গম্ উপদেজ্ 1 - Chakma Bible

উদ্দেশ্য আর আজল্ কধাগান

¹ দায়ূদোর পুয়ো ইস্রায়েলর রাজা শলোমনর্ গম্ উপদেজ্।

² ইয়েনি লেগা ওইয়্যেদে যেন মানুচ্চুনে গম্ বুদ্ধি আর শিক্ষ্যে পান, যেন তারার বিচের্ বুদ্ধি বাড়ে,

³ যেন মানুচ্চুনে অন্যগুনো সমারে বিবেচনা গুরিনে চলন্, যেন বেক্কুনো লগে তারা গমেডালে, দোল্ আর গম্ বেবহার গরন,

⁴ যেন ভুল্ মানুচ্চুনে চালাগ্ অন আর গাবুজ্যেগুনে জ্ঞান আর বিচেরবুদ্ধি পান,

⁵ -জ্ঞানীগুনে এ উপদেজ্‌ছানি শুনোদোক্ আর শিক্ষ্যে পাদোক্, আর বুদ্ধিবলাগুনে শুনিনে পধেদি যাদে কাবিল্ ওদোক্-

⁶ যেন মানুচ্চুনে চলেত্যে কধানি সিয়েনি আর ভেদ্‌বলা কধানি আর জ্ঞানীগুনোর কধানি আর ভানাগানি বুঝোন্।

⁷ লগেপ্রভুরে ভোক্তি গুরিনে দরানা অলঅ জ্ঞানর গড়াগান্, মাত্তর্ যিগুনোর চিদে চজ্জা বাজে ধরনর তারা গম বুদ্ধি আর শিক্ষ্যেনি ঈচ্ গরন।

গাবুজ্যেগুনো ইদু উপদেজ্

⁸ পুয়োবো মর্, তুই তঅ বাব্‌‌পো উপদেজ শুনিচ্; তর্ মা দিয়্যে শিক্ষ্যেনি ভুলি ন-যেচ্।

⁹ সিয়েনি অবঅ তঅ মাঢাবোত্ বেড়েবার দোল্ মালাছড়া আর গত্তনার নেগেলেচ্ ধোক্ক্যেন।

¹⁰ পুয়োবো মর্, পাপিগুনে যুনি তরে ভান্ন্যেই পধেদি নিবাত্তে চান তুই রাজি ন-ওচ্।

¹¹ ধোজ্য, কনজনে কলঅ, “আমা লগে এজঅ, খুন গুরিবাত্তে যেই আমি হাপ্ দি থেই, কনঅ নিদ্দুযি মান্‌জ্যরে ধুরিবাত্তে পোল্ল্যেই থেই।

¹² তারা যেবাবোত্যেগুরি পুরো কিয়্যেগান্দোই জেদাবাদে মরণ জাগাত, অত্তাৎ সে গাত্তোত্ লামন্দোই, সেবাবোত্যেগুরি এজঅ, আমি তারারে জেদাবাদে পুরো গিলি ফেলেই;

¹³ সেক্কে আমি নানান্ বাবোত্যে মংগা মংগা জিনিস পেবং, আর লুদেয়্যে জিনিসছোই আমা ঘরানি ভোরেবং।

¹⁴ আমা লগে তঅ ভাগ্যগান্ তুই গুরি লঅ, আমা টেঙা থৈল্যে এক্কো অবঅ।”

¹⁵ মঅ পুয়োবো, তুই তারা লগে ন-যেচ্, তারা পধেদি তঅ টেঙান্ ন-ফেলেচ্;

¹⁶ কিত্তে তারা টেঙানি পাপ কামত্ যায়, খুন গুরিবাত্তে তারা ধাবা যান্।

¹⁷ মান্‌জ্যে কন, “পেখ্‌কুনো চোগো মুজুঙোত্ জাল পাদিলে কনঅ লাভ্ ন-অয়।”

