গণাণা 32 - Chakma Bibleযর্দন গাঙর্ পূগ পারর্ জাগায়ান 1 রূবেণ আর গাদ-গুট্টির মানুচ্চুনোর গোরু, ছাগল আর ভেড়াছাগলর দাঙর্ দাঙর্ পাল এলাক্। তারা দেগিলাক্ যাসের আর গিলিয়দ দেজ্চান্ য়েমান পালেবাত্তে অমহদ দোল্ জাগা। 2 সিয়েনি দেগিনে তারা মোশি আর ধর্মগুরু ইলিয়াসর আর ইস্রায়েলীয় সমাজর্ নেতাগুনোরে যেইনে কলাক্, 3-4 “অটারোৎ, দীবোন, যাসের, নিম্রা, হিষ্বোন, ইলিয়ালী, সেবাম, নবো আর বিয়োন নাঙে যেদক্কানি জাগা লগেপ্রভু ইস্রায়েলীয়গুনোর্ অধীনোত্ আন্যে সে জাগায়ানি য়েমান্ পালেবাত্তে অমহদ দোল্, আর তর্ এই চাগরুনোরঅ য়েমানপাল আগন্। 5 যুনি আমা উগুরে তর্ দোয়্যে অয় সালে তর্ এই চাগরুনোরে এই জাগায়ানি সোম্বোত্তি ইজেবে দে। যর্দন গাঙর্ উইপারত্ আমারে লোই ন-যেবে।” 6 সেক্কে মোশি গাদ আর রূবেণ-গুট্টির মানুচ্চুনোরে কলঅ, তমার ভেইয়ুনে যুদ্ধো গুরিবাত্তে যেবাক্ আর তুমি এই জাগানত্ বোই থেবা? 7 লগেপ্রভু ইস্রায়েলীয়গুনোরে যে দেজ্চান্ দিয়্যে তুমি তারারে সিয়েনত্ যেবার্ উচ্চোমিগান্ ভাঙি দুয়োর্ কিত্তে? 8 দেজ্চান চেই এবাত্তে যেক্কে মু্ই তমা বাপ-দাদাগুনোরে কাদেশ-বর্ণেয়ত্তুন্ পাদেয়োং সেক্কে তারায়ো ঠিগ্ এবাবোত্যে গোজ্যন। 9 ইষ্কোল কিঝিঙ্ সং যেইনে দেজ্চান্ চেই এজানার্ পরেদি তারা লগেপ্রভুর দিয়্যে দেজত্ ইস্রায়েলীয়গুনোরে যেবার্ উচ্চোমিগান্ ভাঙি দুয়োন। 10 সেদিন্যে লগেপ্রভু রাগে জুলি উঠ্যে আর তে শমক্ খেইনে কোইয়্যেদে, 11 যে দেজ্চান্ দিবার্ কধা মুই অব্রাহামরে, ইস্হাকরে আর যাকোব ইদু শমক্ খেইনে এগেম্ গোজ্যং মিশরত্তুন্ নিগিলি এচ্চ্যে কুড়ি বা তাত্তুন্ বেশ্ বয়জর্ মানুচ্চুনো ভিদিরে কনজনে সিয়েন্ ন-দেগিবাক্, কিত্যে তারা মর্ কধানি পুরোপুরি মানি ন-চলন্। 12 বানা কনিসীয়ো যিফূন্নির পূঅ কালেব আর নূনোর পূঅ যিহোশূয় সেই দেজ্চান্ দেগিবো, কিত্যে তারা মর্ কধাগান্ পুরোপুরি মানি চোল্যন। 13 ইস্রায়েলীয়গুনো উগুরে লগেপ্রভু রাগে জুলি উঠ্যে আর তা চোগোত্ ভান্ন্যেই কাম্ গোজ্যে সেই বেক্ মানুচ্চুন্ শেজ্ ন-ওই যানা সং চোল্লিশ বজর্ ধুরিনে তে তারার্ ধূল্যেচর-চাগালা ভিদিরে নানান্ জাগাত্ গুরেয়োন্। 14 “আর তুমি, পাপীগুন, তমার বাপ-দাদাগুনোর্ জাগাত্ এইনে থিয়েইয়ো আর ইস্রায়েলীয়গুনো উগুরে লগেপ্রভুর রাগর্ আগুনান আরঅ বাড়েই দুয়ো। 