গণাণা 11 - Chakma Bibleলগেপ্রভুর আগুন 1 ইস্রায়েলীয়গুনোর যেদক্কানি দুখ্-কট্ট অর্ সিয়েনিলোই তারা লগেপ্রভুর মুজুঙোত্ কিজিক্-মিজিক্ গরা ধোজ্যন্। সিয়েনি শুনিনে লগেপ্রভু অমহদ বেজার্ অলঅ। তার পাধেয়্যে আগুনান্ তারা ভিদিরে জ্বলা ধুরিলো আর তাম্বুলোর কাজা কুরেন্দি কিজু মান্জ্যরে পুড়িনে মারে ফেলেল। 2 সেক্কে মানুচ্চুনে মোশি ইদু কানাকুদি গরা ধুরিলাক আর তে লগেপ্রভু ইদু তবনা গুরিলো। সেক্কে আগুনান্ মুড়ি গেলঅ। 3 লগেপ্রভুর এই আগুনান্ তারা ভিদিরে জ্বলের্ সেনত্তে সেই জাগাগানর্ নাঙান্ অলঅ তবেরা। য়েরার বেবস্থা 4 ইস্রায়েলীয়গুনো লগে অন্য জাদর্ যে মানুচ্চুনে এলাক্ তারা আরেক বাবোত্যে হানার্ লুভে পাগল্ ওই উদিলাক। তারার্ মজুঙো-মুজুঙি ইস্রায়েলীয়গুনে আরঅ কানাকুদি গুরিনে কুয়ো ধুরিলাক, “হায়, যুনি আমি য়েরা হেই পেদং! 5 মিসর দেজত্ টেঙা-পোজে ছাড়া মাছ হেবার্ কধা আমার্ মনত্ উদে। ইয়েনিবাদে মাম্রা, খোর্মোজ্, পিঁয়েজ, পিয়েজর শাক্ আর রোনোর্ কধায়ো আমাত্তুন্ মনত্ উদের্। 6 মাত্তর্ ইক্কিনে আমার্ ভিদিরেন্দিয়ান্ শুগেই যেইয়্যে। মান্না বাদে আমার চোগোত্ আর কিচ্ছু ন-এজের্।” 7 মান্নার্ চেঙারাগান্ অলঅ বাগোর্ বীঝি ধোক্ক্যেন, আর সিগুন চাদেয়ো এলাক্কে গুগ্গুলুর ধোক্ক্যেন। 8 মানুচ্চুনে ঘুরি ফিরি সিগুন্ কুড়েইনে আনিদাক আর কল্লোই বা পাত্তর্লোই নিগুজ্ গুরি নিদাক। সিগুন্ তারা পিলেলোই উঝিদাক বা সিগুনদোই পিদে বানেদাক্। সিয়েরর্ চোত্তান্ এলদে জলপাইয়োর্ তেল দিইনে বানেয়ে পিদে ধোক্ক্যেন। 9 রেদোত্ তাম্বুলানর-চাগালাত্ শিরো পানি পুরিদো আর সিয়েন উগুরে পুরিদো মান্না। 10 মোশি শুনিলোদে পত্তি পরিবারর্ মানুচ্চুনে তারার্ নিজোর্ নিজোর্ তাম্বুলোর দোরো কুরে কানদন্। ইয়েন্দোই লগেপ্রভু রাগে ফুলি উদিলো আর মোশিয়ো কাঙেলেত্যে পেলঅ। 11 তে লগেপ্রভুরে কলঅ, “তুই তর্ চাগর্বোরে কিত্তে এই দজাত্ ফেলেয়োচ্? তরে বেজার্ অইদে ধোক্ক্যেন মুই এন্ কি গোজ্যংগে, তুই এই বেক্ মানুচ্চুনোর্ ভারান্ মঅ উগুরে চাপি দুয়োচ্? 12 মুই কি এই বেক্ মানুচ্চুনোরে পেদত্ ধোজ্যং? মুই কি ইগুনোরে পুদেয়োং? তুই তারার পুরোণি মানুচ্চুনো ইদু যে দেজ্চান্ দিবার্ শমক্ খেইয়োচ্ সিয়েনত্ কিত্তেই তুই মরে সাদাঙা-বাব ধোক্ক্যেন গুরি তারারে বুগোদ্ গুরি নেযেবাত্তে কোইয়োচ? 13 এই বেক্ মানুচ্চুনোত্তে মুই কুদু য়েরা পেম? তারা মইদু বানা ‘য়েরা হেবাত্তে দুয়ো’ কোই কোই কানাকুদি গত্তন্। 