মথি লেখ্যে গম্ হবর্ 26 - Chakma Bible

প্রভু যীশুরে মারে ফেলেবার্ কুজুরোমি

¹ এই বেক্ কধানির্ শেজদি যীশু তা শিচ্চ্যগুনোরে কলঅ,

² “তুমি দঅ হবর্ পঅ আর দ্বিদিন্ পরেদি উদ্ধোর-পরব্, আর মান্‌জ্য পুয়োবোরে ক্রুশোত্ দিবাত্তে ধুরি দিয়্যে অবঅ।”

^3-4 সেই সময়োত্ দাঙর্ ধর্মগুরু কাইয়াফার ঘরত্ আজল্ ধর্মগুরুগুনে আর যিহূদীগুনোর্ বুড়ো নেতাগুনে এগত্তর্ অলাক্ আর যীশুরে গোপনে ধুরি আনিনে মারে ফেলেবার্ কুজুরোমি গুরিলাক্।

⁵ মাত্তর্ তারা কলাক্, “পরবর্ সময়োত্ নয়; সেক্কে মানুচ্চুনো ইধু অয়ত কোল্-কোজ্যে আরাম্ভ অবঅ।”

প্রভু যীশুর মাঢাবোত্ আতর্ ঢালানা

⁶ যীশু যেক্কে বৈথনিয়াত্ ফারাঙিরুগি শিমোন ঘরত্ এলঅ সেক্কে এক্কো মিলে তাইধু এলঅ।

⁷ সেই মিলেবো এক্কো ধুব্ পাত্তর পিলেত্ গুরিনে অমকদ মংগা আতর্ আনিলো। যীশু যেক্কে হেবাত্তে বুজিলো সেক্কে তে তা মাঢাবোত্ সেই তুম্বাজ্ তেলান্ ঢালি দিলো।

⁸ শিচ্চ্যগুনে সিয়েন্ দেগিনে কাঙেলেত্যে পেইনে কলাক্, “এই মংগা জিনিস্‌চান কিত্তে বর্‌বাদ গরা অর্?

⁹ ইয়েন্ দঅ বোউত্ দামে বিজিনে টেঙাগুন্ নাঢা মানুচ্চুনোরে দিয়্যে যেদঅ।”

¹⁰ যীশু এ কধাগান্ বুঝি পারিনে শিচ্চ্যগুনোরে কলঅ, “তুমি এ মিলেবোরে দুঘ্ দুয়োর্ কিত্যে? তে দঅ মত্তে গম্ কাম্ গোজ্যে।

¹¹ নাঢা মানুচ্চুনে দঅ নিত্য তমা ইধু আগন্, মাত্তর্ মরে তুমি নিত্য ন-পেবা।

¹² তে মঅ কিয়্যেগান উগুরে এ আতরান্ ঢালি দিইনে মরে কবরত্তে যুক্কোল্ গোজ্যে।

¹³ ইক্কিনে, মুই তমারে ঘেচ্চেকগুরি কঙর্, জগদর্ যে কনঅ জাগাত্ গম্ হবর্ ফগদাং গরা অবঅ সিধু এ মিলেবোর্ কধাগান্ ইদোত্ তুলি দিবাত্তে তার্ এ কামর্ কধাগান্অ কুয়ো অবঅ।”

তিরিচ্চো টেঙার্ লুভে

¹⁴ সে পরেদি সেই বারজন শিচ্চ্যত্তুন্-এক্কো শিচ্চ্য যিহূদা ইষ্কারিয়োৎ নাঙে শিচ্চ্যবো আজল্ ধর্মগুরুগুনো ইধু গেলঅ,

¹⁵ আর পুযোর্ গুরিলো, “যুনি মুই বেঈমানী গুরিনে যীশুরে তমা আঢত্ ধুরি দুয়োং তুমি মরে কি দিবা?” আজল্ ধর্মগুরুগুনে তিরিচ্চো রুবোর টাকা গুণিনে তারে দিলাক্।

¹⁶ সেক্কেত্তুন্ ধুরি যিহূদা যীশুরে ধুরি দিবাত্তে সুযোগ তগা ধুরিলো।

শেজ্ উদ্ধোর্-পরবর্ হানা

¹⁷ সদানেইয়্যে রুটি পরবর্ পত্তম্ দিনোত্ শিচ্চ্যগুনে যীশু ইধু এইনে কলাক্, “তত্তে উদ্ধোর্-পরবর্ হানা আমি কুদু যুক্কোল্ গুরিবোং?”

