মথি লেখ্যে গম্ হবর্ 24 - Chakma Bibleযুগোর্ শেজ্ দিনুন্ ( মার্ক ১৩:১-১৩ ; লূক ২১:৫-১৯ ) 1 যীশু উবোসনা-ঘরত্তুন্ নিগিলি যাল্লোই, এমন্ সময়োত্ তা শিচ্চ্যগুনে তারে উবোসনা-ঘরর্ বিল্ডিঙানি দেগেবাত্তে তাইধু এলাক্। 2 সেক্কে যীশু তারারে কলঅ, “তুমি দঅ ইয়েনি বেক্কানি দেগর্, মাত্তর্ মুই তমারে ঘেচ্চেকগুরি কঙর্, ইয়েনত্ এক্কো পাত্তর উগুরে আর এক্কো পাত্তর্ ন-থেবঅ; বেক্কুন্ ভাঙি ফেলা অবঅ।” 3 যীশু যেক্কেনে জৈতুন মুড়োবোত্ বুয়োই এলঅ সেক্কে শিচ্চ্যগুনে আন্দলে আন্দলে তাইধু এইনে কলাক্, “আমারে কঅ, কক্কে ইয়েনি ঘুদিবো আর কিবাবোত্যে চিহ্নোলোই বুঝো যেবঅ যে ইবেয়ই তর্ এবার্ সময় আর যুগ থুম্ অবার্ অক্ত ওইয়্যে?” 4 জোবত্ যীশু কলঅ, জাগি থাগঅ, কেঅ যেন তমারে ন-ঠগায়, 5 কিয়া ভালোক্জনে মঅ নাঙে এইনে কধা কবাক্, মুয়ই মশীহ, আর বোউত্ মান্জ্যরে ঠোগেবাক্। 6 তুমি যুদ্ধোর্ রঅ শুনিবাত্যে যর্ আর যুদ্ধোর্ হবরা-হবর্অ তুমি শুনিবা। মাত্তর্ উজিয়ার্! ইয়েন্দোই ন-দোরেয়ো, কিয়া ইয়েনি অবঅ; মাত্তর্ সেক্কেয়ো থুম্ নয়। 7 এক জাদে অন্য জাদর্ বিরুদ্ধে আর এক রেজ্য অন্য রেজ্যর্ বিরুদ্ধে যুদ্ধো গুরিবো। পত্তি জাগাত্ ভাদরাত্ আর ভূজোল্ অবঅ। 8 মাত্তর্ ইয়েনি বেক্কানি বানা যন্ত্রনার্ আরাম্ভ। 9 সে পরেদি তমারে বানি থবাক্ আর সাজা দিবাত্যে ধুরিবাক্ আর তমারে খুন্ গুরিবাক্। মত্তে বেক্ মানুচ্চুনে তমারে ঘিনেবাক্। 10 সে অক্তত্ ভালোক্জনে পিজেদি যেবাক্ আর একজন আর একজনরে ধুরি দিবাক্ আর ঘিনেবাক্। 11 বোউত্ ফক্কর্ ভাববাদী এইনে ভালোক্ জনরে ঠোগেবাক্। 12 পাজি কামানি বাড়িবো বিলি ভালোক্ জনর্ কোচ্পানা অমকদ কুমি যেবঅ। 13 মাত্তর্ যে থুম্ সং থির্ থেবঅ তে উদ্ধোর্ পেবঅ। 14 বেক্ জাদ ইধু সাক্ষি দিবাত্তে স্বর্গ-রেজ্যর্ গম্ হবর্ গোদা পিত্থিমীত্ ফগদাং গরা অবