মথি লেখ্যে গম্ হবর্ 28 - Chakma Bible

মরণ উগুরে জিদেনা

¹ জিরেবার্ দিনো পরেদি সাপ্তার্ পত্তম্ দিনোত্ বেন্ন্যে মাদান্ মগ্‌দলীনী মরিয়মে আর সেই অন্য মরিয়মে গোর্‌বো চেবাত্তে গেলাক্।

² সেক্কে আদিক্ক্যেগুরি জদবদে ভূজোল্ বেলঅ, কিয়া প্রভুর্ এক্কো দূত স্বর্গত্তুন্ লামি এলঅ আর গোরান মুয়োনত্তুন্ পাত্তর্‌বো সোরেই দিইনে সিবে উগুরে বুজিলো।

³ তা চেঙেরাগান্ কারেন ধোক্ক্যেন্ এলঅ আর তা কাবড়-চুগোড়ানি তুলো ধোক্ক্যেন্ ধুব্ এলঅ।

⁴ চুগিদারুনে এদক্ দোরেয়োন যে তারা গির্‌গিরা ধুরিলাক্ আর মরা ধোক্ক্যেন্ অলাক্।

⁵ স্বর্গদূত্তো মিলেগুন্দোই কধা কলঅ, তে কলঅ, “তুমি ন-দোরেয়ো, কিয়া মুই হবর্ পাং, যিবেরে ক্রুশোত্ দিয়্যে ওইয়্যে তুমি সেই যীশুরে তগর্।

⁶ তে ইয়েনত্ নেই। তে যেবাবোত্যেগুরি কোইয়্যে সেবাবোত্যেগুরি জেদা ওই উঠ্যে। এজঅ, তে যিয়েনত্ পড়ি এলঅ সে জাগায়ান্ চগি।

⁷ তুমি যাদিমাদি যেইনে তা শিচ্চ্যগুনোরে কঅ, তে মরণত্তুন্ জেদা ওই উঠ্যে আর ইক্কুনি তমা আগেদি গালীলোত্ যার্। তুমি সিধু তারে দেগিবা। মুই তমারে কি কলুং সিয়েন ইদোত্ রাগেয়ো।”

⁸ সেই মিলেগুনে ঘেচ্চেকগুরি দোরেয়োন্, মাত্তর্ তো হুজিয়ে রাজিয়ে যাদিমাদি গোর ইত্তুন্ গেলাক্কোই আর যীশুর্ শিচ্চ্যগুনোরে এ হবরান্ দিবাত্তে ধাবা দিয়্যে ধুরিলাক্।

⁹ এন্ সময়োত্ যীশু আদিক্ক্যেগুরি সেই মিলেগুনো মুজুঙোত্ এইনে কলঅ, “তমার্ ভালেদি ওক্।” সেক্কে সেই মিলেগুনে তাইধু যেইনে তা টেঙত্ ধুরি সালাম্ গুরিনে তারে গোজেনর্ সর্মান দিলাক্।

¹⁰ যীশু তারারে কলঅ, “ন-দোরেয়ো; তুমি যেইনে ভেইয়ুনোরে গালীলোত্ যেবাত্তে কঅ। তারা সিধু মরে দেগিবাক্।”

¹¹ সেই মিলেগুনে যেক্কে যাদন্ সেক্কে সেই চুগিদারুনোত্তুন্ কয়েকজনে শঅরত্ গেলাক্ আর যিয়েনি যিয়েনি ঘোট্যে সিয়েনি আজল্ ধর্মগুরুগুনোরে জানেলাক্।

¹² সেক্কে ধর্মগুরুগুনে আর বুড়ো নেতাগুনে এগত্তর্ ওইনে সল্লা গুরিলাক্ আর সেই সৈন্যগুনোরে ভালোক্কুন্ দীনার্ দিইনে কলাক্,

¹³ “তুমি কোইয়ো, ‘আমি রেদোত্ যেক্কে ঘুম্ যের্ সেক্কে তা শিচ্চ্যগুনে এইনে তারে চুর্ গুরি নেযেয়োন।’

¹⁴ এ কধাগান্ যুনি আজল্ শাসনগুরিয়্যেবো শুনে সালে আমি তারে বুঝেবং আর সাজা আঢত্তুন্ তমারে রোক্ষ্যে গুরিবোং।”

¹⁵ সেক্কে চুগিদারুনে সেই টেঙাগুন্ নেযেলাক্ আর তারারে যেবাবোত্যে কুয়ো ওইয়্যে সেবাবোত্যেগুরি কলাক্। এজঅ সং সেই কধাগানি যিহূদীগুনো ইধু ছিদি পড়ি আঘে।

শেজ্ উগুম্

¹⁶ যীশু গালীলো যে মুড়োবোত্ শিচ্চ্যগুনোরে যেবাত্তে কোইয়্যে সেই এগারজন্ শিচ্চ্য সেক্কে সেই মুড়োবোত্ গেলাক্।

¹⁷ সিয়েনত্ যীশুরে দেগিনে তারা তারে সালাম্ গুরিনে গোজেনর্ সর্মান দিলাক্, মাত্তর্ কয়েকজনে সন্দেহ গুরিলাক্।

¹⁸ সেক্কে যীশু কায়কুরে এইনে তারারে এ কধাগান্ কলঅ, “স্বর্গর্ আর পিত্‌থিমীর বেক্ খেমতাগান্ মরে দিয়্যে ওইয়্যে।

¹⁹ ইয়েনত্তে তুমি যেইনে বেক্ জাদ মানুচ্চুনোরে মর্ শিচ্চ্য বানঅ। বাব্‌‌‌পো, পুয়োবো আর পবিত্র আত্মার্ নাঙে তারারে বাপ্তিস্ম দুয়ো।

²⁰ মুই তমারে যেদক্কানি উগুম্ দুয়োং সিয়েনি পালেবাত্তে তারারে শিক্ষ্যে দুয়ো। চঅ, যুগোর্ থুম্ সং নিত্য মুই তমা সমারে সমারে আগং।”