নহিমিয় 11 - Chakma Bibleযিরূশালেম আর তার্ কায়-কুরে আদাম্মেগুনোর্ নাঙানি 1 মানুচ্চুনোর নেতাগুনে যিরূশালেমত্ বজত্তি গুরিদাক্। বাদবাগি মানুচ্চুনে চাম্বা চেলাক্ যেনে তারা ভিদিরে পত্তি দশজনে একজন পবিত্র শঅর্ যিরূশালেমত্ বজত্তি গুরি পারন্, আর বাদবাগি নয়জনে তারার্ নিজোর নিজোর্ আদামত্ থেবাক্। 2 যিদুক্কুন্ মান্জ্যে আওজ্ গুরিনে যিরূশালেমত্ বজত্তি গুরিবাত্তে চেলাক্ মানুচ্চুনে তারারে নাঙ্ গিনিলাক্। 3-5 বোউত্ ইস্রায়েলীয়, ধর্মগুরু, লেবীয়, উবোসনা-ঘরর্ সেবাগুরিয়্যে আর শলোমনর্ চাগরুনোর্ বংশধরুনোরে যিহূদা দেজর্ নানান্ আদামত্ নিজোর্ নিজোর্ ভূইয়োত্ বজত্তি গুরিদাক্। ইয়েনিবাদেয়ো যিহূদা আর বিন্যামীন-গুট্টির কয়েক্কো মান্জ্যে যিরূশালেমত্ বজত্তি গুরিদাক্। দেজর্ যিদুক্কুন্ নেতায় যিরূশালেমত্ বজত্তি গুরিদাক্ তারা অলাক্: যিহূদার বংশধরুনো ভিদিরেত্তুন্ উষিয়োর পূঅ অথায় আর বারূকোর পূঅ মাসেয়। উষিয়োর পূরোণিমানুচ্চুন্ অলাক্ সখরিয়, অমরিয়, শফটিয়, মহললেল আর পেরস। বারূকোর পূরোণিমানুচ্চুন্ অলাক্ কল্হোষি, হসায়, অদায়া, যোয়ারীব, সখরিয় আর শীলোনীয়। 6 পেরসর গুট্টিত্ বেক্কুনে চের্শঅ আটষট্টিজন বোলী মান্জ্যে যিরূশালেমত্ বজত্তি গুরিদাক্। 7-8 বিন্যামীনোর্ গুট্টির্ ভিদিরেত্তুন্ মশুল্লমর পূঅ সল্লু আর তার্ এজাল্দিয়্যে গব্বয় আর সল্লয়। মশুল্লমর পূরোণিমানুচ্চুন্ অলাক্ যোয়েদ, পদায়, কোলায়া, মাসেয়, ঈথীয়েল আর যিশায়াহ। এ গুট্টিত্ বেক্কুনে নয়শঅ আটেশ জন মানুচ্ যিরূশালেমত্ বজত্তি গুরিদাক্। 9 শিখ্রির পূঅ যোয়েল অলদে তারার্ আজল্ কাম্গুরিয়্যে আর হস্সনূয়ার পূঅ যিহূদা অলদে শঅরর্ দ্বিলম্বর্ নেতাবো। 10-11 ধর্মগুরুগুনোর্ ভিদিরেত্তুন্ যোয়ারীবোর্ পূঅ যিদয়িয়, যাখীন আর হিল্কিয়োর পূঅ সরায়। হিল্কিয়োর পূরোণিমানুচ্চুন্ অলাক্ মশুল্লম, সাদোক, মরায়োৎ আর অহীটুব। অহীটুবে গোজেনর ঘরর্ কাবিদ্যাঙি কামানি গুরিদো। 12-14 তারার্ আরঅ বোউত্ সমাজ্যে কাম্গুরিয়্যে এলাক্ যিগুনে উবোসনা-ঘরত্ কাম্ গুরিদাক্। এ গুট্টির্ বেক্কুনে আস্তোশঅ বেইশজন ধর্মগুরু যিরূশালেমত্ বজত্তি গুরিদাক্। ইগুনে বাদেয়ো যিরোহমর পূঅ অদায়া আর তা গুট্টির্ দ্বিশঅ বিয়াল্লিশ জন ধর্মগুরু যিরূশালেমত্ বজত্তি গুরিদাক্। ইগুনে বেক্কুনে অলাক্ পরিবারর্ আজল্লো। যিরোহমর পূরোণিমানুচ্চুনে অলাক্ পললিয়, অম্সি, সখরিয়, পশ্হূর আর মল্কিয়। ইগুনে বাদেয়ো অসরেলের পূঅ অমশয় আর তা গুট্টির্ একশঅ আটেশজন ধর্মগুরুয়ো যিরূশালেমত্ বজত্তি গুরিদাক্। ইগুনে বেক্কুনে অলাক্ বোলী যোদ্ধা; তারার্ আজল্ কাবিদ্যাঙ্ এলদে হগ্গদোলীমোর পূঅ সব্দীয়েল। অসরেলর পূরোণিমানুচ্চুনে অলাক্ অহসয়, মশিল্লেমোৎ আর ইম্মের। 15 লেবীয়গুনোর ভিদিরেত্তুন্ হশূবের পূঅ শিময়িয়; হশূবের পূরোণিমানুচ্চুনে অলাক্ অস্রীকাম, হশবিয় আর বুন্নি। 