মথি লেখ্যে গম্ হবর্ 25 - Chakma Bible

দোচ্চো মিলের্ হিত্ত্য

¹ সেই সময়োত্ স্বর্গ-রেজ্যগান্ এন্ দশজন মিলে ধোক্ক্যেন্ অবঅ যিগুনে সমাজ্যে জামেইবোরে আগ্-বারেই আনিবাত্তে চেরাগ্‌কোই বারেদি গেলাক্।

² তারা ভিদিরে পাচ্‌জন এলাক্ বুদ্ধিবলা।

³ বুদ্ধিনেইয়্যে মিলেগুনে তারার্ চেরাগ্‌কো নেযেলাক্ ঠিগ্ মাত্তর্ লগে তেল্ ন-নেযেলাক্।

⁴ বুদ্ধিবলা মিলেগুন্ তারার্ চেরাগ্‌কো লগে পিলেত্ গুরি তেল্অ নেযেয়োন।

⁵ জামেইবো এত্তে দেরি অনায় তারা যুড়দে যুড়দে বেক্কুনে ঘুমোত্ পড়িলাক্।

⁶ পরে রেত্ সম্বাগত্ দাঙর্ রঅ শুনো গেলঅ, উইয়ো চঅ, জামেইবো এজের্! জামেইবোরে আগ্- বাড়েই আনিবাত্তে নিগিলো।

⁷ সেক্কে সেই মিলেগুন্ উদিনে তারা চেরাগ্‌কুন ঠিগ্ গুরিলাক্।

⁸ বুদ্ধিনেইয়্যেগুনে বুদ্ধিবলাগুনোরে কলাক্, তমা তেলানিত্তুন্ আমারে কিজু দুয়ো, কিয়া আমা চেরাগ্‌কো মুরি যার্।

⁹ সেক্কে সেই বুদ্ধিবলা মিলেগুনে জোবত্ কলাক্, না, তেল্ যিয়েন্ আঘে সিয়েন্দোই অয়ত আমার্ আর তমার্ ন-কুলেব। তুমি বরং দোগান ইধু যেইনে নিজোত্তে তেল্ কিনি নেযঅ।

¹⁰ সেই বুদ্ধিনেইয়্যে মিলেগুনে যেক্কে তেল্ কিনিবাত্তে গেলাক্ সেক্কে জামেইবো লুমিলো। সেক্কে যে মিলেগুনে যুক্কোল্ এলাক্ তারা জামেইবো সমারে মেলা ঘরত্ গেলাক্। তারা বেক্কুনে ভিদিরে সমানার্ পরেদি দোরান্ নাঢি দিয়্যে অলঅ।

¹¹ “পরেদি সেই বুদ্ধিনেইয়্যে মিলেগুনে এইনে কলাক্, ‘চঅ, দোরান্ খুলি দুয়ো।’

¹² জোবত্ জামেইবো কলঅ, ‘ঘেচ্চেকগুরি কঙর্, মুই তমারে ন-চিনোং।’ ”

¹³ হিত্ত্যবোর্ শেজদি যীশু কলঅ, ইয়েনত্তে সজাক্ থাগঅ, কিয়া সেই দিন্নো বা সেই সময়বোর্ কধা তুমি হবর্ ন-পঅ।

তিন্নো চাগরর্ হিত্ত্য

¹⁴ সেই সময়োত্ স্বর্গ-রেজ্যগান্ এমন এক্কো মান্‌জ্য ধোক্ক্যেন অবঅ যিবে বিদেজত্ যেবার্ আগেদি তা চাগরুনোরে ডাগিনে তার্ বেক্ সোম্বোত্তির্ ভারান্ তারা আঢত্ দি গেলঅ।

¹⁵ সেই চাগরুনোর্ খেমতা অনুসারে তে এক্কোরে পাচ্ আজার্, এক্কোরে দ্বি আজার্ আর এক্কোরে এক আজার্ দীনার্ দিলো। সে পরেদি তে বিদেজত্ গেলঅ।

¹⁶ যে পাচ্ আজার্ দীনার্ পেলঅ তে সিগুন্দোই বেবসা গুরিনে আরঅ পাচ্ আজার্ দীনার্ লাভ্ গুরিলো।

¹⁷ যে দ্বি আজার্ দীনার্ পেলঅ তেয়ো সেবাবোত্যেগুরি আরঅ দ্বি আজার্ দীনার্ লাভ্ গুরিলো।

¹⁸ মাত্তর্ যে এক আজার্ দীনার্ পেলঅ তে মাদিত্ গাঢ্ খুড়িনে তা গিরোজ্‌সো টেঙাগুন্ লুগেই রাগেল।

