নহিমিয় 3 - Chakma Bibleযিগুনে দেবাল্ গাদেলাক্ 1 দাঙর্ ধর্মগুরু ইলীয়াশীবে আর তা লগে ধর্মগুরুগুনে কামত্ যেইনে মেষ-গেট্টো আরঅ গাদেলাক্। তারা সিবে গোজেনর নাঙে উৎসর্ব গুরিনে সিয়েনর্ দোরান্ লাগেলাক্। সে পরেন্দি তারা হম্মেয়া-তাম্বুল আর হননেল-তাম্বুলান সং গাদেইনে দেবালর্ সে দ্বিভাগ উৎসর্ব গুরিলো। 2 ইয়েন পরেদি ভাগ্কান যিরীহোর মানুচ্চুনে বানেলাক্ আর সে পরেন্দি ভাগ্কান ইম্রির পূঅ সক্কুরে বানেল। 3 হস্সনায়ার পূঅগুনে বানেলাক্ মাছ-গেট্তুয়ো। তারা সিয়েনর্ তক্তানি আর সিয়েনর দোরানি, খিলুন্ আর হুক্কুন্ লাগেলাক্। 4 সে পরেন্দি ভাগ্কান ঠিগ্ গুরিলাক্ ঊরিয়ের পূঅ মরেমোৎ। ঊরিয় অলদে হক্কোসর পূঅ। সে পরেন্দি ভাগ্কান বেরিখিয়োর পূঅ মশুল্লমে ঠিগ্ গুরিলো। বেরিখিয় অলদে মশেষবেলর পূঅ। সে পরেন্দি ভাগ্কান বানার পূঅ সাদোকে ঠিগ্ গুরিলো। 5 সে পরেন্দি ভাগ্কান ঠিগ্ গুরিলাক্ তকোয়ার মানুচ্চুনে, মাত্তর্ তারার্ তাগোয়্যে মানুচ্চুনে তারার্ চেইচিদিয়্যেগুনোর্ অধীনোত্ কাম্ গুরিবাত্তে রাজী ন-অলাক্। 6 পাসেহের পূঅ যিহোয়াদা আর বসোদিয়ার পূঅ মশুল্লম যিশানা-গেট্তুয়ো ঠিগ্ গুরিলাক্। তারা সিয়েনর্ তক্তানি আর সিয়েনর দোরানি, খিলুন্ আর হুক্কুন্ লাগেলাক্। 7 সে পরেন্দি ভাগ্কান ঠিগ্ গুরিলাক্ গিবিয়োনীয় মলাটিয় আর মেরোণোথীয় যাদোনে। ইগুনে অলাক্ গিবিয়োন আর মিস্পার মানুচ্। এ ভাগ্কান ইউফ্রেটিস গাঙর্ পোজিমেন্দি শাজন্গুরিয়্যেগুনোর ঘরর্ উইপারন্দি এলঅ। 8 ইয়েন পরেদি ভাগ্কান ঠিগ্ গুরিলো হর্হয় পূঅ উষীয়েলে। উষীয়েলে অলদে এক্কো সনা বানেয়্যে। সে পরেন্দি ভাগ্কান ঠিগ্ গুরিলো হনানিয়। সে তুম্বাজ্ জিনিস্ বানেদ। এধোক্কেন্ গুরিনে তারা পাদাজ্যে-দেবালান্ সং যিরূশালেমর দেবালান্ আগঅ অবস্থাত্ ফিরেই আনিলাক্। 9 যিরূশালেম জেলার্ অদ্দেক্ ভাগর্ শাজন্গুরিয়্যে হূরোর্ পূঅ রফায় সে পরেন্দি ভাগ্কান ঠিগ্ গুরিলো। 10 সে পরেন্দি ভাগ্কান ঠিগ্ গুরিলো হরূমফোর পূঅ যিদায়। এ ভাগ্কান এলদে তা ঘরর্ কায়-কুরে। সে পরেন্দি ভাগ্কান হশব্নিয়োর পূঅ হটুশে ঠিগ্ গুরিলো। 