নহিমিয় 2 - Chakma Bibleনহিমিয়োর যিরূশালেমত্ যানা 1 রাজা অর্তক্ষস্তর রাজাগিরির্ কুড়ি বজরত্ নীষণ মাজত্ একদিন্যে হেবার্ সময়োত্ রাজার মুজুঙোত্ আংগুর-রস এলঅ্, আর মুই সিয়েনি নেযেইনে রাজারে দিলুঙ্। এ আগেন্দি মুই রাজার মুজুঙোত্ কনদিনঅ সুদোমু গুরি ন-থাং। 2 সেনত্তেই রাজা মরে কলদে, “তর্ দঅ অসুখ্ ন-অয়, সালে তঅ মুয়োন্ এদক্ সুদোমু দেগা যার্ কিত্তে? ইয়েন্ দঅ মনত্ দুগ্ বাদে আর কিচ্ছু নয়।” এ কধাগান শুনিনে মুই অমকদ দোরেলুঙ্, 3 তো রাজারে কলুং, “মহারাজ জিংকানিবর্ বাঁজি থেজ্। মর্ পূরোণিমানুচ্চুনে যে শঅরত্ গোর্ পেইয়োন্ সে শঅরান্ যেক্কে ভস্ত ওই যেইয়্যে আর সিয়েনর গেট্টুন আগুন্দোই পুড়িনে বর্বাত্ লাগা ওইয়্যে সেক্কে মর্ মুয়োন্ কিত্তেই সুদোমু ন-লাগিবো?” 4 রাজা মরে কলদে, “তুই কি চাজ্?” সেক্কে মুই স্বর্গর গোজেনর ইদু তবনা গুরিলুঙ্। 5 সে পরেন্দি জোবত্ রাজারে কলুঙ্, “মহারাজে যুনি হুজি ওই থায় আর তঅ চাগর্বো যুনি তঅ চোগেন্দি দোয়্যে-মেয়্যে পেই থায় সালে মর্ পূরোণিমানুচ্চুনোর্ গোরানি যিয়েনত্ আঘে যিহূদার সে শঅরত্ তুই মরে যেবাত্তে অনুমতি দে যেনে মুই সিয়েনি আরঅ বানেই পারং।” 6 রাজার কায়-কুরে রাণীয়ো বোই এলঅ। রাজা মরে পুযোর্ গুরিলো, “তর্ যাদে কয়দিন লাগিবো, আর কক্কে বা তুই ফিরি এবে?” মুই এক্কান্ সময়োর্ কধা কনার্ পরেন্দি রাজা হুজি ওইনে মরে যেবার্ অনুমতি দিলো। 7 মুই রাজারে আরঅ কলুঙ্, “যুনি মহারাজে হুজি ওই থায় সালে ইউফ্রেটিস গাঙর্ উপারর্ শাজন্গুরিয়্যেগুনোর্ ইদু তে যেনে চিদি দে যেনে তারা মরে তারার্ দেজর্ ভিদিরেন্দি যিহূদাত্ যেবাত্তে দুয়োন্। 8 ইয়েনিবাদেয়ো তে যেনে তার্ ঝাড়-চুগিদিয়্যে আসফর ইদু এক্কান্ চিদি দে যেনে তে উবোসনা-ঘরর্ কায়-কুরে তাম্বুলানির গেদোর্ গাজ্ছানিত্তে আর শঅরর্ দেবাল আর মর্ থেবার্ ঘরত্তে মরে গাজ্ দে।”মঅ গোজেনর ভালেদির্ আঢ্তানি আমা উগুরে এলঅ বিলিনে রাজা মর্ বেক্ কোজোলিগানি রোক্ষ্যে গুরিলো। 9 তে মঅ লগে কয়েক্কো সেনাপতি আর একদল ঘোড়াবাহিনী সৈন্যরে পাধেই দিলো। পরেন্দি মুই ইউফ্রেটিস গাঙর্ উপারর্ শাজন্গুরিয়্যেগুনো ইদু যেইনে রাজার চিদিগান দিলুঙ্। 