মার্ক 1 - Chakma Bible

বাপ্তিষ্মদিয়্যে যোহনর প্রচার্

¹ গোজেন পুয়ো যীশু খ্রীষ্ট পৌইদ্যেনে গম্ হবরর্ আরাম্ভ।

² ভাববাদী যিশাইয় বোইয়োত্ গোজেনর্ কোইয়্যে এ কধাগান্ লেগা আঘে: চাহ্, তঅ আগেদি মুই মর্ হবর্ কোইয়্যেবোরে পাদাঙর্। তে তঅ পথ্‌তান্ যুক্কোল্ গুরিবো।

³ ধূল্যেচর-চাগালাত্ একজন রঅ জগার্ পারিনে কত্তে, তুমি প্রভুর্ পথ্‌তান ঠিগ্ গরঅ, তা পথ্‌তান উজু গরঅ।

⁴ সে কধামজিম্ বাপ্তিষ্মদিয়্যে যোহনে ধূল্যেচর-চাগালাত্ যেইনে মানুচ্চুনোরে বাপ্তিষ্ম দের্ আর ফগদাং গরের্ যেন মান্‌জ্যে পাপর্ খেমা পেবাত্তে পাপত্তুন্ মনানি ফিরেন্ আর বাপ্তিষ্ম লন্।

⁵ সেক্কে যিহূদিয়া রেজ্যত্ আর যিরূশালেম শঅরর্ বেক্কুনে নিগিলিনে যোহন ইধু এজা ধুরিলাক্। তারা যেক্কে নিজোর্ পাপ্‌‌পানি স্বীগের্ গুরিলাক্ আর সেক্কে যোহনে যর্দন গাঙত্ তারারে বাপ্তিষ্ম দিলো।

⁶ যোহনে উটোর্ কেজ কাবড় উরিদো আর তা কমরত্ চামড় কমর্-বিজোনি এলঅ, আর তার্ হানাগান এলঅ ঝার মধু আর পুগ্‌‌-যুগ্।

⁷ তে যিয়েন্ ফগদাং গুরিদো সিয়েন অলঅ, “মঅ পরেদি এক্কো এজের্। তে মত্তুন্ বেশ্ খেমতাবলা। মাঢা নিগিরিনে তার্ জদার্ ফিতেগানি খুলিবার্ যগাজ্যেয়ো মুই নয়।

⁸ মুই তমারে পানিত্ বাপ্তিষ্ম দুয়োঙর্ মাত্তর্ তে পবিত্র আত্মালোই তমারে বাপ্তিষ্ম দিবো।”

প্রভু যীশুর বাপ্তিষ্ম আর পোরোক্ষ্যে

⁹ সে অক্তত্ যীশু গালীল রেজ্যর্ নাসরত্ আদামত্তুন্ এলঅ, আর যোহনে তারে যর্দন গাঙত্ বাপ্তিষ্ম দিলো।

¹⁰ পানিত্তুন্ উদি এজানার্ লগে লগে যীশু দেগিলোদে, আগাজ্‌চান ফাদি যেইয়্যে আর পবিত্র আত্মা কোদোর ধোক্ক্যেন্ ওইনে তা উগুরে লামি এলঅ।

¹¹ সে অক্তত্ স্বর্গত্তুন্ এ কধাগান শুনো গেলঅ, “তুয়ই মর্ কোচ্‌পেইয়্যে পুয়ো, তঅ উগুরে মুই অমকদ হুজি।”

¹² ইয়েনর্ পরেদি যীশুরে পবিত্র আত্মার্ পরিচালনায় ধূল্যেচর-চাগালাত্ যাহ্ পড়িলো।

¹³ সেই ধূল্যেচর-চাগালাত্ চল্লিশ দিন ধুরিনে শদানে যীশুরে লুভ্ দেগেইনে পাপত্ ফেলেবার চেট্ট্যা গরা ধুরিলো। সিয়েনত্ বোউত্ ঝার্‌বো এ্যামান্ এলাক্, আর স্বর্গদূত্তুনে যীশুরে সেবা যত্তন্ গুরিলাক্।

শিচ্চ্য-অনা

¹⁴ যোহনে জেলখানাত্ বন্দী অনার্ পরেদি যীশু গালীল রেজ্যত্ গেলঅ। সিধু তে এ কধাগান্ কোইনে গোজেনর্ দিয়্যে গম্ হবরান্ ফগদাং গরা ধুরিলো,

