মীখা 5 - Chakma Bible

বৈৎলেহমত্তুন্ এগেম্ গোজ্যে শাজন্‌গুরিয়্যেবো

¹ ও সৈন্যদল্লোই ঘিরে হেইয়্যে শঅরান্, তঅ সৈন্যদল্লো সাজা, কিত্যে আমা বিরুদ্ধে এক্কান ঘিরে অর্। শত্রুগুনে ইস্রায়েলর শাজন্‌গুরিয়্যেবোর্ গালত্ লুদিক্কোই আঘাত্ গত্তন্।

² লগেপ্রভু কত্তে, “মাত্তর্, ও বৈৎলেহম-ইফ্রাথা, যুনিয়ো তুই যিহূদার আজার আজার আদামানি ভিদিরে চিগোন্, তো তঅ ভিদিরেত্তুন মর্ তপ্পে এমন এক্কো এবঅ যিবে অবঅ ইস্রায়েলর শাজন্‌গুরিয়্যে, যিবের্ আরাম্ভ আগ দিনোত্তুন্ ধুরি, শেজ্ কালত্তুন্ ধুরি।”

³ সে সময়ান ন-এজানা সং লগেপ্রভু ইস্রায়েলানরে ছাড়িনে থেবঅ। পুয়ো-অদে পীড়েই তা পুয়ো-ছাগুন জর্ম দিবার পরেদি সেই শাজন্‌গুরিয়্যেবোর যে ভেইয়ুনে বন্দীদজাত্ আগন্ তারা ইস্রায়েলীয়গুনো লগে মিজেবাত্তে ফিরি এবাক্।

⁴ সেই শাজন্‌গুরিয়্যেবো এইনে লগেপ্রভুর বল্লোই, তার গোজেন লগেপ্রভুর মহিমায় গরগ ধোক্ক্যেন তা মানুচ্চুনোরে চালেব। তারা গমেডালে বজত্তি গুরিবাক্, কিত্যে তে যে দাঙর্ সে কধাগান সেক্কে জগদর্ শেজ্ দুযি সং বেক্কুনে স্বিগের্ গুরিবাক্;

⁵ আর তে সাজা আনিবো। আসিরিয়গুনে যেক্কে আমা দেজ্‌‌‌চান আক্রমন গুরিবাক্ আর আমা তাম্বুলানি টেঙোই উরিবাক্ সেক্কে আমি তা বিরুদ্ধে সাতজন পালগরে, এন্ কি, আষ্টোজন নেতারে তুলিবোং।

⁶ তারা যুদ্ধোর্ মাধ্যমে আসিরিয়া দেজ্‌‌‌চান অত্তাৎ, নিম্রোগুনোর দেজ্‌‌‌চান শাজন্‌ গুরিবাক। আসিরিয়গুনে আমা দেজ্‌‌‌চান আক্রমন গুরিলে আর আমা দুযিগান টেঙোই মাড়িলে তারা আঢত্তুন্ আমা শাজন্‌ গুরিয়্যেবো আমারে উদ্ধোর্ গুরিবো।

⁷ ভালোক্ জাদ ভিদিরে যাকোবর্ বাঁজি থেইয়্যে মানুচ্চুন অবাক্ লগেপ্রভুত্তুন্ এচ্চ্যে শিরো পানি ধোক্ক্যেন, ঘাস উগুরে ঝড় পড়েদে ধোক্ক্যেন যিয়েনি মান্‌‌‌জ্যর উগুম ন-পড়ে বা সিয়েনি উগুরে নির্ভর ন-গরে।

⁸ ভালোক্ জাদ ভিদিরে যাকোবর বাঁজি থেইয়্যে মানুচ্চুন অবাক্ ঝার্‌বো য়েমানুনো ভিদিরে সিংহ ধ‌‌োক্ক্যেন, ভেড়া পাল ভিদিরে বলা সিংহ ধোক্ক্যেন; সেই সিংহবো যেক্কে ভেড়াগুনোর সংমোধ্যেদি যায় সেক্কে তারারে ধুরিনে কট্টা কট্টা গুরি ছিড়ি ফেলায়; কনজনে তারারে উদ্ধোর্ গুরি ন-পারন।

⁹ যাকোব মানুচ্চুনে শত্রুগুনো উগুরে জিদিবাক্ আর তারার্ বেক শত্রুগুন ভস্ত ওই যেবাক্।

¹⁰ লগেপ্রভু কত্তে, “ও ইস্রায়েল, সে সময় মুই তঅ ভিদিরেত্তুন্ তঅ ঘোড়াগুনোরে শেজ্ গুরি ফেলেম আর তঅ রথ্‌তানিরে ভস্ত গুরি দিম।

¹¹ তঅ দেজর্ শঅরানি মুই ভস্ত গুরি দিম আর তর্ বেক তাম্বুলানি ভাঙি দিম।

¹² মুই তর্ যাদুবিদ্যেগানি বর্‌বাদ্ গুরিম; মায়াবিদ্যে বেবহার গুরিয়্যেগুন আর তইদু ন-থেবাক্।

¹³ তত্তুন্ মুই খুন্যে মূত্তিগুন আর তর্ পূজোর্ বেক খুদোগুন বর্‌বাদ গুরি ফেলেম; তর্ আঢে বানেয়্যে জিনিসচ্চোরে তুই আর পূজো ন-গুরিবে।

¹⁴ মুই তঅ ভিদিরেত্তুন্ বেক্ আশেরা-খুদোগুন উগুরে ফেলেম আর তর্ শঅরানি ভাঙি ফেলেম।

¹⁵ যে জাদ্‌‌‌‌‌‌‌‌তুনে মর্ বাধ্য ন-অন মুই অমকদ রাগে তারা উগুরে হেনা সুজিম।”