নহূম 3 - Chakma Bible

অভিশাব্ পেইয়্যে নীনবীগান

¹ অভিশাব্ পোড়োক্, সেই লো ঝোরেয়্যে শঅরানর্, যিয়েন মিজে আর লুদেয়্যে জিনিস্‌‌‌‌চোই ভোজ্জ্যে, যিয়েনত্ নিত্য মানুচ্-শিগের্ চলের্।

² শুনো, চাবুগো রঅ, চাক্কার্ ঘড়ঘড় রঅ; সিয়েনত্ ঘোড়া ফাল্যেনে যাদন্; রথ্‌‌‌‌তানি ইন্দি উন্দি যার্;

³ ঘোড়া বাহিনীগুনে আক্রমন গত্তন্, লাম্বা ছুরিগানি ঝিমিলের্, সেলুন্ ঝিক্ ঝিক্ গরের্। চঅ, বোউত্ আহত মানুচ্ আর মরা কিয়্যের্ কুড়্, গুণি ন-ফুরেইয়্যে মরাকিয়্যে, মান্‌জ্যে মরা কিয়্যে উগুরে উজোত্ খাদন্।

⁴ ইয়েনি বেক্কানি অর্ সেই বেশ্যেবোর্ বোউত্ বেশ্যেগিরিত্তে; তে জদবদে দোল্ আর নানান্ বাবোত্যে যাদুকরী। তার বেশ্যের্ কামানিলোই তে জাদ্‌তুনোরে আর যাদু বিদ্যেলোই মানুচ্চুনোরে বন্দী গরে।

⁵ বেগত্তুন্ খেমতাবলা লগেপ্রভু কত্তে, “ও নীনবী, মুই তঅ বিরুদ্ধে; মুই মুয়োন সং তঅ কাবড়ান্ তুলিম। তর্ লাংটাগান মুই জাদ্‌তুনোরে দেগেম আর রেজ্যগানিরে দেগেম তর্ লাজানা।‌

⁶ মুই তঅ উগুরে আদংকাজর্ ফেলেম, তরে ঘিনেইদ্যে চোগেদি রিনি চেইম্ আর তরে ঈচ্ গরেদে মান্‌‌জ্য ধোক্ক্যেন গুরিম।

⁷ মান্‌জ্যে তরে দেগিনে মুয়োন্ ফিরেবাক্ আর কবাক্, ‘নীনবীগান ভস্ত ওই যেইয়্যে, কন্না তাত্তে আবিলেচ্ গুরিবো?’ মুই তত্তে কুদু বুঝেইয়্যে মানুচ্ তোগেইনে পেইম্?”

⁸ ও নীনবীগান, তুই কি নো-আমোনানত্তুন্ বেশ্ গম্? তে দঅ য়্যেল্ গাঙ পারত্ এলঅ আর তা চেরোকিত্তে ঘিজ্যে এলঅ পানিগান। গাঙান্ এলঅ তার রোক্ষ্যের্ দেবালান।

⁹ কূশ আর মিসরানে তারে অমকদ বল্ দিদো; তা সমাজ্যেগুনো ভিদিরে পূট আর লিবিয়াগান এলঅ।

¹⁰ তো তা মানুচ্চুনোরে বন্দী গুরিনে অন্য দেজত্ নেযা ওইয়্যে। পত্তি পধ মুয়োত্ তা চিগোন্ গুড়োগুনোরে আজার্ মাড়া ওইয়্যে। তার্ মুরুব্বীগুনোত্তে চাম্বা চেইনে তারারে চিগোল্লোই বানি নেযা ওইয়্যে।

¹¹ ও নীনবীগান, তুইয়ো মাত্তল্ ওইনে ঢুলি পড়িবে; তুই শত্রুগুনোত্তুন্ লুগেবাত্তে আশ্রয় তোগেবে।

¹² তর্ বেক তাম্বুলানি পাগানা ফল্লোই ভরা ডোমোর্ গাজ ধোক্ক্যেন; যে কনজনে সিগুন লাড়েইলে ডোমোরুন তা মুয়োনত্ পড়িবাক্।

¹³ তঅ সৈন্যগুন দঅ বেক্কুন্ মিলে ধোক্ক্যেন্। তঅ দেজর্ গেইট্টুন্ তঅ শত্রুগুনোর্ মুজুঙোত্ এক্কুবারে খুলো রোইয়্যে; আগুনানে সিগুনোর হুক্কুন্ পুড়ি ফেলেয়্যে।

¹⁴ তুই ঘিরিবার সময়ানত্তে পানি তুলি রাগা, তর্ তাম্বুলানি দরমর গর্। মাদিগান দুলিনে মল্; চিবিদি আর বালু মিজে আর ইট্‌তোই কুড়্ বানা।

¹⁵ সিয়েনত্ আগুনানে তরে গিলিবো; লাম্বা ছুরিগানে তরে কাবি ফেলেব আর ভস্তগুরিয়্যেবো পুগ্-যুগো ধোক্ক্যেন ভস্ত গুরি ফেলেব। তুই ভস্ত গুরিয়্যে আর ঝাক্ বান্যে পুগ্-যুগো ধোক্ক্যেন সোংখ্যেদি বাড়ি উদ্।

¹⁶ তর্ বেবসায়ীগুনোর্ সোংখ্যে তুই আগাজ তারাত্তুন্‌অ বেশ্ বাড়েয়োচ্, মাত্তর্ তারা ভস্তগুরিয়্যে পুগ্-যুগো ধোক্ক্যেন ঝাক্ ছাড়িনে উড়ি যেইয়োন্।

¹⁷ তর্ চুগিদারুন আর কাম্ গুরিয়্যেগুন ঝাক্ বান্যে পুগ্-যুগোর্ ঝাগ ধোক্ক্যেন, যিগুনে যার্‌কালত্ দেবাল উগুরে বৈই থান্ মাত্তর্ বেলান্ উদিলে পরেদি উড়ি যান্, কুদু যান্ কনজনে হবর্ ন-পান।

¹⁸ ও আসিরিয়ার রাজা, তঅ নেতাগুনে ঘুমোদন্; তঅ রাজ্‌কামগুরিয়্যেগুনে পড়ি আগন্। তঅ মানুচ্চুনে মুড়োই মুড়োই ছিদি পোজ্যন্, তারারে এগত্তর্ গুরিবার কনজন নেই।

¹⁹ কন কিজুয়ে তর্ ঘা-গানরে গম্ গুরি ন-পারের্; তঅ আঘাত্‌তান সাংগাদিক্। যিগুনে তঅ হবরান্ শুন্ন্যন্ তারা পত্তিজনে তর্ পতনত্ আঢ্‌‌তালি দেদন্, কিত্যে তর্ অমকদ চিৎনপুজ্যে কামানি কন্না ন-ভুগের্?