মীখা 1 - Chakma Bible

¹ যিহূদার রাজা যোথম, আহস আর হিষ্কিয়র রাজাগিরির সময়োত্ মোরেষৎ আদামর মীখা ইধু শমরিয়া আর যিরূশালেম পৌইদ্যেনে লগেপ্রভুর কধানি দর্শনর মাধ্যমে ফগদাং অলঅ।

শমরিয়া আর ইস্রায়েলর বিচের্

² ও জাদ্‌‌তুন, তুমি বেক্কুনে কান্ পাদঅ; ও পিত্‌‌থিমীগান আর সিয়েন ভিদিরে বেক্কানি, শুনো। প্রভু লগেপ্রভু তা পবিত্র ঘরানত্তুন্ তমা বিরুদ্ধে সাক্ষ্য দিবো।

³ চঅ, লগেপ্রভু তা থেবার ঘরানত্তুন্ এজের্; তে লামি এইনে পিত্‌‌থিমীর অজল্ জাগায়ানি উগুরেদি যেবঅ।

⁴ মুম্ যেবাবোত্যেগুরি আগুনোত্ গুলি যায়, খামা জাগানদি যেবাবোত্যেগুরি পানি গোজ্যে যায় সেবাবোত্যেগুরি তা টেঙ তলাত্ মুড়ো-মুড়িগুন ফাদি যেবঅ, কলগ্‌কানি ফাদি যেবঅ।

⁵ যাকোব পাপত্তে, ইস্রায়েল বংশর অন্যেয়ত্তে ইয়েনি অবঅ। যাকোবর পাপত্তে দায়ী কন্না? শমরিয়া কি নয়? যিহূদার পূজোর্ অজল্ জাগানিত্তে দায়ী কন্না? যিরূশালেমানে কি নয়?

⁶ সেনত্তে লগেপ্রভু কত্তে, “শমরিয়াগানরে মুই খুলো মাদর্ ভস্তর্ খুর্ বানেম, আর সিয়েন অবঅ আংগুর গাজ লাগেবার জাগা। মুই তা পাত্তরুন কলগত্ ফেলেই দিম আর তা গোড়াগান খুলো রাগেম।

⁷ তার্ বেক মূত্তিগুন কট্টা কট্টা গুরি ভাঙি ফেলা অবঅ; তার মন্দির-বেশ্যেগুনোর বেক কামেয়্যেগুন্ আগুন্দোই পুড়ো অবঅ; তার বেক মূত্তিগুন মুই ভস্ত গুরি ফেলেম। তে দঅ বেশ্যেগিরির পাওনা ইজেবে ইগুন পেইয়্যে সেনত্তে সিগুন আরঅ বেশ্যেগিরিত্তে বেবহার গরা অবঅ।”

আবিলেচ্ আর ইদোত্ তুলোনা

⁸ ইয়েনত্তে মুই কানাকুদি আর আবিলেচ্ গুরিম; মুই খালি টেঙে লাংটা ওইনে ঘুরি বেড়েম। মুই শিয়েলর আর পেজা ডগরেদে ধোক্ক্যেন গুরি আবিলেচ্ গুরিম।

⁹ ইয়েনর কারনান্ শমরিয়ার ঘা গান আর গম্ ন-অবঅ; সিয়েন যিহূদা ইধু লুম্মেগি। সিয়েন মঅ মানুচ্চুনোর্ গেদো সং, এমন কি, যিরূশালেম সং লুম্মেগি।

¹⁰ তুমি গাতত্ এ কধাগান ন-জানেয়ো, এক্কেনায়ো কানাকুদি ন-গোজ্য। তুমি বৈৎ-লি-অফ্রাতদ্ ধূল্যেত্ গজ্জ।

¹¹ ও শাফীরোত্ বজত্তি গুরিয়্যে মানুচ্চুন, তুমি লাংটা আর লাজত্ পড়িনে যগোই। যিগুনে সাননত্ বজত্তি গরন্ তারা নিগিলি এই ন-পারিবাক। বৈৎ-এৎসলে আবিলেচ্ গরের্; তে আর তমা তপ্পে ন-থিয়্যেব।

¹² যিগুনে মারোদত্ বজত্তি গরন্ তারা উবোল্‌‍ফাল্ ওইনে রেহাই পেবাত্তে বাজ্জেই আগন্, কিত্যে লগেপ্রভুত্তুন্ দযা এচ্চ্যে; এমন কি, সিয়েন যিরূশালেমর গেদো সং লুম্মেগি।

¹³ ও লাখীশোত্ বজত্তি গুরিয়্যে মানুচ্চুন, তুমি রথ সমারে ঘোড়াগুনোরে লাগেই দুয়ো। ইস্রায়েলর অন্যেয়ান পত্তমে তমা ভিদিরে পাহ্ যেইয়্যে বিলি সিয়োন-ঝিবোরে তুমি পাপর্ পধেদি নেযেয়ো।

¹⁴ সেনত্তে তুমি মোরেষৎ-গাতরে বিদেয়-বক্‌‌‌শিজ দিবা। ইস্রায়েলর রাজাগুনে অক্‌‌‌ষীব শঅর উগুরে আজা গুরি ন-পারিবাক্।

¹⁵ ও মারেশায় বজত্তি গুরিয়্যে মানুচ্চুন, লগেপ্রভু তমা বিরুদ্ধে এক্কো গজক্ গুরিয়্যে পাদেব। ইস্রায়েলর বেক্ বাঈনীগান অদুল্লমত্ যেবগোই।

¹⁶ যে পুয়ো-ছাগুনোরে নিইনে তুমি হুজি অদা তারাত্তে আবিলেচ্ গুরিবাত্তে যেইনে তমা মাঢাগুন মুড়েই ফেলঅ; শকুনো মাঢা ধোক্ক্যেন তুমি মাঢাগুন টাক্ গুরি ফেলঅ, কিত্যে তারা বন্দী ওইনে তমাত্তুন্ দূরোত্ যেবাক্।