গণাণা 18 - Chakma Bibleধর্মগুরু আর লেবীয়গুনোর কামানি 1 লগেপ্রভু হারোণরে কলঅ, “পবিত্র তাম্বুলোর বিরুদ্ধে যেদক্কানি অন্যেয় গরা অবঅ তার্ ভারান্ নেযা পুরিবো তত্তুন্, তর্ পূঅগুনোর আর তর্ বংশর অন্য মানুচ্চুনোর্। ইয়েনবাদে ধর্মগুরুর্ কামানিত্ যেদক্কানি অন্যেয় অবঅ তার ভারান্অ তত্তুন্ আর তর্ পূঅগুনোত্তুন্ বুয়োই নেযা পুরিবো। 2 তুই তর্ পুরোণি মানুচ্চুনোর্ গুট্টিত্তুন্ অন্য বেক্ লেবীয়গুনোরে লোই আন্, যেনে তমা সমারে মিজেইনে তারা সাক্ষ্য-তাম্বুলো মুজুঙোত্ সেবা কামত্ তরে আর তর্ পূঅগুনোরে সাহায্য গুরি পারন। 3 তর্ অধীনোত্ থেইনে সাক্ষ্য-তাম্বুলোর বেক্ কামানি তারাত্তুন্ গরা পুরিবো, মাত্তর্ পবিত্র তাম্বুলোর কনঅ জিনিজো ইদু বা পূজোবো ইদু তারা যেই ন-পারিবাক্। সিয়েন গুরিলে তুমি আর তারা বেক্কুনে মারা পুড়িবা। 4 তারা তর্ কামত্ মিজেবাক; মিলন-তাম্বুলোর দেগাশুনোর ভারান্, অত্তাৎ সেই তাম্বুলোর বেক্ কামর্ ভারান্ তারা উগুরে থেবঅ। মাত্তর্ তমা ইদু লেবীয়গুনে বাদে অন্য কনজনে যেই ন-পারিবাক্। 5 ইস্রায়েলীয়গুনো উগুরে যেনে আরঅ মর্ রাগ্কান্ ফগদাং ন-অয় সেনত্তে পবিত্র তাম্বুলোর আর পূজোবো দেগাশুনো গুরিবার্ ভারান্ তমা উগুরে থেবঅ। 6 দান ইজেবে তমা আদত্ তুলি দিবাত্তে মুই নিজেই ইস্রায়েলীয়গুনো ভিদিরেত্তুন্ লেবীয়গুনোরে বেঈ লোইয়োং। মিলন-তাম্বুলোর কাম গুরিবাত্তে লগেপ্রভু ইদু তারারে উৎসর্ব গরা ওইয়্যে। 7 মাত্তর্ ধর্মগুরু্ ইজেবে বানা তুই আর তর্ পূঅগুনে পূজোবোর আর পর্দার ভিদিরে কামানি গুরি পারিবাক্। ধর্মগুরুর্ কামান্ মুই দান ইজেবে তমারে দুয়োঙর্। লেবীয়গুনে বাদে আর কনজনে যুনি মিলন-তাম্বুলোর চাগালা ইদু এজন্ সালে তারে মারে ফেলা অবঅ।” ধর্মগুরু আর লেবীয়গুনোর পাওনা 8 ইয়েনর্ পরেদি লগেপ্রভু হারোণরে কলঅ, মইদু যেদক্কানি জিনিস উৎসর্ব গরা অয় সিয়েনর বেক্ কামর্ ভারান মুই নিজে তরে দুয়োঙর্। মঅ নাঙে ইস্রায়েলীয়গুনোর উৎসর্ব গোজ্যে বেক্ পবিত্র জিনিসছানি মুই তরে আর তর্ বংশধরুনোরে নিত্য পাওনা ইজেবে দুয়োঙর্। 9 দাঙর পবিত্র উৎসর্বত্তে, অত্তাৎ শোজ্য-উৎসর্ব, পাপ-উৎসর্ব আর দুষ্-স্বীগেরত্তে ইস্রায়েলীয়গুনে মইদু যিয়েনি আনিবাক্ আর যে ভাক্কান্ পূজোবোর আগুনোত্ ন-পুড়িবা সিয়েনি তুমি নিবা; সিয়েনি অবঅ তমার আর তমার বংশধরুনোর পাওনা। 