10 ইস্রায়েলীয়গুনোরে ভালেদি গুরিবাত্তে এক্কো মানুচ্ এচ্ছ্যে শুনিনে হোরোণীয় সন্বল্লট আর অম্মোনীয় মুরুব্বী টোবিয় অমকদ বেজার্ অলঅ। দেবালর অবস্থাগান চানা 11-12 মুই যিরূশালেমত্ যেইনে সিদু তিনদিন থানার পরেন্দি রেদোত্ কয়েক্কো মানুচ্ লগে নেযেইনে নিগিলিলোং। যিরূশালেমত্তে যিয়েনি গুরিবাত্তে গোজেনে মঅ মনত্ আওজ্ দিয়্যে সিয়েনি মুই কাররে ন-কঙ্। মুই যে এ্যমান উগুরে চোজ্যং সিবে বাদে আর অন্য কনঅ এ্যমান্ মঅ লগে ন-এলাক্। 13 সে রেদোত্ নিগিলিনে মুই কিজিঙো-গেট্টোর্ ভিদিরেন্দি সাপ-কূয়ো আর সে পরেন্দি সার-গেদোর্ ইন্দি গেলুং আর যিরূশালেমর ভাঙা দেবাল্ আর আগুন্দোই ভস্ত গোজ্যে গেট্তুনোর অবস্থাগান্ চেলুঙ্। 14 সে পরেন্দি মুই পয়নালা-গেদোত্ আর রাজার্ পূয়োরবোর্ ইন্দি উজেই গেলুং; মাত্তর্ মুই যে এ্যমান্নো উগুরে চোজ্যং তা সে জাগান ইন্দি যেবাত্তে কনঅ পথ ন-এলঅ। 15 ইয়েনত্তে মুই সে রেদোত্ দেবালর অবস্থাগান চাদে চাদে কিজিঙোর্ ভিদিরেন্দি গেলুঙ্ আর কিজিঙোর-গেদো ইন্দি আরঅ শঅরত্ ফিরি এলুঙ্। 16 মুই কুদু যেইয়োং বা কি গোজ্যং সিয়েন্ দাঙর্ পধর্ কামগুরিয়্যেগুনে হবর্ ন-পান, কিত্যে মুই সেক্কেয়ো সামান্য যিহূদীগুনোরে বা ধর্মগুরুগুনোরে বা মুরুব্বী মানুচ্চুনোরে বা দাঙর্ পোজিশনর্ কাম্গুরিয়্যেগুনোরে বা যিগুনে কাম্ গুরিবাক্ তারারে কিচ্ছু ন-কঙ্। 17 পরেন্দি মুই সে দাঙর্ পোজিশনর্ কাম্গুরিয়্যেগুনোরে কলুঙ্, “আমি যে কেধোক্কেন্ দুঘোত্ আগিই সিয়েন্ তুমি দেগর্। যিরূশালেমান ভস্ত ওই রোইয়্যে আর সিয়েনর্ গেট্তুন্ আগুন্দোই পুড়ো ওইয়্যে। এজঅ, আমি যিরূশালেমর দেবালান্ আরঅ গাদেইনে তুলিই। ইয়েন্দোই আর আমি ঘিনাইদে মানুচ্ ওই ন-থেবং।” 18 মঅ গোজেনে কেধোক্কেন্ গুরিনে মরে ভালেদি গোজ্যে আর রাজা মরে কি কোইয়্যে সিয়েন্অ মুই তারারে জানেলুঙ্। জোবত্ তারা কলাক্, “এজঅ্, আমি বানানা আরাম্ভ গুরিই।” ইয়েন কোইনে তারা সে গম্ কামান্ আরাম্ভ গুরিবাত্তে যুক্কোল্ অলাক্। 19 মাত্তর্ হোরণীয় সন্বল্লট, অম্মোনীয় মুরুব্বী টোবিয় আর আরবীয় গেশম্ এ কধাগান শুনিনে আমারে ঘিনা ধুরিলাক্। তারা কলাক্, “তুমি ইয়েন কি গরর্? তুমি কি রাজার বিরুদ্ধে উল্লোমি গুরিবা?” 20 মুই জোবত্ তারারে কলুঙ্, “স্বর্গর গোজেনে আমারে ফোলেই দিবো। আমি, তার্ চাগরুনে, আরঅ দেবাল গাদেবং, মাত্তর্ যিরূশালেমত্ তমার্ কনঅ সোম্পোত্তি, কনঅ্ দাবি বা কনঅ অধিকার নেই।” |
Copyright © 2021 Bangladesh Bible Society
Bangladesh Bible Society