মার্ক 7 - Chakma Bible

চলেদে সুদোম্

¹ যিগুনে যিরূশালেমত্তুন্ এচ্চ্যন্ এমন্ কয়েক্কো ফরীশী আর ধর্ম-মাষ্টর যীশুর চেরোকিত্যে এগত্তর্ অলাক্।

² তারা দেগিলাক্, যীশুর শিচ্চ্যগুনোত্তুন্ কয়েকজনে আঢ্ ন-ধোইনে অসিজিগুরি হেবাত্তে বোচ্চ্যন্।

³ ফরীশীগুনে আর বেক্ যিহূদীগুনে পুরোণি দিনোর্ ধর্ম-মাষ্টরুনোরে দিয়্যে যে সুদোমান্ চলি এজের্ সেই সুদোম মজিম্ আঢ্ ন-ধোইনে ন-হান্।

⁴ বাজারত্তুন্ এইনে তারা আঢ্-টেঙ্ ন-ধোইনে কিচ্চু ন-হান্। ইয়েনি বাদেয়ো তারা আরঅ নানান্ বাবোত্যে সুদোম পালেই থান্, যেমন্ লদা, কদরা, থাল্ ইগুন ধনা।

⁵ সেনত্তে ফরীশী আর ধর্ম-মাষ্টরুনে যীশুরে পুযোর্ গুরিলাক্, “পুরোণি দিনোর্ ধর্ম-মাষ্টরুনোরে দিয়্যে যে সুদোমানি চলি এজের্ তঅ শিচ্চ্যগুনে সিয়েনি মানি ন-চলদন্ কিত্তে? মাত্তর্ তারা সিয়েনর্ বদলে দঅ আঢ্ ন-ধোইনে হান্।”

⁶ যীশু জোব্ দিলো, “তুমি ভণ্ড! তমা পৌইদ্যেনে ভাববাদী যিশাইয় ঠিগ্ কধা কোইয়্যে। তা বোইবোত্ লেঘা আঘে: এ মানুচ্চুনে মুয়োদি মরে সর্মান গরন্, মাত্তর্ তারার্ মনানি মত্তুন্ দূরোত্ থায়।

⁷ তারা মিজে মিজে মর্ উবোসনা গরন্, তারার্ দিয়্যে শিক্ষ্যে মান্‌জ্যর্ বানেয়্যে কয়েক্কো সুদোম্ বানা।

⁸ তুমি দঅ গোজেনর্ দিয়্যে উগুমানি বাদ্ দিইনে মান্‌জ্যর্ দিয়্যে চলেদে সুদোমানি পালর্।”

⁹ যীশু তারারে আরঅ কলঅ, “গোজেনর্ উগুম বাদ্ দিইনে নিজোর সুদোমানি পালেবাত্তে গমেডালে গম্ পথ্‌তান্ তমার জানা আঘে।

¹⁰ যেমন্ ধরঅ, মোশি কোইয়্যেদে, ‘মা-বাবরে সর্মান গরঅ’ আর ‘যিবের্ কধালোই মা-বাবঅ উগুরে অশ্রদ্ধা থায় তারে হামাক্কায় মারে ফেলা পড়িবো।’

¹¹ মাত্তর্ তুমি কোই থাগঅ, যুনি কেঅ তার্ মা-বাবরে কয়, ‘মর্ যে জিনিস্‌চান্দোই তর্ সাহায্য ওই পারিদো সিয়েন গদ্দন্,’ অত্তাৎ গোজেন ইধু উৎসর্ব গরা ওইয়্যে,

¹² মাত্তর্ মা-বাবত্তে তাত্তুন্ আর কিচ্চু গরা ন-পরে।

¹³ এবাবোত্যেগুরি তুমি তমার চলেত্তে সুদোমান্ শিক্ষ্যে দিইনে গোজেনর্ কধানি বাদ্ দুয়ো। ইয়েনি বাদেয়ো তুমি আরঅ এবাবোত্যে বোউত্ কাম গুরি থাগঅ।”

¹⁴ ইয়েনর্ পরেদি যীশু মানুচ্চুনোরে আরঅ তাইধু ডাগিনে কলঅ, “তুমি বেক্কুনে মঅ কধাগান্ শুনো আর বুঝো।

^15-16 বারেত্তুন্ যিয়েনি মান্‌জ্য ভিদিরে যায় সিয়েনি মান্‌জ্যরে অসিজি গুরি ন-পারে, বরং মান্‌জ্য ভিদিরেত্তুন্ যিয়েনি নিগিলি এজে সিয়েনি মান্‌জ্যরে অসিজি গরে।”

¹⁷ ইয়েনর্ পরেদি যীশু যেক্কে মানুচ্চুনোরে ফেলেইনে ঘরত্ সোমেল, সেক্কে শিচ্চ্যগুনে সে কধাগানর্ অত্তগান্ তাত্তুন্ পুযোর্ গুরিলাক্।

¹⁸ যীশু তারারে কলঅ, “তুমি কি অন্যগুনোত্তুন্ এদক্ অবুঝ্? তুমি কি ন-বুঝো যে, বারেত্তুন্ যিয়েনি মান্‌জ্য ভিদিরে চমে সিয়েনি তারে অসিজি গুরি ন-পারে?