¹⁵ “সময় ওইয়্যে, গোজেন রেজ্যগান্ কায়-কুরে লুম্মেগি। তুমি পাপত্তুন্ মনানি ফিরো আর এ গম্ হবরান্ বিশ্বেজ্ গরঅ ।”

¹⁶ একদিনে যীশু গালীল সাগর পার ইন্দি যার্। এমন্ সময়োত্ তে শিমোন আর তার ভেই আন্দ্রিয়রে সাগরত্ জাল্ ফেলাদে দেগিলো। সেই দ্বিজনে জাল্যে এলাক্।

¹⁷ যীশু তারারে কলঅ, “মঅ লগে এজঅ। মুই তমারে মানুচ্-ধরা জাল্যে বানেম্।”

¹⁸ সেক্কে তারা জালানি থোইনে যীশু লগে গেলাক্।

¹⁹ সিয়েনত্তুন্ কিজু দূরোত্ যানার পরেদি তে সিবদিয়র্ দ্বিবে পুয়ো যাকোব আর যোহনরে দেগিলো। তারা নঅগানত্ বুজিনে জালানি তুনোদন্।

²⁰ যীশু তারারে দেগানার্ লগে লগে ডাগিলো, আর তারা বাপ্পো সিবদিয়রে চাগরুনো লগে নঅগানত্ থোইনে যীশু লগে গেলাক্।

ভুদে পেইয়্যে মানুচ্চো

²¹ যীশু আর তা শিচ্চ্যগুনে কফরনাহূম শঅরত্ গেলাক্। পরেদি জিরেবার্ দিনোত্ যীশু সমাজ-ঘরত্ যেইনে শিক্ষ্যে দিয়্যে ধুরিলো।

²² মানুচ্চুনে তা শিক্ষ্যেলোই আমক্ ওই গেলাক্, কিয়া তে ধর্ম-মাষ্টরুনো ধোক্ক্যেন্ শিক্ষ্যে ন-দের্ বরং যিবের্ অধিকার আঘে সেবাবোত্যে মান্‌জ্য ধোক্ক্যেন শিক্ষ্যে দের্।

²³ সে অক্তত্ ভুদে পেইয়্যে এক্কো মানুচ্ সেই সমাজ-ঘর ভিদিরে এলঅ।

²⁴ তে রঅ ছাড়িনে কলঅ, “ও নাসরতর্ যীশু, আমা লগে তর্ কি দরকার্? তুই কি আমারে সর্বনাশ্ গুরিবাত্তে এচ্চোস্? মুই হবর্ পাং তুই কন্না; তুই দঅ গোজেনর্ সেই পবিত্র মানুচ্চো।”

²⁵ যীশু সেক্কে সেই ভুদ্‌‌‌তোরে ধমক্ দিইনে কলঅ, “জুরো অ, তা ভিদিরেত্তুন্ নিগিলি যাহ্।”

²⁶ সেই ভুদ্‌‌‌তো সেক্কে মানুচ্চোরে মুজুরি ধুরিলো আর কিজেক্ ছাড়িনে তা ভিদিরেত্তুন্ নিগিলি গেলঅ।

²⁷ এ ঘদনাগান্ দেগিনেই মানুচ্চুনে এদক্ আমক্ অলাক্ যে, তারা নিজো ভিদিরে কুয়ো ধুরিলাক্, “ইয়েনি কি বেপার? এ অধিকার ভরা নুয়ো শিক্ষ্যেগান বা কি? এন্‌ কি, ভুদ্‌‌‌তোরেয়ো তে উগুম দে আর তারা তা কধানি শুনোদে বাধ্য অন্।‌”

²⁸ ইয়েন্দোই গালীল রেজ্যর্ বেক্‌ জাগানিত্ যীশুর কধা ছিদি পড়িলো।

ভালোক্জনে গম্ অলাক্ (মথি ৮:১৪-১৭; লূক ৪:৩৮-৪১)

²⁹ পরেদি তারা সমাজ ঘরত্তুন্ নিগিলিনেই শিমোন আর আন্দ্রিয় ঘরত্ গেলাক্। যাকোব আর যোহনেয়ো তারা লগে এলাক্।

