নহিমিয় 9 - Chakma Bibleইস্রায়েলীয়গুনোর্ পাপ স্বীগের্ গরানা 1 সে একই মাজর্ চোব্বিশ দিনোত্ ইস্রায়েলীয়গুনে এগত্তর্ ওইনে উবোস্ থেলাক্, বস্তা পাদা উরিলাক্ আর মাদাগুনোত্ ধূল্যে দিলাক্। 2 ইস্রায়েল জাদর্ মানুচ্চুনে অন্য জাদর্ বেক্ মানুচ্চুনোর্ ইত্তুন্ নিজোরে ফারগ্ গুরি নিলাক্। তারা থিয়্যেইনে নিজোর্ পাপ আর তারার্ পূরোণিমানুচ্চুনোর্ ভান্ন্যেইয়ানি স্বীগের্ গুরিলাক্। 3 সে পরেন্দি তারা থিয়্যেই থেইনে দিনোর্ চের্ ভাগর্ এক ভাগ্ সময় তারার্ গোজেন্ লগেপ্রভুর রীদি-সুদোম বোইবোত্তুন্ পড়া ধুরিলাক্ আর চের্ ভাগর্ এক ভাগ্ সময়োত্ পাপ স্বীগের্ গরন্ আর তারার্ গোজেন লগেপ্রভুর উবোসনা গুরিনে কাদেলাক্। 4 যেশূয়, বানি, কদ্মীয়েল, শবনিয়, বুন্নি, শেরেবিয়, বানি আর কনানী নাঙে লেবীয়গুনে তারার্ মঞ্চর্ উগুরে থিয়্যেইনে রঅ ছাড়ি ছাড়ি তারার্ গোজেন্ লগেপ্রভুরে ডাগিলাক্। 5 পরেন্দি লেবীয়গুনো ভিদিরেত্তুন্ যেশূয়, কদ্মীয়েল, বানি, হশব্নিয়, শেরেবিয়, হোদিয়, শবনিয় আর পথাহিয় কলদে, “তুমি উদিনে তমার্ গোজেন্ লগেপ্রভুর বাঈনী গরঅ, যিবে পুরোণিকালত্তুন্ ধুরিনে জীংকানিবর্ আঘে।” সে পরেন্দি তারা ইয়েন্ কোইনে তবনা গুরিলাক্, ও লগেপ্রভু, তর্ মহিমাবলা নাঙর্ বাঈনী ওক্; আমার্ দিয়্যে বেক্ ভালেদিগানি আর নাঙ্ গিনেনাত্তুন্ তুই দাঙর্। 6 বানা তুয়ই লগেপ্রভু। তুয়ই আগাজ্, দাঙর্ আগাজ্ আর সিয়েন ভিদিরে বেক্কানি, পিত্থিমী আর তা উগুরে বেক্কানি আর সাগর্ আর তা ভিদিরে বেক্কানি বানেয়োচ্। তুয়ই বেক্কুনোর্ পরাণান্ দুয়োচ্ আর স্বর্গর বেক্কুনে তর্ উবোসনা গরন্। 7 তুয়ই লগেপ্রভু গোজেন। তুই অব্রামরে বেঈ লোইনে কল্দীয়গুনোর দেজ্ছান্ ঊরত্তুন্ নিগিলেনেই লোই এচ্ছ্যস্ আর তা নাঙান্ রাগেয়োচ্ছে অব্রাহাম। 8 তুই তার্ মনান্ বিশ্বেজি দেগিনে কনানীয়, হিত্তীয়, ইমোরীয়, পরিষীয়, যিবূষীয় আর গির্গাশীয়গুনোর্ দেজত্ তা বংশবোরে দিবাত্তে তাত্তেই এক্কান্ বেবস্থা থিদেবর্ গোজ্যস্। তুই গম্ বিলিনে তর্ এগেম্ তুই রোক্ষ্যে গোজ্যস্। 9 মিসর দেজত্ আমা পূরোণিমানুচ্চুনোর্ দুখ্কানি তুই দেখ্যস্; লোহিত সাগরর্ পারত্ তারার্ কানানিগানি তুই শুন্যস্। 10 ফরৌণ, তার্ বেক্ কামগুরিয়্যেগুনোরে আর তা দেজর্ বেক্ মানুচ্চুনোরে তুই বোউত্ চিহ্নো আর আমক্ অবার্ কাম্ দেগেয়োচ্, কিত্যে তুই হবর্ পেদে আমা পূরোণিমানুচ্চুনোর্ লগে মিসরীয়গুনোর্ বেবহার্ এলদে বার্বোলোই ভরা। এ কামানি গুরিনে তুই তর্ সুনাঙ্ রোক্ষ্যে গোজ্যস্, যিয়েনি এজঅ আঘে। 