14 তারার্ ভরান্ অমহদ বেশ্, মর্ গায়্ গায়্ সিয়েন দায়িত্বো নেযানা সম্ভব নয়। 15 তুই যুনি মর্ অবস্থাগান এধোক্ক্যেন গরচ্ সালে ইক্কুনি তুই মরে মারে ফেলা। যুনি মুই তর্ দোয়্যে পেই থাং সালে নিজোর্ চোগেদি মর্ নিজোর্ দজাগান মরে দেগিবাত্তে ন-দিস্।” 16 লগেপ্রভু মোশিরে কলঅ, ইস্রায়েলীয়গুনো ভিদিরে যিগুনোরে তুই নেতা আর সর্মানিত মানুচ্ বিলি জানচ্ তারা ভিদিরেত্তুন্ সত্তুরজন বুড়ো নেতারে মইদু আন্। তুই তারারে মিলন-তাম্বুলো ইদু এইনে তঅ সমারে থিয়্যেবাত্তে কঅ। 17 মুই সিয়েনত্ লামি এইনে তঅ সমারে কধা কোম্। তঅ উগুরে যে আত্মাগান্ আঘে মুই সিয়েনরে তারা উগুরেয়ো দিম্। মানুচ্চুনোর্ ভারান্ বুয়োই নিবাত্তে তারা তরে সাহায্য গুরিবাক। সেক্কে তত্তুন্ আর গায়্ গায়্ দায়িত্বোগান বুয়োই নেযা ন-পুরিবো। 18 তুই মানুচ্চুনোরে কঅ, তুমি নিজোরে লগেপ্রভুর নাঙে ফারক্ গুরি নেযেনে এজেত্তে কেইলেত্তে যুক্কোল্ অ, কিত্তে কেল্যেই তুমি য়েরা হেই পেবা। তুমি লগেপ্রভু ইদু কাঁনি কাঁনি য়েরা হেবার কধা কোইয়ো আর জানেয়োদে, ইয়োত্তুন্ মিসর দেজত্ তুমি গম্ এলা। সেনত্তেই ইক্কুনি তে তমারে য়েরা দিবো আর তুমি সিয়েন্ হেবা। 19 সেই য়েরাগান্ তুমি বানা একদিন, দ্বিদিন, পাঁচদিন, দশ দিন বা কুড়ি দিন হেবা সিয়েন নয়, 20 পুরো একমাস সং হেবা। সেক্কে সেই য়েরাগান্ তমার্ নাগন্দি নিগিলি এবঅ আর য়েরালোই তমার্ ন-রুচ্যে মু-অবঅ। এদক্কানি অবঅ কারন যিবে তমা ভিদিরে আঘে সেই লগেপ্রভুরে তুমি অগ্রাজ্য গোজ্য আর তা মুজুঙোত্ কাঁনি কাঁনি কোইয়ো, মিসর দেজ্চান্ ফেলেই এজানা তমার্ উজিত্ ন-এলঅ। 21 এ কধাগান্ শুনিনে মোশি কলদে, “যুদ্ধো গরেদে ধোক্ক্যেন মানুজই মঅ সমারে ছয় লাখ্ আগন্, আর তুই কত্তে পুরো একমাস সং তুই তারারে য়েরা হেবাত্তে দিবে। 22 তারার্ গোরু-ভেড়াছাগলুন বেক্কুন্ কাবিলেয়ো তারার্ পক্ষে সামালানা ন-অবঅ। বড়সাগরর বেক্ মাচ্ছুন্ ধুরি আনিলেয়ো সেক্কে তারার্ ন-কুলেব।” 23 জোবত্ লগেপ্রভু মোশিরে কলঅ, “লগেপ্রভুর খেমতাগান কি এদক্ কম? মর্ কধাগান্ তইদু হামাক্কায়্ লাগিবো না-কি সিয়েন্ তুই এবারত্ দেগিবে।” 24 এই কধাগান শুনিনে মোশি বারেন্দি যেইনে লগেপ্রভু যিয়েন্ কোইয়্যে সিয়েন্ মানুচ্চুনোরে জানেল। তে ইস্রায়েলীয়গুনোত্তুন্ সত্তুরজন বুড়ো নেতারে আনিনে মিলন-তাম্বুলো মুজুঙোত্ আঝিল্ গুরিলো। 