¹⁸ এ মানুচ্চুনে নিজে খুন্ অবাত্তে হাপ্ দি থান, নিজে শেজ্ অবাত্তে পৌল্যেই থান্।

¹⁹ ভান্ন্যেই পধেদি কনঅ কিজু পেবাত্তে যিগুনে যান তারার বেক্কুনোর দজা এবাবোত্যে অয়; তারা যিয়েনি পান সিয়েনিলোই তারা জিংকানিগানি শেজ্ গুরি দুয়োন।

দোল্ বুদ্ধির ডাগনি

²⁰ দোল্ বুদ্ধি পধে পধে রঅ ছাড়িনে ডাগে, বাজারত্ রঅ ছাড়ে।

²¹ কোল-কোজ্যেলোই ভরা পধ মুয়োত্ তে রঅ ছাড়ে, শঅর গেদোত্ সুমিবার পদথ্ তে এ কধাগান কয়,

²² ভুল্ মানুচ্চুন, আর কয়দিন তুমি তমার ভুলো কামানি গম্‌পেবা? যিগুনে ঈচ্ গরন তারা আর কয়দিন তারা ইদু রঙ্গ-ফুত্তি পেবাক্? যিগুনোর চিদে চজ্জা নেই তারা আর কয়দিন জ্ঞানানরে ঘিনেবাক্?

²³ মর্ শাজন কধালোই যুনি তুমি শুনিদা, সালে মঅ আত্মাগান মুই তমা উগুরে ঢালি দিদুং, মঅ মনঅ কধানি তমারে জানেদুং।

²⁴ মুই যেক্কেনে ডাগিলুং সেক্কেনে তুমি মরে এলাফেলা গুরিলে, আত্ বাবেলেয়ো কনজনে সেক্কে মরে শমক্ ন-দিলে।

²⁵ তুমি যেক্কে মর্ বেক উপদেজ্‌ছানি এলাফেলা গুরিলে, দুষ্ দেগেই দিলেয়ো সিয়েনি শুনিবাত্তে ন-চেলা,

²⁶ সেক্কে তমা ভস্ত অনা দেগিনে মুই আজিম্, তমা উগুরে দজা এলে তামাজা গুরিম।

²⁷ দজা ঝড় ধোক্ক্যেন্ তমা উগুরে লামি এলে, দজাগানে ঠুত্যে বোইয়্যের ধোক্ক্যেন তমারে ঘুরি ঘুরি নেযেলে, দুঘোত্-দজাত্ তুমি পুরিলে, মুই তামাজা গুরিম্।

²⁸ “ভুল্ মানুচ্চুনে সেক্কে মরে ডাগিবাক্ মাত্তর্ মুই শমক্ ন-দিম; তারা মরে তোগেবাক্ মাত্তর্ মরে তোগেইনে ন-পেবাক্।

²⁹ তারা জ্ঞানানরে ঈচ্ গোজ্যন্ আর লগেপ্রভুরে ভোক্তিগুরিনে ন-দরান্।

³⁰ সেনত্তে মঅ উপদেজ্‌ছান তারা ন-শুনোন্, আর ঠিগ গুরিবাত্তে মুই যিয়েনি কোইয়োং সিয়েনি ঈচ্ গোজ্যন্;

³¹ সেনত্তে তারার নিজোর কামর ফল পেবাক্, নিজো সল্লা গোজ্যে ফল্লোই পেট ভরা পুরিবো।

³² ভুল মানুচ্চুনোর ভান্ন্যেই পধেদি যানাগান তারার মরণর দযা অবঅ, জ্ঞান নেইয়্যেগুনোর চিদেচজ্জা নেইয়্যে মনভাব্‌পানি তারারে ভস্ত গুরিবো;

³³ মাত্তর্ যিগুনে মঅ কধাগান শুনোন্ তারা গমেডালে বজত্তি গুরিবাক্; তারা সুগে-শান্দিয়্যে থেবাক্, অমংগলরে ন-দোরেবাক্।”