11 তুই তারার্ মুজুঙোত্ সাগরানরে দ্বিভাগ্ গোজ্যস্, সেনত্তেই তারা শুগুনো ভূইয়ানর্ উগুরেন্দি পার্ ওই যেইয়োন্; মাত্তর্ যিগুনে তারারে লোড়েইনে এত্তন্ তুই তারার্ পানিগানর্ গঙার্লোই পাত্তর্ ফেলাইদে ধোক্ক্যেন্ গুরিনে গভীন্ পানিত্ ফেলে দুয়োজ্। 12 তুই দিনো অক্তত্ মেঘঅ ছাগ্কোই তারারে চালেইনে নেযেয়োচ্ আর রেদোত্ আগুনো জিল্লোই তারারে যেবার্ পদত্ পহর্ দুয়োচ্। 13 তুই সিনাই মুড়োবোর্ লামি এচ্ছ্যস্ আর স্বর্গত্তুন্ তারার্ লগে কধা কোইয়োচ্। সে অক্তত্ তুই ন্যায্য উগুম্, দোল্ রীদি-সুুদোম আর দোল্ সুদোম্ আর উগুম্ তারারে দুয়োচ্। 14 তর্ পবিত্র জিরেবার্ দিন্নো পৌইদ্যেনে তুই তারারে জানেয়োচ্ আর তঅ্ চাগর্ মোশির মাধ্যমে তুই তারারে উগুম্, সুদোম আর আইন দুয়োচ্। 15 পেট্পরা বুগ্মারেবাত্তে তুই স্বর্গত্তুন্ তারারে হানা দুয়োচ্ আর পানিতিরেজ্ মারেবাত্তে পাত্তরত্তুন্ পানি নিগিলেই দুয়োজ্। যে দেজ্ছান দিবাত্তে তুই শমক্ খেইয়োজ্ সিদু যেইনে সিয়েন্ অধিকার্ গুরিবাত্তে তুই তারারে উগুম্ দুয়োজ্। 16 তো আমা পূরোণিমানুচ্চুনোর বেবহার্ এলদে বার্বোলোই ভরা; তারা একগেয়েমি ওইয়োন্ আর তর্ উগুমান্ ন-পালান্। 17 তারা বাধ্য থেবাত্তে অস্বীগের্ গোজ্যন্, আর যেদক্কানি আমক্ অবার্ কাম্ তুই তারার্ ভিদিরে গোজ্যস্ সিয়েনিয়ো তারা মনত্ ন-রাগান্। তারা একগেয়েমি গুরিনে আরঅ চাগর্ কাদিবাত্তে মিসরত্ ফিরি যেবাত্তে এক্কো নেতারে নেযেয়োন। মাত্তর্ তুই ক্ষমাশীল গোজেন, দোয়্যেবান আর মেয়্যের্ ভরা; তুই সহজে বেজার্ ন-অস্ আর তর্ কোচ্পানা শেজ্ ন-ওইয়্যে। সেনত্তেই তুই তারারে ছাড়ি ন-যাজ্। 18-19 এন্ কি, তারা নিজোত্তে ছাজি ফেলেইনে এক্কো গোরুছঅ মূত্তি বানেইনে কোইয়োন্, ইবেয়ই তমা গোজেন; মিসর দেজত্তুন্ ইবেয়ই তমারে নিগিলেই আন্যে। এধোক্কেন্ গুরিনে যেক্কে তারা তরে অমকদ অগমান্ গোজ্যন্ সেক্কেয়ো তর্ মেয়্যেত্তে তুই ধূল্যেচর-চাগালাত্ তারারে ছাড়ি ন-যাজ্। দিনোত্ তারারে আদেই নেযেবাত্তে মেঘঅ ছাগ্ আর রেদোত্ তারারে যেবার্ পধথ্ পহ্র দিবাত্তে আগুনো ঝিলান্ তারাত্তুন্ সোরেই ন-নেযাজ্। 20 তুই তারারে শিক্ষ্যে দিবাত্তে তর্ মংগলময় আত্মাবোরে দান গোজ্যস্। তারার্ হানা-দানাত্তে তুই যে মান্না দুয়োচ্ সিয়েনি বন্ধ গুরি ন-দুয়োচ্; তুই তারারে পানিতিরেজ্ কাদেবাত্তে পানি দুয়োচ্। 