মথি লেখ্যে গম্ হবর্ 5 - Chakma Bibleবর্পেইয়্যে কন্না ( লূক ৬:২০-২৩ ) 1 যীশু ভালোক্কুন্ মানুচ্ দেগিনে মুড়ো উগুরে উদিলো। তে বজানার্ পরেদি তা শিচ্চ্যগুনে তাইধু এলাক্। 2 সেক্কে তে শিচ্চ্যগুনোরে ইয়েন কোইনে শিক্ষ্যে দিয়্যে ধুরিলো: 3 মনানদি যিগুনে নিজোরে নাঢা বিলি মনে গরন্ তারা বর্পেইয়্যে, কিয়া স্বর্গ-রেজ্যগান তারার্। 4 যিগুনে দুঘ্ গরন্ তারা বর্পেইয়্যে, কিয়া তারা সান্ত্বনা পেবাক্। 5 যিগুনোর হাচ্চ্যেক্কানি চিদে তারা বর্পেইয়্যে, কিয়া পিত্থিমীগান তারার্ অবঅ। 6 যিগুনে মনে-পরাণে গোজেনর্ আওজ্ মজিম চলিবাত্তে চান্ তারা বর্পেইয়্যে, কিয়া তারার্ সেই আওজ্চান পূরোণ্ অবঅ। 7 যিগুনে দোয়্যেলু তারা বর্পেইয়্যে, কিয়া তারা দোয়্যে পেবাক্। 8 যিগুনোর্ মনানি দোল্ তারা বর্পেইয়্যে, কিয়া তারা গোজেনরে দেগিবাক্। 9 মান্জ্যর্ জিংকানিত্ শান্তি আনিবাত্তে যিগুনে কাম্ গরন্ তারা বর্পেইয়্যে, কিয়া গোজেনে তারারে নিজোর্ পুয়ো বিলিনে ডাগিবো। 10 গোজেনর্ আওজ্ মজিম চলিবাত্তে যেইনে যিগুনে অত্যেচার্ সোজ্য গরন্ তারা বর্পেইয়্যে, কিয়া স্বর্গ-রেজ্যগান্ তারার্। 11 তুমি বর্পেইয়্যে, যেক্কে মান্জ্যে মত্তে তমারে অগমান্ গরন্ আর অত্যেচার্ গরন্ আর মিজে গুরিনে তমা নাঙে নানান্ বাবোত্যে ভান্ন্যেই কধা কন্। 12 তুমি ফুত্তি গরঅ আর হুজি ওইয়ো, কিয়া স্বর্গত্ তমাত্তে দাঙর্ বক্শিজ্ আঘে। তমা আগেদি যে ভাববাদীগুন এলাক্ মান্জ্যে তারারেয়ো এবাবোত্যেগুরি অত্যেচার্ গুরিদাক্। শিচ্চ্যগুন নুন্ আর পহ্র ধোক্ক্যেন্ ( মার্ক ৯:৫০ ; লূক ১৪:৩৪-৩৫ ) 13 তুমি পিত্থিমীর নুন্, মাত্তর্ যুনি নুনোর্ সুয়োত্তান্ বর্বাদ্ ওই যায় সালে কেধোক্ক্যেন্ গুরিনে সিয়েন আরঅ নুন্যো গরা যেবঅ? সেই নুনান্ আর কনঅ কামত্ ন-লাগে। সিয়েন বানা বারেদি ফেলে দিবার আর মান্জ্য টেঙোই উড়েদে ধোক্ক্যেন্ যগাজ্যে অয়। 14 তুমি জগদর্ পহ্র্। মুড়ো উগুরে শঅর্ লুগেই থোই ন-পারে। 15 কনজনে চেরাগ জ্বালেইনে কাল্লোং তলে ন-থন্ মাত্তর্ চেরাগ টগ উগুরে থন্। সেক্কে ঘরর্ বেক্ মানুচ্চুনে পহ্রান্ পান্। 16 সেবাবোত্যেগুরি তমা পহ্রান মানুচ্চুনো মুজুঙোত্ জ্বোলোক্, যেনে তারা তমার্ গম্ কামানি দেগিনে তমা স্বর্গর্ বাপ্পোর্ বাঈনী গরন্। মোশির্ রীদি-সুদোম পৌইদ্যেনে শিক্ষ্যে 17 এ কধাগান মনে ন-গোজ্য, মুই মোশির্ রীদি-সুদোম আর ভাববাদীগুনোর্ লেগা বাদ্ দিবাত্তে এচ্চ্যং। মুই সিয়েনি বাদ্ দিবাত্তে ন-এজং মাত্তর্ পূরোণ্ গুরিবাত্তে এচ্চ্যং। 