গণাণা 33 - Chakma Bibleযেবার পদথ্ ইস্রায়েলীয়গুনোর্ জিরেনা 1 মোশি আর হারোণর পরিচালনায় ইস্রায়েলীয়গুনে সৈন্যদল ধোক্ক্যেন গুরি মিসর দেজত্তুন্ নিগিলি এজানার্ পরেদি নানান্ জাগাত্ জিরেই জিরেই যেইয়োন। 2 যেবার পদথ্ তারা যেদক্কানি জাগাত্ জিরেয়োন লগেপ্রভুর উগুমে মোশি সিয়েনি লিগি রাগেল। তারা যেদক্কানি জাগাত্ জিরেয়োন সিয়েনি অলঅ: 3 উদ্ধোর-পরবর্ পরেদি দিন্নোত্ বজরর্ পত্তম মাজর্ পন্দর তারিগোত্ ইস্রায়েলীয়গুনে রামিষেষত্তুন্ আদি যানা আরাম্ভ গোজ্যন। বেক্ মিসরীয়গুনোর্ চোগো মুজুুুুঙোন্দি বুগ্ ফুলেইনে তারা নিগিলি যেইয়োন। 4 মিসরীয়গুনে সেক্কে তারার্ পত্তম পূঅগুনোরে গোর্ দেদন। লগেপ্রভু তারার্ পত্তম পূঅগুনোরে মারে ফেলেয়্যে আর তারার্ দেব-দেবেদাগুনোরে সাজা দিয়্যে। 5 ইস্রায়েলীয়গুনে রামিষেষ ছাড়ি এইনে সুক্কোদত্ তাম্বুলান ফেলেয়োন। 6 সে পরেদি তারা সুক্কোৎ ছাড়ি যেইনে ধূল্যেচর-চাগালাত্ এথম বিলিনে এক্কান জাগাত্ তারার্ তাম্বুলান্ ফেলেয়োন। 7 এথমান্ ছাড়িনে তারা বাল-সফোনর মুজুঙোত্ পী-হহীরোদত্ ফিরি এইনে মিগ্দোলর ইদু তাম্বুলান ফেলেয়োন। 8 তারা পী-হহীরোৎ ছাড়িনে সাগর্ পার্ ওইনে এথম ধূল্যেচর-চাগালাত্ যেইনে উদিলাক আর সিয়েন ভিদিরেন্দি তিন দিনোর্ পথ যেইনে মারাতত্ তাম্বুলান্ ফেলেলাক। 9 মারা বাদে তারা এলীমত্ যেইনে তাম্বুলান্ ফেলেয়োন। সিয়েনত্ বারবো পানির উইপুদ্ আর সত্তুরবো খাজোর্ গাছ এলাক্। 10 পরেদি তারা এলীম জাগায়ান ছাড়িনে সুয়েজ বড়্ গাঙ পাড়ত্ যেইনে তাম্বুলান ফেলেয়োন। 11 সে পরেদি তারা সুয়েজ বড়গাঙর্ কায় কুরেত্তুন্ যেইনে সিন ধূল্যেচর-চাগালাত্ তাম্বুলান ফেলেলাক। 12 সিন ধূল্যেচর-চাগালায়ান ছাড়িনে তারা দপ্কাতত্ যেইনে তাম্বুলান ফেলেলাক্। 13 দপ্কা ছাড়িনে তারা আলূশোত্ যেইনে তাম্বুলান ফেলেয়োন। 14 আলূশ ছাড়িনে তারা রফীদীমোত্ যেইনে তাম্বুলান ফেলেয়োন। ইয়েনত্ মানুচ্চুনোত্তে কনঅ হেবার্ পানি ন-এলঅ। 15-35 রফীদীমান্ ফেলেইনে তারা সিনাই ধূল্যেচর-চাগালাত্ যেইনে তাম্বুলান ফেলেয়োন। ইয়েনর পরেদি তারা পর পর্ যেদক্কানি জাগাত্ যেইনে তাম্বুল ফেলেয়োন সিয়েনি অলঅ কিব্রোৎ-হত্তাবা, হৎসেরোৎ, রিৎমা, রিম্মোণ-পেরস, লিব্না, রিস্সা, কহেলাথা, শেফর মুড়ো, হরাদা, মখেলোৎ, তহৎ, তেরহ, মিৎকা, হশ্মোনা, মোষেরোৎ, বনে-যাকন, হোর্-হগিদ্গদ, যট্বাথা, অব্রোণা আর ইৎসিয়োন-গেবর। 36 ইয়েন পরেদি তারা সীন ধূল্যেচর-চাগালা ভিদিরে কাদেশত্ যেইনে তাম্বুলান ফেলেয়োন। 