25 সেক্কে লগেপ্রভু সেই মেঘ ভিদিরে গুরি লামি এইনে মোশি সমারে কধা কলঅ। মোশি উগুরে যে আত্মাগান্ এলঅ তাঁরে তে সেই সত্তুরজন বুড়ো নেতা উগুরেয়ো দিলো। যেক্কে সেই আত্মাগান্ তাঁরা উগুরে এলঅ সেক্কে কয়েকদিনোত্তে তাঁরা ভাববাদী ইজেবে কধা কোইয়োন। 26 ইল্দদ আর মেদদ নাঙে দ্বিজন মান্জ্যে তাম্বুলো ভিদিরেই এলাক। বেঈ লোইয়্যে বুড়ো নেতাগুনো ভিদিরে এই দ্বিজনেয়ো এলাক, মাত্তর্ তারা মিলন-তাম্বুলো ইদু ন-যান। তো তারা উগুরে সেই আত্মাগান্ এচ্চ্যে। সেক্কে তারায়ো সেই অক্তত্ তাম্বুলো ভিদিরে ভাববাদী ইজেবে কধা কুয়ো ধোজ্যন। 27 এক্কো গাবুজ্যে ধাবা যেইনে মোশিরে কলঅ, “ইল্দদ আর মেদদে তাম্বুলো ভিদিরে ভাববাদী ইজেবে কধা কদন্।” 28 সেক্কে নূনোর পূঅ যিহোশূয় মোশিরে কলঅ, “ও মর্ প্রভু, সিগুনোরে জুরো গুরি থেবাত্তে উগুম গর্।” যিহোশূয় গাবুরো বয়জত্তুন্ ধুরি মোশির সাহায্যগুরিয়্যে এলঅ। 29 জোবত্ মোশি কলঅ, “মর্ মান-সর্মানান্ তইদু দাঙর্ ওই উদিলো? মুই চাং লগেপ্রভুর বেক্ মানুচ্চুনেয়ই যেন ভাববাদী অন আর লগেপ্রভু যেনে তার আত্মাগান্ তারা উগুরে দে।” 30 ইয়েনর পরেদি মোশি আর ইস্রায়েলীয় বুড়ো নেতাগুনে তাম্বুলোত্ ফিরি গেলাক্। 31 পরেদি লগেপ্রভু এক্কান্ বোইয়্যের্ পাদেল। সেই বোইয়েরান্ বড়সাগরত্তুন্ ভারুই পেক্কুন্ ঠিলি আনিনে তাম্বুলোর চেরোকিত্তে এক দিনোর পদথ্ এন্গুরি ফেলেই দিলো, সিগুন্ মাদিত্তুন্ দ্বিআত্ সং উজু ওইনে রলাক। 32 সেদিন্যে আর সেই রেদোত্ আর তারকেল্যে গোদাদিন্য মানুচ্চুনে বারেন্দি যেইনে ভারুই পেক্কুন্ কুড়েইনে আনিলাক্। তারা পত্তিজনে কমেন্দি এক আজার্ আস্তোশত কেজি সং কুড়েলাক্। সিগুন্ তারা তাম্বুলোর চেরোকিত্তে বিজেইনে রাগেলাক্। 33 মাত্তর্ সেই য়েরানি মুয়োত্ দিইনে চাবাদে ন-চাবাদে মানুচ্চুনোর বিরুদ্ধে লগেপ্রভুর রাগ্কান্ জুলি উদিলো। তে তারা উগুরে এক্কান্ দর্গরেপারা ভানা পাধেই দিলো। 34 সেনত্তে সেই জাগায়ানর্ নাঙ্ দিয়া অলঅ কিব্রোৎ-হত্তাবা (যিয়েনর্ ভেদ্তান্ “লুভী মানুচ্চুনোর্ ছবাশাল্”), কিত্যে মানুচ্চুনে সিয়েনত্ লুভীগুনোরে গারেয়োন। 35 ইয়েনর পরেদি মানুচ্চুনে কিব্রোৎ-হত্তাবা ছাড়িনে হৎসেরোতত্ যেইনে সিয়েনত্ থেলাক। |
Copyright © 2021 Bangladesh Bible Society
Bangladesh Bible Society