গণাণা 9 - Chakma Bibleউদ্ধোরর্-পরব্ 1 ইস্রায়েলীয়গুনে মিসর দেজত্তুন্ নিগিলি এজানার দ্বিবজরর্ পত্তম মাজত্ সিনাই ধূল্যেচর চাগালাত্ লগেপ্রভু মোশিরে কলঅ, 2 “ইস্রায়েলীয়গুনে যেন ঠিগ্ সময়োত্ উদ্ধোর্ অনার-পরপ্পো পালন গরন্। 3 তারা যেন ঠিগ্ সময়োত্, অত্তাৎ এই মাজর্ চৌদ্দো দিনোর দিন্নোত্ বেলান্ ডুবি যানার্ পরেদি বেক্ রীদি-সুদোম মজিম এই পরপ্পো পালন্ গরন্।” 4 এই কধাগান্ শুনিনে মোশি ইস্রায়েলীয়গুনোরে উদ্ধোর অনার-পরপ্পো পালন গুরিবাত্তে কলঅ। 5 সেক্কে তারা বজরর্ পত্তম মাজর্ চৌদ্দো দিনোর্ দিন্নোত্ বেলান্ ডুবি যানার্ পরেদি সিনাই ধূল্যেচর চাগালাত্ সিবে পালন গুরিলাক্। লগেপ্রভু মোশিরে যেধোক্কেনগুরি উগুম্ গোজ্যে ইস্রায়েলীয়গুনে ঠিগ্ সেধোক্কেনগুরি বেক্কানি গুরিলাক্। 6 সেই সময়োত্ তারা ভিদিরে কয়েকজন মান্জ্যে এক্কো মরাকিয়্যে ধরানার্ কারনে ফি-বলা দজাত্ পুরিনে সেদিন্যে উদ্ধোর্ অনার-পরপ্পো পালন গুরি ন-পারিলাক্। তারা সেদিন্যে মোশি আর হারোণ ইদু গেলাক্। 7 তারা মোশিরে কলাক্, “এক্কো মরাকিয়্যে ধরানার্ কারনে আমি ফি-বলা দজাত্ পোজ্যেই। সেনত্তে বিলি অন্য ইস্রায়েলীয়গুনো সমারে আমি ঠিগ্ সময়োত্ লগেপ্রভুর নাঙে উৎসর্ব গুরিবাত্তে কিত্তে ন-পারিবোং?” 8 জোবত্ মোশি কলঅ, “তমা পৌইদ্যেনে লগেপ্রভুর উগুমান হবর্ ন-পানা সং তুমি বাজ্জেই থাগঅ।” 9 সেক্কে লগেপ্রভু মোশিরে কলঅ, 10 ইস্রায়েলীয়গুনোরে কোইদে, তারা বা তারার্ বংশধরুনো ভিদিরে যুনি কনজনে মরাকিয়্যে ধরানার্ কারনে ফি-বলা দজাত্ পড়ন্ বা তারা যুনি দূরোত্ যাইদে পদথ্ থান্ তো তারা লগেপ্রভুর নাঙে উদ্ধোর অনার-পরপ্পো পালন গুরি পেবাক্। 11 দ্বিমাসর চৌদ্দো দিনোর্ দিন্নোত্ বেলান্ ডুবি যানার পরেদি তারার্ এই পরপ্পো পালন গরা পুরিবো। সদানেইয়ে রুটি আর তিদে শাগ সমারে তারাত্তুন উদ্ধোর-পরপ্পোর য়েরা খা পুরিবো। 12 বেন্যেমাদান সং কিচ্ছু ফেলে রাগেই ন-পারিবো বা কনঅ আড়্ ভাঙি ন-পারিবো। উদ্ধোর অনার-পরপ্পো পালেবার্ সময়োত্ বেক্ সুদোমানি তারাত্তুন্ মানি চলা পুরিবো। 13 মাত্তর্ ফি-বলা নয় বা যাত্রা পদথঅ নয় এধোক্কেন কনঅ মান্জ্যে যুনি উদ্ধোর অনার-পরপ্পো পালন্ ন-গরে, সালে তে ঠিগ্ সময়োত্ লগেপ্রভুর নাঙে উৎসর্ব ন-গরে বিলি তারে তার্ জাদ ভিদিরেত্তুন্ বাদ দিয়া পুরিবো। তাত্তুন্ তার্ পাপর ফল ভোগ্ গরাই পুরিবো। 