গণাণা 14 - Chakma Bibleইস্রায়েলীয়গুনোর উল্লোমী গরানা 1 এই কধাগান্ শুনিনে ইস্রায়েলীয়গুনে বেক্কুনে জয়-জগার গরা ধোজ্যন। তারা গোদা রেদ্তো ধুরিনে কানাকুদি গুরিলাক্। 2 মোশি আর হারোণর বিরুদ্ধে তারা নানান কধা কলাক্। তারা বেক্কুনে মিলিনে তারারে কলাক্, “মিসর দেজত্ বা এই ধূল্যেচর চাগালাত্ মুরি যানাগানই আমার উজিত এলঅ। 3 যুদ্ধোত্ মুরি যেবাত্তে কিত্তে লগেপ্রভু আমারে সেই দেজত্ নেযার্? তারা আমার মোক্ আর ঝি-পূঅগুনোরে কারি নিবাক্। ইয়োত্তুন্ মিসরত্ ফিরি যানা আমার উজিত এলঅ।” 4 তারা একজন আরেকজনরে কলাক্, “যঅ, এক্কো নেতা ঠিগ্ গুরি নেযেইনে আমি মিসরত্ ফিরি যেই।” 5 এই অবস্থাগান্ দেগিনেই মোশি আর হারোণে ইস্রায়েলীয়গুনোর পুরো দল্লো মুজুঙোত্ মাদিত্ আদু পাড়িনে পরিলাক। 6-7 যিঁগুনে সেই দেজর্ খোঁজ-খবর নিবাত্তে যেইয়োন্ তারা ভিদিরেত্তুন্ সেক্কে নূনোর পূঅ যিহোশূয়ো আর যিফুন্নির পূঅ কালেব তারার্ কাবড় ফাঁদিনে ইস্রায়েলীয়গুনোর্ পুরো দল্লোরে কলাক্, “আমি যে দেজ্চান্ চেবাত্তে যেইয়্যেই সিয়েন্ এক্কান্ অমহদ দোল্ দেজ্। 8 লগেপ্রভু যুনি আমা উগুরে বেজার ন-থায়্ সালে সেই দেজ্চানত্ তে আমারে নেযেব যিয়েনত্ দুধ, মধু আর কনঅ কিজুর অভাব নেই, আর তে সিয়েনি আমারে দিবো। 9 সালে তুমি লগেপ্রভুর বিরুদ্ধে উল্লোমী ন-গোজ্য। তুমি সেই দেজর্ মানুচ্চুনোরে ন-দোরেইয়ো; তারারে গিলি খাদে আমার্ দেরি ন-অবঅ। তারারে আর রোক্ষ্যে গুরিয়ে নেই। তারারে তুমি ন-দোরেয়ো কিত্যে লগেপ্রভু আমা লগে আঘে।” 10 মাত্তর্ দলর বেক্কুনে যিহোশূয় আর কালেবরে পাত্তর্ মেলা দিইনে মারে ফেলেবার কধা কুয়া ধোজ্যন। সেক্কে মিলন-তাম্বুলোত্তুন বেক্ ইস্রায়েলীয়গুনোর্ মুজুঙোত্ লগেপ্রভুর মহিমা দেগা দিলো। 11 লগেপ্রভু মোশিরে কলঅ, “আর কয়দিন এই মানুচ্চুনে মরে ইংসে-নিন্দে গুরিবাক? তারা ভিদিরে মুই যেদক্কানি আমক্ অবার্ চিহ্নো দেগেয়োং তার্ পরেদিয়ো আর কয়দিন তারা মরে অবিশ্বেজ্ গুরিবাক? 12 মুই এক্কান্ দাঙর্ পিড়ে আনিম্ আর এগেম্ গোজ্যে দেজর্ অধিকারানি তারাত্তুন্ কাড়ি নেযেম, মাত্তর্ তঅ ভিদিরেত্তুন্ মুই তারাত্তুনো বেশ্ দাঙর্ আর বোলী এক্কো জাদ্ সৃট্টি গুরিম্।” 13 এই কধাগান্ শুনিনে মোশি লগেপ্রভুরে কলঅ, সিয়েন্ যুনি গরচ্ সালে কধাগান্ মিসরীয়োগুনোর্ কানত্ যেবঅ। তারা ভিদিরেত্তুন্ দঅ তুই তর্ নিজোর্ খেমতায়্ এই বেক্ মানুচ্চুনোরে লোই এচ্চ্যস্। 14 সেই কধাগান্ সেক্কে মিসরীয়োগুনে এই দেজর্ মানুচ্চুনোরেয়ো কবাক্। ও লগেপ্রভু, এ ভিদিরে এ দেজর্ মানুচ্চুনে শুন্যন্দে, তুই ইস্রায়েলীয়গুনো সমারে আগচ্, আর ও লগেপ্রভু, তরে অমহদ কায়-কুরেত্তুন্ দেগা যায়। তারা শুন্যন্দে, তর্ মেক্কান্ ইগুনো উগুরে আঘে আর দিনোত্ তুই মেঘ আন্দলে আর রেদোত্ আগুনো আন্দল ভিদিরেত্তুন্ ইগুনোর্ আগে আগে আদচ্। 