³⁰ শিমোন শুড়িবোর্ জ্বর ওইয়্যে বিলি তে পোজ্যে এলঅ। যীশু এজানার্ লগে লগে তা কধা তারে কুয়ো অলঅ।

³¹ সেক্কে যীশু তা কায়কুরে যেইনে আত্তান্ ধুরিনে তারে তুলিলো। সেক্কে তা জ্বরান্ গম্ অলঅ আর তে তারার্ হানা-দানার্ যুক্কোল্ গুরিলো।

³² সে দিন্ন্যে বেলান্ ডুবোনার পরেদি সাজোন্ন্যে অক্তত্ মানুচ্চুনে বেক্‌ পিড়েল্ল্যেগুনোরে আর ভুদে পেয়্যে মানুচ্চুনোরে যীশু ইধু আনিলাক্।

³³ শঅরর্ বেক্‌ মানুচ্চুনে সেক্কে সে ঘরান দোরান্ ইধু এইনে থুবেলাক্।

³⁴ যীশু নানান্ বাবোত্যে পিড়েল্ল্যেরে গম্ গুরিলো আর বোউত্ ভুদ্ ধাবেই দিলো। তে ভুদ্‌‌‌‌তুনোরে কধা কবাত্তে ন-দিলো, কিয়া সেই ভুদ্‌‌‌‌তুনে কোই পারিদাক্ তে কন্না।

গালীল রেজ্যত্ প্রচার

³⁵ তার কেল্যে বেন্যেপোত্যে আন্ধার্ থাগদে যীশু উদিলো আর ঘরত্তুন্ নিগিলিনে এক্কান্ নিরিবিলি জাগাত্ যেইনে তবনা গরা ধুরিলো।

³⁶ শিমোন আর তা সমাজ্জ্যেগুনে যীশুরে তগাদন্।

³⁷ পরেদি তারে তোগেই পেইনে তারা কলাক্, “বেক্কুনে তরে তগাদন্।”

^38-39 যীশু তারারে কলঅ, “যেই, আমি কায়কুরে আদামানিত্ যেই যেন মুই সিধুয়ো প্রচার গুরি পারং; কিয়া সেনত্তে দঅ মুই এচ্চ্যংগে।” এবাবোত্যেগুরি যীশু গালীল বেক্‌ জাগানিত্ যেইনে যিহূদীগুনোর সমাজ-ঘরানিত্ ফগদাং গুরিলো আর ভান্ন্যেই আত্মাগুন ধাবেল।

এক্কো ফারাঙীবলা পিড়েল্ল্যে গম্ অলঅ

⁴⁰ পরেদি এক্কো ফারাঙীবলা পিড়েল্ল্যে যীশু ইধু এইনে তা মুজুঙোত্ আঢু পাদিনে কলঅ, “তুই আয়োচ্ গুরিলে মরে গম্ গুরি পারচ্।”

⁴¹ মানুচ্চোরে যীশুর্ অমকদ চিত্ পুরিলো। তে আঢ্‌তান বাবেইনে তারে ধুরিনে কলঅ, “মুই সিয়েনই চাং, তুই গম্ অ।”

⁴² থিক্ সেক্কে তা ফারাঙীয়ানি গম্ ওই গেলঅ।

⁴³ যীশু সেক্কে তারে বিদেয় দিলো, মাত্তর্ তা আগেদি তারে দরমর গুরি কলঅ,

⁴⁴ “চেইজ্, এ কধাগান কাররে ন-কোজ্। তুই বরং ধর্মগুরুগুনো ইধু যেইনে নিজোরে দেগাগোই আর সিজি অবাত্যে মোশি যে উৎসর্বর উগুমানি দিয়্যে সিয়েনি উৎসর্ব গর্। ইয়েনিলোই ধর্মগুরুগুনো ইধু প্রমাণ অবঅ যে, তুই গম্ ওইয়োচ্।”

⁴⁵ মাত্তর্ সে মানুচ্চো বারেদি যেইনে বেক্‌ জাগানিত্ এ হবরান্ কুয়ো ধুরিলো। সিয়েনত্যে যীশু আর্ কনঅ আদামত্ খুলোমেলা গুরিনে যেই ন-পারিলো। তাত্তুন্ নিরিবিলি জাগাত্ থা পল্ল; তো মানুচ্চুনে নানান্ জাগাত্তুন্ তা ইধু এজা ধুরিলাক্।