18 মুই তমারে ঘেচ্চেক্গুরি কঙর্, আগাজ্ আর পিত্থিমীগান্ শেজ্ ন-অনা সং, যেদক্ বিলোন্ সং রীদি-সুদোমর্ বেক্ কধানি ন-ফলে সেদক্ বিলোন সং সেই রীদি-সুদোমর্ এক ফুদো কি এক্কেনায়ো বাদ্ ন-যেবঅ। 19 সেনত্তে উগুমানি ভিদিরে চিগোন্ এক্কান উগুম্অ যে কনজনে অমান্য গরে আর মান্জ্যরে সিয়েনি অমান্য গুরিবাত্তে শিক্ষ্যে দে তারে স্বর্গ-রেজ্যত্ বেগত্তুন্ চিগোন্ বিলি কুয়ো অবঅ। মাত্তর্ যে কনজনে সে উগুমানি মানে আর শিক্ষ্যে দে তারে স্বর্গ-রেজ্যত্ দাঙর্ কুয়ো অবঅ। 20 মুই তমারে কঙর্, ধর্ম-মাষ্টর আর ফরীশীগুনোর ধার্মিকতাগানত্তুন্ তমার যুনি বেশ্ কিজু ন-থায় সালে তুমি কনবাবদে স্বর্গ-রেজ্যত্ সোমেই ন-পারিবা। রাগ পৌইদ্যেনে শিক্ষ্যে 21 তুমি শুন্ন্যদে, পুরোণি মানুচ্চুনো ইধু এ কধাগান কুয়ো ওইয়্যে, খুন্ ন-গোজ্য; যে খুন্ গরে তে বিচেরর্ দায়ত্ পড়িবো। 22 মাত্তর্ মুই তমারে কঙর্, যে কনজনে তা ভেইয়ো উগুরে রাগ্ গরে তে বিচেরর্ দায়ত্ পড়িবো। যে কনজনে তা ভেইয়োরে কয়, তুই বেকুব্, তে দাঙর্ তেম্মাঙর্ বিচেরর্ দায়ত্ পড়িবো। আর যে তা ভেইবোরে কয়, তুই বিবেক্ নেইয়্যে, তে নরগ আগুনো দায়ত্ পড়িবো। 23 সেনত্তে গোজেন নাঙে তঅ দানুন্ উৎসর্ব গুরিবার অক্তত্ যুনি মনত্ পড়ে, তঅ বিরুদ্ধে তঅ ভেইবোর্ কিজু কবার্ আঘে, 24 সালে তঅ দানুন্ সে পূজোবো মুজুঙোত্ থোইনে যাহ্। আগে তঅ ভেইয়ো লগে আরঅ মিলেমিলি অ পরেদি এইনে তঅ দানুন্ উৎসর্ব গর্। 25 কনজনে তঅ বিরুদ্ধে মগদ্দমা গুরিলে আদালদত্ যেবার্ আগেদি তা সমারে যাদিমাদি মিট্মাট্ গুরি ফেলা। সিয়েন ন-গুরিলে তে তরে বিচেরগ আঢত্ দিবো, আর বিচেরগে তরে পুলিশো আঢত্ দিবো, আর পুলিশে তরে জেলোত্ দিবো। 26 মুই তরে ঘেচ্চেকগুরি কঙর্, শেজ্ পৌইজেবো ন-দেনা সং তুই সিয়েনত্তুন্ কনঅ বাবদে ছড়ান্ ন-পেবে। সিনেলী পৌইদ্যেনে শিক্ষ্যে ( মথি ১৯:৯ ; মার্ক ১০:১১-১২ ; লূক ১৬:১8 ) 27 “তুমি শুন্ন্যদে, এ কধাগান কুয়ো ওইয়্যে, ‘সিনেলী ন-গোজ্য।’ 28 মাত্তর্ মুই তমারে কঙর্, যে কনজনে কনঅ মিলে ইন্দি অন্য চোগেদি রিনি চায় তে সেক্কে মনে মনে তা সমারে সিনেলী গুরিলো।” 29 তঅ ডেন্ চোগ্কো যুনি তরে পাপ পধেদি টানে সালে সিবে নিগিলেইনে দূরোত্ ফেলেই দে। তর্ গোদা কিয়্যেগান নরগত্ পড়ানাত্তুন্ বরং সিগুনোর্ এক্কো বর্বাদ্ অনা তঅ পক্ষে গম্। 30 যুনি তঅ ডেন্ আঢ্তানে তরে পাপ পধেদি টানে সালে সিয়েন্ কাবি ফেলেই দে। তর্ গোদা কিয়্যেগান্ নরগত্ যানাত্তুন্ বরং এক্কান বর্বাদ্ অনা তঅ পক্ষে গম্। 31 আরঅ কুয়ো ওইয়্যেদে, যে কনজনে তা মোক্কোরে ছাড়ি দে তে তারে ছুড়্ কাবোজ্ দুয়োক্। 