15 তুমি যুনি তা কধা মজিম ন-আদঅ, সালে তে এবেরায়ো এই বেক্ মানুচ্চুনোরে ধূল্যেচর-চাগালাত্ ফেলেই রাগেব, আর তুমি অবা তারার্ ভস্ত অনার্ কারণান্।” 16 সেক্কে তারা মোশি ইদু উজেই যেইনে কলাক্, আমি বানা ইয়েনত্ আমার্ য়েমানপালুনোর্ ঘর্ আর আমা গোর্বোত্তে শঅর্ বানেবাত্যে চের্ । 17 মাত্তর্ ইস্রায়েলীয়গুনোরে তারার্ নিজোর্ জাগানত্ লুমেই ন-দেনা সং আমি যুদ্ধোর্ সাজে তারার্ আগে আগে যেবাত্তে যুক্কোল আগিই। ইয়েন ভিদিরে আমার্ পরিবার্বো দেবাল-ঘিজ্যে শঅরত্ বজত্তি গুরিবো যেনে এই দেজর্ মানুচ্চুনো আঢত্তুন্ তারা রোক্ষ্যে পান। 18 ইস্রায়েলীয়গুনে পত্তিজনে তার্ সোম্বোত্তিগানি ন-পানা সং আমি আমার্ ঘরত্ ফিরি ন-এবং। 19 যর্দন গাঙর্ উইপারত্ ইস্রায়েলীয়গুনো সমারে আমি কনঅ সোম্বোত্তি ন-নিবোং, কিত্যে গাঙর্ পূগ পারন্দি দঅ আমি সিয়েনি পেবং। 20-21 এ কধাগান শুনিনে মোশি তারারে কলঅ, “যুনি তুমি সিয়েন্ গরঅ, যুনি তুমি লগেপ্রভুর মুজুঙোত্ যুদ্ধোর্ পোজাক্ উরো আর লগেপ্রভু তা শত্রুগুনোরে তা মুজুঙোত্তুন্ ধাবেই ন-দেনা সং তুমি বেক্কুনে যুদ্ধোর্ পোজাক্কোই লগেপ্রভুর মুজুঙোত্ যর্দন গাঙান্ পার্ অ, 22 মাত্তর্ দেজ্চান লগেপ্রভুর অধীনোত্ এজানার্ পরেদি তুমি ফিরি এই পারিবা আর লগেপ্রভু আহ্ ইস্রায়েল জাদ উগুরে তমার্ কামানিত্তুন্ রেহাই পেবা; আর সেক্কে লগেপ্রভুর্ আওজে এই জাগায়ান্ তমার্ সোম্বোত্তি অবঅ । 23 মাত্তর্ যুনি তুমি সিয়েন্ ন-গরঅ সালে লগেপ্রভুর বিরুদ্ধে তুমি পাপ গুরিবা। তুমি ইয়েন্ জানি রাগেয়ো, তমার পাপ তমারে রেহাই ন-দিবো। 24 তুমি তমার্ ঝি-পূঅগুনোত্তে শঅর্ বানেই পারিবা আর ছাগল-ভেড়াছাগলর ঘরঅ বানেই পারিবা, মাত্তর্ যে কামান গুরিবার্ এগেম্ তুমি গোজ্য সিয়েনি তমাত্তুন্ গরা পুরিবো।” 25 সেক্কে গাদ আর রূবেণ-গুট্টির মানুচ্চুনে মোশিরে কলাক্, “তুই আমার্ গিরোজ, তুই আমারে যে উগুমান্ দিলে আমি, তর্ চাগরুনে, সিয়েনি পালন গুরিবোং। 26 আমার্ ঝি-পূঅ, মোক্, ছাগল-ভেড়াছাগল আর গোরুর পালুন্ সিদু গিলিয়দর্ শঅরানিত্ থেবাক। 27 মাত্তর্ আমি আমার্ গিরোজর্ কধা মজিম যুদ্ধো গুরিবাত্তে যুদ্ধোর্ পজাক্কোই লগেপ্রভুর মুজুঙোত্ গাঙ্ পার্ ওই যেবং।” 28 সেক্কে মোশি এই মানুচ্চুনো পৌইদ্যেনে ধর্মগুরু ইলিয়াসর, নূনোর্ পূঅ যিহোশূয় আর ইস্রায়েলীয় গুট্টির নানান্ বংশর নেতাগুনোরে উগুম্ দিলো। 