15 সেনত্তে তুই যুনি ইগুনোরে বেক্কুনোরে এক সমারে মারে ফেলাচ্ সালে যিদুক্কুন্ জাদ্ তর্ পৌইদ্যেনে সেই কধানি শুন্যন্ তারা কবাক্কে, 16 লগেপ্রভু সেই মানুচ্চুনো ইদু যে দেজ্চান্ দিবার্ শমক্ গোজ্যে সিয়েনত্ লোই যেবার্ খেমতা নেই বিলিই তে ধূল্যেচর-চাগালাত্ তারারে মারে ফেলেয়্যে। 17 “ইক্কিনে ও প্রভু, তুই তর্ খেমতা দেগা। তুই দঅ ফগদাং গোজ্যচ্, 18 ‘লগেপ্রভু এনেবাদে বেজার্ ন অয়, তার কোচ্পানার্ শেজ্ নেই আর তে অন্যেয় আর উল্লোমিগানি ক্ষেমা গরে, মাত্তর্ দুষীগুনোরে তে সাজা দে; তে বাবর্ অন্যেয়র্ সাজা তার্ বংশর তিন আর চের্ পুরুষ সং দি থায়।’ 19 মিসর দেজ্চান্ ফেলেই এজানার্ সময়ত্তুন্ ধুরি ইক্কিনে সং তুই যেধোক্ক্যেন গুরি তারারে ক্ষেমা গুরি এজর্ সেধোক্ক্যেন তর্ সেই অমহদ কোচ্পানা সমারে মিজেইনে তুই এই মানুচ্চুনোর্ অন্যেয়ানি ক্ষেমা গর্।” 20 সেক্কে লগেপ্রভু কলঅ, “তর্ কধা মজিম মুই তারারে পাপ্ ক্ষেমা গুরিলুং। 21 মাত্তর্ মুই বাঁজি আগং এই কধাগান যেধোক্ক্যেন সত্য আর গোদা দুনিয়েগান্ মর্ মহিমায়্ পরিবাদি এই কধাগান্ যেধোক্ষ্যেন সত্য সেধোক্ষ্যেন্ সত্য , 22-23 এই মানুচ্চুনোত্তুন্ একজনেয়ো সেই দেজ্চান্ চেই ন-পেবাক, যে দেজ্চান্ দিম্ বিলি মু্ই তারার্ পুরোণি মানুচ্চুনো ইদু শমক্ গোজ্যং। ইয়েনর্ কারণান্ অলঅ, এই মানুচ্চুনে মর্ মহিমাগান্ আর মিসরর্ ধূল্যেচর-চাগালাত্ দেগেয়্যে মর্ আমক্ অবার চিহ্নগানি দেগিনেয়ো মরে অগ্রাজ্য গোজ্যন আর দশ দশবার মরে যগা চেইয়োন। যিগুনে মরে ইংসে-নিন্দে গোজ্যন্ তারা কনজনে সেই দেজ্চান্ ন-দেগিবাক। 24 মাত্তর্ মর্ চাগর্ কালেবর মনত্ সেধোক্ক্যেন চিদে-সজ্জা নেই আর তে মর্ কধাগান্ পুরোপুরি মানি চলে। সেনত্তে যে দেজত্ তে যেইয়্যে মুই তারে সেই দেজত্ লোই যেম্ আর তার্ বংশধরুনে সিয়েনি সোম্বোত্তি ইজেবে পেবাক। 25 সেই কিঝিঙানিত্ ইক্কিনে অমালেকীয় আর কনানীয়োগুনে বজত্তি গত্তন্। তুমি এযেত্তে কেল্যে পিজেন্দি ফিরিনে আকাবা বড়গাঙর্ পত্থান্ ধুরিনে ধূল্যেচর-চাগালা ইন্দি যাহ্ ধুরিবা।” 26 ইয়েনর্ পরেদি লগেপ্রভু মোশি আর হারোণরে কলঅ, 27 “আর কয়দিন এই পাজি জাদ্তুনে মর্ বিরুদ্ধে বক্বক গুরিবাক? তারার্ বক্বক্ গরানা মুই শুন্যং।” 28 লগেপ্রভু মোশি আর হারোণরে কলঅ ইস্রায়েলীয়গুনোরে কবাত্তে, “মর্ জীংকানির্ দিব্য দিইনে কঙত্তে, মুই লগেপ্রভু তমারে যিয়েন্ কদে শুন্যং সেধোক্ক্যেন মুই তমাত্তে গুরিম। 29 তমা ভিদিরে কুড়ি বজর বা তাত্তুন্ বেশ্ বয়জর্ যিগুনোরে মানুচ্ গুণিবার্ সময় গোণা ওইয়্যে, অত্তাৎ যিগুনে মর্ বিরুদ্ধে বক্বক্ গোজ্যন, তারার্ মরাকিয়্যেগানি এই ধূল্যেচর-চাগালাত্ পড়ি থেবঅ। 