ফিলিপীয় 1 - Chakma Bibleফিলিপীয়গুনো ইধু পৌলর্ চিধি 1 তীমথিয় আর মুই পৌল-আমি খ্রীষ্ট যীশুর চাগর্। খ্রীষ্ট যীশু লগে এগত্তর্ ওইয়্যে গোজেনর্ যিদুক্কুন মানুচ্ ফিলিপী শঅরত্ আঘন্ আমি তারা ইধু আর তারার্ পরিচালগ্কুনো ইধু আর সেবা গুরিয়্যেগুনো ইধু লিগির্। 2 আমা বাবা গোজেন আর প্রভু যীশু খ্রীষ্ট তমারে দোয়্যে গোরোক্ আর শান্তি-দান গোরোক্। ফিলিপীয়গুনোত্যে তবনা 3 মুই যেদক্বার তমা কধা ইদোত্ তুলোং সেদক্বার মঅ গোজেনরে ভালেদি জানাং। 4 তমাত্যে তবনার্ সময়োত্ মুই নিত্য হুজী ওইনে তবনা গুরি থাং, 5 কিয়া যীশু খ্রীষ্ট পৌইদ্যেনে গম হবর্ প্রচারর্ কামত্ তুমি পত্তম দিনোত্তুন্ ধুরি ইক্কিনে সং মরে সাহায্য গুরি এজর্। 6 মর্ এ বিশ্বেজ্চান আঘে, তমা অন্তরত্ যিবে গম্ কাম গুরিবাত্যে আরাম্ভ গোজ্জ্যে তে খ্রীষ্ট যীশুর্ এবার্ দিন্নো সং সিয়েন চালেইনে থুম্ গুরিবো। 7 তমা বেক্কুনো পৌইদ্যেনে মর্ মনভাব এবাবোত্যে অনা উচিত, কিয়া তুমি মর্ কোচ্পেইয়্যে। মুই জেলোত্ থেলেয়ো গম হবরর্ পক্ষে থেইনে সিয়েনর্ সত্যগান প্রমাণ গরং, সেক্কে তুমি বেক্কুনে মঅ লগে গোজেনর্ দোয়্যের্ ভাগী। 8 খ্রীষ্ট যীশুর্ কোচ্পানা রিবেঙত্ থোইনে মুই যে তমারে কদক্ কোচ্পাং সিয়েনর গোজেনে সাক্ষী। 9 মুই তবনা গরং তমার কোচ্পানা যেন জ্ঞান আর বিচের-বুদ্ধিলোই এগত্তর্ ওইনে বাড়ানাত্ থায়। 10-11 সালে যিয়েন ঘেচ্চ্যেক গুরিনে বেক্কানিত্তুন্ গম সিয়েন তুমি বুঝিনে বেঈ লোই পারিবা। ইয়েন্দোই তুমি যীশু খ্রীষ্টর্ মাধ্যমে গম্ জিংকানির্ ফলে ভর্পুনোং ওইনে খ্রীষ্টর্ এবার দিন্নো সং খাটি আর থুদো নেইয়্যে থেই পারিবা; আর ইয়েন্দোই গোজেনর্ বাঈনী আর নাঙ্ গিনেনা অবঅ। জিংকানি মানে খ্রীষ্ট 12 ভেইলগ্, মুই চাং যেন তুমি কোই পারঅ যে, মঅ উগুরে যিয়েনি ঘোট্যে সিয়েনির ফলে গম হবরর্ প্রচারর্ কাম আরঅ উজেই যেয়্যে। 13 আর সেক্কে ইধুগোর্ রাজ-ঘরর্ সৈন্যদলুন্ আর অন্য বেক্কুনে হবর্ পেয়োন্দে, খ্রীষ্টত্যে মুই বন্দী অবস্থায় আঘং। 14 ইয়েনবাদে, মর্ এ বন্দী অবস্থায় থানার্ কারনে বেশির্ ভাগ্ ভেইয়ুনে প্রভু উগুরে আরঅ বেশ্ গুরিনে নির্ভর্ গুরিবাত্তে শিক্ক্যন্ আর সেনত্যে তারা ন-দোরেইনে গোজেনর্ কধা প্রচার গত্তে আরঅ সাহচী ওইয়োন। 15 তারাত্তুন্ কেঅ কেঅ খালিক্ ইংসে আর দলাদলির্ মনভাব্পোই খ্রীষ্ট পৌইদ্যেনে প্রচার গরন্; আরঅ অন্যগুনে গম্ উদ্দেচ্চ্যলোই সিয়েন গরন্। 16 এ মানুচ্চুনোর্ মনত্ কোচ্পানা আঘে বিলিনে তারা খ্রীষ্ট পৌইদ্যেনে প্রচার গরন্, কিয়া ইগুনে কোই পারন্দে, গম হবরর্ পক্ষ ওইনে কধা কবাত্যে মুই আঘং। 