গম্ উপদেজ্ 21 - Chakma Bible1 লগেপ্রভু আঢত্ রাজার মনান্ পানি গঙার ধোক্ক্যেন্; লগেপ্রভু যিয়েনত্ চায় সিয়েনত্ তারে চালায়। 2 মান্জ্যর বেক্ পথ্তানি তা ইদু গম্ বিলিনে মনে অয়, মাত্তর্ লগেপ্রভু তা মনান্ মাবি চায়। 3 লগেপ্রভু ইদু য়েমান-উৎসর্ব গরানাত্তুন্ ঠিগ্ আর গম্ কাম গরানা আরঅ দোল্। 4 পাজিগুনোর চোগো ইজিরে বাড়্বো আর মনানি অহংকারে ভরা; তারার জিংকানি-চেরাগ্কো পাপে ভরা। 5 কামগুরিয়্যেবোর পরিকল্পনার ফলে ঘেচ্চেকগুরি বোউত্ ধন অয়, মাত্তর্ যে মানুচ্চো পরিকল্পনা ন-গরে যাদিমাদি গুরি কাম গুরিবাত্তে যায় তার কামাক্কায় অভাব অয়। 6 মিজে কোইয়্যে মুয়োন্দি যিগুনে ধন পান তারা মরণরে তগান্; তারাত্তে সেই ধন পানাগান যেন মরণর আঘে এক্কেনা সুগোর্ নিজেস্। 7 পাজিগুনোর অমকদ অত্যেচার তারারে ভস্ত ইন্দি টানি নেযায়, কিত্তে তারা গমেডালে চলিবাত্তে অস্বিগের্ গরন্। 8 দুষি মান্জ্যর জিংকানির-পথ্তান বেঙা-কঙা, মাত্তর্ খাটি মান্জ্যে গমেডালে কাম গরন্। 9 কোল্ বাজেয়্যে মোগো লগে বজত্তি গরানাত্তুন্ বরং ছাদ উগুরে এক কনাত্ গায় গায় বজত্তি গরানা গম্। 10 পাজি মান্জ্যে ক্ষতি গুরিবাত্তে চায়; তা পাড়াল্যেবো তাত্তুন্ কনঅ দোয়্যে ন-পায়। 11 ঠাট্টা-মশ্কারি গুরিয়্যেবোরে সাজা দিলে ভুল্ মানুচ্চো জ্ঞান পায়; জ্ঞানীবোরে উপদেজ্ দিলে তে বুদ্ধি পায়। 12 ন্যায়বলা গোজেনে পাজি পরিবার মানুচ্চুনোরে চোগে চোগে রাগায় আরে তে পাজিগুনোরে ভস্ত গরে। 13 যে মানুচ্চো নাঢা মানুচ্চুনোর কানানিলোই কানান্ ঢিবে দি রাগায়, তে যেক্কে নিজে কানিবো সেক্কেনে কনজনে সিয়েনি ন-শুনিবা। 14 গুমুরোত্ দিয়্যে দানুন্ রাগ্কানে থামেই দে, আর লুগেই রাগেয়্যে ঘুষ্ নিগিলেই দিলে দর্গরেপারা রাগ্কান থামাই। 15 ন্যায়বিচের্ গোজেন ভক্তগুনো ইদু হুজি, মাত্তর্ অন্যেয়গুরিয়্যেগুনো ইদু সিয়েনি দজা। 16 যে মানুচ্চো বুদ্ধিবলা পথ্তান ছাড়িনে অন্য কিত্তেদি যায় তে মরাগুনো লগে থেবঅ। 17 যে মানুচ্চো আমোদ-প্রমোদ গম্ পায় তে নাঢা অবঅ; যে মানুচ্চো আংগুর-রস আর তুম্বাজ্ তেল্ গমপায় তে কনদিন্অ তাগোয়্যে ওই ন-পারিবো। 18 যেরেদি নিদ্দুযি মানুচ্চুনোর বদলে পাজিগুনে আর গম মানুচ্চুনোর বদলে অবিশ্বেজিগুনে দুঘ্ পেবাক্। 19 কোল্ বাজেয়্যে আর বজং স্বভাবর মোগো লগে বজত্তি গরানাত্তুন্ ধূল্যেচরত্ যেইনে বজত্তি গরানা গম্। 20 বুদ্ধিমান ঘরত্ মূল্যবান ধন আর তুম্বাজ্ তেল্ জমা থায়, মাত্তর্ সিয়েন যুনি বিবেচনা নেইয়্যে মান্জ্য ঘরত্ থায় সালে তে বেক্কানি শেজ্ গুরি ফেলায়। 21 যে মানুচ্চো আওজ্ গুরিনে সততা আর বিশ্বেজ্ পধেদি চলে তে জিংকানি, আশীদ্বাদ্ আর সর্মান পায়। 22 জ্ঞানী মান্জ্যে খেমতাবলাগুনোর শঅরানি আক্রমন গরে আর যে ঘরান উগুরে তারা নির্ভর গুরিদাক্ সিয়েনে ভস্ত গুরি ফেলায়। 23 যে তার মুয়োন আর জিলান্ উজিয়ারে রাগায় তে দজাত্তুন্ নিজোরে রোক্ষ্যে গরে। 24 বাড়্বো গুরিয়্যে আর অহংকারগুরিয়্যে মান্জ্যর নাঙান অলঅ “ঠাট্টা-মশ্কারিগুরিয়্যে”; তে অমকদ বাড়্বো গুরিনে কাম গরে। 25 আল্সি মান্জ্যর কামনাগানে তা মরণান্ ঘদায়, কিত্তে তা আঢ্তানে কাম গুরিবাত্তে অস্বিগের্ গরে। 26 এন্ মানুচ্ আগন যিগুনে নিত্য লুভ্ গরন, মাত্তর্ গোজেন ভক্ত মান্জ্যে গমেডালে দান গরন্। 27 পাজিগুনোর উৎসর্বয়ানি লগেপ্রভু ঘিনেই, আর সিয়েনি যুনি ভান্ন্যেই আজাই আনা অয় সালে সিয়েনি আরঅ ঘিন্ গরেপারা অয়। 28 মিজে সাক্ষিবো ভস্ত ওই যেবঅ, মাত্তর্ যে মানুচ্চো মনযোগ দিইনে শুনে তা কধাগান উমরত্তে থিদেবর্। 29 পাজি মান্জ্যর মুয়োদি কনঅ লাজাইদে ধোক্ক্যেন ন-লাগে, মাত্তর্ গম্ মান্জ্যে তা জিংকানি-পধেদি চলানা পৌইদ্যেনে বিশ্বেজ্ থায়। 30 কনঅ জ্ঞান, কনঅ বুদ্ধি বা কনঅ পরিকল্পনা লগেপ্রভুর বিরুদ্ধে যেই ন-পারে। 31 যুদ্ধোর্ দিনুনোত্তে ঘোড়াগুন যুক্কোল্ রাগা অয়, মাত্তর্ জিদেনা লগেপ্রভু উগুরে নির্ভর গরে। |
Copyright © 2021 Bangladesh Bible Society
Bangladesh Bible Society