¹⁸ যীশু তারারে কলঅ, “শঅর ভিদিরে যেইনে সে মানুচ্চোরে কঅ, মাষ্টরবাবু কত্তে, ‘মঅ সময়ান্ কায়কুরে লুম্মেগি। মঅ শিচ্চ্যগুনো সমারে মুই তঅ ঘরত্ উদ্ধোর্-পরব্ পালন্ গুরিম্।’ ”

¹⁹ যীশু শিচ্চ্যগুনোরে যে উগুমান্ দিলো শিচ্চ্যগুনে সেবাবোত্যেগুরি উদ্ধোর্-পরবর্ হানাগান্ যুক্কোল্ গুরিলাক্।

²⁰ যেক্কেনে সাজোন্যে অলঅ যীশু সেই বারজন্ শিচ্চ্যরে নিইনে হেবাত্তে বুজিলো।

²¹ হেবার্ অক্তত্ তে কলঅ, “মুই তমারে ঘেচ্চেক্‌‍‍‍‍গুরি কঙর্, তমা ভিদিরেত্তুন্ একজনে মরে শত্রুগুনো আঢত্ ধুরি দিবো।”

²² সেক্কেনে শিচ্চ্যগুনে অমকদ দুঘ্ পেইনে একজনর্ পর একজন যীশুরে পুযোর্ গরা ধুরিলাক্, “সিবে কি মুই, প্রভু?”

²³ জোবত্ তে তারারে কলঅ, “যে মঅ সমারে পিলেবোত্ আঢ্‌তান দের্ তেয়ই মরে ধুরি দিবো।

²⁴ মান্‌জ্য পুয়োবো পৌইদ্যেনে পবিত্র বোইয়োত্ যেবাবোত্যেগুরি লেগা আঘে ঠিগ্ সেবাবোত্যেগুরি তে মুরি যেবঅ ঠিগ্, মাত্তর্ কি দর্‌‍গরেপারা সেই মানুচ্চো, যে মান্‌জ্য পুয়োবো লগে বেঈমানী গরে! তে মান্‌জ্যর্ জর্ম ন-অলে বরং তাত্যেই গম্ অদঅ।”

²⁵ যিহূদা, বেঈমান, তে কলঅ, “প্রভু, সিবে কি মুই?”

যীশু তারে কলঅ, “তুই ঠিগ্ কধা কলে।”

²⁶ হানা-দানা চলের্, এমন্ সময়োত্ যীশু রুটি লোইনে গোজেনরে ভালেদি জানেল। পরেদি তে সেই রুটিগান্ কট্টা কট্টা গুরিলো আর শিচ্চ্যগুনোরে দিইনে কলঅ, “এইয়্যে লঅ, হঅ; ইয়েন্ মর্ কিয়্যে।”

²⁷ ইয়েনর্ পরেদি তে গলচ্চো লোইনে গোজেনরে ভালেদি জানেল আর সিবে শিচ্চ্যগুনোরে দিইনে কলঅ, “গলচ্চোর্ এই আংগুর-রস্‌চান তুমি বেক্কুনে হঅ,

²⁸ কিয়া ইয়েন্ মর্ লো যিয়েন্ ভালোক্কুন্ মান্‌জ্যর্ পাপর্ খেমাত্তে দিয়্যে অবঅ। মান্‌জ্যত্তে গোজেনর্ নুয়ো সুদোম মর্ এই লো-গান্দোই সুজো অবঅ।

²⁹ মুই তমারে কঙর্, ইক্কেত্তুন্ ধুরি যেদক্ বিলোন্ সং মুই মঅ বাব রেজ্যত্ তমা সমারে আংগুর-ফলর্ রস্ নুয়ো গুরি ন-হাং সেদকদিন সং মুই আরঅ কনদিন্অ সিয়েন্ ন-হেম্।”

³⁰ পরেদি তারা এক্কো গীদ্ গেই গেই নিগিলিনে জৈতুন্ মুড়োবোত্ গেলাক্।

পিতরর্ অস্বীগের্ গুরিবার্ কধা

³¹ পরেদি যীশু তা শিচ্চ্যগুনোরে কলঅ, “এচ্চ্যে রেদোত্ মরে নিইনে তমা বেক্কুনো মনত্ মানা এবঅ। পবিত্র বোইবোত্ লেগা আঘে, ‘মুই গরগ্‌কোরে মারে ফেলেম্, সেক্কে পাল ভেড়াগুন্ ছিদি পড়িবাক্।’

