মথি লেখ্যে গম্ হবর্ 9 - Chakma Bible

অাজর্ পীড়েল্যে গম্ অলঅ

¹ পরেদি যীশু নৌকোত্ উদিনে সাগরান্ পার্ ওইনে নিজো শঅরত্ এলঅ।

² মানুচ্চুনে সেক্কে বিচ্ছোনত্ পড়ি থেইয়্যে এক্কো বেসৎ-পীড়েল্যেরে তাইধু আনিলাক্। সে মানুচ্চুনোর বিশ্বেজ্ দেগিনে যীশু সেই পীড়েল্যেবোরে কলঅ, “সাহচ গর্, ও গাবুজ্যে, তঅ পাপ্‌পান খেমা গরা অলঅ।”

³ ইয়েন্দোই কয়েক্কো ধর্ম-মাষ্টরে মনে মনে কুয়ো ধুরিলাক্, “এ মানুচ্চো গোজেনরে অগমান্ গরের্।”

⁴ যীশু তারার্ মন কধা কোই পারিনে কলঅ, “তুমি মনে মনে ভান্ন্যেই চিন্তে কিত্তে গরর্?

⁵ কুবোন্ কনা সহজ, ‘তঅ পাপ্‌পান খেমা গরা অলঅ,’ বা ‘তুই উদিনে আঢি বেড়া’?

⁶ তুমি যেন কোই পারঅ এই পিত্‌‍থিমীত্ পাপ খেমা গুরিবার খেমতা মান্‌জ্য পুয়োবোর্ আঘে”-ইদ্দুর্ সং কোইনে তে সেই বেসৎ-পীড়েল্যেবোরে কলঅ, “উঠ্, তঅ বিচ্ছোনান্ তুলিনে ঘরত্ যাহ্।”

⁷ সেক্কে তে উদিনে তা ঘরত্ গেলঅ।

⁸ মানুচ্চুনে এ ঘটনাগান্ দেগিনে দোরেলাক্, আর গোজেনে মান্‌জ্যরে এমন্ খেমতা দিয়্যে বিলিনে গোজেনরে বাঈনী গরা ধুরিলাক্।

প্রভু যীশু মথিরে ডাগিলো

⁹ যীশু যেক্কে সিয়েনত্তুন্ যাল্লোই সেক্কে পদথ্ মথি নাঙে এক্কো মান্‌জ্যরে খাজানা তুলেদে ঘরত্ বুয়োই থাগদে দেগিলো। যীশু তারে কলঅ, “আয়, মঅ শিচ্চ্য অগি।” মথি সেক্কেনে উদিনে তা সমারে গেলঅ।

¹⁰ ইয়েন পরেদি যীশু মথি ঘরত্ হেবাত্তে বুজিলো। সেক্কে বোউত্ খাজানা-তুলিয়্যে আর বজং মানুচ্ এইনে যীশু আহ্ তা শিচ্চ্যগুনো সমারে হেবাত্তে বুজিলাক্।

¹¹ সিয়েন দেগিনে ফরীশীগুনে যীশুর শিচ্চ্যগুনোরে কলাক্, “তমা মাষ্টর্‌বো খাজানা-তুলিয়্যে আর বজং মানুচ্চুনো সমারে হানা-দানা কিত্তে গরে?”

¹² এ কধাগান শুনিনে যীশু কলঅ, “যিগুনে গম্ আগন্ তারাত্তে ডাক্তরর্ দরকার নেই, বরং অসুখ্যেগুনোত্তে দরকার আঘে।

¹³ ‘মুই দোয়্যে দেগিবাত্তে চাং, য়েমান্-উৎসর্ব নয়’-পবিত্র বোইবোত্ এ কধাগানর্ অত্ত কি, সিয়েন যেইনে তোগেইনে নিগিলো। যিগুন্ ধার্মিক তারারে মুই ডাগিবাত্তে ন-এজং, বরং পাপীগুনোরে ডাগিবাত্তে এচ্চ্যং।”

উবোস্ থানা পৌইদ্যেনে আরঅ শিক্ষ্যে

¹⁴ পরেদি বাপ্তিস্মদিয়্যে যোহন শিচ্চ্যগুনে যীশু ইধু এইনে কলাক্, “আমি আর ফরীশীগুনে এদক্ উবোস্ থেই, মাত্তর্ তঅ শিচ্চ্যগুনে উবোস্ ন-থান্ কিত্তে?”

