গণাণা 35 - Chakma Bibleলেবীয়গুনোর্ আদামানি আর শঅ্রানি 1-2 যিরীহোর মুজুঙোত্ যর্দন গাঙ পাড়ত্ মোয়াবর সংজাগানত্ লগেপ্রভু মোশিরে দিইনে ইস্রায়েলীয়গুনোরে উগুম্ দিলো, সোম্বোত্তি পেবার পরেদি তুমি সিয়োত্তুন্ লেবিয়গুনোরে বজত্তি গুরিবাত্তে কদক্কানি আদাম আর শঅর্ দিবা, আর সিয়েনি সমারে তার্ চেরোকিত্তে য়েমান্ চোড়েবার্ মাদঅ দিবা। 3 ইয়োন্দোই লেবীয়গুনে বজত্তি গুরিবাত্তে আদাম আর শঅর্ পেবাক্ আর তারার্ গোরু-ভেড়া-ছাগল আর অন্য য়েমান চোড়েবার্ মাদঅ পেবাক্। 4 যেদক্কানি আদাম আর শঅর তুমি লেবীয়গুনোরে দিবা সিয়েনির্ চেরোকিত্তে য়েমান চোড়েবার্ মাদঅ জাগায়ানি যেনে আদাম বা শঅরর্ দেবালত্তুন্ এক আজার্ আত্ সং অয়। 5 পত্তি আদাম বা শঅরানি সংমোধ্যেন্দি রাগেইনে সিয়েনির্ বারেন্দি উত্তোরে আর দোগিণে দ্বিআজার্ আর পূগ্ আর পোজিমেন্দি দ্বি আজার্ আত্ মাবি দিবা। এই জাগায়ানি তারা তারার্ আদাম্ বা শঅরর্ য়েমান চোড়েবার্ মাদ্ ইজেবে পেবাক্। জিরেবার-শঅর্ 6 “তুমি যেদক্কানি আদাম আর শঅর্ লেবীয়গুনোরে দিবা সিয়েনি ভিদিরে ছগান অবঅ জিরেবার-শঅর। কেউ কাররে মারে ফেলেলে সেই জিরেবার-শঅরর্ যে কনঅ এক্কানত্ তে ধেই যেই পারিবো। ইয়েনি বাদে তুমি তারারে আরঅ বিয়াল্লিশ্ছান্ আদাম দিবা। 7 বেক্কানিয়ে আট্চোল্লিশচান্ আদাম আর শঅর লেবীয়গুনোরে দিয়্যে পুরিবো আর সিয়েনির পত্তি আদামর চেরোকিত্তে য়েমান চোড়েবার্ মাদ্ থেবঅ। 8 ইস্রায়েলীয়গুনোর সোম্বোত্তিত্তুন্ লেবীয়গুনোর্ যেদক্কানি আদাম আর শঅর দিয়্যে অবঅ সিয়েনি পত্তি গুট্টির পেইয়্যে সোম্বোত্তির পরিমাণান বুঝেই দিয়্যে পুরিবো। যে গুট্টিবোর ভাগত্ বেশ্ আদাম আর শঅর পড়িবো সেই গুট্টিবোত্তুন্ বেশ্ আর যে গুট্টিবোর ভাগত্ কম্ আদাম আর শঅর পড়িবো সেই গুট্টিবোত্তুন্ কম নিবা।” 9-11 ইয়েনির পরেদি লগেপ্রভু মোশিরে কলঅ ইস্রায়েলীয়গুনোরে কবাত্তে, যর্দন গাঙান্ পার্ ওইনে কনান দেজত্ যেইনে তুমি নিজোত্তে কদক্কানি জিরেবার-শঅর ঠিগ্ গুরিবা যেনে কেউ কাররে অদাদৎ মারে ফেলেলে সিদু ধেই যেই পারন্। 12 যিবের হেনা সুজিবার্ কধা, ইয়ানি অবঅ তা আদত্তুন্ রোক্ষে পেবার জিরেবার-শঅর, যেনে খুন গরানার্ দায়ত্ পোজ্যে মানুচ্চো ইস্রায়েলীয়গুনোর বিচের-সভাত্ থিয়্যেবার্ আগেদি মুরি ন-যায়। 13 এই যে ছগান্ শঅর তুমি লেবীয়গুনোরে দিবা সিয়েনি অবঅ তমার্ জিরেবার-শঅর। 14 ইয়ানির তিনান্ থেবঅ যর্দন গাঙর্ পূগ পারত্ আর তিনান্ থেবঅ কনান দেজর্ ভিদিরে। 15 এই ছগান অবঅ ইস্রায়েলীয়গুনোর, ইস্রায়েলীয় বানেয়্যে আদাম্মেগুনোর্ আর অন্য দেজর আদাম্মেগুনোর্ জিরেবার-শঅর্। কনঅ মানুচ্ অদাদৎ কাররে মারে ফেলেলে সিদু ধেই যেই পারিবো। 16 কনঅ মানুচ্ যুনি লুয়োর্ জিনিস্সোই কাররে আঘাত গরে আর সেক্কে তে মুরি যায় সালে তে খুনি। সেই খুনিবোরে মারে ফেলা পুরিবো। 17 যিয়েন্দোই মানুচ্ মারে ফেলা যায় এধোক্ক্যেন কনঅ পাত্তর্ যুনি কারঅ আদত্ থায়্ আর সিবেলোই যুনি তে কাররে আঘাত গরে আর সেক্কে তে মুরি যায় সালে তে খুুনী। সেই খুনীবোরে মারে ফেলা পুরিবো। 