নহিমিয় 1 - Chakma Bible1 হখলিয়োর পূঅ নহিমিয়র কধা। রাজা অর্তক্ষস্তর রাজাগিরির কুড়ি বজরত্ কিশ্লেব মাজত্ মুই শূশন রাজধানীত্ এলুং। 2 হনানি নাঙে মঅ ভেইয়ূনো ভিদিরে একজন আর যিহূদার অন্য কয়েক্কো মানুচ্ শূশনত্ এলাক্। বাবিলো বন্দীদজাত্তুন্ যিগুনে ফিরি যেইয়োন্ সে মানুচ্চুনোর্ পৌইদ্যেনে আর যিরূশালেমর পৌইদ্যেনে মুই তারার্ ইদু পুযোর্ গুরিলুঙ্। 3 তারা মরে কলাক্, “বন্দীদজাত্তুন্ যিগুনে দেজত্ ফিরি যেইয়োন্ তারা অমকদ দুগোত্ আর অসর্মানর্ ওইনে আগন্। যিরূশালেমর দেবালান্ ভাঙি যেইয়্যে আর সিয়েনর্ গেট্টুন আগুন্দোই পুড়ি দিয়্যে ওইয়্যে।” 4 এ কধানি শুনিনে মুই বজিনে কানা ধুরিলুঙ্। কয়েকদিন ধুরিনে মুই আবিলেচ্ খেলুঙ্ আর উবোস্ থেলুং আর স্বর্গর গোজেনর ইদু তবনা গুরিলুং। 5 সে পরেন্দি মুই কলুং, ও স্বর্গর গোজেন লগেপ্রভু, দর্ বুগুদ্ লাগেয়্যে দাঙর্ গোজেন, যিগুনে তরে কোচ্পান আর তঅ উগুম্ পালান্ তুই তারাত্তেই থুম্ ন-ওইয়্যে কোচ্পানার্ বেবস্থা রোক্ষ্যে গুরি থাচ্। 6 ও লগেপ্রভু, কোজোলি গরঙ্, তঅ চাগরুনোত্তেই, অত্তাৎ ইস্রায়েলীয়গুনোত্তে মুই তঅ চাগর্ তঅ মুজুঙোত্ দিনে রেদে যে তবনা গরঙর্ সিয়েনি তুই শুন্ আর সিয়েনিত্ মনান্ দে। আমি ইস্রায়েলীয়গুনে তর্ উল্লোমি গুরিনে যে পাপ্পানি গোজ্যেই সিয়েনি মুই স্বীগের্ গরঙর্। হামাক্কাই মুই আর মঅ্ বাবর্ বংশর মানুচ্চুনে পাপ গোজ্যেই। 7 আমি তর্ উল্লোমি গুরিনে অমকদ অন্যেই কাম্ গোজ্যেই। তঅ চাগর্ মোশিরে তুই যেদক্কানি উগুম, সুদোম আর রীদি-সুদোম্ দুয়োচ্ সিয়েনি আমি ন-পালেই। 8 কোজোলি গরঙ্, তঅ চাগর্ মোশিরে তুই যে উগুমান্ দুয়োচ্ সিয়েনি মনত্ তুলি চাহ্। তুই কোইয়োচ্ছ্যে, তুমি যুনি অবিশ্বেজি অ সালে মুই অন্য জাত্তুনো ভিদিরে তমারে ছিদি দিম্; 9 মাত্তর্ তুমি মইদু ফিরি এলে আর মঅ উগুমানি পালন গুরিনে সে মজিম্ কাম্ গুরিলে, তমার্ বন্দীদজাত্ থেইয়্যে মানুচ্চুনে যুনি আগাজর্ থুম্ দুযিত্অ থান্ সালে মুই তারারে সিয়োত্তুন্ তোগেইনে মর্ থেবার ঘর ইজেবে যে জাগায়ান্ বেঈ নেযেয়োং সিদু তারারে নেযেম্। 10 “ইগুনে তরই চাগর্ আর তরই মানুচ্, যিগুনোরে তুই তর্ দাঙর্ বল্লোই আর দরমর আত্তোই উদ্দোর্ গোজ্যস্। 11 ও প্রভু, কোজোলি গরঙ্, তর্ এ চাগর্বোর তবনালোই আর যিগুনে তর্ নাঙান্ ভক্তি গুরিনে ইদোত্ তুলোন্ তর্ সে চাগরুনোর্ তবনাগানি তুই শুনিচ্। তর্ চাগর্বোরে এচ্ছ্যে ফোলেই দে আর এ রাজাবো ইদু দোয়্যে-মেয়্যের্ মানুচ্চো গর্।” মুই রাজার আংগুর-রস ভাগগুরি দিয়্যে এলুঙ্। |
Copyright © 2021 Bangladesh Bible Society
Bangladesh Bible Society