³² মাত্তর্ মুই মরণত্তুন্ জেদা অনার্ পরেদি মুই তমা আগে আগে গালীলোত্ যেম্।”

³³ সেক্কে পিতরে তারে কলঅ, “তরে নিইনে বেক্কুনো মনত্ মানা এলেয়ো মঅ মনত্ কনদিন্অ মানা ন-এবঅ।”

³⁴ যীশু তারে কলঅ, “মাত্তর্ মুই তরে ঘেচ্চেক্‌গুরি কঙর্, এচ্চ্যে বেন্যেপোত্যে রাদা কুরো ডাগ্ কারিবার্ আগেদি তুই তিনবার্ কবে, তুই মরে ন-চিনোস্।”

³⁵ পিতরে কলঅ, “মত্তুন্ যুনি তঅ সমারে মরায়ো পড়ে তো মুই কনদিন্অ ন-কোম্, মুই তরে ন-চিনোং।” সেক্কেনে অন্য শিচ্চ্যগুনেয়ো বেক্কুনে সেই একই কধা কলাক্।

গেৎশিমানী বাগানত্

³⁶ পরেদি যীশু তা শিচ্চ্যগুনো সমারে গেৎশিমানী নাঙে এক্কান্ জাগাত্ গেলঅ আর শিচ্চ্যগুনোরে কলঅ, “মুই সিয়েনত্ যেইনে যেদক্কন্ সং তবনা গরং সেদক্কন্ সং তুমি ইয়েনত্ বুয়োই থাগঅ।”

³⁷ ইয়েন্ কোইনে তে পিতর আর সিবদিয়র্ দ্বিবে পুয়োরে সমারে নেযেল। তে মনত্ দুঘ্ আর কষ্ট পেলঅ।

³⁸ তে তারারে কলঅ, “দুঘে যেন মঅ পরাণান্ নিগিলি যার্। তুমি ইয়েনত্ থাগঅ আর মঅ সমারে জাগি থাগঅ।”

³⁹ পরেদি তে কিজু দূরোত্ যেইনে মাদিত্ মাঢা নিগুরিনেই পড়িলো আর তবনা গুরিনে কলঅ, “মর্ বাবা, যুনি সম্ভব্ অয় সালে এই দুঘোর্ গলচ্চো মত্তুন্ দূরোত্ যোক্। তো মর্ আওজ্ মজিম ন-ওক্, তঅ অায়োজ্ মজিম ওক্।”

⁴⁰ ইয়েনর্ পরেদি তে তার্ তিনজন শিচ্চ্য ইধু ফিরি এইনে দেগিলো তারা ঘুমোত্ পোজ্জ্যন্। তে পিতররে কলঅ, “ইয়েন্ কি! তুমি তিনজনে মঅ সমারে এক ঘণ্টায়ো কি জাগি থেই ন-পারিলা?

⁴¹ জাগি থাগঅ আর তবনা গরঅ যেন পোরোক্ষ্যেত্ ন-পড়অ। আত্মায় আওজ্ আঘে ঠিগ্, মাত্তর্ কিয়্যেদি বল্‌পোজ্যে।”

⁴² তে ফিরি যেইনে দ্বিবারত্ তবনা গুরিনে কলঅ, “ও বাহ্, মুই ন-গুজিলেয়ো যুনি এই দুঘোর্ গলচ্চো দূর্ ন-অয় সালে তঅ আওজ্‌চান পূরোণ্ ওক্।”

⁴³ তে কয়েকবার ফিরি এলঅ আর তে দেগিলো তা শিচ্চ্যগুনে ঘুমোত্ পোজ্জ্যন্, কিয়া তারা এদক্ অঘোর্ ঘুমোত্ যে চোগ্‌কুন্ খুলি ন-পারদন্।

⁴⁴ তে আরঅ তারারে ছাড়ি যেইনে তিন্ বার্ সেই একই কধা কোইনে তবনা গুরিলো।

⁴⁵ পরেদি তে শিচ্চ্যগুনো ইধু এইনে কলঅ, “তুমি কি এজঅ ঘুম যর্ আর জিরোর্? চঅ, সময়বো লুম্মেগি, মান্‌জ্য পুয়োবোরে পাপীগুনো আঢত্ ধুরি দিয়্যে অবঅ।

⁴⁶ উদো, আঢঅ আমি যেই। চঅ, যিবে মল্লোই বেঈমানী গরের্ এইয়্যে সে মানুচ্চো।”