21 ধূল্যেচর-চাগালাত্ চোল্লিশ বজর্ সং তুই তারারে পালেয়োজ্। তারার্ কনকিজু অভাব ন-অয়; তারার্ কাবড়-চুগোড়ানিয়ো পূরোণ্ ন-অয় আর তারার্ টেঙানিয়ো ন-ফুলে। 22 পরেন্দি তুই বোউত্ রেজ্য আর জাত্ তারার্ আঢত্ দুয়োজ্, এন্ কি, তারার্ বেক্ জাগানিয়ো তারারে ভাগ্ গুরি দুয়োজ্। তারা হিষ্বোণর রাজা সীহোনর দেজ্ছান আর বাশনর রাজা ওগের দেজ্ছান্ অধিকার গোজ্যন। 23 আগাজ তারা ধোক্কেন্ তুই তারারে বোউত্ পূঅ-ছা দুয়োজ্ আর তুই তারারে সে দেজত্ নেযেয়োজ্ যে দেজ্ছানত্ সুমিনে সিয়েন্ গজক্ গুরিবার্ কধা তুই তারার্ পূরোণিমানুচ্চুনোরে কোইয়োচ্। 24 তারার্ পূঅ-ছাগুনে সে দেজত্ যেইনে সিয়েন্ গজক্ গুরি নেযেয়োন। সে দেজত্ বজত্তিগুরিয়্যে কনানীয়গুনোরে তুই তারার্ মুজুঙোত্ চিগোন্ গোজ্যস্। কনানীয়গুনোরে, তারার্ রাজাগুনোরে আর দেজর্ অন্য জাদ্তুনোরে তুই তারার্ আঢত্ তুলি দুয়োজ্ যেনে তারা তারার্ উগুরে যিয়েনি হুজি সিয়েনি গুরি পারন্। 25 তারা দেবাল্-ঘিজ্যে ভালোক্কানি শঅর্ আর বোল্বোল্যে ভূই গজক্ গোজ্যন্; তারা নানান্ বাবোত্যে গম্ গম্ জিনিজ্সোই ভোজ্যে ঘর্ আর আগেন্দি কুড়ো ওইয়্যে এধোক্কেন্ কূয়ো, আংগুর ক্ষেত্, জলপাইয়োর্ বাগান আর বোউত্ গুলোগুলি গাজ্ গজক্ গোজ্যন্। তারা হেইনে পেট্ ভুরিনে পক্তা-মোক্তা ওইয়োন্ আর তর্ দিয়্যে বোউত্ ভালেদি ভোগ গোজ্যন। 26 মাত্তর্ তো তারা অবাধ্য ওইনে তঅ বিরুদ্ধে উল্লোমি গোজ্যন্; তর্ রীদি-সুুদোম তারা ছাড়ি যেইয়োন। তর্ যে ভাববাদীগুনে তারারে উজিয়ার্ গুরিদাক্ যেনে তারা তইন্দি ফিরি এজন্ সে ভাববাদীগুনোরে তারা মারে ফেল্যন; তারা তরে অমকদ অগমান গোজ্যন। 27 সেনত্তেই তুই শত্রুগুনোর্ আঢত্ তারারে তুলি দুয়োচ্ আর শত্রুগুনে তারার্ উগুরে অত্যেচার্ গুরিদাক্। তারার্ দুঘোত্ তারা তইদু কানাকুদি গোজ্যন্ আর তুই স্বর্গত্তুন্ সিয়েনি শুন্যচ্। তুই অমকদ দোয়্যেই তারা ইদু উদ্ধোর্গুরিয়্যেগুনোরে পাধেই দুয়োচ্। তারা শত্রুগুনোর্ আদত্তুন্ তারারে উদ্ধোর্ গোজ্যস্। 28 মাত্তর্ যে তারা জিরেন্ পেদাক্ এম্নে আরঅ তারা তঅ চোগেন্দি যিয়েনি ভান্ন্যেই সিয়েনি গুরিদাক্। সে পরেন্দি তুই শত্রুগুনোর্ আঢত্ তারারে ছাড়ি দুয়োচ্ যেনে শত্রুগুনে তারার্ গিরোজ্ ওই পারন্। মাত্তর্ আরঅ যেক্কে তারা তইদু কানিদাক্ সেক্কেনে স্বর্গত্তুন্ সিয়েনি শুনিনে তর্ দোয়্যেই তুই বার্ বার্ তারারে উদ্ধোর্ গুরিদে। 