¹⁹ ইয়েনর্ কারনান্ অলঅ, সিয়েন দঅ তা মনত্ ন-চমে মাত্তর্ পেদত্ সমে আর পরেদি কিয়্যেত্তুন্ নিগিলি যায়।” এ কধাগান্দোই যীশু বুঝেই দিলোদে যে, বেক্ হানাগানি সিজি।

²⁰ যীশু আরঅ কলঅ, “মান্‌জ্য ভিদিরেত্তুন্ যিয়েনি নিগিলি এজে সিয়েনিই মান্‌জ্যরে অসিজি গরে,

²¹ কিয়া মান্‌জ্য ভিদিরে, অত্তাৎ মনত্তুন্ ভান্ন্যেই চিন্তে, নানান্ বাবোত্যে বেভিচের্, চুর্, খুন,

²² লুভি অনা, অন্যরে ক্ষতি গুরিবার্ আওজ্, ছলনা, বজং খাচ্চ্যত্, ইংসে, নিন্দে, বার্ গরানা আর মূর্খকামানি নিগিলি এজে।

²³ এই বেক্ ভান্ন্যেয়ানি মান্‌জ্য ভিদিরেত্তুনই নিগিলি এজে আর মান্‌জ্যরে অসিজি গরে।”

অযিহূদী মিলেবোর্ বিশ্বেজ্

²⁴ ইয়েনর্ পরেদি যীশু সে জাগায়ান্ ছাড়িনে সোর চাগালাত্ গেলঅ। তে এক্কান ঘরত্ সোমেল আর চেলদে যেন কেঅ হবর্ ন-পান্, মাত্তর্ তে লুগি থেই ন-পারিলো।

²⁵ সিয়েনত্ এমন্ এক্কো মিলে এলঅ যিবের্ ঝিবোরে ভান্ন্যেই আত্মায় পেইয়্যে। সে মিলেবো যীশু পৌইদ্যেনে শুনিনে সেক্কে এইনে যীশুর টেঙত্ পুড়িলো।

²⁶ মিলেবো এলদে অযিহূদী আর সুর-ফৈনীকীত জোর্মেয়্যে। তে যীশু ইধু কোজোলী গরা ধুরিলো যেন তে তা ঝিবোত্তুন্ ভান্ন্যেই আত্মাগান্ দূর্ গুরি দে।

²⁷ যীশু জোবত্ কলঅ, “আগে পুয়ো-ঝিগুনে পেট ভুরিনে খাদোক্, কিয়া পুয়ো-ঝিগুনোর হানা লোইনে কুগুরো মুজুঙোত্ ফেলানা গম্ নয়।”

²⁸ সেক্কে সে মিলেবো কলঅ, “প্রভু, তুই ঠিগই কোইয়োচ্, মাত্তর্ পুয়ো-ঝিগুনোর হানাত্তুন্ যেদক্কানি পড়িনে টেবিলো তলে পড়ে সিয়েনি দঅ কুগুরে খায়।”

²⁹ যীশু তারে কলঅ, “কধাগান তুই গমেডালে কোইয়োচ্। ইক্কিনে যাহ্; যেইনে চাহ্, ভান্ন্যেই আত্মাগানে তঅ ঝিবো ভিদিরেত্তুন্ নিগিলি যেইয়্যে।”

³⁰ সে মিলেবো সেক্কে ঘরত্ ফিরি যেইনে দেগিলো, তা ঝিবো বিচ্ছোনত্ পড়ি আঘে আর ভান্ন্যেই আত্মাগানে তা ভিদিরেত্তুন্ নিগিলি যেইয়্যে।

বহ্‌রা আর হন্ মানুচ্চো গম্ অলঅ

³¹ ইয়েনর্ পরেদি যীশু সোর চাগালাগান্ ছাড়িনে সীদোন শঅর ভিদিরেদি গালীল সাগর কায়কুরে দিকাপলি চাগালার্ আদামানিত্ গেলঅ।

³² সিয়েনত্ কয়েক্কো মান্‌জ্যে এক্কো বহ্‌রা আর হন্ মান্‌জ্যরে যীশু ইধু আনিলাক্ আর কোজোলী গরা ধুরিলাক্ যেন তে সে মিলেবো উগুরে তা আঢ্‌তানি বাজায়।

³³ যীশু ভিড়ো ভিদিরেত্তুন্ সেই মানুচ্চোরে এক কিত্তেদি নেযেইনে তা দ্বি কানত্ নিজো আঙুলুন্ দিলো। পরেদি সেফ্ ফেলেইনে মানুচ্চোর্ জিলান্ ধুরিলো।

³⁴ সে পরেদি তে আগাজ ইন্দি রিনি চেইনে ভঅ নিজেস্ ফেলেইনে মানুচ্চোরে কলঅ, “এপ্‌ফাথা,” অত্তাৎ “খুলি যাহ্।”

³⁵ সেক্কে মানুচ্চোর্ কানানিয়ো খুলি গেলঅ, জিলান্ খুলি গেলঅ আর তে গমেডালে কধা কুয়ো ধুরিলো।

³⁶ যীশু এ পৌইদ্যেনে কাররে ন-কবাত্তে মানুচ্চুনোরে মানা গোজ্যে। মাত্তর্ তে যেদক্ তারারে মানা গোজ্যে সেদক্ তারা সে পৌইদ্যেনে আরঅ বেশ্ গুরি কুয়ো-কি গরা ধুরিলাক্।

³⁷ এ ঘটনাগান্দোই মানুচ্চুনে অমকদ আমক্ ওইনে কলাক্, “ইবে বেক্ কামানি কদক্ গমেডালে গরে। ইবে বহ্‌‌রাগুনোর্ শুনিবার বল্ আর ববাগুনোর্ কধা কবার খেমতা দে।”