শত্রুগুনো আঢত্ প্রভু যীশু

⁴⁷ যীশু সেক্কেয়ো কধা কর্, এমন্ সময়োত্ যিহূদা সিয়েনত্ এলঅ। তে সেই বারজন শিচ্চ্য ভিদিরে একজন এলঅ। তা সমারে বোউত্ মানুচ্ ছুরি আর মুগোর্‌লোই এলাক্। আজল্ ধর্মগুরুগুনে আর বুড়ো নেতাগুনে ইগুনোরে পাধেয়োন।

⁴⁸ সেই বেঈমান্‌নো মানুচ্চুনো সমারে এক্কান্ চিহ্নো ঠিগ্ গোজ্যে; তে কোইয়্যেদে, “যিবেরে মুই চুমিম্ তেয়ই সেই মানুচ্চো; তুমি তারে ধুরিবা।”

⁴⁹ সেনত্তে যিহূদা সোজা যীশু ইধু যেইনে কলঅ, “মাষ্টরবাবু, তর্ শান্তি ওক্।” আর তে তারে চুমিলো।

⁵⁰ যীশু তারে কলঅ, “দাংগু, যিয়েন্ গুরিবাত্তে এচ্চ্যস্, সিয়েন গর্।” মানুচ্চুনে লগে লগে এইনে যীশুরে ধুরিলাক্।

⁵¹ যিগুনে যীশু সমারে এলাক্ তারা ভিদিরে একজনে তা ছুরিগান্ নিগিলেল আর তা দাঙর্ ধর্মগুরুবোর্ চাগরর্ এক্কান্ কান্ কাবি ফেলেল।

⁵² সেক্কে যীশু তারে কলঅ, “তঅ ছুরিগান্ খাবত্ থঅ। ছুরি যিগুনে ধরন্ তারা ছুরিলোই মরন্।

⁵³ তুই কি মনে গরচ্, মুই মঅ বাপ্পোরে ডাগিলে তে ইক্কিনে মরে আজার্ আজার্ স্বর্গদূত্ পাধেই ন-দিবো? মাত্তর্ সালে পবিত্র বোইবোর্ কধাগান্ কেধোক্ক্যেন্ গুরি পূরোণ্ অবঅ?

⁵⁴ বোইবোত্ দঅ লেগা আঘে ইয়েনি বেক্কানি এবাবোত্যে অবঅ।”

⁵⁵ পরেদি যীশু মানুচ্চুনোরে কলঅ, “মুই কি ডাগেত্, তুমি ছুরি আর মুগোর্‌লোই মরে ধুরিবাত্তে এচ্চো? মুই পত্তিদিন্ উবোসনা-ঘরত্ বুয়োইনে শিক্ষ্যে দিদুং, আর সেক্কে দঅ তুমি মরে ন-ধরঅ।

⁵⁶ মাত্তর্ ইয়েনি বেক্কানি ঘুদিলো যেন পবিত্র বোইবোত্ ভাববাদীগুনে যিয়েনি লেখ্যন্ সিয়েনি পূরোণ্ অয়।” শিচ্চ্যগুনে বেক্কুনে সেক্কে যীশুরে ফেলেইনে ধেই গেলাক্।

দাঙর্ তেম্মাঙ মুজুঙোত্

⁵⁷ যিগুনে যীশুরে ধোজ্যন্ তারা তারে দাঙর্ ধর্মগুরু কাইয়াফা ইধু নেযেলাক্। সিদু ধর্ম-মাষ্টরুনে আর বুড়ো নেতাগুনে এক সমারে এগত্তর্ ওইয়োন্।

⁵⁸ পিতরে দূরোত্তুন্ যীশুর পিজে পিজে দাঙর্ ধর্মগুরুবোর্ উদোনান সং গেলঅ আর যেরেদি কি অয় সিয়েন্ চেবাত্তে ভিদিরে সোমেইনে চুগিদারুনো লগে বজিলো।

⁵⁹ যীশুরে মারে ফেলেবাত্যে আজল্ ধর্মগুরুগুনে আর তেম্মাঙর্ বেক্ মানুচ্চুনে তা বিরুদ্ধে কিজু মিজে সাক্ষী তগা ধুরিলাক্।

⁶⁰ মাত্তর্ তারা কনঅ মিজে সাক্ষী ন-পেলাক্, যুনিয়ো বোউত্ মিজে সাক্ষী তা পৌইদ্যেনে কবাত্যে এচ্চোন্। যেরেদি দ্বিজন্ মানুচ্ উজেই এইনে কলাক্,

⁶¹ “এ মানুচ্চো কোইয়্যেদে, মুই গোজেন ঘরান্ ভাঙি ফেলেইনে তিন দিনো ভিদিরে আরঅ সিয়েন্ বানেই দি পারং।”

⁶² সেক্কে দাঙর্ ধর্মগুরুবো থিয়্যেল আর যীশুরে কলঅ, “ইগুনে তঅ বিরুদ্ধে যিয়েনি কদন্ সে পৌইদ্যেনে তুই কি কনঅ জোব্ ন-দিবে ?”

