ বা বাপ্‌-মা নেইয়্যেগুনোর ভূইয়ানি গজক্ ন-গুরিচ্,

¹¹ কিত্তে তারার্ উদ্ধোর্ গুরিয়্যেবো খেমতাবলা; তে তঅ বিরুদ্ধে মগদ্দমাত্ কুদুম্মো ইজেবে তারার তপ্পে নিবো।

(১১)

¹² তুই শিক্ষ্যেন্দি মনান্ দে, আর জ্ঞানর কধানি শুন্।

(১২)

¹³ ঝি-পুয়োগুনোরে শাজন্ গুরিবাত্তে এলাফেলা ন-গোজ্য; তারে লুদিক্কোই মারিলে তে ন-মুরিবো।

¹⁴ তারে হামাক্কায় তুই লুদিক্কোই মারিনে সাজা দিবে, সেক্কে গোরত্তুন্ তারে রোক্ষ্যে গুরিবে।

(১৩)

¹⁵ মঅ পুয়োবো, তঅ মনান্ যুনি জ্ঞানে ভর্‌পুনং অয় সালে মঅ মনান্ সুগি অবঅ, অয়, মুই সুগি ওম্।

¹⁶ যেক্কে তঅ মুয়োনে ঠিগ্ কধা কবঅ সেক্কে মঅ মনানে হুজি অবঅ।

(১৪)

¹⁷ তঅ রিবেঙো পাপীগুনোরে ইংসে ন-গোরোক্, বরং নিত্য লগেপ্রভুরে ভোক্তি গুরি দোরেইনে তুই আঢাউদো গর্।

¹⁸ সালে তর্ ভবিচ্চদর্ আজা আঘে, আর তঅ আজাগান ভাঙি দিয়্যে ন-অবঅ।

(১৫)

¹⁹ মঅ পুয়োবো, কধাগান শুন, জ্ঞানী অ, তঅ রিবেঙান্ ঠিগ্ পধেদি চালা।

²⁰ যিগুনে বেশ্ গুরিনে আংগুরো-রস হান্ বা যিগুনে বেশ্ পেদুক্ আর বেশ্ য়েরা হান্, তুই তারা সমারে ন-মিজেস্;

²¹ কিত্তে মাত্তল্ আর পেদুক্কুনে নাঢা ওই যান্, আর ঘুম ঘুম ভাব্ মান্‌জ্যরে ফাদা কাবড় উরোই।

(১৬)

²² তঅ বাবঅ কধা শুন্ যিবে তরে জর্ম দিয়্যে; তর্ মাবো বুড়ো ওই গেলে তারে ঈচ্ ন-গুরিচ্।

²³ যে কনঅ মূল্যে ওক্ সত্য, জ্ঞান, শিক্ষ্যে আর বিচেরবুদ্ধি পাহ্; কনঅ কিজুর্ বদলে সিয়েনি অন্যরে ন-দুয়ো।

²⁴ গোজেন ভক্তবোর্ বাব্‌পো বোউত্ হুজি অয়; জ্ঞানীবলা পুয়োবোর বাব্‌পো তা পুয়োবোলোই সুগি অয়।

²⁵ তঅ মা-বাবে যেন সুগি অয়; যিবে তরে পুদেয়্যে তে যেন হুজি অয়।

(১৭)

²⁶ মঅ পুয়োবো, মঅ শিক্ষ্যেগান মনযোগ দে; মঅ জিংকানিগান দেগিনে যেন তুই হুজি অচ্।

²⁷ চাহ্, বেশ্যের গভিন গাদ ধোক্ক্যেন্, আর ভান্ন্যেই পধেদি যেইয়্যে মিলেবো যেন লাম্বা গাদ ধোক্ক্যেন্।

²⁸ সেবাবোত্যে মিলে ডাগেদ ধোক্ক্যেন্ উৎ পাদি থান্, আর মান্‌জ্য ভিদিরে অবিশ্বেজি বাড়েই দুয়োন্।

(১৮)

²⁹ কন্না হায় হায় গরে? কন্না আবিলেচ্ গরে? কন্না কোল্-কোজ্যে গরে? কন্না বেশ্ কধা কয়? কন্না এনেবাদে আঘাত্ পায়? কা চোগ্‌কুন রাঙা অন্?

³⁰ যিগুনে ভালক্কন্ সং মদ্ হান তারার এবাবোত্যে অয়; তারা মিজেয়্যে মদ্ হেবাত্তে সিয়েন তোগেবাত্তে যান্।

³¹ মদ কিত্তেদি ন-চেয়ো যুনিয়ো সিয়েন রঙর্, যুনিয়ো সিয়েন গলজত্ জোগ্‌জোক্যে, যুনিয়ো সিয়েন সহজে গত্তনাত্ পড়েগোই;

³² যেরেদি সিয়েনে সাপ ধোক্ক্যেন্ কামাড়াই, আর বিষ্‌বলা সাপ ধোক্ক্যেন কামাড়াই।

³³ তঅ চোগ্‌‌কুনে সেক্কে আমক্ অবার কান্ড দেগিবাক্ আর মনানে উগুদো যাবুদো কধা ভাবিবো।

³⁴ তুই অবে বড়্ গাঙত্ ঘুম যেইয়্যে মান্‌জ্য ধোক্ক্যেন্, বা মাস্তুল উগুরে পুরি থেইয়্যে মান্‌জ্য ধোক্ক্যেন্।

³⁵ তুই কবে, “তারা মরে আঘাত্ গোজ্যন্ মাত্তর্ মুই পিড়ে ন-পাং, মরে তারা মাজ্যন্ মাত্তর্ মুই তার্ ন-পাং। কক্কনে মুই জাগি উদিনে আরঅ মদ্ তোগেবাত্তে যেম্?”