গণাণা 22 - Chakma Bibleরাজা বালাক বিলিয়মরে ডাগিনে পাদেল 1 ইয়েনর্ পরেদি ইস্রায়েলীয়গুনে মোয়াবর সং জাগানত্ যেইনে যিরীহো শঅরর্ উই পারদি যর্দন গাঙর্ উই পারত্ তারার্ তাম্বুলান্ ফেলেলাক্। 2 ইস্রায়েলীয়গুনে ইমোরীয়গুনোর যে অবস্থা গোজ্জ্যন্ সিয়ান্ বেক্কান্ সিপ্পোরর্ পূঅ মোয়াবর্ রাজা বালাকে দেখ্যে। 3 এদক্ মানুচ্ দেগিনে মোয়াবীয়গুনে দোরেয়োন্। ইস্রায়েলীয়গুনোরে দেগিনে হামাক্কায় মোয়াবীয়গুনে অমহদ দোরেয়োন। 4-5 তারা মিদিয়নীয় বুড়ো নেতাগুনোরে কলাক্, “গোরুগুনে যেধোক্ক্যেনগুরি মাদর্ ঘাস পুঝিসারি খেই নেযান্ এই দল্লো সেধোক্ক্যেনগুরি আমা চেরোকিত্তে বেক্কানি পুঝিসারি খেই নেযেবাক্।” সেনত্তে মোয়াবর সেক্কে রাজাবো সিপ্পোরর পুয়ো বালাকে বিয়োরর পুয়ো বিলিয়মরে ডাগি আনিবাত্তে মানুচ্ পাদেই দিলো। বিলিয়মে সেক্কে ইউফ্রেটিস গাঙর্ কায়-কুরে তার নিজোর্ মানুচ্চুনোর্ দেজত্ পথোর শঅরত্ এলাক্। বালাকে কোই পাদেল, “মিসর দেজত্তুন্ একদল মানুচ্ নিগিলি এচ্চ্যন্। তারা গোদা দেজ্চান্ ছাগি নেযেয়োন্ আর মর্ মুজুঙোত্ বজত্তি গোজ্জ্যন। 6 এই মানুচ্চুনে মত্তুন্ বেশ্ বোলী; সেনত্তে তুই এইনে এই মানুচ্চুনোরে অভিশাব দেগি। সালে অয়ত মুই তারারে অদেই দিইনে দেজত্তুন্ দাবেই দি পারিম্। মুই এই কধাগান্ হবর্ পাং, তুই যারারে আশিদ্বাদ গরছ্ তারা হামাক্কায়্ আশিদ্বাদ পান্ আর যিগুনোরে অভিশাব দুয়োচ্ তারা উগুরে অভিশাব্ পড়ে।” 7 সেক্কে ভাগ্যগানি চাম্বা চেবার টেঙাগুন্ নেযেইনে মোয়াব আর মিদিয়নোর বুড়ো নেতাগুনে রওনা ওই গেলাক্। বালাকে যিয়েন্ কোইয়্যে সিয়েন্ তারা যেইনে বিলিয়ম ইদু কলাক্। 8 সেক্কে বিলিয়মে তারারে কলঅ, “তুমি ইয়েনত্ রেত্তো কাদঅ। লগেপ্রভু মরে যে জোব্পান্ দিবো সিয়েন মুই তমারে জানেম।” সেনত্তেই মোয়াবীয় নেতাগুনে তা সমারে থেলাক্। 9 গোজেনে এইনে বিলিয়মরে পুযোর গুরিলো, তঅ সমারে এই মানুচ্চুন্ কন্না? 10 জোবত্ বিলিয়মে গোজেনরে কলঅ, “মোয়াবর রাজা সিপ্পোরর পূঅ বালাকে মইদু হবর্ পাদেইনে কোইয়্যেদে, 11 ‘মিসর দেজত্তুন্ একদল মানুচ্ নিগিলি এইনে দেজ্ছানরে ঢাগি ফেলেয়োন। ইক্কিনে তুই এইনে মর্ পক্কত্তুন এই মানুচ্চুনোরে অভিশাব্ দেগি। সালে অয়ত মুই যুদ্ধো গুরিনে ইগুনোরে ধাবেই দি পারিম।’” 12 মাত্তর্ গোজেনে বিলিয়মরে কলঅ, “তুই তারা সমারে ন-যেবে আর সেই মানুচ্চুনোরে কনঅ অভিশাব ন-দিবে, কিত্যে সিগুন মর্ আশিদ্বাদ পেইয়্যে মানুচ্।” 13 তার্কেল্যে বেন্যে বিলিয়মে ঘুমোত্তুন্ উদিনে বালাকে পাদেয়্যে নেতাগুনোরে কলঅ, “তুমি নিজো দেজত্ ফিরি যঅ। লগেপ্রভু মরে তমা সমারে যেবাত্তে দেদে রাজী নয়।” 