মীখা 6 - Chakma Bible

ইস্রায়েল বিরুদ্ধে লগেপ্রভুর কধা

¹ ও ইস্রায়েল, লগেপ্রভুর কধানি শুন। তে কত্তে, “ও মীখা, তুই থিয়্যেইনে মুড়ো-মুড়ি মুজুঙোত্ তঅ মাম্‌লাগান আজিল্ গর্‌‌‌‌‌‌‌‌; তর্ যিয়েনি কবার্ আঘে সিয়েনি মুড়োগুনে শুনোদোক্।”

² ও মুড়ো-মুড়িগুন, তুমি লগেপ্রভুর আবিত্তিগানি শুনো; ও পিত্‌‌‌‌‌‌‌‌‌‌থিমীর উমর খুদোগুন, তুমিয়ো শুনো। ইয়েনর কারনান্ তা মানুচ্চুনো বিরুদ্ধে লগেপ্রভুর কিজু কবার্ আঘে; তে ইস্রায়েল বিরুদ্ধে এক্কান মাম্‌‌‌‌‌‌‌‌‌‌‌লা দিয়্যে।

³ লগেপ্রভু কত্তে, “ও মঅ মানুচ্চুন, মুই তমারে কি গোজ্যং? কেধোক্ক্যেন গুরি মুই তমারে দুঘ্ দুয়োং? মরে জোব্ দে।

⁴ মুই মিসর দেজত্তুন্ তমারে নিগিলেই আন্যং, চাগর অবস্থাত্তুন্ তমারে উদ্ধোর্ গোজ্যং। তমারে বল্ দিবাত্তে মোশি, হারোণ আর মরিয়মরে পাদেয়োং।

⁵ ও মঅ মানুচ্চুন, মোয়াবর রাজা বালাক যে সল্লাগান গোজ্যে আর বিয়োরর পুয়ো বিলিয়মে কি জোব্ দিয়্যে সিয়েন ইদোত্ তুলি চঅ। শিটীমত্তুন্ গিল্‌‌‌‌‌‌‌‌‌‌‌‌গল সং তমার্ যানার্ কধা ইদোত্ তুলো যেনে তুমি মর্ উদ্ধোর্ গোজ্যে কামানি হবর্ পঅ।”

⁶ মুই কিলোই লগেপ্রভুর মুজুঙোত্ যেইম্ আর স্বর্গর্ গোজেনর্ উবোসনা গুরিম? মুই কি পুজ্যে-উৎসর্বত্তে এক বোজোজ্যে কয়েক্কো গোরু ছঅলোই তা মুজুঙোত্ যেইম্?

⁷ লগেপ্রভু কি আজার্ আজার্ ভেড়া বা দশ আজার গাঙ্ ভরা জলপাই তেল্লোই হুজি অবে? মর্ অন্যেয়ত্তে কি মুই মর্ পত্তম পুয়োবো, মর্ পাপত্তে মঅ কিয়্যের্ ফল উৎসর্ব গুরিম?

⁸ ও মানুচ্চো, যিয়েনি গম্ সিয়েনি দঅ তে তরে দেগেয়্যে। ন্যায় কাম্ গরানা, গোজেন উগুরে বিশ্বেজি থেবাত্তে কোচ্‌পানা আর তঅ গোজেন লগে নম্রগুরিনে উদোলোলি রোক্ষ্যে গরানা বাদে লগেপ্রভু তইদু আর কিচ্ছু ন-চায়।

যিরূশালেমর অন্যেয় আর তার সাজা

⁹ জ্ঞানী মানুচ্চুনে লগেপ্রভুরে ভোক্তিগুরিনে দরান্। উই শুনো, লগেপ্রভু শঅর মানুচ্চুনোরে ডাগের্। তে কত্তে, “তুমি সাজা দিবার লুদিক্কো ইন্দি আর যিবে সিবেরে নেযেয়্যে তাইন্দি মনযোগ দুয়ো।

¹⁰ পাজি মানুচ্চুনোর্ ঘরত্ অসৎ উপায়ে পেইয়্যে ধন-সোম্বোত্তি আর ঠোগেবার মাবেদে আড়ি আঘে যিবে মুই ঘিনাং।

¹¹ যে মানুচ্চো ইধু ঠোগেবার পাল্লা আর মাবদি কম্ সীল্ আঘে তারে কি মুই নিদ্দুজি বিলি মনে গুরিম?

¹² তমা তাগোয়্যে মানুচ্চুনে অত্যেচারী, তুমি মিজে কধা কোইয়্যে আর তমা মুয়োনি ছলনার্ কধা কয়।

¹³ সেনত্তে মুই তমারে পাপত্তে অমকদগুরি সাজা দিম্ আর তমারে ভস্ত গুরিম।

¹⁴ তুমি হেলে ঈল্ ন-অবঅ; তমা পেদত্ পেট্ পরা থেবঅ। তুমি পযাপিরানি এক জাগাত্তুন্ অন্য জাগাত্ নেযেবা মাত্তর্ কিচ্ছু রোক্ষ্যে গুরি ন-পারিবা, কিত্যেই তুমি যুনি বা কিজু রোক্ষ্যে গরঅ সালে সিয়েনি মুই যুদ্ধো আনিনে ভস্ত গুরিম।

¹⁵ তুমি বীজ্ ফেলেবা মাত্তর্ ফসল কাবি ন-পারিবা; তুমি জলপাই মাড়িবা মাত্তর্ নিজে সিয়েনর্ তেলান বেবহার গুরি ন-পারিবা; তুমি আংগুর মাড়িনেয়ো সিয়েনর রস্‌‌চান হেই ন-পেবা।

¹⁶ তুমি অম্রির রীদি-সুদোমানি পালেয়ো আর আহাব বংশর বেক্ অভ্যেস্ মজিম্ চোল্য। তুমি তারার্ সল্লা মজিম্ চোল্য। সেনত্তে মুই ভস্তর্ আঢত্ আর ঠাট্টা-মশ্‌‌কারীগুরিয়্যে গুনোর আঢত্ তমারে তুলি দিম; মঅ মানুচ্ ইজেবে তমার্ অসর্মান ভুগো পুরিবো।”