নহিমিয় 4 - Chakma Bibleযিগুনে দেবালান্ বানেলাক্ 1 আমি আরঅ দেবালান্ বানের্ শুনিনে সন্বল্লটে রাগে আগুনো ধোক্কেন্ ওই গেলঅ আর অমকদ বেজার্ অলঅ। তে যিহূদীগুনোরে ঠাট্টা গরা ধুরিলো। 2 তা লগে মানুচ্চুনোর্ মুজুঙোত্ আর শমরিয়ার সৈন্যদলুনোর্ মুজুঙোত্ তে কলঅ, “এ বল্পোজ্যে যিহূদীগুনে কি গত্তন্? তারা কি নিজেই এ কামান গুরিবাক্? গোজেনর্ বল্ পেবাত্তে তারা কি এ্যমান্ উৎসর্ব গুরিবাক্? এক দিনে কি দেবালান্ বানানা থুম্ গুরিবা? কট্টা কট্টা ওই পড়ি থেইয়্যে পাত্তরর্ কুড়োত্তুন্ কি তারা পাত্তরুনোরে দরমর গুরি তুলি পারিবাক্? সিগুন্ দঅ পুড়ি যেইয়োন।” 3 অম্মোনীয় টোবিয় সেক্কে তার্ কায়-কুরে এলঅ; তে কলদে, “তারা যিয়েন্ বানেয়োন্ সিয়েনর্ উগুরে যুনি এক্কো শিয়েল্ উদেগোই সালে তারার্ সে পাত্তরর্ দেবালান্ ভাঙি পুরিবো।” 4 সেক্কে নহিমিয় তবনা গুরিলো, “ও আমা গোজেন, তুই শুন্ কেধোক্কেন্ গুরিনে আমারে তুচ্ছো গরা অর্। তারার্ গোজ্যে অগমানান্ তুই তারার্ মাদা উগুরে ফেলা। তুই এমন্ গর্ যেনে তারা বন্দী ওইনে লুদেয়্যে মাল্ ইজেবে অন্য দেজত্ থান্। 5 তারার্ অন্যেয়ানি তুই মাব্ ন-গুরিচ্ বা তঅ চোগোর্ মুজুঙোত্তুন্ তারার্ পাপ্পানি তুই ফুজি ন-ফেলেচ্, কিত্যে যিগুনে দেবালান্ গাদাদন্ তারার্ মুজুঙোত্ তারা তরে অগমান্ গোজ্যন্।” 6 দেবালান্ যেদক্ অজল্ অবঅ সিয়েনর্ অদ্দেকান্ সং এধোক্কেন্ গুরিনে আমি তুলিলোং, কিত্যে মানুচ্চুনে তারার্ বেক্ মনান্-পরাণান দিইনে কাম্ গোজ্যন্। 7 মাত্তর্ সন্বল্লট, টোবিয়, আরবীয়োগুনে, অম্মোনীয়গুনে আর অস্দোদর মানুচ্চুনে যেক্কে শুনিলাক্, যিরূশালেমর দেবালান্ ঠিগ্ গরানার্ কামান্ উজেই যেইয়্যে আর ফাক্কানি বন্দ গরা অর্ সেক্কে তারা অমকদ রাগ্ তুলিলাক্। 8 তারা বেক্কুনে মিলিনে এ কুজুরোমিগান্ গুরিলাক্, তারা যেইনে যিরূশালেমর বিরুদ্ধে যুদ্ধো গুরিবাক্ আর বেজাল্ আরাম্ভ গুরি দিবাক্। 9 মাত্তর্ আমি আমা গোজেনর ইদু তবনা গুরিলোং আর তারার্ দরে দিন-রেত্ চুগি দিবাত্তে বেবস্থা গুরিলোং। 10 এ ভিদিরে যিহূদার মানুচ্চুনে কলাক্, “কাম্গুরিয়্যেগুনে বল্পোজ্যে ওই পোজ্যন্ আর পড়ি থেইয়্যে পাত্তরর্ কট্টাগুন্ এদক্ বেশ্ ওইয়োন্দে, আমি দেবালান্ আর তুলি ন-পারিবোং।” 11 ইন্দি আমা শত্রুগুনে কলাক্, “তারা জানিবার্ আগেন্দি বা দেগিবার্ আগেন্দি আমি সিদু তারার্ ভিদিরেন্দি যেইনে আঝিল্ অবং আর তারারে মারে ফেলেইনে কামানি বন্ধ গুরি দিবোং।” 