নহিমিয় 8 - Chakma Bibleইষ্রা রীদি-সুুদোম পড়িলো 1 সাত্ মাজর্ আগেন্দি বেক্ মানুচ্চুনে একলগে মিলিনে পানি-গেদোর্ মুজুঙেন্দি চক্কর্বোত্ এগত্তর্ অলাক্। তারা ধর্ম-মাস্টর্ ইষ্রারে ইস্রায়েলীয়গুনোত্তে লগেপ্রভুর দিয়্যে উগুম্, অত্তাৎ মোশির রীদি-সুদোম বোইবো আনিবাত্তে কলাক্। 2 সাত্ মাজর্ পত্তম দিনোত্ ধর্মগুরু ইষ্রা মিলে-মরদ আর যিগুনে শুনিলে বুঝি পারন্ এধোক্কেন্ বেক্ মানুচ্চুনোর্ দলর্ মুজুঙোত্ রীদি-সুদোম বোইবো আনিলো। 3 পানি-গেট্তোর্ মুজুঙোত্ চক্কর্বো ইন্দি মুয়োন্ ফিরেইনে মিলে-মরদ্ আর অন্য যিগুনে বুঝি পারন্ তারার্ ইদু তে বেন্যে মাদানত্তুন্ ধুরি দ্বিবুজ্যে সং সিয়েন্ পোড়েই শুনেল, আর বেক্ মানুচ্চুনে মন্ দিইনে রীদি-সুদোম বোইবোর্ কধা শুনেল। 4 বোইবো পড়িবাত্তে তক্তালোই যে মঞ্চবো বানা ওইয়্যে সিবে উগুরে ধর্ম-মাস্টর্ ইষ্রা যেইনে থিয়্যেল। সিবের্ ডেনেন্দি থিয়্যেইয়্যে এলঅ্ মত্তিথিয়, শেমা, অনায়, উরিয়, হিল্কিয় আর মাসেয়; আর তার্ বাঙেন্দি এলদে পদায়, মীশায়েল, মল্কিয়, হশুম, হশবদ্দানা, সখরিয় আর মশুল্লমে। 5 সে পরেন্দি ইষ্রা বোইবো খুলিলো। বেক্ মানুচ্চুনে তারে দেগদন্, কিত্যে তে তারাত্তুন্ অজল্ জাগাত্ থিয়্যেইয়্যে এলঅ। তে বোইবো খুলোনার্ পরেন্দি বেক্ মানুচ্চুনে উদিনে থিয়্যেলাক্। 6 সেক্কে ইষ্রা মহান গোজেন লগেপ্রভুর বাঈনী গুরিলো, আর বেক্ মানুচ্চুনে তারার্ আঢ্তানি তুলিনে কলাক্, “আমেন, আমেন।” সে পরেন্দি তারা মাদিত্ মাদা নিগিরিনে লগেপ্রভুরে তারার্ মনর্ ভোক্তি জানেলাক্। 7 যেশূয়, বানি, শেরেবিয়, যামীন, অক্কুব, শব্বথয়, হোদিয়, মাসেয়, কলীট, অসরীয়, যোষাবদ, হানন আর পলায়-এ লেবীয়গুনে সিয়েনত্ থিয়্যেই থেইয়্যে মানুচ্চুনোরে রীদি-সুদোমর্ পৌইদ্যেনে বুঝেই দিলাক্। 8 যিয়েনি পড়া অর্ সিয়েনি যেনে মানুচ্চুনে বুঝি পারন্ সেনত্তেই তারা গোজেনর্ রীদি-সুদোম বোইবোত্তুন্ পড়িপাড়াই অনুবাদ গুরিনে ভেদ্তান্ বুঝেই দিলাক্। 9 সে পরেন্দি শাজন্গুরিয়্যে নহিমিয়, ধর্মগুরু আর ধর্ম-মাস্টর্ ইষ্রা আর যে লেবীয়গুনে মানুচ্চুনোরে শিক্ষ্যে দেদন্ তারা বেক্ মানুচ্চুনোরে কলাক্কে, “এচ্ছ্যে এ দিন্নো তমার্ গোজেন্ লগেপ্রভুর নাঙে পবিত্র। তুমি আবিলেচ্ বা কানাকুদি ন-গুরিবা।” তে এ কধাগান কলঅ, কিত্যে মানুচ্চুনে বেক্কুনে রীদি-সুদোম কধানি শুনিনে কানদন্। 