মীখা 4 - Chakma Bible

লগেপ্রভুর মুড়ো

¹ শেজ্‌কালত্ বেক মুড়োমুড়িগুনো ভিদিরেত্তুন্ সেই মুড়োবোরে বেগত্তুন্ অজলত্ তুলো অবঅ যিয়েনত্ লগেপ্রভুর্ ঘর্ আঘে। চিগোন চিগোন মুড়োগুনোত্তুন্ সিবেরে অজলত্ তুলো অবঅ, আর বেক্ জাদ্‌তুনে পানি গঙার ধোক্ক্যেন তান্দি যেবাক্। ‌‌‌

² ভালোক্ জাদর মানুচ্ এইনে কবাক্, “আঢঅ, আমি লগেপ্রভুর্ মুড়োবোত্ উদিয়োই, আঢঅ, যাকোবর্ গোজেন ঘরত্ যেই। তে আমারে তা পথ্‌তানি পৌইদ্যেনে শিক্ষ্যে দিবো আর আমি তা পধেদি চলিবোং।” তারা এ কধাগান কবাক্, কিত্তে সিয়োনত্তুন্ উগুম দিয়্যে অবঅ। আর যিরূশালেমত্তুন্ ফগদাং অবঅ লগেপ্রভুর কধানি।

³ তে জাদ্‌তুুনো ভিদিরে বিচের্ গুরি দিবো আর দূরোর্ খেমতাবলা মানুচ্চুনো ভিদিরে মিলেমিলি গুরিবো। তারা তারার্ তলোয়ারানি ভাঙিনে নাঙল ফাল্ বানেবাক্ আর যাদিগুন্ ভাঙিনে ঢাল ছাজিবার ছুরি বানেবাক্। এক জাদে অন্য জাদর্ বিরুদ্ধে আর লাম্বাছুরি ন-তুলিবো; তারা আর যুদ্ধো গুরিবাত্তে ন-শিগিবাক্।

⁴ পত্তিজনে নিজোর্ নিজোর্ আংগুর লুদি আর ডোমোর্ গাজ তলে বুজিবাক্ আর কনজনে তারারে দর্‌‌‌‌বুক ন-লাগেবাক্, কারন বেগত্তুন্ খেমতাবলা লগেপ্রভু সে কধাগান কোইয়্যেদে।

⁵ বেক্ জাদ্‌‌‌‌তুনে তারার্ দেব-দেবেদার বল্লোই কাম গুরিলেয়ো আমি উমরত্যে আমা গোজেন লগেপ্রভুর বল্লোই কাম গুরিবোং।

লগেপ্রভুর সল্লা

⁶ লগেপ্রভু কত্তে, “সেদিন্যে মুই আদুরুনোরে এগত্তর্ গুরিম; যিগুনে বন্দী ওইনে অন্য দেজত্ আগন্, যিগুনোরে মুই দুঘ্ দুয়োং তারারে মুই এক্কান জাগাত্ তুবেম্।

⁷ মুই আঢুড়ুনোরে বাজেই রাগেম আর ধাবেই দিয়্যে মানুচ্চুনোরে গুরিম এক্কো দরমর জাদ্। মুই লগেপ্রভু সেদিন্যেত্তুন্ ধুরি উমরত্যে সিয়োন মুড়োবোত্ তারা উগুরে রাজাগিরি গুরিম।

⁸ ও ভেড়া গরগর্ চুগিদার-ঘরান, ও সিয়োন-ঝিবোর্ ঘরান, আগ রেজ্যগান তইধু ফিরেই দিয়্যে অবঅ; রাজা আরঅ যিরূশালেমত্ রাজাগিরি গুরিবো।”

⁹ কিত্তে তুই ইক্কিনে জোরে জোরে কানর্? তুই কি রাজা নেই? তর্ সল্লা দিয়্যেবো কি মুরি যেইয়্যে? সেনত্তে কি পুয়ো ফুদোইদ্যে দুঘ্ পেইয়্যে মিলে ধোক্ক্যেন তরে পীড়ে ধোজ্যে?

¹⁰ ও সিয়োন-ঝিবো, পুয়ো-ফুদোইদ্যে দুঘ্ পেইয়্যে মিলে ধোক্ক্যেন তুই পীড়েলোই এগুর্ উগুর্ হা, কিত্যে ইক্কিনে তত্তুন্ শঅর্ ছাড়িনে খুলো মাদত্ যেইনে থাহ্ পড়িবো। তুই বাবিলোত্ যেবে; সিয়েনত্ তুই উদ্ধোর্ পেবে। লগেপ্রভু সিয়োদোই তঅ শত্রুগুনো আঢত্তুন্ তরে উদ্ধোর্ গুরিবো।

¹¹ মাত্তর্ ইক্কিনে বোউত্ জাদে তঅ বিরুদ্ধে তুবেয়োন। তারা কদন্, “তারে অসিজি গরা ওক্; এজঅ, আমি সিয়োনর দুদ্দশা দেগিনে হুজি ওই।”

¹² মাত্তর্ তারা লগেপ্রভুর পরিকল্পনাগানর কধা হবর্ ন-পান; তারা বুঝি ন-পারন যে, তে শোজ্যবনা ধোক্ক্যেন্ খামারত্ মাড়িবাত্তে তারারে এগত্তর্ গোজ্যে।

¹³ লগেপ্রভু কত্তে, “ও সিয়োন-ঝিবো, তুই উদিনে শোজ্য মাড়্; মুই তরে লুয়োর্ শিং আর পিদোলর্ খুর্ দিম যেনে তুই ভালোক্ জাদরে চুরমার গুরি পারচ্। তুই তারার্ অন্যেয়গুরিনে পেইয়্যে পযাপিরা আর ধন-সোম্বোত্তিগানি মঅ নাঙে, বেক্ পিত্‌‌‌থিমীগানর্ প্রভুর নাঙে ভস্ত অনা অভিশাবর্ অধীন ইজেবে দি দিম‌।”