12 সেনত্তেই যে যিহূদীগুনে তারার্ কায়-কুরে বজত্তি গুরিদাক্ তারা এইনে বার্ বার্ আমারে কুয়ো ধুরিলাক্, “তুমি আমা কায়-কুরে ফিরি এজঅ।” 13 ইয়েনি শুনিনে মুই দেবাল ভিদিরেন্দি তলে জাগায়ানিত্ দেবালর্ ফাক্কানির ইদু বংশ অনুসারে মানুচ্চুনোরে নেযেলুঙ্ আর তারার্ আঢত্ লাম্বা ছুড়ি, সেল্ আর ধনু দিলুঙ্। 14 সে পরেন্দি মুই বেক্কানি দেগিনে-শুনিনে মুরুব্বীগুনোরে, দাঙর্ পোজিশনর্ কামগুরিয়্যেগুনোরে আর বাদবাগি মানুচ্চুনোরে কলুঙ্, “তারারে তুমি ন-দোরেবা। যে দাঙর্ আর দর্ জাগাইদে প্রভু, তা কধাগান মনত্ গরঅ আর তমা ভেই, ঝি-পূঅ, মোক্ আর ঘরত্তেই যুদ্ধো গরঅ।” 15 আমা শত্রুগুনে যেক্কে হবর্ পেলাক্, আমি তারার্ কুজুরোমির কধানি হবর্ পেই আর গোজেনে সিয়েনি বিফল গুরি দিয়্যে, সেক্কে আমি বেক্কুনে দেবালর্ কায়-কুরে যেইনে যে যার্ কামত্ লাগি গেলঙ্। 16-17 সেদিন্যেত্তুন্ ধুরি মর্ অদ্দেক্ মান্জ্যে কাম্ গরা ধুরিলাক্ আর বাদবাগি অদ্দেক্ সেল্, ঢাল, ধনু আর জাদিলোই যুক্কোল্ ওই রলাক্। যিহূদার যিদুক্কুন্ মান্জ্যে দেবালান্ বানেয়োন্ তারার্ পিজেন্দি থেদাক্ তারার্ নেতাগুনে। যিগুনে মাল্-মজলা বুয়োদাক্ তারা এক্ আদেন্দি কাম্ গুরিদাক্ আর অন্য আদন্দি আত্যের্ ধুরিদাক্। 18 যিগুনে বানেদাক্ তারা পত্তিজনে কমরত্ তলোয়ার বানিনে কাম্ গুরিদাক্, আর যে তূরীগুন্ বাজেদ তে মইদু থেদঅ। 19 পরেন্দি মুই মুরুব্বী মানুচ্চুনোরে, দাঙর্ পোজিশনত্ কামগুরিয়্যেগুনোরে আর বাদবাগি মানুচ্চুনোরে কলুঙ্, “কামর্ চাগালাগান্ দাঙর্ আর সিয়েন্ বোউত্ জাগা জুড়িনে রইয়্যে; সেনত্তেই আমি দেবালান কায়-কুই একজনত্তুন্ অন্যজনে ফারগ্ ওইনে দূরোত্ দূরোত্ আগিই। 20 তুমি যিয়েনত্ তূরীর রঅ্গুন শুনিবা সিয়েনত্ আমা ইদু এইনে এগত্তর্ অবা। আমা গোজেনে আমার্ ওইনে যুদ্ধো গুরিবো।” 21 বেন্যেপোত্যেত্তুন্ ধুরি আরাম্ভ গুরিনে সাজোন্যে ন-অনা সং অদ্দেক্ মান্জ্যে সেল্ ধুরিনে থেদাক্ আর আমি এধোক্কেন্ গুরিনে কাম্ গুরিদোং। 22 সে অক্তত্ মুই মানুচ্চুনোরে আরঅ কলুঙ্, “পত্তিজনে তা চাগর্বোরে লোইনে রেদো অক্তত্ যেনে যিরূশালেমত্ থায় যেনে রেদোত্ চুগি দি পারে আর দিনোত্ কাম্ গুরি পারে।” 23 মুই বা মর্ ভেইয়ুনে বা মঅ চাগরুনে বা মঅ কিয়্যেরোক্ষ্যেগুনে কনজনে আমি কাবড়্-চুগোড়্ ন-খুলিদোং ; এন্ কি, পানির্ কায়-কুরে গেলেয়ো আমি পত্তিজনে নিজোর্ আত্যেরানি লগে নেযেদঙ্। |
Copyright © 2021 Bangladesh Bible Society
Bangladesh Bible Society