17 মাত্তর্ ঐ পত্তম দলর্ মানুচ্চুনে নিজোর স্বার্থত্যে খ্রীষ্ট পৌইদ্যেনে প্রচার গুরি থান্; কনঅ গম উদ্দেচ্চ্যলোই সিয়েন ন-গরন্। সিগুনে মনে গরন্, ইয়েন্দোই মর্ বন্দী অবস্থায় তারা মরে দুঘ্ দি পারিবাক্। 18 মাত্তর্ সিয়েন্দোই কি অয়? আজল্ কধাগান অলঅ, ইয়েন্দোই যেবাবোত্যে ওক্ খ্রীষ্ট পৌইদ্যেনে প্রচার অর্-সিয়েন ছলনার্ উদ্দেচ্চ্যে ওক্ আর গম উদ্দেচ্চ্যে ওক্; আর সিয়েন্দোই মুই হুজী। মর্ এই হুজিগান কনদিনঅ থুম্ ন-অবঅ, 19 কিয়া মুই কোই পারং, মঅ উগুরে যিয়েন ঘোট্যে সিয়েনর্ শেষ্ ফল অবঅ মর্ উদ্ধোর্; আর সিয়েন তমার তবনালোই আর যীশু খ্রীষ্টর্ আত্মার সাহায্যলোই অবঅ। 20 মর্ থির্ বিশ্বেজ্ আঘেদে, মুই কনঅ কিজুত্ লাজ্ ন-পেম বরং মত্তুন্ যদেষ্ট সাহচ্ থেবঅ, যেনে আগে যেধোক্ক্যেন মর্ মাধ্যমে খ্রীষ্টর্ বাঈনী ফগদাং অদঅ সেধোক্ক্যেন ইক্কিনিয়ো অবঅ-সিয়েন মুই বাজং কি মরং; 21 কিয়া মর্ পক্ষে জিংকানি অলঅ খ্রীষ্ট আর মরণান্ অলঅ লাভ। 22 মাত্তর্ যুনি মুই বাঁজি থাং সালে সিয়েন মত্তে এমন এক্কান কামর্ জু গুরি দিবো যেনে যদেষ্ট ফল অয়। কুবোন্ মুই বেঈ লোম সিয়েন কোই ন-পারং। 23 দ্বিয়োকিত্ত্যেদি মরে টানদন্। মুই মুরি যেইনে খ্রীষ্ট সমারে থেবাত্যে চাং, কিয়া সিয়েন বোউত্ গম। 24 তো তমাত্যে মর্ বাঁজি থেবার্ দরকার আরঅ বেশ্। 25 মুই ঘেচ্চ্যেকগুরি হবর্ পাং মুই বাঁজি থেম্ আর তমা বেক্কুনো সমারে থেম্, যেন তমার বিশ্বেজ্চান বাড়ে আর সিয়েন্দোই তুমি হুজী অ। 26 সেনত্যে তমা ইধু মর্ আরঅ এজানার্ কারনে তুমি খ্রীষ্ট যীশুর্ মাধ্যমে মল্লোই হুজিয়ে পেলাং বেঈ পড়িবা। 27 বেগত্তুন্ দাঙর্ কধাগান অলঅ, তুমি এন্ গুরিনে তমার জিংকানিগান কাদঅ যিয়েন খ্রীষ্ট পৌইদ্যেনে গম হবরর্ যগাজ্জ্যে। সালে মুই নিজে এইনে তমারে দেগংগি বা দূরোত্তুন্ তমা কধা শুনোং, মুই হবর্ পেম্বে, তুমি মনে-পরাণে এক ওইনে থির্ গুরিনে থিয়্যেই আঘঅ আর যে বিশ্বেজ্চান গম্ হবরর্ মাধ্যমে এজে সিয়েনত্যে এক সমারে কাম গরর্। 28 যিগুনে তমা বিরুদ্ধে আঘন্ তারা ইন্দিত্তুন্ কনঅ কিজুলোই তুমি ন-দোরেইয়ো। ইয়েন্দোই প্রমাণ অবঅ যে, তারা ভস্ত অবাত্যে যাদন্ আর তুমি উদ্ধোর্ পেবাত্যে যর্; আর এ উদ্ধোরান গোজেনত্তুন্ এজে। 29 তমারে দোয়্যে গরা ওইয়্যেদে যেন তুমি যে বানা খ্রীষ্ট উগুরে বিশ্বেজ্ গুরি পারঅ এমন নয়, সিয়েনত্যে দুঘ্অ ভুগি পারঅ। 30 তুমি আঘে মরে যেবাবোত্যে গুরি দুঘ্ স্বীগের্ গত্তে দেক্ক্য আর ইক্কিনিয়ো সে পৌইদ্যেনে যিয়েনি শুনোর্, তুমিয়ো সেই সেবাবোত্যে দুঘোত্ ধরা পোজ্জ্য। |
Copyright © 2021 Bangladesh Bible Society
Bangladesh Bible Society