¹⁹ ভালোক্ দিন পরেদি সেই গিরোজ্‌সো ফিরি এইনে চাগরুনোত্তুন্ ইজেব্ চেলঅ।

²⁰ যে চাগর্‌বো পাচ্ আজার্ দীনার্ লোইয়্যে তে আরঅ পাচ্ আজার্ টেঙালোই এইনে কলঅ, তুই মরে পাচ্ আজার্ দীনার্ দুয়োচ্। চাহ্, মুই আরঅ পাচ্ আজার্ দীনার্ লাভ্ গোজ্যং।

²¹ সেক্কে তা গিরোজ্‌‌সো তারে কলঅ, দোল্ কাম গোজ্যস্, তুই গম্ আর বিশ্বেজি চাগর্। তুই কম্ টেঙালোই বিশ্বেজি বিলিনে মুই তরে ভালোক্কানি কামর্ ভার্ দিম্। আয়, মঅ হুজির্ ভাগীদার্ অ।

²² সে পরেদি যে দ্বি আজার্ দীনার্ লোইয়্যে তে এইনে কলঅ, তুই মরে দ্বি আজার্ দীনার্ দুয়োচ্, চাহ্, মুই আরঅ দ্বি আজার্ দীনার্ লাভ্ গোজ্যং।

²³ সেক্কে তা গিরোজ্‌সো তারে কলঅ, গম্ কাম গোজ্যস্। তুই গম্ আর বিশ্বেজি চাগর্। তুই কম পৌইদ্যেনে বিশ্বেজি বিলিনে মুই তরে ভালোক্কানি কামর্ ভার্ দিম্। আয়, মর্ হুজির্ ভাগীদার্ অগি।

²⁴ মাত্তর্ যে চাগর্‌‌‌‌বো এক আজার্ দীনার্ লোইয়্যে তে এইনে কলঅ, চাহ্, মুই হবর্ পেদুং তুই অমকদ আঘাত্যে মানুচ্। তুই যিয়েনত্ বীজি ন-ফেলাস্ সিয়েনত্তুন্ কাবচ্ আর যিয়েনত্ ন-ছিদোচ্ সিয়েনত্তুন্ কুড়োচ্।

²⁵ ইয়েনত্তে মুই দরে বারেদি যেইনে মাদিত্ তঅ টেঙাগুন্ লুগেই রাগেয়োং। এইয়্যে চাহ্, তঅ জিনিস্‌‌‌‌চুন তরই আঘে।

²⁶ জোবত্ তা গিরোজ্‌সো তারে কলঅ, তুই পাজি আর আল্‌সি চাগর্! তুই দঅ হবর্ পেদে যিয়েনত্ মুই ন-লাগাং সিয়েনত্ কাবং আর যিয়েনত্ ন-ছিদোং সিয়েনত্ কুড়োং।

²⁷ ঠিগ্ আঘে, তর্ উচিত্ এলদে মঅ টেঙাগুন ব্যাংকত্ জমা রাগানা, আর মুই যেক্কে ফিরি এদুং সেক্কে সুদ সহ সিগুন লোই পারিদুং।

²⁸ ইক্কুনি, তুমি তাত্তুন্ টেঙাগুন্ লোইনে যিবের্ দশ আজার্ দীনার্ আগন্ তারে দুয়ো।

²⁹ যিবের্ আঘে তারে আরঅ দিয়্যে অবঅ আর সেক্কে তার্ বোউত্ অবাক্। মাত্তর্ যিবের্ নেই তার্ যিগুন্ আঘন্ সিগুন্অ তাত্তুন্ নেযা অবঅ।

³⁰ সে অকেজর্ চাগর্‌বোরে তুমি বারেদি আন্ধারত্ ফেলেই দুয়ো; সিধু মান্‌জ্যে কানাকুদি গুরিবাক্ আর যন্ত্রণায় দাত্ কামারানাত্ থেবাক্।

বেক্ জাদ্‌তুনোর বিচের্

³¹ মান্‌জ্য পুয়োবো বেক্ স্বর্গদূত্‌তুনোরে সমারে লোইনে যেক্কে নিজোর্ মহিমালোই এবঅ সেক্কে তে রাজা ইজেবে তা সিংহাসনত্ মহিমার্ লগে বুজিবো।

³² সে অক্তত্ বেক্ জাদর্ মানুচ্চুনোরে তা মুজুঙোত্ এক সমারে এগত্তর্ গরা অবঅ। গরগ্‌কুনে যেবাবোত্যে গুরি ভেড়া আর ছাগলুনোরে ফারগ্ গরন্ সেবাবোত্যেগুরি তে বেক্ মানুচ্চুনোরে দ্বি ভাগে যুদো গুরিবো।

