গম্ উপদেজ্ 17 - Chakma Bible1 কোল্-কোজ্যেলোই ভরা মেট্বান ঘরত্তুন্ সুগে-শান্দিয়্যে এক কট্টা শুগুনো রুটিয়ো গম্। 2 পরিবারত্ অসর্মান আনেদে পুয়োবো উগুরে বুদ্ধিবলা চাগর্বো সদ্দার্ অয়, আর ভেইয়ুনো সমারে তেয়ো সোম্বোত্তির্ ভাগ্ পায়। 3 রূবো পোরোক্ষ্যে গুরিবাত্তে গোলেবার পিলে আঘে আর সনাত্তে আগেদে চুলো, মাত্তর্ লগেপ্রভু মনান্ পোরোক্ষে গরে। 4 পাজি মান্জ্যে ভান্ন্যেই কধা শুনে; মিজে কধা কোইয়্যে সর্বনাশ কধা শুনে। 5 যে মানুচ্চো নাঢা মান্জ্যরে ঠাট্টা গরে তে তারার গোজেনরে অগমান গরে; যে অন্যগুনোর দযাত্ হুজি অয় তে সাজা পেবদে পেবঅ। 6 নাদিন-পুদিনুন্ বুড়োগুনোর ভবিচ্চদ, আর বাব্পো তা পুয়ো-ঝিগুনোরে বাড়্বো গুরিবার কধা। 7 চিগোন মন মানুচ্চুনোর দাঙর্ দাঙর্ কধা কনা ন-মানায়, আরঅ দাঙর্ মান্জ্যর মিজে কধা কনায়ো ন-মানায়। 8 যে মানুচ্চো ঘুষ্ দে তাইদু সিয়েন ভাগ্যত্তে পাত্তর ধোক্ক্যেন্; তে যিন্দি ফিরে সিন্দি ফলে। 9 যে মানুচ্চো অন্যেয়ানি ঢাগি দে তে কোচ্পানাগান বাড়েই দে, মাত্তর্ যে মানুচ্চো কোই কোই বেড়াই তে দাংগুত্ব ভাঙি ফেলায়। 10 জ্ঞাননেইয়্যে মান্জ্য ইদু চাবুগোর্ একশত্তান্ ঘা যেত্তমান্ ন-লাগে, একপল্লা গেইল্ হেলে বুদ্ধিমানর তাত্তুন্ বেশ্ লাগে। 11 উল্লোমি মান্জ্যে বানা ভান্ন্যেয়ন্দি মনান্; তা বিরুদ্ধে এক্কো চিৎনপুজ্যে দূতোরে পাধেই দিয়্যে অবঅ। 12 যে কান্ড-জ্ঞান নেইয়্যে মানুচ্ ভুল্ কামত্ পড়ি আঘে তা সমারে দেগা অনাত্তুন্ ছঅ চুর্ ওইয়্যে ভালুগো সমারে দেগা অনা সিত্তুনো গম্। 13 যে মানুচ্চো উপকারর বদলে অপকার গরে, অপকারানে কনদিন্অ তা ঘরান ন-ছাড়িবো। 14 কোল্-কোজ্যে বাজানা গদা ভাঙি যেইয়্যে পানি ধোক্ক্যেন্, সেনত্তে তর্কাতর্কি গুরিবার আগেদি সিয়েন বাদ দুয়ো। 15 যিগুনে দুষি মান্জ্যরে নিদ্দুষি বিলিনে ধরন আর যিগুনে নিদ্দুষিরে দুষি বানান্, তারারে দ্বিয়জনরে লগেপ্রভু ঘিনেই। 16 জ্ঞান পেবাত্তে বিবেচনা নেইয়্যে ভুল্ মান্জ্য আঢত্ টেঙা থেলে কি লাভ? তার দঅ বুদ্ধি নেই। 17 দাংগুবো নিত্য কোচ্পায়, আর ভেইবো থাইদে দুঘোত্ বল্ দিবাত্তে। 18 যে মানুচ্চোর বিচেরবুদ্ধির অভাব আঘে তে হেনসিভ্ লাগেইনে চুক্তি গরে আর সমাজ্যেবোর্ জামিন অয়। 19 যে মানুচ্চো উল্লোমি মনভাব্পোই থেবাত্তে গমপায় তে কোল্-কোজ্যে গুরিবাত্তে গম্ পায়; যে মানুচ্চো বাড়্বো গরে তে দজাগান ডাগি আনে। 20 যে মানুচ্চোর মনান্ কুজুরো তার ভালেদি ন-অয়; যে মানুচ্চো ছলনার কধা কয় তে দজাত্ পড়ে। 21 জ্ঞান বুদ্ধি নেইয়্যে পুয়ো মা-বাবর দুঘ্ আনে; ভোক্তি নেইয়্যে পুয়োবো বাবর্ হুজি বলতে কিচ্চু নেই। 22 আজি-হুজি মনানে কিয়্যেগানরে গম্ রাগায়, মাত্তর্ ভাঙা মনানি কিয়্যেগানরে বর্বাত্ লাগায়। 23 বিচের রায়ান ঘুরেই দিবাত্তে পাজি মান্জ্যে লুগেই রাগেয়্যে ঘুষ্ লয়। 24 যিবের বিচেরবুদ্ধি আঘে তে জ্ঞানন্দি মনান্ দে, মাত্তর্ বিবেচনা নেইয়্যে মান্জ্যর মনান্ দুনিয়ের বেক্কানিন্দি ঘুরি বেড়ায়। 25 বিবেচনানেইয়্যে পুয়ো বাবর্ কাঙেলেত্যে অয়, আর যিবে তারে পেদত্ রাগেয়্যে তা মনান্ তে তিদে গুরি দে। 26 নিদ্দুযি মান্জ্যরে জড়িমানা গরানা বা দাঙর্ পোজিশন মান্জ্যর গম্ কামত্তে পিদেনা ঠিগ্ নয়। 27 বুদ্ধিবলা মান্জ্যে নিজোরে দোঙেই রাগেইনে কধা কয়; যে মানুচ্চোর বিচেরবুদ্ধি আঘে তা মাঢাবো ঠান্ডা। 28 জুরো গুরি থেলে ভুল্-বেদমা মানুচ্চোরেয়ো জ্ঞানি মনে অয়, আর মুয়োন বানি রাগেলে মনে অয় তার বিচেরবুদ্ধি আঘে। |
Copyright © 2021 Bangladesh Bible Society
Bangladesh Bible Society