গণাণা 16 - Chakma Bibleকোরহ, দাথন আরঅ অবীরামে 1-2 লেবী-গুট্টির যিষ্হরর পূঅ কোরহ আর রূবেণ-গুট্টির ইলীয়াবর পূঅ দাথন আর অবীরাম আর পেলতর পূঅ ওন মোশির বিপক্ষে থিয়্যেলাক্। কোরহ এলদে লেবির পূঅ কহাতের নাদিন্। ইগুনো সমারে মিজেলাক্ দুইশ পঁঞ্চাশ জন ইস্রায়েলীয় যিগুনে এলাক সমাজর নাঙ্-গোজ্যে বেঈ লোইয়্যে নেতা। 3 তারা মোশি আর হারোণর বিপক্ষে দল বুদি এইনে কলাক্, “তুমি অমকদ বাড়াবাড়ি গরর্। গোদা ইস্রায়েলীয় সমাজ্সো পত্তিজনই লগেপ্রভুর নাঙে যুদো গোজ্যে আর লগেপ্রভুয়ো তারা সমারে আঘে। মাত্তর্ তুমি কিত্তে লগেপ্রভুর মানুচ্চুনো উগুরে নিজোরে তুলি ধোজ্য?” 4 এই কধাগান শুনিনে মোশি মাদি উগুরে আদু পাড়িনে পড়িলো। 5 তে কোরহ আর তার দলর মানুচ্চুনোরে কলঅ, “এযেত্যেকেল্যে বেন্যেমাদান্ লগেপ্রভু দেগেই দিবো কন্না তার মানুচ্ আর কন্না তার নাঙে যুদো গোজ্যে। তেয়ই সেই মানুচ্চোরে তা মুজুঙোত্ যেবাত্তে দিবো। যিবেরে তে বেঈ লবঅ তারে তে তা মুজুঙোত্ যেবাত্তে দিবো। 6-7 কোরহ, তুই আর তর্ দলর মানুচ্চুনে এক্কান্ কাম্ গুরিবাক। তুমি পৌইরেগ কদরা নেযেইনে এযেত্যেকেল্যে লগেপ্রভুর মুজুঙোত্ সিবে ভিদিরে আগুন আর পৌইরেগ দিবা। লগেপ্রভু যিবেরে বেঈ লবঅ বুঝো পুরিবো-তেয়ই তার নাঙে যুদো গোজ্যে মানুচ্। তুমি লেবীয়গুনে অমহদ বাড়াবাড়ি গরর্।” 8 মোশি কোরহরে আরঅ কলঅ, “তুমি লেবীয়গুনে ইক্কিনে মঅ কধাগান্ শুনো। 9 ইয়েনই কি তমার পক্ষে যগাজ্যে নয়, ইস্রায়েলীয়গুনোর গোজেন সমাজর অন্য মানুচ্চুনোত্তুন্ তমারে যুুদো গুরিনে নিজো ইদু আন্যে যেনে তুমি লগেপ্রভুর থেবার-তাম্বুলানর্ কাম্ গুরি পারঅ আর সমাজর্ মানুচ্চুনোরে সেবা গুরিবাত্তে তারার মুজুঙোত্ থিয়্যেই পারঅ? 10 তে তরে আর অন্য বেক্ লেবীয়গুনোরে নিজোর্ ইদু আন্যে, মাত্তর্ তুমি ইক্কিনে ধর্মগুরুগুনোর পদ্থানঅ গজক্ গুরি নিবাত্তে চঅর্। 11 তুই আর তর্ দলর্ বেক্ মানুচ্চুনে লগেপ্রভুর বিপক্ষে দল পাগেয়ো। হারোণে যে কন্না, তুমি তার বিপক্ষে বক্বক্ গরর্?” 12 ইয়েনর্ পরেদি মোশি ইলীয়াবর পূঅ দাথন আর অবীরামরে ডাগিনে পাদেল মাত্তর্ তারা কোই পাদেলাক, “আমি ন-যেবং। 13 তুই এই ধূল্যেচর-চাগালাত্ মারে ফেলেবাত্তে এধোক্ক্যেন দেজত্তুন্ আমারে নিগিলেই আন্ন্যচ্ যিয়েনত্ দুধ, মধু আর কনঅ কিজুর অভাব ন-এলঅ। ইয়েনই কি যগাজ্যে নয়? সিয়েন উগুরে ইক্কিনে আর আমার্ নেতা অবাত্তে চঅর্। 