32 মাত্তর্ মুই তমারে কঙর্, যুনি কনজনে বেভিচের দুষ্ বাদে অন্য কনঅ কারনে মোগোরে ছাড়ি দে তে তারে বেভিচারিনি বানায়। আর যিবেরে ছাড়ি দিয়্যে ওইয়্যে সে মিলেবোরে যে লয় তেয়ো বেভিচের্ গরে। শমক্ হানা পৌইদ্যেনে শিক্ষ্যে 33 আরঅ তুমি শুন্ন্যদে, পূরোণি মানুচ্চুনো ইধু কুয়ো ওইয়্যে, মিজে শমক্ ন-গোজ্য, বরং প্রভুর্ নাঙে তর্ বেক্ শমক্কানি পালঅ। 34 মাত্তর্ মুই তমারে কঙর্, এক্কুবারে শমক্ ন-হেয়ো। স্বর্গর্ নাঙে ন-গোজ্য, কিয়া সিয়েন গোজেনর সিংহাসন। 35 পিত্থিমীগান নাঙে ন-গোজ্য, কিয়া সিয়েন তার টেঙ্ থবার্ জাগা। যিরূশালেম নাঙে ন-গোজ্য, কিয়া সিয়েন দাঙর্ রাজার শঅর্। 36 তঅ মাঢাবো নাঙে ন-গুরিচ্, কিয়া তার্ এক্কান চুল ধুব্ কি কালা গুরিবার খেমতা তর্ নেই। 37 তমা কধাত্ অয় যেন অয় আর নয় যেন নয় অয়; ইয়েনর বেশ্ যিয়েন, সিয়েন শদান ইত্তুন্ এজে। হেনা সুজোনা পৌইদ্যেনে শিক্ষ্যে ( লূক ৬:২৯ , ৩০ ) 38 তুমি শুন্ন্যদে, কুয়ো ওইয়্যে, চোগোর্ বদলে চোগ্ আর দাতর্ বদলে দাত্। 39 মাত্তর্ মুই তমারে কঙর্, তমা সমারে যে কনজনে ভান্ন্যেই বেবহার গরে তা বিরুদ্ধে কিচ্চু ন-গোজ্য; বরং যে কনজনে তঅ ডেন্ গালত্ চুয়োড়্ মারে তারে বাঙ্অ গালানত্অ চুয়োড়্ মারিবাত্তে দিস্। 40 যে কনজনে তঅ সিলুম্মো নিবাত্তে মগদ্দমা গুরিবাত্তে চায় তারে তর্ কাবরান্অ নিবাত্তে দিস্। 41 যে কনজনে তরে তা ভূদিবো লোইনে এক মেইল্ বলেবলে যেবাত্তে হয় তা সমারে দি-মেইল্ যেচ্। 42 যে তত্তুন্ কিজু চায় তারে দিস্, আর যে তত্তুন্ উদোর্ চায় তারে দিবাত্তে অস্বীগের্ ন-গুরিচ্। শত্রুরে কোচ্পানা পৌইদ্যেনে শিক্ষ্যে ( লূক ৬:২৭-২৮ , ৩২-৩৬ ) 43 তুমি শুন্ন্যদে, কুয়ো ওইয়্যে, তঅ পাড়াল্ল্যেগুনোরে কোচ্পেবে আর শত্রুরে ঘিনেবে। 44 মাত্তর্ মুই তমারে কঙর্, তমা শত্রুগুনোরেয়ো কোচ্পেয়ো। যিগুনে তমারে অত্যেচার্ গরন্ তারাত্তে তবনা গোজ্য, 45 যেনে মান্জ্যে দেগন্ তুমি ঘেচ্চেকগুরি তমা স্বর্গীয় বাবার্ পুয়ো। তে দঅ গম্-বজং বেক্কুনো উগুরে তা বেলান্ দে আর গম্ আর বজং মানুচ্চুনো উগুরে ঝড়্ দে। 46 যিগুনে তমারে কোচ্পান বানা তারারে যুনি তুমি কোচ্পঅ সালে তুমি কি বক্শিজ্ পেবা? খাজানা-তুলিয়েগুনেয়ো কি সে বাবোত্যে ন-গরন্? 47 আর যুনি তুমি বানা তমা নিজো মানুচ্চুনোরে ভালেদি জান সালে অন্যগুনোত্তুন্ বেশ্ আর কি গরর্? অযিহূদীগুনেয়ো কি সে বাবোত্যে ন-গরন্? 48 ইয়েনত্তে কং, তমা স্বর্গর্ বাপ্পো যেবাবোত্যে খাটি তুমিয়ো সেবাবোত্যে খাটি অ। |
Copyright © 2021 Bangladesh Bible Society
Bangladesh Bible Society