গণাণা 25 - Chakma Bibleইস্রায়েলীয়গুনোর ভান্ন্যেই পদেন্দি যানা 1 শিটীম শঅর ইদু থেবার সময় ইস্রায়েলীয়গুনে মোয়াবীয় মিলেগুনো সমারে সিনেলী আরাম্ভ গোজ্যন্। 2 এই বেক্ মিলেগুনে তারার্ দেব-দেবেদাগুনোর নাঙে য়েমানডালির্ উৎসবত্ ইস্রায়েলীয়গুনোরে বাত্যেয়োন, আর ইস্রায়েলীয়গুনেয়ো তারা লগে খানা-দানা গুরিনে সেই বেক্ দেবেদাগুনোরে পূজো গুরিলাক্। 3 ইঙিরিনে ইস্রায়েলীয়গুনে পিয়োর মুড়োবোত্ বাল দেবেদা পূজোত্ মিজেলাক্। সেক্কে তারা উগুরে লগেপ্রভুর রাগর্ আগুনান্ জুলি উদিলো। 4 লগেপ্রভু মোশিরে কলঅ, “তুই বেক্ ইস্রায়েলীয় নেতাগুনোরে ধুরিনে মারে ফেলা আর দিনো পহ্রত্ মঅ মুজুঙোত্ তারার্ কিয়্যেনি ফেলে রাগেচ্। সেক্কে ইস্রায়েলীয়গুনো উগুরেত্তুন্ মর্ সেই রাক্কান্ দূর অবঅ।” 5 সেক্কে মোশি ইস্রায়েলীয় বিচেরগুরিয়্যেগুনোরে কলঅ, “তমার্ অধীনোত্ যিদুক্কুন মান্জ্যে পিয়োরর বাল দেবেদার পূজোত্ মিজেয়োন্দোই তারার্ পত্তিজনরে তমাত্তুন্ মারে ফেলা পুরিবো।” 6 সেক্কে মোশি আর ইস্রায়েলীয়গুনে বেক্কুনে যেক্কে মিলন-তাম্বুলো ইদু কানাকাদি গত্তন্ সেই সময়োত্ এক্কো ইস্রায়েলীয় তারার্ চোগো মুজুঙোন্দি এক্কো মিদিয়নীয় মিলেরে তা গোর্বোর্ মানুচ্চুনো ভিদিরে নেযেল। 7-8 ধর্মগুরু হারোণর নাদিন্ ইলিয়াসরর পূঅ পীনহসে এ বেপারান্ দেগিনে দল ছাড়িনে আঢত্ সেল্ নেযেইনে সেই ইস্রায়েলীয় মানুচ্চোর্ পিজে পিজে তা তাম্বুলান ভিদিরে যেইনে সুমিলো আর সেল্লো তে সেই ইস্রায়েলীয় আর মিদিয়োনীয় মিলেবোর্ পেদঅ ভিদিরে ভোরেই দিলো। ইয়েনর্ পরেদি ইস্রায়েলীয়গুনো ভিদিরেত্তুন্ ভানাগান্ দূর্ অলঅ। 9 মাত্তর্ যিগুনে সেই ভানাগানদোই মুরি গেলাক্ তারা সোংখ্যেদি এলাক চোব্বিশ আজার। 10 সেক্কে লগেপ্রভু মোশিরে কলঅ, 11 “ধর্মগুরু হারোণর নাদিন্, অত্তাৎ ইলিয়াসরর্ পূঅ পীনহস ইস্রায়েলীয়গুনো উগুরেত্তুন্ মর্ রাক্কান্ দূর্ গোজ্যে। ইস্রায়েলীয়গুনো ভিদিরেত্তুন্ তে মর্ পাওনা ভোক্তিগান পৌইদ্যেনে মঅ ধোক্ক্যেন আওজী। সেনত্তেই মর্ পাওনা ভোক্তিগান পৌইদ্যেনে মর্ অমহদ আওজ্ থেলেয়ো মুই তারারে শেজ্ গুরিবাত্তে ন-দুয়োং। 12 সেনত্তে তুই তারে কোইদে, মুই তাত্তে এক্কান্ গম্ সুদোম্ থিদেবর্ গোজ্যং। 13 তে তার্ গোজেনর্ পাওনা ভোক্তিগান পৌইদ্যেনে আওজী ওইনে ইস্রায়েলীয়গুনোর পাপ্পানি নাঢি দিবার্ কামান গোজ্যে বিলি মুই তাত্তে এধোক্ক্যেন সুদোম থিদেবর্ গোজ্যং যেনে ধর্মগুরুবোর্ পদ্তান্ তার্ আর তার্ বংশধরুনো ভিদিরে উমরত্যে ধুরি থায়।” 14 যে ইস্রায়েলীয় মিলেবোরে সেই মিদিয়নীয় মিলেবো সমারে মারে ফেলা ওইয়্যে তা নাঙান্ এলদে সিম্রি। তে অলদে শালূর পূঅ আর শিমিয়োন-গুট্টির এক্কো বংশর নেতা। 15 যে মিদিয়নীয় মিলেবো মারে ফেলা ওইয়্যে তা নাঙান্ এলদে কস্বী। তে এলদে মিদিয়ন দেজর্ সূর নাঙে এক্কো বংশর নেতার ঝি। 16 পরেদি লগেপ্রভু মোশিরে কলঅ, 17 “মিদিয়নীয়গুনোরে তুমি শত্রু ইজেবে দেগিবা আর তারারে মারে ফেলেবা, 18 কিত্যে পিয়োরর্ দেবেদা পূজো আর কস্বীর বেপারান্দোই বুদ্ধি খাদেইনে তমারে ভুল্ পদথ্ নেযেইনে তারা তমার্ শত্রু ওইয়োন। তুই দঅ জানচ্, এই কস্বী এলদে তারার্ কুদুম্মো আর এক্কো মিদিয়নীয় সর্দারর ঝি। পিয়োরর্ বাল দেবেদা পূজোনার্ কারনে যেক্কে তমা ইদু ভানা দেগা দিয়্যে সেক্কে সেই মিলেবোরে মারে ফেলা ওইয়্যে।” |
Copyright © 2021 Bangladesh Bible Society
Bangladesh Bible Society