নহিমিয় 6 - Chakma Bibleনহিমিয়র বিরুদ্ধে কুজুরোমি 1 পরেন্দি সন্বল্লট, টোবিয়, আরবীয় গেশম আর আমা বাদবাগি শত্রুগুনে শুনিলাক্, মুই দেবালান্ আরঅ বানেয়োং আর সে দেবালানর্ ভিদিরে কনঅ ফাক্ নেই। মাত্তর্ সেক্কেয়ো মুই গেট্তুনোত্ দোর্ ন-লাগাঙ্। 2 সেক্কে সন্বল্লটে আর গেশমে মরে এ কধাগান কোই পাদেলাক্, “আয়, আমি ওনো সংজাগানত্ এক্কান্ আদামত্ এগত্তর্ ওই।” আজলে তারা মরে ক্ষতি গুরিবাত্তে কুজুরোমি গোজ্যন্। 3 সেনত্তেই মুই মানুচ্ পাদেইনে তারারে এ জোব্পান দিলুঙ্, “মুই এক্কান্ বিশেজ্ দরকারী কাম্ গরঙর্ বিলিনে যেই ন-পারঙর্। মুই কাম্ বাদ দিইনে তমা ইদু যানার্ কারনে কিত্তেই কাম্ বন্ধ থেবঅ?” 4 তারা চের্ বার্ একই হবর্ মইদু পাদেলাক্ আর পত্তিবারত্ মুই তারারে একই জোব্ দিলুঙ্। 5 সে পরেন্দি পাচ্বারত্ সন্বল্লটে একই হবর্ দিইনে তা চাগর্বোরে মইদু পাধেই দিলো। তা আঢত্ এক্কান্ খুলো চিদি এলঅ। 6 সিয়েনত্ লেগা এলদে, “নানান্ জাদ্তুনো ভিদিরে এ কধাগান শুনো যার্ আর গেশমেয়ো কত্তে, তুই আর যিহূদীগুনে উল্লোমির্ কুজুরোমি গোজ্যন্ বিলিনে দেবালান্ বানত্তে। ইয়েনিবাদেয়ো এ হবরানি অনুসারে বুঝো যাত্তে, তুই তারার্ রাজা অবাত্তে যর্। 7 তঅ পৌইদ্যেনে এ কধাগান যেনে যিরূশালেমত্ ফগদাঙ্ গরা অয়, যিহূদা দেজত্ এক্কো রাজা আঘে, সেনত্তেই তুই ভাববাদীগুনোরেয়ো নেযেয়োজ্। ইক্কিনে এ হবরান্ দঅ রাজার্ ইদু লুমিবোগোই। সেনত্তেই এজঅ, আমি এগত্তর্ ওইনে সল্লা গুরিই।” 8 মুই তারে এ জোব্পান পাধেই দিলুঙ্, “তুই যিয়েনি কোইয়োচ্ সেধোক্কেন্ কিচ্ছু ন-অর্; ইয়েন্ তর্ মন্গজ্জা কধা।” 9 তারা আমা কামানি দোঙেই রাগেবাত্তে এ কধানি কোইনে আমারে দর্বুগ্ লাগেবার্ চেট্ট্যা গরা ধুরিলাক্। ও গোজেন্, ইক্কিনে তুই মঅ আঢত্ বল্ দে। 10 একদিন্যে মুই দলায়র পূঅ শময়িয়োর্ ঘরত্ গেলুঙ্। দলায় অলদে মহেটবেলর পূঅ। শময়িয় তা ঘরত্ পৌল্যেই এলঅ। তে কলদে, “এজঅ, আমি গোজেনর ঘরত্, সুদ্ধো-সাংগ জাগা ভিদিরে মিলিই আর ঘরর্ দোরানি বন্দ গুরি দিই, কিত্যে মানুচ্চুনে তরে মারিবাত্তে এত্তন্; তারা রেদোত্ তরে মারিবাত্তে এবাক্।” 11 মাত্তর্ মুই কলুঙ্, “মঅ ধোক্ক্যেন্ মান্জ্যর্ কি ধেই যানা উজিত্? বা মঅ ধোক্কেন্ কনজনর্ কি তার্ নিজো পরাণান্ রোক্ষ্যে গুরিবাত্তে তবনা-ঘরর্ ভিদিরে যানা উজিত্? মুই ন-যেম্।” 12 মুই যদবদে বুজিলুঙ্, গোজেনে তারে ন-পাদাই; টোবিয় আর সন্বল্লটে তারে টেঙা দিয়্যে বিলিনে তে মঅ বিরুদ্ধে এ কধানি কোইয়্যে। 13 তারে টেঙা দিয়্যে ওইয়্যে যেনে মুই দরাং আর তা কধামজিম্ কাম্ গুরিনে পাপ্ গরঙ্, আর সেক্কে যেনে তারা মরে দুর্নাম গুরিনে মরে লাজত্ ফেলেই পারন্। 14 ও মর্ গোজেন, টোবিয় আর সন্বল্লটে যিয়েনি গোজ্যন্ সিয়েনি তুই মনত্ রাগা। মিলে-ভাববাদী নোয়াদিয়া আর বাদবাগি যিদুক্কুন্ ভাববাদীয়্যে মরে দোরেবাত্তে চেট্ট্যা গোজ্যন্ তারার্ কধানিয়ো মনত্ রাগেচ্। দেবালান্ বানানা থুম্ অলঅ 15 ইলূল মাজর্ পোজোচ্ তারিগোত্, বায়ূন্নো দিনোত্ দেবালান্ তুলোনা থুম্ অলঅ। 16 আমা বেক্ শত্রুগুনে যেক্কে এ কধাগান শুনিলাক্ আর কায়-কুরে বেক্ জাদ্তুনে সিয়েন্ দেগিলাক্ সেক্কে আমা শত্রুগুনে সাহস আরেলাক্, কিত্যে তারা বুঝিলাক্, এ কামান্ আমা গোজেনর বল্লোই গরা ওইয়্যে। 17 সে অক্তত্ যিহূদার মুরুব্বীগুনে টোবিয়োর ইদু বোউত্ চিদি পাদেয়োন্ আর টোবিয়োর ইত্তুন্ তারা জোব্অ পেদাক্। 18 যিহূদার ভালোক্জনে টোবিয়োর ইদু শমক্তোই বান্যে এলাক্, কিত্যে তে অলদে আরহর পূঅ শখনিয়োর জামেই। টোবিয়োর পূঅ যিহোহানন বেরিখিয়োর পূঅ মশুল্লমর ঝিবোরে লোইয়্যে। 19 ইগুনে বাদেয়ো সে মুরুব্বীগুনে টোবিয়োর্ গম্ কামর্ কধানি মরে জানেদাক্ আর মঅ কধানিয়ো তারে জানেদাক্। টোবিয় মরে দর্বুক্ লাগেবাত্তে মইদু চিদি লিগিদো। |
Copyright © 2021 Bangladesh Bible Society
Bangladesh Bible Society