11 হারীমোর পূঅ মল্কিয় আর পহৎ-মোয়াবর পূঅ হশূব সে পরেন্দি ভাগ্কান আর তুন্দুর-তাম্বুলান্ ঠিগ্ গুরিলাক্। 12 যিরূশালেম জেলার অদ্দেক্ ভাগর্ শাজন্গুরিয়্যে হলোহেশর পূঅ শল্লুম আর তার্ ঝিগুনে সে পরেন্দি ভাগ্কান ঠিগ্ গুরিলাক্। 13 কিজিঙো-গেট্তুয়ো ঠিগ্ গুরিলাক্ হানূনে আর সানোহর আদাম্মেগুন। তারা সিয়েন দোরান্, খিলুন্ আর হুক্কুন্ লাগেলাক্। তারা সার-গেট্তুয়ো সং দেবালর এক আজার আত্ জাগায়ো ঠিগ্ গুরিলাক্। 14 বৈৎ-হক্কেরম জেলার শাজন্গুরিয়্যে রেখবর পূঅ মল্কিয় সার-গেট্তুয়ো ঠিগ্ গুরিলো। তে তার্ দোরান্, খিলুন্ আর হুক্কুন্ লাগেয়্যে। 15 মিস্পা জেলার শাজন্গুরিয়্যে কল্হোষির পূঅ শল্লুম পয়নালার্-গেট্তুয়ো ঠিগ্ গুরিলো। তে সিয়েন উগুরে ছাল্ দিলো আর সিয়েনর দোরান্, খিলুন্ আর হুক্কুন্ লাগেল। রাজার বাগানর কায়-কুরে শীলোহর পুয়োরর্ দেবালত্তুন্ আরাম্ভ গুরিনে দায়ূদোর শঅরত্তুন্ যে সিড়িগান্ তলেন্দি লামি যেইয়্যে সিয়েন সং তে ঠিগ্ গুরিলো। 16 বৈৎসূর জেলার অদ্দেক ভাগর্ শাজন্গুরিয়্যে অস্বূকোর পূঅ নহিমিয় দেবালর পরেন্দি ভাগকান্ দায়ূদ-বংশর গোরানর্ ইত্তুন্ খুন্যে পুয়োর্বো আর বীরুনোর ঘরানি সং ঠিগ্ গুরিলাক্। 17 সে পরেন্দি ভাগ্কান বানির পূঅ রহূমোর অধীনোত্ লেবীয়গুনে ঠিগ্ গুরিলাক্। সে পরেন্দি ভাগ্কান কিয়ীলা জেলার অদ্দেক্ ভাগর্ শাজন্গুরিয়্যে হশবিয় তার্ চাগালার্ ওইনে ঠিগ্ গুরিলো। 18 সে পরেন্দি ভাগ্কান তারার্ ভেইয়ুনে, অত্তাৎ কিয়ীলা জেলার বাদবাগি অদ্দেক্ ভাগর্ মানুচ্চুনে ঠিগ্ গুরিলাক্। তারা তারার্ শাজন্গুরিয়্যে হেনাদদর পূঅ ববয়র অধীনোত্তুন্ ঠিগ্ গরেদে কামানি গুরিলাক্। 19 সে পরেন্দি ভাগ্কান, অত্তাৎ মিস্পার শাজন্গুরিয়্যে যেশূয়োর পূঅ এসর আত্যের্ রাগেবার ঘরত্ উদিবার্ পধ মুজুঙোন্দি জাগানত্তুন্ দেবালর টেক্কো সং ঠিগ্ গুরিলো। 20 সে পরেন্দি সব্বয়র পূঅ বারূকে দেবালর বাক্কোত্তুন্ দাঙর্ ধর্মগুরু ইলিয়াশীবোর ঘরর্ দোরান সং আওজ্ গুরিনে ঠিগ্ গুরিলাক্। 21 সে পরেন্দি ভাগকান্ ঊরিয়োর পূঅ মরেমোৎ ইলিয়াশীবোর ঘরর্ দোরানত্তুন্ আরাম্ভ গুরিনে ঘরানর্ থুম্ সং ঠিগ্ গুরিলো। ঊরিয় অলদে হক্কোসর পূঅ। 