37 কাদেশ ছাড়িনে তারা ইদোম দুঝিগান কায়-কুরে হোর্ মুড়োবোত্ যেইনে তাম্বুলান ফেলেয়োন। 38 ইস্রায়েলীয়গুনে মিসরত্তুন্ নিগিলি এজানার্ পরেদি চোল্লিশ বজরর্ পাঁচ মাজর্ পত্তম দিনোত্ লগেপ্রভুর উগুমে ধর্মগুরু হারোণে হোর মুড়োবো উগুরে উদি যেয়েগোই আর সিয়েনত্ মুরি গেলঅ। 39 হোর মুড়োবো উগুরে হারোণর মরানার্ সময় তার্ বয়জ্চান ওইয়্যেদে একশ তেইশ বজর। 40 ইয়েন ভিদিরে অরাগুনোর কনানীয় রাজাবো ইস্রায়েলীয়গুনোর এবার্ হবরান শুন্যে। তে কনান দেজর্ নেগেভ আদামত্ বজত্তি গুরিদো। 41-47 সে পরেদি ইস্রায়েলীয়গুনে হোর মুড়োবো ছাড়ানার্ পরেদি যেদক্কানি জাগাত্ যেইনে তাম্বুল ফেলেয়োন সিয়েনি অলঅ সল্মোনা, পূনোন, ওরোৎ, মোয়াবর দুঝির্ ইয়ী-অবারীম, দীবোন-গাদ আর অল্মোন-দিব্লাথয়িম। পরেদি তারা অবারীম মুড়োবোত্ লুমিনে নবো মুড়োবো ইদু তাম্বুল ফেলেয়োন। 48 পরেদি তারা অবারীম মুড়োবো ছাড়িনে যিরীহোর্ উগুদোন্দি যর্দন গাঙর্ পাড়ত্ মোয়াবর সং জাগানত্ যেইনে তাম্বুল ফেলেলাক্। 49 এই তাম্বুলান তারা ফেলেয়োন্ যর্দন গাঙর্ দুঝিবো ধুরিনে মোয়াবর সংজাগানত্ বৈৎ-যিশীমোৎত্তুন্ আবেল-শিটীম শঅর সং। 50-52 যিরীহোর উই কিত্যেদি যর্দন গাঙর্ পাড়ত্ মোয়াবর সংজাগানত্ লগেপ্রভু মোশিরে ইস্রায়েলীয়গুনোরে এই কধাগান্ জানেই দিবাত্তে কোইয়্যে, তুমি যর্দন গাঙান্ পাড় ওইনে কনান দেজত্ যেইনে তমার পথতানত্তুন্ দেজর্ বেক্ মানুচ্চুনোরে ধাবেই দিইনে নিগিলেই দিম। তারার্ পাত্তরত্ লেখ্যে বেক্ মূত্তিগুন আর ছাঁঝি ফেলেইনে বানেয়্যে বেক্ আরুগ্ আর মুড়োবো উগুরে বেক্ পূজোগুন্ তুমি ভস্ত গুরি ফেলেবা। 53 পরেদি তুমি সেই দেজ্চান্ গজক্ গুরি নেযেইনে সিয়েনত্ বজত্তি গুরিবা কিত্যে গজক্ গুরিবাত্তে দেজ্চান মুই তমারে দুয়োং। 54 তুমি চাম্বা চেইনে নানান্ বংশর জাগায়ানি ঠিগ গুরি নিবা। বংশর জনসোংখ্যেগুন বেশ্ অলে বেশ্ জাগা আর কম অলে কম্ জাগা দিয়্যে পুরিবো। চাম্বা চেইনে যে বংশর্ জাগায়ানি যিয়েনত্ পুরিবো সেই বংশবত্তুন সিয়োদোই জাগা নেযা পুরিবো। গুট্টির নানান্ বংশগুনে গুট্টির চাগালা ভিদিরেত্তুনই জাগা পেবাক্। 55 “মাত্তর্ তুমি যুনি সেই দেজর্ আদাম্মেগুনোরে ধাবেই ন-দুয়ো তো যিগুনোরে তুমি থেবাত্তে দিবা তারা তমার্ চোগোত্ বুড়্শী ধোক্ক্যেন আর ঢাগ আড় কাঁদা ধোক্ক্যেন অবঅ। তুমি সেই দেজত্ বজত্তি গুরিবার অক্তত্ তারা তমারে দুঘ্ দিবাক। 56 সেক্কে মুই তমা উগুরে সিয়েনোই গুরিম যিয়েনি মুই তারা উগুরে গুরিম বিলিনে ঠিগ্ গুরি রাগেয়োং।” |
Copyright © 2021 Bangladesh Bible Society
Bangladesh Bible Society