14 ইয়েনবাদে তুই দঅ সেধোক্ক্যেন কনঅ দুধ আর মধুুলোই ভোজ্যে দেজত্ আমারে ন-নেযাচ্ বা ভুই-জবিন্ আর আংগুর্ ক্ষেদর অধিকারঅ্ ন-দুয়োচ্। তুই কি এই মানুচ্চুনোরে চোগকান্ গুরি রাগেবাত্তে চর্? না, আমি ন-যেবং।” 15 এই কধাগান্ শুনিনে মোশি অমহদ রাগ্ তুলিনে লগেপ্রভুরে কলঅ, “তুই তারার উৎসর্বগানি গুজি ন-লোচ্। মুই তারাত্তুন্ এক্কো গাধায়ো ন-নেযাং আর তারার কনঅ ক্ষোতিয়ো ন-গরং।” 16 সে পরেদি মোশি কোরহরে কলঅ, এযেত্যেকেল্যে তত্তুন্ আর তর্ দলর্ বেক্কুনোত্তুন লগেপ্রভুর মুজুঙোত্ আঝিল্ উয়ো পুরিবো। তুই আর তর্ দলর্ মানুচ্চুনোত্তুন আর সে সমারে হারোণত্তুনঅ আঝিল্ উয়ো পরিবো। 17 পত্তি জনত্তুন্ তার্ পৌরেগর্ কদরাত্ পৌইরেগ্ দিয়া পুরিবো; বেক্কুনে দুইশ পঞ্চাশচুয়ো পৌইরেগর্ কদরাত্ পৌইরেগ্ দিইনে লগেপ্রভুর মুজুঙোত্ সিগুন্ উৎসর্ব গরা পুরিবো। তত্তুন্ আর হারোণত্তুন পৌইরেগর্ কদরাত্ পৌইরেগ্ উৎসর্ব গরা পুরিবো। 18 মোশি কধা মজিম্ পত্তিজনে নিজোর নিজোর পৌইরেগর্ কদরাত্ আগুন আর পৌইরেগ লোইনে মিলন-তাম্বুলোর দোরান মুজুঙোত্ মোশি আর হারোণ সমারে যেইনে থিয়্যেলাক্। 19 কোরহ যেক্কে মোশি আর হারোণর বিপক্ষে সমাজর বেক্ মানুচ্চুনোরে এগত্তর্ গুরিনে মিলন-তাম্বুলোর দোরান ইদু যেইনে থিয়্যেলাক্ সেক্কে তারার্ বেক্কুনো মুজুঙোত্ লগেপ্রভুর মহিমাগান্ দেগা দিলো। 20 লগেপ্রভু মোশি আর হারোণরে কলঅ, 21 “তুমি অন্য বেক্ মানুচ্চুনোত্তুন্ যুদো ওই যঅ, যেনে মুই তারারে এই অক্তবোত্ শেজ্ গুরি দি পারং।” 22 মাত্তর্ মোশি আর হারোণে মাদিত্ আদু পাড়ি পড়িনে কলাক্কে, “ও গোজেন, তুই বেক্ মানুচ্চুনোর পরাণর গিরোজ্। বানা এক্কো মান্জে পাপ গোজ্যে বিলি কি তুই গোদা ইস্রায়েলীয় সমাজ উগুরে তর্ রাক্কান্ দেগেবে?” 23 সেক্কে লগেপ্রভু মোশিরে কলঅ, 24 “তুই ইস্রায়েলীয়গুনোরে কোই দে যেনে তারা কোরহ, দাথন আর অবীরামর তাম্বুলোর ইত্তুন্ সুরিই যান।” 25 এই কধাগান শুনিনে মোশি উদিনে দাথন আর অবীরামর ইদু গেলঅ আর ইস্রায়েলীয় বুড়ো নেতাগুনে তাঁর পিজে পিজে গেলাক্। 26 মোশি ইস্রায়েলীয়গুনোরে কলঅ, “তুমি এই পাজি মানুচ্চুনোর্ তাম্বুলো কায়কুরেত্তুন্ সুরি যঅ। তারার কনঅ জিনিস তুমি ন-ধোজ্য; যুনি সিয়েন্ গরঅ সালে তারার্ পাবত্তে তমারেয়ো শেজ্ গুরি ফেলা অবঅ।” 