¹⁵ যীশু তারারে কলঅ, জামেই সমারে থাগদে কি জামেইঅ সমারে মানুচ্চুনে দুঘো কধা কোই পারন্? মাত্তর্ সময় এজের্ যেক্কে জামেইয়রে তারা কায়-কুরেত্তুন্ নেযা অবঅ। সে সময়ত্ তারা উবোস্ থেবাক্।

¹⁶ কনজনে পুরোন্ সিলুমোত্ নুয়ো কাবড়্ জড়া ন-দুয়োন, কিয়া যেরেদি পুরোণ কাবড়ানত্তুন্ নুয়ো তালিগান্ ছিনি এজে আর সেক্কে সেই ফাদাগান্ আরঅ দাঙর্ অয়।

¹⁷ পুরোণ চাম থৈল্যেত্ কনজনে থচ্‌তাজা আংগুর-রস ন-থন্। থলে থৈল্যেগুন ফাদি যেইনে সে রসচান্ পড়ি যায় আর থৈল্যেগুন্অ বরবাত্ যায়। মান্‌‌জ্যে নুয়ো চাম থৈল্যেত্ থচ্‌তাজা আংগুর-রস থন্; সেক্কে দ্বি কিত্তেদি রোক্ষ্যে পায়।

এক্কো মরা মিলে ছঅ আর এক্কো অসুখ্যে মিলে

¹⁸ যীশু মানুচ্চুনো ইধু যেক্কে এই বেক্ কধানি কর্ সেক্কে এক্কো যিহূদী নেতা তাইধু এলঅ আর তারে সালাম্ গুরিনে কলঅ, “মঅ ঝিবো ইক্কিনে মুরি গেলঅ। মাত্তর্ তুই এইনে তা উগুরে আঢ্‌তান থঅ, সিয়েন্দোই তে জেঁই উদিবো।”

¹⁹ সেক্কে যীশু আহ্ তা শিচ্চ্যগুনে উদিনে তা সমারে গেলাক্।

²⁰ সে সময়োত্ এক্কো মিলে পিজেন্দিত্তুন্ যীশু ইধু এইনে তা আঢ্ কাবড়র কণাবো ধুরিলো। মিলেবো বার বজর্ ধুরিনে মিলে পীড়েত্ ভুগের্।

²¹ তে মনে মনে ভাবের্, যুনি তে বানা তা কাবড়ান্ ধুরি পারে সালে গম্ ওই যেবঅ।

²² যীশু ফিরিনে তারে দেগিনে কলঅ, “সাহস গর্, মা! তুই বিশ্বেজ্ গোজ্যস্ বিলি গম্ ওইয়োচ্।” সেই সময়ত্তুন্ ধুরি মিলেবো গম্ অলঅ।

²³ ইয়েনর্ পরেদি যীশু সেই যিহূদী নেতাবো ঘরত্ গেলঅ। সিয়েনত্ তে দেগিলো, যিগুনে বাশী বাজান্ তারা আঘন্ আর মানুচ্চুনে রঅ ছাড়দন্।

²⁴ সেক্কে যীশু কলঅ, “তুমি বারেদি যঅ। চিজিবো ন-মরে, ঘুম্ যাত্তে।” এ কধাগান শুনিনে তারা আজা-আজি গরা ধুরিলাক্।

