নহূম 2 - Chakma Bible

নীনবীর ভস্ত অনা

¹ ও নীনবী, যে মানুচ্চো ছিদি-বিদি দে তে তঅ বিরুদ্ধে উজেই এজের্। তাম্বুলোত্ তঅ সৈন্যগুন সাজা, পথ্‌‌‌তানি চুগি দে, কমর্‌‌‌বো দরমর গর্, তঅ সৈন্যদলুন্ যুক্কোল্ রাগা।

² যুনিয়ো ভস্তগুরিয়্যেগুনে ইস্রায়েলরে মানুচ্ নেইয়্যে গোজ্যন্ আর তা আংগুর খেত্‌তানি চৌইদ্যেল্ গুরি দৈন্ তো লগেপ্রভু ইক্কিনে যাকোবর, অত্তাৎ ইস্রায়েলর আগর্ সয়-সাগোজ্যে ফিরেই দিবো।

³ শত্রু-সৈন্যগুনোর ঢালানি রাঙা রংয়র আর যোদ্ধাগুনে কিয়্যেত্ ধোগ্‌ধোক্যে রাঙা রংয়র্ পোজাক। তারা যুদ্ধোত্তে যুক্কোল্ অদন্; তারার্ রথ্‌তানির্ লুয়োনি চক্‌চক্ গরের্; তারা সেল্ ঘুরোদন্;

⁴ তারার্ বেক রথ্‌তানি পধে পধে ঝড় ধোক্ক্যেন্ চলের্ আর শঅর খুলো জাগানির ভিদিরেদি আবাংপাদারে ইন্দি-উন্দি যার্। সিয়েনি রিনি চাদে জ্বোল্‌‌জোল্যে বোম্বা ধোক্ক্যেন; সিয়েনি কারেন ধোক্ক্যেন দাবা যার্।

⁵ রাজা তা সেনাপতিগুনোরে ডাগের্; তারা পদথ্ উজোত্ হেলেয়ো উজেই যাদন্। তারা শঅর দেবাল ইধু দাবা যাদন্; তারা দেবাল্ ভাঙেদে মিশিন্ বোজেয়োন।

⁶ গাঙর্ গদা দোরানি ভাঙি পোজ্যে আর রাজঘর ভস্ত ওই যার্।

⁷ রাণীর কাবড়-চুগোরানি খুলি ফেলেইনে তারে বন্দী গুরিনে নেযা অর্। তার চাগরাণীগুনে কঅ কুরেদে ধোক্ক্যেন আবিলেচ্ গত্তন্ আর বুগ্ চাবাড়াদন।

⁸ নীনবীগান এক্কান গদা-ভাঙি যেইয়্যে পুয়োরো ধোক্ক্যেন যিয়েনর পানিগান নিগিলি যার্। তে “থাম, থাম,” কোইনে রঅ ছাড়ের্ মাত্তর্ তা মানুচ্চুনে কনজনে পিজেদি ন-ফিত্তোন্।

⁹ তার রূবোগানি লুদো, সোনাগানি লুদো। ইয়েনি বেক্কানি ন-ফুরেইয়্যে; ইয়েনি তার বেক্কানি ধন ভান্ডালর্ ধন-সম্পদ।

¹⁰ তারে লুদো অর্, খালি গরা অর্ আর ভস্ত গরা অর্। তা মানুচ্চুনোর মনানি গলি যেইয়্যে, আঢু গিলেগুন দগ্‌‌দগাদন্; তারার্ কমরত্ আর জোর্ নেই, তারার পত্তিজনর্ রাঙা-কালা মু ওই যেইয়্যে।

¹¹ সেই সিংহগুনো গাত্তো ইক্কিনে কুধু, যিয়েনত্ তারা তারার্ ছঅগুনোরে হাবেদাক্, যিয়েনত্ সিংহ, সিংহী আর তারার্ ছঅগুনে ন-দোরেইয়্যেগুরি থেদাক্?

¹² সিংহ তা ছঅগুনোত্তে যদেষ্ট য়েমান্ মারিদো আর তার সিংহীগুনোত্তে গত্তনা চিবি মারিদো বোউত্ য়েমান্; তে তার্ মারে ফেলেয়্যে য়েমান্দোই তার্ থেবার জাগায়ান আর ছিনিনে কট্টা গোজ্যে য়েমান্দোই তা গাঢ্‌‌তো ভোরেদ।

¹³ বেগত্তুন্ খেমতাবলা লগেপ্রভু কোইয়্যেদে, “ও নীনবী, মুই তঅ বিরুদ্ধে; মুই তঅ রথ্‌‌‌তানি পুড়ি ফেলেম, আর লাম্বা ছুরিগানে তর্ বোলা সিংহগুনোরে শেষ্ গুরিবো। মুই তর্ শিগেরত্তে কন কিজু এই পিত্‌থিমীত্ ফেলেই ন-রাগেম‌‌‌। তর্ হবর্ দিয়্যেগুনোর মুয়োর্ রঅগুন্ আর শুনো ন-যেবঅ।”