³³ তে নিজোর্ ডেনেদি ভেড়াগুনোরে আর বাঙেদি ছাগলুনোরে রাগেব।

³⁴ ইয়েনর্ পরেদি রাজা তা ডেনেদি মানুচ্চুনোরে কবঅ, তুমি যিগুনে মঅ বাপ্পোর্ বর্ পেইয়ো, এজঅ। জগদর্ আরাম্ভত্ যে রেজ্যগান্ তমাত্তে যুক্কোল্ গুরি রাগা ওইয়্যে সিয়েনর্ অধিকারী অ।

³⁵ যেক্কে মর্ পেট্ পুজ্যে সেক্কে তুমি মরে হেবাত্তে দুয়ো; যেক্কে পানি তিরেস্ পেইয়্যে সেক্কে পানি দুয়ো; যেক্কে গর্বা ওইয়োং সেক্কে আশ্রয় দুয়ো;

³⁶ যেক্কে উত্যেবুত্যে এলুং সেক্কে কাবড়্ উরেই দুয়ো; যেক্কে অসুখ্ এলুং সেক্কে মরে দেগাশুনো গোজ্য; আর যেক্কে মুই জেলখানাত্ বন্দী অবস্থায় এলুং সেক্কে মরে চেবাত্তে যেয়ো।

³⁷ সেক্কে সেই গোজেন্‌ভক্ত মানুচ্চুনে জোবত্ তারে কবাক্, প্রভু, তর্ পেট পুরের্ দেগিনে কক্কে তরে হেবাত্তে দিয়্যেই বা পানি তিরেস্ পেইয়্যে দেগিনে পানি দিয়্যেই?

³⁸ কক্কে তরে গর্বা ইজেবে আশ্রয় দিয়্যেই, বা উত্যেবুত্যে দেগিনে কাবড়্ উরেয়্যেই?

³⁹ আর কক্কে বা তরে অসুগ্ বা জেলখানাত্ আগচ্ হবর্ পেইনে তইধু যেইয়্যেই?

⁴⁰ ইয়েনর্ জোবত্ রাজা সেক্কে তারারে কবঅ, মুই তমারে ঘেচ্চেকগুরি কঙর্, মর্ এই ভেইয়ুনো ভিদিরে সামান্য কনঅ একজনত্তে যেক্কে সিয়েন্ গোজ্য সেক্কে মত্তেই সিয়েন্ গোজ্য।

⁴¹ পরেদি তে তার্ বাঙেদি মানুচ্চুনোরে কবঅ, ও অভিশাব্ পেইয়্যে মানুচ্চুন্, মত্তুন্ তুমি দূর্ অ। শদান্ আর তা দূত্‌তুনোত্তে যে উমর কালর্ আগুন যুক্কোল্ গরা ওইয়্যে সিয়েন ভিদিরে যঅ।

⁴² যেক্কে মর্ পেট্ পুজ্যে সেক্কে তুমি মরে হেবাত্তে ন-দুয়ো; যেক্কে পানি তিরেস্ পেইয়্যে সেক্কে পানি ন-দুয়ো;

⁴³ যেক্কে গর্বা ওইয়োং সেক্কে আশ্রয় ন-দুয়ো; যেক্কে উত্যেবুত্যে এলুং সেক্কে মরে কাবড়্ উরেই ন-দুয়ো; যেক্কে অসুগ্ এলুং আর জেলখানাত্ বন্দী অবস্থাত্ এলুং সেক্কে মরে চেবাত্তে ন-যঅ।

⁴⁴ সেক্কে তারা তারে কবাক্, প্রভু, কক্কে তর্ পেট্ পুরের্ বা পানি তিরেস্ পেইয়্যে দেগিনে, বা গর্বা ওইয়োচ্ দেগিনে, বা উত্যেবুত্যে দেগিনে, বা অসুগ্ বা জেলখানাত্ আগচ্ হবর্ পেইনে সাহায্য ন-গুরিই?

⁴⁵ “জোবত্ তে তারারে কবঅ, ‘মুই তমারে ঘেচ্চেকগুরি কঙর্, তুমি যেক্কে এই সামান্য মানুচ্চুনো ভিদিরে কনঅ একজনত্তে সিয়েন্ ন-গরঅ সেক্কে সিয়েন্ মত্তেয়ো ন-গরঅ।’ ”

⁴⁶ সে পরেদি যীশু কলঅ, “এই মানুচ্চুন্ উমরত্তে সাজা পেবাক্, মাত্তর্ সেই গোজেন্ ভক্ত মানুচ্চুনে উমর জিংকানি ভোগ্ গুরিবাত্তে যেবাক্।”