10 সুদ্ধো-সাংগ জিনিস যেধোক্ক্যেনগুরি খায় তুমি সেধোক্ক্যেন গুরি সিয়েনি হেবা। তমার বেক্ মরদ্ পূঅগুনে সিয়েনি খেই পারিবাক। সিয়েনি সুদ্ধো-সাংগ বিলি তারাত্তুন্ মনে গরা পুরিবো। 11 ইস্রায়েলীয়গুনোর দিয়্যে বেক্ দোলন-উৎসর্বর জিনিস্চানিয়ো তর্ অবঅ। সিয়েনি মুই তরে আর তর্ বংশর বেক্কুনোরে নিত্য পাওনা ইজেবে দুয়োঙর্। তর্ পরিবার ভিদিরে যিগুনে সিজি অবস্থায় থেবাক্ তারা সিয়েনি খেই পারিবাক্। 12 “ইস্রায়েলীয়গুনে তারার পত্তমে তুল্যে ফলুনোর বেগত্তুন্ গম্ যে জলপাইয়র্ তেল, নূয়া আংগুরো-রস আর শোজ্য লগেপ্রভুরে দিবাক সিয়েনি বেক্কানি মুই তরে দিলুং। 13 লগেপ্রভু ইদু আন্যে তারার ভূইয়োর পত্তম্ ফলুন তর্ অবঅ। তর্ পরিবারত্ যিগুনে সিজি অবস্থায় থেবাক তারা সিয়েনি খেই পারিবাক্। 14 ইস্রায়েলীয়গুনো ভিদিরে ভস্তর্ অভিশাব বিলি জানেই দিয়্যে পত্তি জিনিস-পাদিনি তর্ অবঅ। 15 লগেপ্রভু ইদু ইস্রায়েলীয়গুনোর উৎসর্ব গোজ্যে পত্তিঘরর পত্তম মরদ পূঅবো তর্ অবঅ-তে মান্জ্যর ওক্ বা য়েমানর ওক্। মান্জ্যর পত্তম মরদ পূঅবোরে তুই হামাক্কায় উদ্ধোর্ গুরিবে আর অসিজি য়েমানর পত্তম চেলা ছঅবোরেয়ো তুই উদ্ধোর্ গুরিবে। 16 একমাস বয়স অনার পরেদি ঠিগ্ গোজ্যে উদ্ধোরর দামে, অত্তাৎ দশ গ্রাম ওজনর্ ধর্মীয় শেখেলর পাঁচ শেখেল রূবোলোই, মান্জ্যর পত্তম মরদ পূঅবোরে তুই উদ্ধোর্ গুরিবে। 17 মাত্তর্ পত্তম জোর্মেয়ে এধোক্ক্যেন চেলা ছঅ বা ভেড়াছাগলর বা ছাগলর পাদা ছঅ ছাড়েই নেযানা ন- চলিবো। ইগুন্ সুদ্ধো-সাংগ। তুই পূজোবো উগুরে সিগুনোর লোনি ছিদি দিবে আর আগুন্দোই-গোজ্যে উৎসর্ব ইজেবে তারার তেলানি পুড়ি ফেলেবে। ইয়েনর তুম্বাজে লগেপ্রভু খুজি অয়। 18 দোলন-উৎসর্বর বুগো য়েরানি আর ডেনেন্দি উলুহুলোর য়েরানি ধোক্ক্যেন ইগুনোর য়েরানিয়ো তর্ পাওনা অবঅ। 19 লগেপ্রভুর নাঙে ইস্রায়েলীয়গুনোর উৎসর্ব গোজ্যে বেক্ সুদ্ধো-সাংগ জিনিস্-পাদিনি মুই তরে আর তর্ ঝি-পূঅগুনোরে নিত্য পাওনা ইজেবে দিলুং। ইয়েনি লগেপ্রভুর চোগোত্ তর্ আর তর্ বংশর বেক্কুনোত্তে এক্কান উমরত্যে ঠিগেদে সুদোম্।” 20 ইয়েনর্ পরেদি লগেপ্রভু হারোণরে কলঅ, ইস্রায়েলীয়গুনোর দেজত্ তুই কনঅ সোম্বোত্তির গিরোজ্ ন অবে আর ভুই-জোবিনোর্ কন ভাগঅ তুই ন পেবে। ইস্রায়েলীয়গুনো ভিদিরে মুয়ই তর্ পাওনা ভাগ, মুয়ই তর্ সোম্বোত্তি। 21 “ইস্রায়েলীয়গুনে তারার্ আয়র্ যে দশ ভাগর এক ভাগ মরে দিবাক সিগুন্ মুই পাওনা ইজেবে লেবীয়গুনোরে দিলুং। মিলন-তাম্বুলোর সেবা কামর্ বদলে তারা সিয়েনি পেবাক। 