14 “ইস্রায়েলীয়গুনো ভিদিরে বজত্তি গোজ্যে অন্য জাদর কনঅ মান্জ্যে যুনি লগেপ্রভুর্ নাঙে উদ্ধোর অনার-পরপ্পো পালেবাত্তে চায়, সালে তাত্তুন্ এ পরপ্পোর রীদি-সুদোম মজিম সিয়েনি পালা পুরিবো। ইস্রায়েলীয় আর অন্য জাদর্ বেক্কুনে এক্কুই সুদোমান্ পালা পুরিবো।” থেবার-তাম্বুলান উগুরে মেঘ 15 যেদিন্যে থেবার-তাম্বুলান, অত্তাৎ সাক্ষ্য-তাম্বুলান তুলো অলঅ সেদিন্যে সিবে লগেপ্রভুর মেঘ্কান্দোই নাঢা গেলঅ। সাজোন্যাত্তুন্ ধুরি বেন্যেমাদান্ সং থেবার-তাম্বুলান উগুরেগান্ সেই মেঘ্কান আগুনো ধোক্কেন্ দেগা গেলঅ। 16 সে পরেত্তুন্ ধুরি অবস্থাগান্ সেধোক্কেন্ ওয়া ধুরিলো। থেবার-তাম্বুলান সেই মেঘকান্দোই নাট্যে থেদঅ আর রেদোত্ সিয়েন আগুনো ধোক্কেন্ দেগা যেদঅ। 17 থেবার-তাম্বুলান উগুরেত্তুন্ যেক্কে মেঘ্কান সোরেই যেদঅ সেক্কে ইস্রায়েলীয়গুনে আঢা মারিদাক। মাত্তর্ যিয়েনত্ সেই মেঘ্কান্ উজু গুরি থিয়েদ সিয়েনত্ তারা তাম্বুলান ফেলেদাক্। 18 লগেপ্রভুর উগুমে তারা আঢা মারিদাক আরঅ লগেপ্রভুর উগুমে তাম্বুলান ফেলেদাক্। থেবার-তাম্বুলান উগুরে যেদক্কণ মেঘ্কান থেদঅ ইস্রায়েলীয়গুনে সেদক্ষণ তাম্বুলান ফেলেইনে সিয়োদোই থেদাক্। 19 থেবার-তাম্বুলান উগুরে মেঘ্কান যেক্কে ভালোক্ দিন সং থেদঅ ইস্রায়েলীয়গুনে সেক্কে লগেপ্রভুর উগুমানি মানিনে ন-যেদাক্। 20 মাঝে মোধ্যে মেঘ্কান থেবার-তাম্বুলান উগুরে কয়েকদিন থেদঅ। ইস্রায়েলীয়গুনে লগেপ্রভুর উগুমে তাম্বুলান ফেলেদাক আরঅ্ তাঁরই উগুমে আঢা মারিদাক্। 21 মাঝে মোধ্যে মেঘ্কান বানা সাজোন্যাত্তুন্ ধুরি বেন্যেমাদান্ সং থেদঅ। বেন্যে অক্তত্ মেঘ্কান সোরেই গেলে তারা আরঅ যাহ্ ধুরিদাক। মেঘ্কান সোরেই গেলে তারা যাহ্ ধুরিদাক-সিয়েন দিনোত্ ওক্ বা রেদোত্ ওক্। 22 দ্বিদিন ওক্ বা এক মাস ওক্ অথবা তাত্তুন বেশ্ সময় ওক্, যেদকবুলোন্ মেঘ্কান থেবার-তাম্বুলান উগুরে থেদঅ ইস্রায়েলীয়গুনে তাম্বুলান ফেলেইনে সিয়োদোই থেদাক, আঢা ন-মারিদাক্। মাত্তর্ মেঘ্কান সোরেই গেলে তারা আরঅ আঢানা আরাম্ভ গুরিদাক্। 23 লগেপ্রভুর উগুমে তারা তাম্বুলান্ ফেলেদাক্ আরঅ লগেপ্রভুর উগুমে যাহ্ ধুরিদাক। মোশিরে দিইনে উগুম্ মজিম তারা লগেপ্রভুর উগুমান মানি চলিদাক্। |
Copyright © 2021 Bangladesh Bible Society
Bangladesh Bible Society