27 এই কধাগান শুনিনে মানুচ্চুনে কোরহ, দাথন আর অবীরামর্ তাম্বুলো ইত্তুন্ সুরিই গেলাক্। সে সময়োত্ দাথন আর অবীরামে তারার মোক্কুনোরে আর চিগোন-দাঙর ঝি-পূঅগুনোরে লোইনে তাম্বুলো দোরোন ইদু নিগিলি এইনে থিয়্যেই রলাক। 28 মোশি সেক্কে ইস্রায়েলীয়গুনোরে কলঅ, “ইয়োত্তুনোই তুমি বুঝি পারিবা, মুই যিয়েন্ গরঙর্ সিয়েন গুরিবাত্তে লগেপ্রভুই মরে পাদেয়্যে; ইয়েন মর্ মনে মন্গজ্জা কিচ্ছু নয়। 29 এই বেক্ মানুচ্চুনোর যুনি স্বাভাবিক মরণ অয়, আর অন্য মানুচ্চুনোর যেধোক্ক্যেন অয় সেধোক্ক্যেন্ যুদো গুরি কিচ্ছু ন-অয় সালে বুঝো পুরিবো লগেপ্রভু মরে ন-পাদায়। 30 মাত্তর্ লগেপ্রভু যুনি পুরোপুরি নূয়া কিজু গরে আর পিত্থিমীগানে মুয়ান্ খুলিনে যুনি তারারে আর তারার বেক্কানি গিলি ফেলায় আর যুনি তারা জেদা বাদে গোরত্ যান্দোই সালে তুমি বুঝি পারিবা, এই মানুচ্চুনে লগেপ্রভুরে ঈচ্ গোজ্যন।” 31 মোশির এই কধাগান কনার্ শেজ্ অদে ন অদে সেই বেক্ মানুচ্চুনোর টেঙর্ তলেদি মাদিগান দ্বিভাগ ওই গেলঅ, 32 আর পিত্থিমীগানে মুয়োন খুলিনে কোরহর পরিবারর বেক্ মানুচ্চুনোরে আর বেক্কানি গিলি ফেলেল। 33 তারার যেদক্কানি এলঅ বেক্কানি নেযেইনে তারা জেদা অবস্থায় গোরত্ গেলাক্। পরেদি তারা উগুরে সেই ফাদাগান বন্ধ ওই গেলঅ। 34 তারার কাঁনা-কুদিলোই চেরোকিত্তে বেক্ ইস্রায়েলীয়গুনে জগার্ পারিনে এই কধাগান্ কদে কদে দাবা দিলাক্, “পিত্থিমীগানে অয়ত আমারেয়ো গিলি ফেলেব।” 35 ইন্দি যে দিশঅ পঞ্চাশজন মান্জ্যে পৌইরেগ্ উৎসর্ব গোজ্যন্ লগেপ্রভু ইত্তুন্ আগুন্ নিগিলি এইনে তারারে পুড়ি ফেলেল। 36 লগেপ্রভু মোশিরে কলঅ, 37 “তুই ধর্মগুরু হারোণর পূঅ ইলীয়াসররে কোই দে যেনে তে সেই পোড়া জাগাত্তুন্ পৌইরেগর্ কদরাগুন নিগিলেই আনিনে আঙারাগুন কিজু দূরোত নেযেইনে ছিদি দে, কিত্যে পৌইরেগর্ কদরাগুন মর্ নাঙে যুদো গরা ওইয়্যে। 38 পাপ গুরিবার্ কারনে যিদুক্কুন মানুচ্ মুরি যেইয়োন পৌইরেগর্ কদরাগুন্ তারার। মাত্তর্ সিগুন্ লগেপ্রভুর মুজুঙোত্ আঝিল্ গরা ওইয়্যে বিলিনে সিগুন্ তাঁর নাঙে যুুদো গরা ওইয়্যে। সেনত্তে তুমি সিগুন্ পিদেনেই চাগা গুরিনে সিগুন্দোই পূজোবো নাঢি দুয়ো। ইয়েন্ যেনে ইস্রায়েলীয়গুনো ইদু এক্কান চিহ্নো ওই থায়।” 