22 ইক্কিনেত্তুন্ ধুরি অন্য ইস্রায়েলীয়গুনে আর মিলন-তাম্বুলো ইদু যেই ন-পারিবাক্। সিয়েনি গুরিলে তারা তারার পাপর্ ফল ভোগ গুরিবাক আর মুরি যেবাক্। 23 লেবীয়গুনে মিলন-তাম্বুলো কাম্ গুরিবাক আর সে পৌইদ্যেনে তারার্ বেক্ অন্যেইয়ানিত্তে তারাই দায়ী অবাক্। বংশর পর বংশ ধুরিনে ইয়েনোই অবঅ এক্কান উমরর্ সুদোম্। অন্য ইস্রায়েলীয়গুনো ভিদিরে লেবীয়গুনে কনঅ সোম্বোত্তির গিরোজ্ ন-অবাক্। 24 সিয়েনর বদলে ইস্রায়েলীয়গুনে লগেপ্রভু ইদু দান ইজেবে তারার আয়র্ যে দশ ভাগর এক ভাগ্ আনিবাক্ সিগুনোই মুই পাওনা ইজেবে তারারে দিলুং। সেনত্তে মুই লগেপ্রভু তারা পৌইদ্যেনে কঙর্, লেবীয়গুনে অন্য ইস্রায়েলীয়গুনো ভিদিরে কনঅ সোম্বোত্তির গিরোজ্ ন-অবাক্।” 25-26 ইয়েনর্ পরেদি লগেপ্রভু মোশিরে কলঅ লেবীয়গুনোরে এই কধাগান্ কবাত্তে, অন্য ইস্রায়েলীয়গুনোর আয়র্ যে দশ ভাগর্ এক ভাগ্ মুই তমারে পাওনা ইজেবে দুয়োঙর্ সিগুন পেবার পরেদি সিয়োত্তুন্ দশ ভাগর্ এক ভাগ্ লগেপ্রভুর নাঙে তমার্ উৎসর্ব গরা পুরিবো। 27 এই উৎসর্ববো তমার পক্ষে তমার্ নিজোর খামার-ঘরর ফসল আর নিজোর মাজ্যে আংগুরো-রস ইজেবে ধরা অবঅ। 28 তুমি অন্য ইস্রায়েলীয়গুনোত্তুন্ তারার্ আয়র্ যে দশ ভাগর একভাগ পেবা সে ভিদিরেত্তুন্ এধোক্ক্যেনগুরি তমাত্তুনো লগেপ্রভুর নাঙে কিজু উৎসর্ব গরা পুরিবো। এই দশ ভাগর এক ভাগত্তুন্ লগেপ্রভুর ভাক্কো তুমি ধর্মগুরু হারোণর আদত্ দিবা। 29 যেদক্কানি তমারে দিয়্যে অবঅ সে ভিদিরেত্তুন্ বেগত্তুন্ গম্ ভাক্কো, যিয়েনি লগেপ্রভুর নাঙে যুদো গুরি রাগেয়্যে, সিয়েনির বেক্কানি তুমি লগেপ্রভুর পাওনা ইজেবে দিবা। 30 “বেগত্তুন্ গম্ ভাক্কো লগেপ্রভুরে দেনার পরেদি যিয়েনি বাগি থেবঅ সিয়েনি তমার পক্ষে তমার্ নিজোর্ খামার-ঘরর্ ফসল আর নিজে মাজ্যে আংগুরো-রস ইজেবে ধরা অবঅ। 31 তুমি আর তমার পরিবারর মানুচ্চুনে যে কনঅ জাগাত্ সিয়েনি খেই পারিবাক্ কিত্যে সিয়েনিই অবঅ মিলন-তাম্বুলোত্ তমার কাম্ গোজ্যে বেতন। 32 ইয়েনত্ তমার কনঅ দুষ্ ন-অবঅ, কিত্যে বেগত্তুন্ গম্ ভাক্কান্ তুমি লগেপ্রভুরে দুয়ো। সালে তুমি ইস্রায়েলীয়গুনোরে দিয়্যে সুদ্ধো-সাংগ জিনিস্-পাদিনি অসিজি গরানার্ দুজে দুষী ন-অবা আর তুমি মুরিয়ো ন-যেবা।” |
Copyright © 2021 Bangladesh Bible Society
Bangladesh Bible Society