29 তর্ রীদি-সুদোম ইন্দি ফিরি এবাত্তে তুই তারারে উজিয়ার্ গোজ্যস্ মাত্তর্ তারার্ বেবহারান্ এলদে বার্বোলোই ভরা; তারা তর্ বেক্ উগুমানি ন-পালান্। তর্ যেদক্কানি উগুম্ পালন্ গুরিলে মানুচ্ বাজন্ সেনত্তেই সিয়েনর্ বিরুদ্ধে তারা পাপ গোজ্যন্। তারা একগেয়েমি গুরিনে আর গত্তনাগুন্ দরমর গুরিনে তর্ কধানি শুনিবাত্তে ন-চান্। 30 মাত্তর্ তো ভালোক্ বজর্ ধুরিনে তুই তারার্ উগুরে ধৈয্য ধোজ্যস্। তর্ ভাববাদীগুনোর্ মাধ্যমে তঅ আত্মালোই তু্ই তারারে উজিয়ার্ গোজ্যস্, মাত্তর্ সেক্কেয়ো তারা কান ন-পাদন্। সেনত্তেই নানান্ জাদর্ আঢত্ তুই তারারে তুলি দুয়োচ্। 31 মাত্তর্ তর্ অমকদ দোয়্যের্ কারনে তুই তারারে শেজ্ গুরি ন-দুয়োচ্ বা ছাড়ি ন-যাজ্, কিত্যে তুই দোয়্যে-মেয়্যেবলা গোজেন্। 32 ও আমা গোজেন, তুই দাঙর্, বোলী আর দর্বুগ্ জাগেয়্যে গোজেন। তর্ শেজ্ ন-ওইয়্যে কোচ্পানার্ সুদোমানি তুই রোক্ষ্যে গুরি থাচ্। আসিরিয়ার রাজাগুনোর্ সময়ত্তুন্ ধুরি আরাম্ভ গুরিনে এচ্ছ্যে সং যে দুখ্কানি আমা উগুরে আর আমা রাজাগুনোর্, নেতাগুনোর্, ধর্মগুরুগুনোর্, ভাববাদীগুনোর্, আমা পূরোণিমানুচ্চুনোর্ আর তমার্ বেক্ মানুচ্চুনো উগুরে চলের্ সিয়েনি তঅ চোগেন্দি যেনে চিগোন্ বিলিনে মনে ন-গরচ্। 33 তুই আমা উগুরে যিয়েনি ঘুদিবাত্তে দুয়োচ্ সিয়েনিলোই তুই অন্যেই ন-গরচ্; তুই বিশ্বেজ্ গুরিনে কাম্ গোজ্যস্ আর আমি অন্যেই গোজ্যেই। 34 আমা রাজাগুনে, নেতাগুনে, ধর্মগুরুগুনে আর আমা পূরোণিমানুচ্চুনে তর্ রীদি-সুদোমানি মানি ন-চলন্; তর্ উগুম্ বা উজিয়ার্ কধা তারা ন-শুনোন্। 35 তারার্ রাজাগিরির্ সময়োত্ তারা তর্ দিয়্যে দাঙর্ আর বোল্বোল্যে দেজত্ বোউত্ মংগল ভোগ গোজ্যন্, তো তারা তর্ সেবা ন-গরন্ বা তারার্ ভান্ন্যেই পধত্তুন্ ন-ফিরোন্। 36 “চঅ, এচ্ছ্যে আমি চাগর্; যে দেজ্ছান তুই আমা পূরোণিমানুচ্চুনোরে দুয়োচ্ যেনে তারা সিয়েনর্ ফলুন্ আর নানান্ বাবোত্যে গম্ জিনিসছানি হেই পারিই আমি সিয়োদোই চাগর্ ওই রোইয়্যেই। 37 আমা পাপত্তেই যে রাজাগুনোরে তুই আমা উগুরে রাজাগিরি গুরিবাত্তে দুয়োচ্ দেজর্ ভালোক্কানি ফসল তারা ইদু যায়। তারা তারার্ আওজ্ মজিম্ আমা কিয়্যে উগুরে আর আমা এ্যমানুনোর্ উগুরে সেলা সোদেয়োন্। আমি অমকদ দুঘোত্ আগিই।” চুক্তি গুরিনে সীলমহ্র 38 সে পরেন্দি মানুচ্চুনে লিগিলাক্: “এ কারনে আমি ইক্কিনে নিজোর্ ভিদিরে লেখ্যে চুক্তি গুরির্, আর সিয়েন উগুরে আমা নেতাগুনে, লেবীয়গুনে আর ধর্মগুরুগুনে তারার্ সীলমহ্রবো দেদন্।” |
Copyright © 2021 Bangladesh Bible Society
Bangladesh Bible Society