ফিলীমন 1 - Chakma Bible1 মুই পৌল খ্রীষ্ট যীশুর বন্দী ওইয়োং। মুই আর আমা বিশ্বেজি ভেই তীমথিয় আমার কোচ্পেইয়্যে সমাজ্জ্যে আর সমারে কাম গুরিয়্যে ফিলীমন ইধু, 2 আমা বোন আপ্পিয়া ইধু, আমা লগে কামগুরিয়্যে আর্খিপ্পর ইধু আর তঅ ঘরত্ যিগুনে মন্ডলী ইজেবে এগত্তর্ অন্ তারা ইধু এ চিধিয়ান লেগঙর্। 3 আমা বাবা গোজেন আর প্রভু খ্রীষ্ট তমারে দোয়্যে গোরোক্ আর শান্তি-দান গোরোক্। পৌলর তবনা 4 মুই নিত্য তবনা গুরিনে তঅ কধা ইদোত্ রাগেইনে তত্ত্যেই গোজেনরে ভালেদি জানেই থাং, 5 কিয়া প্রভু যীশু উগুরে তর্ বিশ্বেজ্ আর গোজেনর্ বেক্ মানুচ্চনো উগুরে তর্ কোচ্পানার কধা মুই শুনঙর্। 6 মুই এ তবনাগান গরং যে, তর্ বিশ্বেজত্যে তর্ দান গরানার মাধ্যমে যেন খ্রীষ্ট বাঈনী পায়। ইয়েনবাদে খ্রীষ্ট সমারে এগত্তর্ ওইনে আমি যেদক্কানি বর্ পেইয়্যেই সিয়েনি পুরোপুরি গুরি বুঝি পারিনে তর্ দান গরানার্ কামান যেন আরঅ বাড়ে। 7 ভেই, তর্ কোচ্পানাগান দেগিনে মুই অমকদ হুজী ওইয়োং আর উচ্চোমি পেইয়োং, কিয়া তুই গোজেন মানুচ্চুনো মনত্ নূয়ো উচ্চোমি জাগেই তুল্ল্যচ্। ওনীষিমত্যে কোজোলি 8 ইয়েনত্যে যুনিয়ো মুই খ্রীষ্টর্ মাধ্যমে তরে তর্ কাম পৌইদ্যেনে জদবদে সাহস গুরিনে উগুম দি পারিদুং, 9-10 তো কোচ্পানাত্যে সিয়েনর্ বদলে মুই তরে কোজোলি গরঙর্। এক্কো বুড়ো মানুচ্ ইজেবে আর বত্তমানে খ্রীষ্ট যীশুত্যে বন্দী ইজেবে মুই পৌল তইধু মর্ পুয়ো ওনীষিমত্যে কোজোলি গরঙর্। জেলখানাত্ মর্ বন্দী অবস্থায় তে বিশ্বেজি ইজেবে মর্ পুয়ো ওইয়্যে। 11 এক সময় এলঅ যেক্কে তইধু সিয়েনর্ কনঅ দাম ন-এলঅ, মাত্তর্ ইক্কিনে তে তর্ আর মর্ দ্বিয়োজন ইধু দামী। 12 যা ওক্, মুই তারে তইধু ফিরেইনে পাধাঙর্; তে মর্ পরাণ ধোক্ক্যেন কোচ্পেইয়্যে। 13 মুই তারে মঅ নিজো ইধু থবাত্যে চেইয়োং, যেন গম্ হবর্ প্রচার গরানার কারনে মর্ এ বন্দী অবস্থায় তে তর্ ওইনে মরে সেবা গুরি পারে। 14 মাত্তর্ তর উগুম ছাড়া মুই কিচ্চু গুরিবাত্যে ন-চাং, যেনে জোর্ গুরিনে তর্ দোয়্যেগান উজোল্ গরা ন-পরে, বরং তুই যেন নিজোত্তুন্ দোয়্যে গরচ্। 15 তুই যেন উমরত্যে তারে ফিরেই পেই পারচ্, অয়ত সেনত্যে তে কিজু দিনোত্যে তত্তুন্ ফারক্ ওই যেয়্যে। 16 মাত্তর্ তুই তারে আর চাগর্ ইজেবে ন-পেবে বরং চাগরত্তুন্অ বেচ্, অত্তাৎ পরাণর্ ভেই ইজেবে পেবে। তে মইধু ভারী পরাণর্, মাত্তর্ মানুচ্ আর বিশ্বেজি ভেই ইজেবে তইধু আরঅ পরাণর্। 17 সেনত্যে যুনি তুই মরে একই বিশ্বেজে বিশ্বেজি বিলি মনে গরচ্ সালে মরে যেবাবোত্যেগুরি মানি লদে ওনীষিমরেয়ো ঠিগ্ সেবাবোত্যে গুরি মানি লঅ। 18 যুনি তে তর্ কনঅ ক্ষতি গুরি থায় বা তইধু কনঅ পৌইদ্যেনে কজ্জতলাত্ থায় সালে সিয়েন মর্ কজ্জ বিলিনে ধুরিচ্। 19 মুই পৌল নিজো আঢে লেগঙর্, মুই সেই কজ্জগুন শুজি দিম্। খালিক্ এ কধাগান মর্ কবার দরকার নেই, খ্রীষ্ট উগুরে বিশ্বেজ্ পৌইদ্যেনে তুই নিজেই মইধু কজ্জ তলাত্ আঘচ্। 20 ভেই, আমি প্রভুর্ ওইয়্যেই বিলি মুই চাংগে, তুই মর্ এক্কান উপকার গর্। বিশ্বেজি ভেই ইজেবে তুই মঅ মনত্ নূয়ো উচ্চোমি জাগেই তুল্। 21 তুই মঅ কধানি মানি লবে কোই পারিনে মুই তইধু এ চিধিয়ান লেগঙর্। খালিক্ মুই কোই পারং, মুই যিয়েনি কঙর্ তুই সিয়েনত্তুন্-অ বেচ্ গুরিবে। 22 আর এক্কান কধা কঙর্-গর্বাগুনো ঘরান মত্যে যুক্কোল্ থঅ, কিয়া মুই আজা গরঙ্ যে, তমা তবনা গরানার ফলে মরে তমা ইধু ফিরেই দিয়্যে অবঅ। 23 ইপাফ্রা তরে ভালেদি জানার্; তে খ্রীষ্ট যীশুত্যে মঅ সমারে বন্দী আঘে। 24 ইয়েন বাদে মার্ক, আরিষ্টার্খ, দীমা আর লূক-মর্ এ সমাজ্জ্যে গুনেয়ো তরে ভালেদি জানাদন্। 25 আমা প্রভু যীশু খ্রীষ্টর্ দোয়্যে তমা রিবেঙত্ থোক্। |
Copyright © 2021 Bangladesh Bible Society
Bangladesh Bible Society