10 নহিমিয় কলদে, “তুমি যেইনে গম্ গম্ হানা আর মিষ্টি রস্ খঅ আর যিগুনোর্ কনঅ হেবার্ নেই তারারে কিজু কিজু পাধেই দুয়ো। এচ্ছ্যে দিন্নো অলদে আমা লগেপ্রভুর নাঙে পবিত্র। তুমি মনত্ দুঘ্ ন-আন্য, কিত্যে লগেপ্রভুর দিয়্যে হুজিগান্ অলদে তমার্ বল্।” 11 লেবীয়গুনে বেক্ মানুচ্চুনোরে জুরো গুরিনে কলাক্কে, “তুমি জুরো অ, কিত্যে এচ্ছ্যে দিন্নো পবিত্র। তুমি মনত্ দুঘ ন-আন্য।” 12 সেক্কে বেক্ মানুচ্চুনে অমকদ হুজি ওইনে হানা-দানা গুরিবাত্তে আর হেবার্ ভাগ্কানি পাদেবাত্তে গেলাক্, কিত্যে যেদক্কানি কধা তারারে জানা ওইয়্যে সিয়েনি তারা বুঝি পাজ্যন্। 13 সে মাসত্ দ্বিদিনোত্ বেক্ বংশগুনোর্ মুরুব্বীগুনে, ধর্মগুরুগুনে আর লেবীয়গুনে রীদি-সুদোমানি গমেডালে বুঝেবাত্তে ধর্ম-মাস্টর্ ইষ্রার ইদু এগত্তর্ অলাক্। 14 তারা রীদি-সুদোম ভিদিরেন্দি দেগিলাক্কে মোশির মাধ্যমে লগেপ্রভু এ উগুমান্ দিলো, সাত্ মাসর্ পরবর্ অক্তত্ ইস্রায়েলীয়গুনে নাদা মান্জ্যর-ঘরত্ বজত্তি গুরিবাক্, 15 আর তারার্ আদামানিত্ আর যিরূশালেমত্ তারা এ কধাগান্ ফগদাঙ্ আর প্রচার্ গুরিবাক্, “যেধোক্কেন্ লেগা আঘে সেধোক্কেন্ তুমি মুড়োমুড়ি চাগালাত্ যেইনে নাদা মান্জ্যর-ঘর্ বানেবাত্তে জলপাই আর ঝার্বো জলপাই গাজ ডেলা আর গুলমেঁদি, খাজোর্ আর পাদালোই-ভোজ্যে গাজঅ ডেলা আনিবা।” 16 সেনত্তেই মানুচ্চুনে যেইনে ডেলা আনিনে কয়েকজনে তারার্ ঘরর্ ছালঅ উগুরে বা উদোনত্ বা গোজেনর্ ঘরর্ উদোনত্ বা পানি-গেট্তোর্ চক্কর্বোত্ বা ইফ্রয়িম-গেট্তোর কায়-কুরে চক্কর্বোত্ নিজোত্তে নাদামান্জ্যর-ঘর্ বানেলাক্। 17 বন্দীদজাত্তুন্ ফিরি এচ্ছ্যে পুরো দল্লো নাদামান্জ্যর-ঘর্ বানেইনে সিয়েনিত্ বজত্তি গুরিলাক্। নূনর পূঅ যিহোশূয়র সময়ত্তুন্ ধুরি সেদিন্যে সং ইস্রায়েলীয়গুনে এধোক্ক্যেন্ আর ন-গরন্। তারা অমকদ হুজিয়ে-ফূত্তি গুরিলাক্। 18 পত্তম দিনোত্তুন্ ধুরি আরাম্ভ গুরিনে শেজ দিন সং ইষ্রা পত্তিদিন গোজেনর রীদি-সুদোম বোইবোত্তুন্ পড়া ধুরিলো। মানুচ্চুনে সাত দিন সং পরপ্বো পালেলাক্ আর আস্তো দিনোত্ সুদোম্ মজিম শেজ দিনোত্ বিশেজ্ তেম্মাং অলঅ। |
Copyright © 2021 Bangladesh Bible Society
Bangladesh Bible Society