22 সে পরেন্দি ভাগ্কান ঠিগ্ গুরিলাক্যে যর্দন গাঙর্ সংজাগাত্ বজত্তি গুরিয়্যে ধর্মগুরুগুনে। 23 সে পরেন্দি ভাগ্কান ঠিগ্ গুরিলাক্ বিন্যামীন আর হশূব। ইয়েন্ অলদে তারার্ ঘরর্ মুজুঙোন্দি ভাগ্কান। সে পরেন্দি ভাগ্কান মাসেয়র পূঅ অসরিয় ঠিগ্ গুরিলো। এ ভাগ্কান অলদে তা ঘরর্ কায়-কুরে ভাগ্কান। মাসেয় অলদে অননিয়োর পূঅ। 24 তা কায়-কুরে হেনাদদর পূঅ বিন্নুয়ী অসরিয়োর ঘরানত্তুন্ আরাম্ভ গুরিনে দুযি সং আর কোণাবো সং আর এক্ ভাগ্ ঠিগ্ গুরিলো। 25-26 উষয়র পূঅ পাললে দুযিবোর্ অন্য কিত্তেন্দি ঠিগ্ গুরিলো। ইয়েন্ অলদে চুগিদারুনোর্ উদোনর্ ইদু রাজঘরত্তুন্ নিগিলি এইনে দাঙর্ তাম্বুলানর্ মুজুঙোন্দি ভাগকান্। সে পরেন্দি ভাগ্কান ঠিগ্ গুরিলো পরোশর পূঅ পদায় আর উবোসনা-ঘরর্ যে সেবাগুরিয়্যেগুনে ওফল মুড়োবোত্ বজত্তি গুরিদাক্ তারা। এ ভাগ্কান অলদে পূগেন্দি পানি-গেট্তুয়ো আর নিগিলি এচ্চ্যে তাম্বুলান সং। 27 তারার্ কায়-কুরে তকোয়র মানুচ্চুনে সে নিগিলি এচ্ছ্যে দাঙর্ তাম্বুলানত্তুন্ ওফলর দেবালান্ সং আর এক্কান্ ভাগ্ ঠিগ্ গুরিলাক্। 28 ঘোড়া-গেদোর্ মুজুঙো ভাগ্কান ধর্মগুরুগুনে ঠিগ্ গুরিলাক্। তারা পত্তিজনে নিজোর্ নিজোর্ ঘরর্ কায়-কুরে দেবাল ভাগ্কান ঠিগ্ গুরিলাক্। 29 সে পরেন্দি ভাগ্কান ইম্মেরর পূঅ সাদোকে ঠিগ্ গুরিলো। ইয়েন্ অলদে তা ঘরর্ মুজুঙেন্দিগান। সে পরেন্দি ভাগ্কান পূগেন্দি-গেদোর্ চুগিদার শখনিয়োর পূঅ শময়িয় ঠিগ্ গুরিলো। 30 তার্ কায়-কুরে শেলিমিয়োর পূঅ হনানিয় আর সালফর ছয় লম্বর্ পূঅ হানূনে আর এক্কান্ ভাগ্ ঠিগ্ গুরিলো। সিয়েনর্ কায়-কুরে ভাগ্কান বেরিখিয়োর পূঅ মশুল্লমে ঠিগ্ গুরিলো। ইয়েন্ অলদে তা ঘরর্ মুজুঙেন্দিগান। 31 সে পরেন্দি ভাগ্কান মল্কিয় নাঙে এক্কো সনাবানেয়্যে ঠিগ্ গুরিলো। ইয়েন্ অলদে মিটিঙো-গেদোর্ মুজুঙোত্ উবোসনা-ঘরর্ সেবাগুরিয়্যেগুনোর্ আর বেবসায়ীগুনোর্ ঘরানি সং আর দেবাল কণার্ উগুরে গুদিবো সং। 32 সনাবানেয়্যেগুনে আর বেবসায়ীগুনে দেবাল কণাবো উগুরে আর এ্যমান-গেদোর্ সংমোধ্যে জাগায়ান্ ঠিগ্ গুরিলাক্। |
Copyright © 2021 Bangladesh Bible Society
Bangladesh Bible Society