ফিলিপীয় 4 - Chakma Bible1 মর্ ভেইয়ুন, তমারে মুই কোচ্পাং আর তমারে রিনি চেবাত্যে চাং। তুমিই মর্ হুজী, মর্ মকুট। তুমি প্রভুর লগে মিজেইনে থির্ থাগঅ। উপদেচ্ 2 উবদিয়া আর সুন্তখী, মুই তমারে বিশেষ গুরিনে এ কোজোলিগান গরঙর্-প্রভুর্ লগে মিজেইয়ো বিলিনে তমা মনানি যেন এক অয়। 3 আর মর্ আজল্ সমাজ্জ্যে, মুই তরেয়ো কোজোলি গরঙর্-তুই এই মিলেগুনোরে সাহায্য গর্। তারা খ্রীষ্টর্ পৌইদ্যেনে গম হবরত্যে মঅ লগে আর ক্লীমেন্ত আর মর্ অন্য সমাজ্জ্যেগুনো সমারে দুঘ্ গোজ্জ্যন্। ইগুনোর্ নাঙানি জিংকানি-বোইবোত্ লেগা আঘে। 4 প্রভু সমারে মিজেয়ো বিলিনে তুমি নিত্য হুজি থাগঅ। মুই আরঅ কং, তুমি হুজী থাগঅ। 5 তমার নরম খাচ্চ্যদ্তানি যেন বেক্কুনে দেগন্। প্রভু যাদিমাদি এজের্। 6 কনঅ বেপার্লোই চিন্তিত ন-ওইয়ো, বরং তমার বেক্ মাগানার্ বেপারানি ভালেদি জানেইনে গোজেনরে জানঅ। 7 সিয়েনর কারনে, গোজেনর্ দিয়্যে যে শান্তির কধা মানুচ্ চিন্তে গুরিনেয়ো বুঝি ন-পারন, খ্রীষ্ট যীশুর্ মাধ্যমে সেই শান্তি তমা রিবেঙানিরে আর মনানিরে রোক্ষ্যে গুরিবো। 8 যেরেদি কং, ভেইলগ্, যিয়েন সত্য, যিয়েন যগাজ্জ্যে, যিয়েন গম্, যিয়েন খাটি, যিয়েন-দোল্, যিয়েন সর্মান পেবার যগাজ্জ্যে, আজল্ কধা যিয়েন গম্ আর নাঙ্ গিনিবার্, সিন্দি তুমি মনানি দুয়ো। 9 তুমি মঅ ইধু যিয়েনি শিগ্কো আর গম্ বিলিনে মানি লোইয়ো আর মইধু যিয়েনি দেক্ক্য আহ্ মঅ মুয়োত্তুন্ যিয়েনি শুন্ন্য, সিয়েনিলোই নিজোরে কামত্ রাগঅ। সেক্কে শান্তিদিয়্যে গোজেনে তমা সমারে সমারে থেবঅ। বক্শিজোত্যে ভালেদি জানানা 10 প্রভু মরে ভারী হুজি গোজ্জ্যে, কিয়া ভালোক্ দিন বাদে তুমি আরঅ মত্যে চিন্তে গরর্। খালিক্ মত্যে নিত্য তমার্ চিন্তে এলঅ, মাত্তর্ সিয়েন তুমি দেগেবার্ জু ন-পঅ। 11 মর্ কনঅ অভাবত্যে যে মুই এ কধাগান্ কঙর্ সিয়েন নয়, কিয়া যে কনঅ অবস্থায় মুই হুজী থেবার্ শিক্ক্যং। 12 অভাব ভিদিরে আর ভারী বেচ্ থানার্ ভিদিরে মুই হুজী থেবাত্যে জানং। ভরন পেদে ওক্ কি খাল্যে পেদে ওক্, ভারী বেচ্ থানার্ ভিদিরে ওক্ বা অভাব ভিদিরে ওক্-কন্ অবস্থাত্ কেধোক্ক্যেন গুরি হুজি থা যায় মুই সিয়েন শিক্ক্যং। 13 যে মরে বল্ দান গরে তার্ মাধ্যমে মুই বেক্কানি গুরি পারং। 14 তো তুমি মর্ দুঘোর্ ভাগীদার্ ওইনে গম্ গোজ্জ্য। 15 ফিলিপীয় মন্ডলীর মানুচ্চুন্, তুমি দঅ নিজেই কোই পারঅ, তুমি পত্তম গম্ হবর্ শুনোনার্ পরেদি যেক্কে মুই ম্যাসিডোনিয়া ফেলেইনে যেইয়োং, সেক্কে তুমি বাদে আর কনঅ মন্ডলী মঅ সমারে দেনা-লনা পৌইদ্যেনে ন-মিজেনদি। 16 মুই যেক্কে থিষলনীকীত এলুং সেক্কেয়ো তুমি কয়েকবার সাহায্য পাধেইনে মর্ অভাব্পান পূরেই দুয়ো। 17 কনঅ বক্শিজ্ যে মুই মাগঙর্ সিয়েন নয়, মাত্তর্ মুই এমন্ ফলর্ আজা গরঙর্ যিগুন তমা নাঙে জমা অনাত্ থেবঅ। 18 মর্ বেক পাওনাগুন মুই পেইয়োং। আসলে মর্ যিগুন দরকার সিত্তুন্-অ বেচ্ মত্তুন্ আঘে। ইপাফ্রদীত আঢত্ তমার পাধেয়্যে বক্শিজ্চানি পেইনে ইক্কিনে মর্ যদেষ্ট ওইয়্যে। এই বক্শিজ্চানি তুম্বাজ্বলা আর মানিলোইয়্যে উৎসর্ব, 19 আর ইয়েনত্ গোজেনে হুজি অয়। মঅ গোজেনে তার্ বাঈনী গরেদে ন-ফুরেইয়্যে ধনে খ্রীষ্ট যীশুর্ মাধ্যমে তমার্ বেক অভাব্পানি পূরেই দিবো। 20 যুগ যুগ ধুরিনে উমরত্যে আমা বাবা গোজেনর্ বাঈনী ওক্। আমেন। শেজর্ কধা 21 খ্রীষ্ট যীশুর্ লগে এগত্তর্ গোজেনর্ পত্তি মান্জ্যরে মর্ ভালেদি জানেয়ো। মঅ লগে যে ভেইয়ুনে আঘন সিগুনে তমারে ভালেদি জানাদন্। 22 গোজেনর্ বেক্ মানুচ্চুন যিগুনে ইধু আঘন, বিশেষ গুরিনে সম্রাট কৈসরর্ ঘর মানুচ্চুনে তমারে ভালেদি জানাদন্। 23 প্রভু যীশু খ্রীষ্টর্ দোয়্যেগান্ তমা রিবেঙত্ থোক্। |
Copyright © 2021 Bangladesh Bible Society
Bangladesh Bible Society