18 যিয়েনিলোই মানুচ্ মারে ফেলা যায় এধোক্ক্যেন কনঅ তক্তার জিনিস যুনি কারঅ আদত্ থায় আর সিয়েনিলোই যুনি তে কাররে আঘাত্ গরে আর সেক্কে তে মুরি যায় সালে তে খুনী। সেই খুনীবোরে মারে ফেলা পুরিবো। 19 খুন ওইয়্যে মানুচ্চোর লুয়োর্ হেনা সুজিবার্ কধা তাত্তুনোই সেই খুনীবোরে মারে ফেলা পুরিবো; দেগিলে তে যেনে তারে মারে ফেলায়। 20-22 যুনি কারর্ মনত্ কনঅ ইংসেলোই কাররে ধাক্কা মারন্ বা আওজ গুরিনে তাইদু কিজু ঢলা মারন্ বা শত্রু ভাবিনে তারে ঘুষি মারন্ আর ইয়েনির কনঅ এক্কান্দোই তে মুরি যায়, সালে যে মাজ্যে তে খুনী; তারে মারে ফেলা পুরিবো। খুন ওইয়্যে মানুচ্চোর্ লুয়োর্ হেনা সুজিবার কধা, খুনীবোরে দেগিলে তে যেনঅ তারে মারে ফেলায়। 23-24 মাত্তর্ মনত্ শত্রুতাভাব ন-থেলেয়ো যুনি কনজনে বাইসাৎ ভুলে কাররে ধাক্কা মারন্ বা মনত্ কনঅ বজং উদ্দেশ্য ন-থেলেয়ো তাইন্দি কিজু মেলা মারন্ বা তারে মারে ফেলেই পারন্ এধোক্ক্যেন কনঅ পাত্তর্ তা উগুরে আদেক্কেনগুরি ফেলেই দুয়োন আর ইগুনোর যে কনঅ এক্কোলোই যুনি তে মুরি যায়, সালে মানুচ্চো তার্ শত্রু ন-এলঅ বিলি আর তারে ক্ষেতি গুরিবার্ আওজ্ তার্ ন-এলঅ বিলি এ সুদোম মজিম ইস্রায়েলীয়গুনোর্ বিচের-সভার মানুচ্চুনোরে লুয়োর্ হেনা সুজিবার্ কধা তার্ আর খুন গোজ্যে মানুচ্চো পৌইদ্যেনে বিচের্ গুরিবাক। 25 বিচের-সভার মানুচ্চুনে সেক্কে লুয়োগানর্ হেনা যিবের সুজিবার কধা তা আদত্তুন্ খুন গোজ্যে মানুচ্চোরে রোক্ষে গুরিনে আরঅ তারে সেই জিরেবার-শঅরানত্ পাধেই দিবাক্ যিয়েনত্ তে ধেই যেইয়্যে। পবিত্র তেল্লোই অভিষেগ গোজ্যে দাঙর্ ধর্মগুরুবোর্ ন-মরানা সং সেই মানুচ্চোত্তুন্ সিয়েনত্ থাহ্ পুরিবো। 26-27 মাত্তর্ মানুচ্চো যুনি সেই জিরেবার্-শঅরর্ চাগালাগান্ পার ওইনে কনদিন বারেন্দি এজে আর লুয়োর্ হেনা যিবের্ সুজিবার কধা তে তারে শঅরর্ চাগালার্ বারেন্দি পায় সালে তে তারে মারে ফেলেই পারিবো, আর সেক্কে তে খুনোত্তে দায়ী ন-অবঅ। 28 দাঙর্ ধর্মগুরুবোর্ মরণ ন-অনা সং সেই মানুচ্চোত্তুন জিরেবার্-শঅর ভিদিরে থাহ্ পুরিবো। বানা দাঙর্ ধর্মগুরুবোর্ মরাণার্ পরেদি তে নিজোর্ জাগানত্ ফিরি এই পারিবো। 29 তুমি দেজ ভিদিরে যিয়োদোই বজত্তি গত্তা সাৎ, বংশর পর বংশ ধুরিনে তমাত্তে ইয়েনি অলঅ আইনোর্ কদক্কানি ধারা। 30 “সাক্ষীর কধা উগুরে নির্ভর গুরিনে খুনিবোরে মারে ফেলেই পারিবো। মাত্তর্ বানা এক্কো সাক্ষীর কধা উগুরে নির্ভর গুরিনে কনজনরে মারেই ফেলেই ন-পারিবো। 31 মরণান্ যিবের্ পাইদে সাজা এধোক্ক্যেন কনঅ খুনিরে টেঙালোই উদ্ধোর গুরি ন-পারিবো। তারে মারে ফেলাই পুরিবো। 32 জিরেবার্-শঅরত্ ধেই যেইয়্যে কনঅ মান্জ্যরে টেঙার্ বদলে দাঙর্ ধর্মগুরুবোর্ মরাণার্ আগেন্দি তার্ জাগা-জোমিত্ ফিরি যেইনে বজত্তি গুরিবাত্তে দেনা ন-চুলিবো। 33 তুমি তমার্ দেজ্ছানরে ফিবলা ন-গুরিবা, কিত্যে লো নিগিলিলে দেজ্ছান ফি-বলা অয়। যে দেজত্ লো নিগিলে-নিগিলি ওইয়্যে লো দিয়োবোর্ লো বাদে আর কেধোক্ক্যেনগুরি সেই দেজর্ ফি-বলাগান্ ঢাগি দিয়্যে ন-যায়। 34 তুমি যে দেজত্ থেবা মুইয়ো সিদু থেম্ বিলি সেই দেজ্ছান ফি-বলা গুরি ন-পারিবা। মুই লগেপ্রভু ইস্রায়েলীয়গুনো ভিদিরে বজত্তি গরঙর্।” |
Copyright © 2021 Bangladesh Bible Society
Bangladesh Bible Society