14 সেনত্তেই মোয়াবীয় নেতাগুনে ফিরি যেইনে বালাকরে কলাক্, “বিলিয়মে আমা লগে এত্তে রাজী নয়।” 15 সেক্কে বালাকে অন্য নেতাগুনোরে পাদেল। তারা আগর নেতাগুনোত্তুন্ জনেদি যেধোক্ক্যেন বেশ্ সেধোক্ক্যেন আরঅ সর্মানি। 16 তারা বিলিয়ম ইদু যেইনে কলাক্কে, “সিপ্পোরর পূঅ বালাকে এই কধাগান কোইয়্যে, কনঅ কিজুয়ে যেনে তরে তাইদু যেবাত্তে মানা ন-গরন্। 17 তে তরে বোউত্ সর্মানর অধিকারী গুরিবো আর তুই যিয়েন্ কবে সিয়েনোই গুরিবো। তে চাইদে যেনে তুই যেইনে তার পক্ষত্তুন্ সেই মানুচ্চুনোরে অভিশাব্ দুয়োচ্।” 18 জোবত্ বিলিয়মে তারারে কলঅ, “বালাকে যুনি সনা-রূবোয় ভোজ্যে তার্ রাজঘরান মরে দে তো মর্ গোজেন লগেপ্রভুর উগুমোর্ বারেন্দি যেইনে মুই কনঅ কাম্ গুরি ন পারিম-কামান্ চিগোন ওক্ বা দাঙর্ ওক। 19 সালে তুমিয়ো রেত্তো ইদু কাদঅ; লগেপ্রভু মরে আর কি কবঅ সিয়েন্ মুই জানি লোম্।” 20 সেই রেদোত্ গোজেনে এইনে বিলিয়মরে কলঅ, “এই মানুচ্চুনে যেক্কে তরে ডাগিবাত্তে এচ্চ্যন্ সেক্কে তুই তারা সমারে যাহ্, মাত্তর্ মুই তরে যিয়েনি কোম্ তুই বানা সিয়েনি গুরিবে।” বিলিয়মর গাধীবো 21 তার্কেল্যে বেন্যে বিলিয়মে ঘুমোত্তুন্ উদিনে তার গাধীবো উগুরে গদি চাপিনে মোয়াবীয় নেতাগুনো সমারে গেলঅ, 22 মাত্তর্ তারে যাদে দেগিনে গোজেনে তা উগুরে অমহদ বেজার্ অলঅ। তারে মানা গুরিবাত্তে লগেপ্রভুর দূত্তো পদথ্ থিয়্যেইনে রলঅ। বিলিয়মে গাধীবো উগুরে চড়িনে যার্। তার্ দ্বিজন চাগর্ তা সমারে এলাক। 23 লগেপ্রভুর দূত্তো তলোয়ার আদত্ লোই থিয়্যেই থাগদে দেগিনে গাধীবো পদ্থান্ ছাড়িনে মাদন্দি লামি গেলঅ। গাধীবোরে আরঅ পদ্থান্ ফিরেইনে লোই যেবাত্তে বিলিয়মে তারে মারা ধুরিলো। 24 লগেপ্রভুর দূত্তো পরেদি দ্বিবে আংগুর ক্ষেদর সংমোধ্যেন্দি এক্কান চিবেচিপ্প্যে পদ উগুরে যেইনে থিয়্যেল। পদ্থানর দ্বিকিত্তেন্দি দেবাল এলঅ। 25 লগেপ্রভুর দূত্তোরে দেগিনে গাধীবো দেবালত্ কিয়্যেগান্ বাজেইনে গেলঅ। সেক্কে বিলিয়মর্ এক্কান টেঙত্ সাংগাদিক ঘজা লাগিলো। বিলিয়মে সেক্কে আরঅ গাধীবোরে মারা ধুরিলো। 26 ইয়েনর্ পরেদি লগেপ্রভুর দূত্তো উজেই এইনে পদ্থানর্ এন্ এক্কান চিবেচিপ্প্যে জাগাত্ থিয়্যেল যিয়েনত্ ডেনে-বাঙে ঘুরিবার্ পথ ন-এলঅ। 27 লগেপ্রভুর দূত্তো দেগিনে গাধীবো বিলিয়মরে নিইনে চুন্দুলগুরি পড়িলো। সেক্কে বিলিয়মে রাগ্ উদিনে লুুদিক্কোলোই গাধীবোরে মারিলো। 