⁶³ মাত্তর্ যীশু অলর্ গুরি থেলঅ। দাঙর্ ধর্মগুরুবো আরঅ তারে কলঅ, “তুই জেদা গোজেনর্ নাঙে শমক্ হেইনে আমারে কঅ, তুই কি সেই মশীহ, অত্তাৎ গোজেনর্ পুয়ো না হি।”

⁶⁴ সেক্কে যীশু তারে কলঅ, “অয়, তুই ঠিগই কোইয়োচ্। মাত্তর্ মুই তমারে ইয়েন্অ কঙর্, ইয়েনর্ পরেদি তুমি মান্‌জ্য পুয়োবোরে বেগত্তুন্ খেমতাবলা গোজেন ডেনেদি বুয়োই থাগদে আর মেঘ সমারে এত্তে দেগিবা।”

⁶⁵ সেক্কে দাঙর্ ধর্মগুরুবো তা কাবড়ান্ ফাদি ফেলেইনে কলঅ, ইবে গোজেনরে অগমান্ গুরিলো। আমাত্তুন্ আরঅ বেশ্ সাক্ষীর দরকার্ নেই? ইক্কিনে দঅ তুমি শুনিলা, তে গোজেনরে অগমান্ গোজ্জ্যে।

⁶⁶ তুমি কি মনে তারা জোব্ দিলাক্, “তে দুষী আর হামাক্কায় মারে ফেলা ওক্।”

⁶⁷ সেক্কে মানুচ্চুনে যীশুর মুয়োনত্ সেফ্ ফেলেই দিলাক্ আহ্ ঘুষি চোড়্ মারিলাক্।

⁶⁸ তারা কলাক্, “এই মশীহ, কধে চেই, কন্না তরে মারিলো?”

পিতরর্ অস্বীগের্

⁶⁹ সেই অক্তত্ পিতরে বারেদি উদোনত্ বুয়োই এলঅ। এক্কো চাগরানী তাইধু এইনে কলঅ, “গালীল যীশু সমারে দঅ তুইয়ো এলে।”

⁷⁰ মাত্তর্ পিতরে বেক্কুনো মুজুঙোত্ অস্বিগের্ গুরিনে কলঅ, “তুই কি কর্ সিয়েন্ মুই হবর্ ন-পাং।”

⁷¹ ইয়েনর্ পরেদি পিতরে বারেদি গেদো কুরে গেলঅ। তারে দেগিনে আর এক্কো চাগরানীয়ে সিদুগোর্ মানুচ্চুনোরে কলঅ, “এ মানুচ্চো নাসরদত্ যীশু সমারে এলঅ।”

⁷² সেক্কে পিতরে শমক্ হেইনে আরঅ অস্বিগের্ গুরিনে কলঅ, “মুই সে মানুচ্চোরে ন-চিনোং।”

⁷³ যে মানুচ্চুনে সিয়েনত্ থিয়্যেই এলাক্ তারা হানক্কণ্ পরেদি পিতররে এইনে কলাক্, “হামাক্কায় তুই সিগুনোত্তুন্ একজন; তঅ কধানিয়ে তরে ধুরি দের্।”

⁷⁴ সেক্কে পিতরে নিজোরে অভিশাব্ দিলো আর শমক্ হেইনে কুয়ো ধুরিলো, “মুই সে মানুচ্চোরে মোটেই ন-চিনোং।” আর সেক্কেনে এক্কো রাদাকুরো ডাগ্‌‍কারি উদিলো।

⁷⁵ যীশু যিয়েনি কোইয়্যে সিয়েনি পিতরর্ মনত্ পড়িলো, “রাধাকুড়ো ডাগ্ কারিবার আগেদি তুই তিন পল্লা কবে, তুই মরে ন-চিনোস্।” সেক্কে পিতরে বারেদি যেইনে জদবদে কানা ধুরিলো।