গম্ উপদেজ্ 2 - Chakma Bible

গম্ বুদ্ধি দেনা

¹ মঅ পুয়োবো, তুই যুনি মঅ কধাগান শুনোচ্ আর তঅ মনান ভিদিরে মর্ বেক উগুমানি থুবেই রাগাচ্,

² যুনি গম বুদ্ধিগানি শুনোচ্ আর বিচের বুদ্ধিগানি ইন্দি মনান্ দুয়োচ্,

³ যুনি মগজ্‌ছান এক্কা লাড়াচ্ আর রঅ ছাড়ি ছাড়ি বিচের বুদ্ধিগানরে ডাগচ্,

⁴ যুনি রূবো তগাইদ্যে ধোক্ক্যেন্ গুরি গম বুদ্ধিগানরে তগাচ্ আর লুগেয়্যে ধন ধোক্ক্যেন গুরি সিয়েন তোগেই চাহ্,

⁵ সালে লগেপ্রভু উগুরে ভোক্তিবলা দরানাগান্ কি, সিয়েন তুই বুঝি পারিবে আর গোজেন পৌইদ্যেনে জ্ঞান পেবে;

⁶ কিত্তে লগেপ্রভু গম বুদ্ধি দান গরে, তা মুয়োত্তুন্ জ্ঞান আর বিচের বুদ্ধি নিগিলি এজে।

⁷ গম্ মনর্ মানুচ্চুনোত্তে তে তরিত্ বুদ্ধি থুবেই রাগায়; যিগুনে গমেডালে চলন্ তে তারার ঢাল অয়,

⁸ যেন তে দোল্ বিচের গুরি পারে, আর তা ভক্তগুনোর্ পথ্‌তানি রোক্ষ্যে গুরি পারে।

⁹ যুনি তুই মঅ কধাগান শুনোচ্, সালে বুঝি পারিবে কুবোন্ যগাজ্যে, দোল্ আর গম আর বুঝি পারিবে ভালেদির্ বেক পধ্‌তানি;

¹⁰ কিত্তে গম বুদ্ধিগানি তঅ মনত্ চোমেব, আর জ্ঞানানে তঅ পরাণান্ হুজি রাগেব।

¹¹ তর্ গম-ভান্ন্যেই বুঝিবার খেমতাগানে তরে রোক্ষ্যে গুরিবো, আর বিচের বুদ্ধিগানে তরে চুগি দিবো।

¹² সেক্কে পাজি মানুচ্চুনোত্তুন্ জ্ঞানানে তরে রোক্ষ্যে গুরিবো; রোক্ষ্যে গুরিবো তারাত্তুন্- যিগুনে মিজে কধা কন্,

¹³ যিগুনে আন্ধার পধেদি আঢিবাত্তে উজু পথ্‌তান্ বাদ দুয়োন,

¹⁴ যিগুনে ভান্ন্যেই কামত্ হুজি অন, ভান্ন্যেই কু কামত্ যিগুনোর রঙ্গ-ফুত্তি,

¹⁵ আর যিগুনে বেঙা আহ্ বজং পধেদি চলন্।

¹⁶ জ্ঞানানে তরে রোক্ষ্যে গুরিবো বেশ্যে মিলেগুনোর আঢত্তুন্, মিদে কধালোই ভরা বজং পধেদি যেইয়্যে মিলেগুনো আঢত্তুন্।

¹⁷ তে তার গাবুরো অক্তত্ নেক্কোরে ছাড়ি দিয়্যে আর তার গোজেনর থিদেবর্ গোজ্যে সুদোমানি অমান্য গোজ্যে।

¹⁸ তুই তা ঘরত্ সোমেলে মরণ পধেদি উজেই যেবে, তা লগে মিজেলে মরাগুনো ইদু লুমিবে।

¹⁹ যিগুনে তাইদু যান্ তারা কনজনে আর্ ফিরি ন-এজন, তারা বাঁজিবার পথ্‌তান্ ন-পান।

²⁰ জ্ঞানানে তরে সিয়েনিত্তুন্ রোক্ষ্যে গুরিবো যেনে তুই গম্ মানুচ্চুনোর পধেদি, গোজেন ভক্তগুনোর্ পধেদি যেই পারচ্।

²¹ গম্ মানুচ্চুনে দেজত্ বজত্তি গুরি পারিবাক্, নিদ্দুযি মানুচ্চুনে সিগুনো ভিদিরে টিগি থেবাক্;

²² মাত্তর্ দেজত্তুন্ পাজি মানুচ্চুনোরে কাবি ফেলা অবঅ আর অবিশ্বেজিগুনোর শিঙোরানি উগুড়ে ফেলা অবঅ।