28 সেক্কে লগেপ্রভু গাধীবোর্ মুয়োন্ খুলি দিলো। তে বিলিয়মরে কলঅ, “মুই তরে কি গোজ্যংগে, তুই ইয়েন্দোই তিনবার মরে মারিলে?” 29 জোবত্ বিলিয়মে সেই গাধীবোরে কলঅ, “তুই মরে বেদমা বানেয়োচ্। মর্ আদত্ যুনি এক্কান তলোয়ার থেদঅ সালে ইক্কিনে মুই তরে মারে ফেলেদুং।” 30 গাধীবো বিলিয়মরে কলঅ, “মুই কি তর্ সেই গাধীবো নয় যিবে উগুরে তুই সারা জিংকানিগান্ চড়ি এচ্চ্যচ্? তঅ সমারে কি এধোক্ক্যেন বেবহার্ গরানা মর্ অভ্যাস?” বিলিয়মে কলঅ, “না, সিয়েন্ দ ন-গরচ্।” 31 ইয়েনর্ পরেদি লগেপ্রভু বিলিয়মর্ চোক্কুন্ খুলি দিলো আর তে লগেপ্রভুর দূত্তোরে তলোয়ার আদত্ গুরি পদ্থানর সংমোধ্যে থিয়্যেই থাগদে দেগিলো। সেক্কে তে মাদা নিগিরিনে মাদিত্ আদুপাড়িনে পড়িলো। 32 লগেপ্রভুর দূত্তো তারে পুযোর্ গুরিলো, “তর্ গাধীবোরে তুই ইয়েন্দোই তিনবার কিত্তে মারিলে? তুই মঅ মুজুঙোত্ মর্ বিরুদ্ধে যর্ বিলি মুই তরে মানা গুরিবাত্তে ইদু এচ্চ্যং। 33 গাধীবো মরে দেগিনে এই তিনবার মঅ মুজুঙোত্তুন্ সুরি যেইয়্যে। যুনি তে সুরি ন-যেদঅ, সালে মুই হামাক্কায়্ তরে এদক্কনে মারে ফেলেদুং আর গাধীবোরে বাঁজেই রাগেদুং।” 34 সেক্কে বিলিয়মে লগেপ্রভুর দূত্তোরে কলঅ, “মুই পাপ গোজ্যং। মুই বুঝি ন-পারং, তুই মরে মানা গুরিবাত্তে পদথ্ থিয়্যেই আগচ্। তুই যুনি বেজার্ অচ্ সালে মুই ফিরি যেম্।” 35 লগেপ্রভুর দূত্তো বিলিয়মরে কলঅ, “তুই উই মানুচ্চুনো সমারে যাহ্, মাত্তর্ মুই তরে যিয়েনি কবাত্তে কোম্ তুই বানা সিয়েনি কবে।” বিলিয়মে সেক্কে বালাকে পাদেয়্যে নেতাগুনো সমারে গেলঅ। 36 বিলিয়মর এজানার্ কধা শুনিনে বালাকে তারে আগ্বারেই নিবাত্তে অর্ণোন গাঙর্ পাড়ত্ মোয়াবীয়গুনোর শঅরত্ গেলঅ। এই শঅরান্ এলদে তার্ রেজ্যর্ শেজ দুঝিত্। 37 বালাকে বিলিয়মরে কলঅ, “মুই কি তরে যাদিমাদি ডাগি আনিবাত্তে ন-পাদাং? সালে কিত্তে তুই মইদু ন-এজচ্? তরে বক্শিজ্ দিবার্ খেমতা কি মর্ নেই?” 38 জোবত্ বিলিয়মে কলঅ, “মুই ইক্কিনে তইদু এচ্চ্যং। মাত্তর্ মর্ নিজোর্ কনঅ কধা কবার্ সাধ্য নেই। গোজেনে যে কধাগান্ মর্ মুয়োন্দি যোগেই দিবো মত্তুন বানা সিয়েনোই কুয়ো পুরিবো।” 39 ইয়েনর্ পরেদি বিলিয়মে বালাক সমারে কিরিয়ৎ-হুষোৎ আদামত্ গেলঅ। 40 বালাকে গোরু আর ভেড়াছাগল উৎসর্ব গুরিনে কিজু য়েরা বিলিয়মরে আর তা সমারে যে নেতাগুনে এলাক তারারে দিলো। 41 তার্ কেল্যে বেন্যেমাদান্ বালাকে বিলিয়মরে নেযেইনে বামোৎ-বাল মুড়োবোত্ গেলাক্। বিলিয়মে সিয়োত্তুন্ ইস্রায়েলীয়গুনোর্ এক্কো ভাগ দেগিলো। |
Copyright © 2021 Bangladesh Bible Society
Bangladesh Bible Society