39 যে মানুচ্চুনোরে পুড়িনে মারে ফেলা ওইয়্যে তারার্ আন্যে পিদলর পৌইরেগর্ কদরাগুন্ ধর্মগুরু্ ইলীয়াসরে এগত্তর্ গুরিলো। সে পরেদি পূজোবো ঢাগিবাত্তে তে সিগুনোরে পিদেইনে চাগা গুরি ফেলেল। 40 মোশিরে দিইনে লগেপ্রভু তারে যে উগুমান দিয়্যে তে সিয়েনোই গুরিলো। ইয়েন গরা অলঅ যেনে ইস্রায়েলীয়গুনে মনত্ রাগান, হারোণর বংশধর বাদে আর কনজনে পৌইরেগ্ জ্বালেবাত্তে লগেপ্রভুর মুজুঙোত্ যেই ন-পারন; যুনি কনজনে যান্ সালে তার্ অবস্থা কোরহ আর তার দলর মানুচ্চুনো ধোক্ক্যেন অবঅ। 41 সে পরেদি দিন্নোত্ ইস্রায়েলীয় সমাজর্ বেক্কুনে মোশি আর হারোণর বিপক্ষে বক্বক্ গরা দোজ্যন্ আর কলাক্, “তুমিই লগেপ্রভুর মানুচ্চুনোরে মারে ফেল্ল্য।” 42 মাত্তর্ যেক্কে সমাজর্ বেক্ মানুচ্চুনে মোশি আর হারোণর বিপক্ষে এগত্তর্ ওইনে মিলন-তাম্বুলো ইন্দি ঘুরিনে থিয়্যেলাক্ সেক্কে অদাদৎ্ মিলন-তাম্বুলান সে মোক্ক্যেন্দি ঢাগি গেলঅ আর লগেপ্রভুর মহিমা ফুদি উদিলো। 43 সেক্কে মোশি আর হারোণে মিলন-তাম্বুলো মুজুঙোত্ গেলাক্, 44 আর লগেপ্রভু মোশিরে কলঅ, 45 “তুমি ইগুনোত্তুন্ সুরি যঅ; মুই ইক্কুনি ইগুনোরে শেজ্ গুরি ফেলেম্।” এই কধাগান শুনিনে তারা মাদিত্ আদু পাড়িনে পুরিলাক। 46 সে পরেদি মোশি হারোণরে কলঅ, “তর্ পৌইরেগর্ কদরাবো লোইনে সিয়েনত্ পূজোবোত্ আগুন ভোরেইনে তা উগুরে পৌইরেগ্ দিচ্ আর যাদিগুরি সেই মানুচ্চুনো ইদু যেইনে তারার্ পাপ্পানি ঢাগিবার্ বেবস্থা গর্। লগেপ্রভুর রাগ্কান্ ফগদাং অলঅ, ভানাপিড়ে আরাম্ভ ওই গেলঅ।।” 47 সেক্কে হারোণে মোশির কধা মজিম পৌইরেগর্ কদরাবোত্ আগুন আর পৌইরেগ দিইনে সেই বেক্ মানুচ্চুনো ভিদিরে গেলঅ। এ সময়ানত্ মানুচ্চুনো ভিদিরে ভানাপিড়ে আরাম্ভ ওই গেলঅ, মাত্তর্ হারোণে পৌইরেগ্ উৎসর্ব গুরিনে তারার্ পাপ্পানি ঢাগি দিবার বেবস্থা গুরিলো। 48 তে জেদা আর মরাগুনোর্ সংমধ্যে যেইনে থিয়্যেল আর ভানাপিড়েগান্ থামেল। 49 কোরহর কারনে যিগুনে মুরি যেইয়োন্ তারা বাদে আরঅ চৌদ্দো আজার্ সাতশত মানুচ্ ভানাপিড়েলোই মুরি গেলাক্। 50 ভানাপিড়েগান্ থামেই যানার পরেদি হারোণে মিলন-তাম্বুলোর দোরানত্ মোশি ইদু ফিরি গেলঅ। |
Copyright © 2021 Bangladesh Bible Society
Bangladesh Bible Society