²⁵ মানুচ্চুনোরে নিগিলেই দেনার্ পরেদি তে ভিদিরে যেইনে চিজিবো আঢ্‌তানি ধুরিলো। সেক্কে তে উদিনে বজিলো।

²⁶ এ ঘটনাগানর্ কধা সে চাগালাত্ বেক জাগাইধু ছিদি পড়িলো।

কান্ আর বুবে গম্ অলাক্

²⁷ যীশু সেই জাগায়ান্ ফেলেইনে যেবার্ সময়োত্ দ্বিজন কান্ মানুচ্ তা পিজে পিজে যাহ্ ধুরিলাক্। তারা রঅ ছাড়িনে কুয়ো ধুরিলাক্, “দায়ূদ বংশধর, আমারে দোয়্যে গর্।”

²⁸ যীশু ঘরত্ সোমেলে পরেদি সেই কান্ মানুচ্চুনে তাইধু এলাক্। সেক্কে তে তারারে কলঅ, “তুমি কি বিশ্বেজ্ গরঅ যে, মুই এ কামান্ গুরি পারং?”

তারা কলাক্, “অয় প্রভু, গুরিই।”

²⁹ পরেদি যীশু তারার্ চোগ্‌কুন ধুরিনে কলঅ, “তুমি যেবাবোত্যে বিশ্বেজ্ গোজ্য তমা উগুরে সেবাবোত্যে ওক্।”

³⁰ আর তারার্ চোগ্‌কুন মিলি গেলঅ। যীশু অমকদ কড়াগুরিনে তারারে কলঅ,

³¹ “চঅ, কনজনে যেন হবর্ ন-পান্।” মাত্তর্ তারা বারেদি যেইনে সেই চাগালার্ বেক্ জাগানিত্ তা হবরান ছিদি দিলাক্।

³² সে দ্বিজন্ মানুচ্ যেক্কে যাদন্ সেক্কে মানুচ্চুনে ভুদে পেইয়্যে এক্কো ববা মান্‌জ্যরে যীশু ইধু আনিলাক্।

³³ যীশু সেই ভুদ্‌তোরে ধাবেই দেনার্ পরেদি মানুচ্চো কধা কুয়ো ধুরিলো। সেক্কে বেক্কুনে আমক্ ওইনে কলাক্, “ইস্রায়েল দেজত্ আর কনদিন্‌অ এবাবোত্যে দেগা ন-যায়।”

³⁴ মাত্তর্ ফরীশীগুনে কলাক্, “তে ভুদ্‌তুনোর রাজার সাহায্যলোই ভুদ্‌তুনোরে ধাবেই দি পারে।”

মানুচ্চুনো উগুরে প্রভু যীশুর মেয়্যে

³⁵ যীশু শঅরত্ আর আদামে আদামে যেইনে যিহূদীগুনোর সমাজ-ঘরত্ শিক্ষ্যে দিবাত্তে আর স্বর্গ-রেজ্যর্ গম্ হবর্ ফগদাং গরা ধুরিলো। ইয়েনি বাদেয়ো তে মানুচ্চুনোর্ নানান্ বাবোত্যে পীড়েয়ো গম্ গুরিলো।

³⁶ মানুচ্চুনোর গেজাঘেস্যে দেগিনে তারাত্তে তার্ মেয়্যে অলঅ, কিয়া তারা গরক্ নেইয়্যে ভেড়া ধোক্ক্যেন্ অরান্ আর অসহায় এলাক্।

³⁷ সেক্কে যীশু তা শিচ্চ্যগুনোরে কলঅ, “খেত্-খেত্তি ঘেচ্চেকগুরি বোউত্ মাত্তর্ কাম গরেদে মানুচ্ কম্।

³⁸ সেনত্তে খেত্-খেত্তি গিরোজ্‌সো ইধু কোজোলী গরঅ যেন তে তার খেত্-খেত্তিগানি কাবিবাত্তে মানুচ্ পাধেই দে।”