29 তে তারারে কলঅ, “গাদ আর রূবেণ-গুট্টির মরত্তুনে যুনি বেক্কুনে যুদ্ধোর্ পোজাক্কোই লগেপ্রভুর্ মুজুঙোত্ যুদ্ধো গুরিবাত্তে তমা লগে যর্দন্ গাঙান্ পার্ ওই যান্, মাত্তর্ যেক্কে দেজ্চান্ তমার্ অধীনোত্ এবঅ সেক্কে তুমি সোম্বোত্তি ইজেবে গিলিয়দ দেজ্চান্ তারারে দি দিবা। 30 মাত্তর্ যুনি তারা সিয়েন্ ন-গরন্ সালে কনান দেজত্ তমা সমারে তারার্ সোম্বোত্তিগানি নেযা পুরিবো।” 31 এই কধাগান্ শুনিনে গাদ আর রূবেণ-গুট্টির্ মানুচ্চুনে কলাক্, “লগেপ্রভু যিয়েনি কোইয়্যে তর্ চাগরুনে সিয়েনই গুরিবাক্। 32 আমি লগেপ্রভুর মুজুঙোত্ যুদ্ধোর্ পোজাক্ উড়িনে গাঙ্ পার্ ওইনে কনান দেজত্ যেবং, মাত্তর্ গাঙর্ এ পারত্ থেবঅ আমার্ সোম্বোত্তিগানি।” 33 মোশি সেক্কে ইমোরীয়গুনোর্ রাজা সীহোনর্ রেজ্য আর বাশনর রাজা ওগের রেজ্য গাদ আর রূবেণ-গুট্টির মান্জ্যরে আর মনঃশি-গুট্টির অদ্দেক্ মান্জ্যরে ভাগ গুরি রাগেল। এই মনঃশি যোষেফর পূঅ। গ্রাম আর শঅর আর সিগুনোর্ চেরোকিত্তে জাগানি সুদ্ধো বেক্ দেজ্চান্ তে তারাত্তে রাগেল। 34 গাদ-গুট্টির মানুচ্চুনে দীবোন, অটারোৎ, অরোয়ের, 35 অট্রোৎ-শোফন, যাসের, যগ্বিহ, 36 বৈৎ-নিম্রা আর বৈৎ-হারণ নাঙে কদক্কানি আদাম আর শঅর্ দেবাল দিইনে ঘিরিনে ঠিগ গুরিলাক্ আর তারার্ গোরু-ভেড়াছাগলর ঘরঅ বানেলাক্। 37-38 রূবেণ-গুট্টির মানুচ্চুনে হিষ্বোন, ইলিয়ালী আর কিরিয়াথমিয় শঅর আর নবো, বাল্-মিয়োন আর সিব্মা নাঙে আদামানি ঠিগ্ গুরিলাক্। ঠিগ্ গুরি নেযেয়্যে আদামানির্ নূয়ো নাঙ্ দিয়্যে অলঅ। নবো আর বাল্-মিয়োন আদামর্ নাঙান্ বদলা ওইয়্যে। 39 মনঃশির পূঅ মাখীরোর্ বংশধরুনে গিলিয়দত্ যেইনে দেজ্চান্ আগে গজক্ গুরি নেযেয়োন্ আর যিদুক্কুন্ ইমোরীয় সিয়েনত্ এলাক্ তারারে ধাবেই দুয়োন্। 40 সেনত্তে মোশি মনঃশির বংশধর মাখীরীয়গুনোর্ ভাগত্ গিলিয়দ চাগালাগান্ রাগেল। তারা সিয়েনত্ থেলাক। 41 যায়ীর নাঙে মনঃশির্ এক বংশধর যেইনে ইমোরীয়গুনোর্ আদামানি গজক্ গুরি নেযেল আর সিয়েনির্ নাঙানি দিলো হব্বোৎ-যায়ীর। 42 নোবহ যেইনে কনাৎ আর তার্ কায়-কুরে আদামানি গজক্ গুরি নেযেইনে নিজোর্ নাঙ্ মজিম জাগায়ানির্ নাঙ্ দিলো নোবহ। |
Copyright © 2021 Bangladesh Bible Society
Bangladesh Bible Society