16 ইগুন্ বাদেয়ো এলদে শব্বথয় আর যোষাবাদ নাঙে লেবীয়গুনোর ভিদিরে দ্বিজন আজল্ মানুচ্, যিগুনোর্ আঢত্ গোজেনর ঘরর্ বারেন্দি কামানি চেইচিদিবার্ ভারান্ এলঅ। 17 ইগুনে বাদেয়ো এলদে মীখার পূঅ মত্তনিয়, যিবে ভালেদি আর তবনাগানি পরিচালনা কামত্ আজল্ এলঅ। মীখার পূরোণিমানুচ্চুন অলাক্ সব্দি আর আসফ। ইগুনোর্ লগে এলাক্ বক্বুকিয়, যিবে তার্ সমাজ্যেগুনোর্ ভিদিরে দ্বিলম্বরত্। আরঅ এলদে শম্মুয়োর পূঅ অব্দ; শম্মুয়োর পূরোণিমানুচ্চুনে অলাক্ গালল আর যিদূথূন। 18 পবিত্র শঅরর্ লেবীয়গুনে বেক্কুনে অলাক্ দ্বিশঅ চুরোশি জন। 19 গেট্-চুগিদারুনে অলাক্ অক্কুব, টল্মোন আর তারার্ সমাজ্যেগুনে। ইগুনে একশঅ বায়োত্তুর্ জন মান্জ্যে গেট্তুন চুগি দিদাক্। 20 ইস্রায়েলীয়গুনোর বাদবাগি মানুচ্চুনে, ধর্মগুরুগুনে আর লেবীয়গুনে যিহূদার পুরো শঅর্ আর আদামর ভিদিরে পত্তিজনে যে যার্ পূরোণিমানুচ্চুনোর্-ভূইয়োত্ বজত্তি গুরিদাক্। 21 উবোসনা-ঘরর্ সেবাগুরিয়্যেগুনে ওফল মুড়োবোত্ বজত্তি গুরিদাক্। তারার্ চেইচিদিবার্ ভারান্ এলদে সীহ আর গীষ্পের উগুরে। 22 যিরূশালেমত্ লেবীয়গুনোর আজল্ কাম্গুরিয়্যে এলদে বানির পূঅ উষি। বানির পূরোণিমানুচ্চুন্ অলাক্ হশবিয়, মত্তনীয়, মীখা আর আসফ। আসফর বংশর মানুচ্চুনে গায়ক্ ইজেবে গোজেনর ঘরত্ সেবা-কাম্ গুরিদাক্। 23 রাজার উগুমোর্ অধীনোত্ এলাক্কে এ গানগেইয়্যেগুনে। সে উগুম্ মজিম্ তারার্ পত্তিদিনোর্ কামানি ঠিগ্ গরা অদঅ। 24 মানুচ্চুনোর্ বেক্কানি পৌইদ্যেনে রাজার সল্লাদিয়্যে এলদে মশেষবেলর পূঅ পথাহিয়। মশেষবেলর পূরোণিমানুচ্ অলদে সেরহ আর যিহূদা। 25 যিহূদা-গুট্টির্ মানুচ্চুনে যেদক্কানি আদাম্ আর সেজাগার্ ক্ষেত্-খামারানিত্ বজত্তি গুরিদাক্ সিয়েনি অলদে কিরিয়ৎ-অর্ব আর তার্ কায়-কুরে আদামানি, দীবোন আর সিয়েনর্ কায়-কুরে আদামানি, যিকব্-সেল আর সিয়েনর্ কায়-কুরে আদামানি, 26 যেশূয়, মোলাদা, বৈৎ-পেলট, 27 হৎসর-শুয়াল, বের্-শেবা আর তার্ কায়-কুরে আদামানি, 28 সিক্লগ, মকোনা আর সিয়েনর্ কায়-কুরে আদামানি, 29 ঐন্-রিম্মোন, সরা, যর্মূত, 30 সানোহ, অদুল্লম আর সিয়েনির কায়-কুরে আদামানি, লাখীশ আর সিয়েনর্ কায়-কুরে আদামানি আর অসেকা আর সিয়েনর কায়-কুরে আদামানি। তারা বের্-শেবাত্তুন্ আরাম্ভ গুরিনে হিন্নোম কিজিঙ্ সং বেক্ জাগানিত্ বজত্তি গুরিদাক্। 31 বিন্যামীন-গুট্টির্ মানুচ্চুনে যেদক্কানি আদামত্ বজত্তি গুরিদাক্ সিয়েনি অলদে গেবা, মিক্মস, অয়া, বৈথেল আর সিয়েনির্ কায়-কুরে আদামানি, 32 অনাথোৎ, নোব, অননিয়া, 33-35 হাৎসার, রামা, গিত্তয়িম, হাদীদ, সবোয়িম, নবল্লাট, লোদ, ওনো আর কালিগরুনোর্ কিজিঙানি। 36 ইয়েনিবাদেয়ো কিজু লেবীয়, যিগুনে আগেন্দি যিহূদা-চাগালাত্ বজত্তি গুরিদাক্, তারা বিন্যামীন-চাগালাত্ যেইনে বজত্তি গরা ধুরিলাক্। |
Copyright © 2021 Bangladesh Bible Society
Bangladesh Bible Society