30 বজত্তি গুরিবাত্তে যে দেজ্চান্ তমারে দিম্ বিলি মুই শমক্ গোজ্যং বানা যিফুন্নির পূঅ কালেবে আর নূনোর পূঅ যিহোশূয়ো বাদে আর কনজনে সেই দেজত্ চোমেই ন-পারিবাক। 31 তমার্ যে ঝি-পূঅগুনোরে কাড়ি নেযা অবঅ বিলি তুমি কোইয়ো সেই ঝি-পূঅগুনোরে মুই সে দেজত্ নেযেম। এই ঝি-পূঅগুনেই সেই দেজ্চান্ ভোগ্ গুরিবাক্ যিয়েন্ তুমি টেংগোই লাদি মাজ্য। 32 তমার্ মরা কিয়্যেগানি এই ধূল্যেচর-চাগালাত্ পড়ি থেবঅ। 33 তমার বেগঅ শেজন্দি মানুচ্চো এই ধূল্যেচর-চাগালাত্ মুরি ন-যানা সং তমার অবিশ্বেজর্ কারনে তমার্ ঝি-পূঅগুনে চোল্লিশ বজর্ সং ইয়েনত্ ভেড়াছাগল চোড়েেইনে বেড়েবাক্। 34 দেজ্চান চেই এত্তে যে চোল্লিশ দিন সময় লাক্কে তার্ পত্তি দিনোত্তে এক বজর্ গুরি বেক্কুনে চোল্লিশ বজর্ সং তুমি তমার্ অন্যেয়ত্তে দুঘ্ পেবা আর বুঝি পারিবাদে, মুই বিরুদ্ধে থেলে অবস্থাগান্ কেধোক্ক্যেন অয়। 35 এই পাজি জাদর্ মানুচ্চুনে যিগুনে মর্ বিরুদ্ধে দল পাগেয়োন্ তারা বেক্কুনে এই ধূল্যেচর জাগাদই শেজ্ ওই যেবাক। মুই লগেপ্রভু এই কধাগান কঙর্।” 36 দেজ্চানর্ খোঁজ-হবর আনিবাত্তে মোশির্ পাধেই দিয়্যে যে দল্লো ফিরি এইনে ভান্ন্যেই কধা ছোড়েই দিইনে মোশির বিরুদ্ধে বেক্ ইস্রায়েলীগুনোরে বক্বক্ গুরিবার উস্কানি দুয়োন, 37 অত্তাৎ যে মানুচ্চুনে সেই দেজ্চানর্ পৌইদ্যেনে ভান্ন্যেই কধা ছোড়েই দিবাত্তে দায়ী এলাক তারা বেক্কুনে লগেপ্রভুর মুজুঙোত ভানালোই মুরি গেলাক্। 38 বাঁজি রলাক্ বানা নূনোর পূঅ যিহোশূয়ো আর যিফুন্নির পূঅ কালেবে। 39 মোশি লগেপ্রভুর কধাগান্ বেক্ ইস্রায়েলীয়গুনোরে জানেল। সেক্কে মনত্ দুঘে তারা ভাঙি পড়িলাক। 40 তার্কেল্যে বেন্যেপোত্যে তারা সেই মুড়োমুরি চাগালা ইন্দি যেবাত্তে যুক্কোল্ ওইনে কলাক্, “আমি যের্। আমি পাপ গুরি ফেল্ল্যেই; ইক্কুনি আমি লগেপ্রভুর এগেম্ গোজ্যে দেজত্ যেবং।” 41 মাত্তর্ মোশি কলঅ, “তুমি লগেপ্রভুর উগুমোর্ বিরুদ্ধে কিত্তে যর্? তমার্ এই কামান্ গম্ ন-অবঅ। 42 তুমি ন-যেয়ো, কিত্যে লগেপ্রভু তমা সমারে নেই। শত্রুগুনো ইদু তুমি উদি যেবাগোই। 43 সিদু তুমি অমালেকীয় আর কনানীয়গুনোর মুজুঙোত্ পড়িবা। তুমি লগেপ্রভুত্তুন্ সুরি যেইয়ো বিলি তে তমা সমারে ন-থেবঅ। সেক্কে তুমি যুদ্ধোত্ মুরি যেবা।” 44 তো তারা দুঃসাহস গুরিনে সেই মুড়োমুড়ি চাগালা ইন্দি উজেই গেলাক্। মাত্তর্ মোশি ন-গেলঅ আর লগেপ্রভুর সুদোম-সিন্দুক্কোয়ো তাম্বুলো ভিদিরে রোই গেলঅ। 45 তারারে দেগিনে সেই মুড়োমুরি চাগালার্ অমালেকীয় আর কনানীয়গুনে লামি এইনে তারারে আক্রমণ গুরিলাক্ আর হর্মা শঅর সং তারারে লোড়েই নেযেলাক্। |
Copyright © 2021 Bangladesh Bible Society
Bangladesh Bible Society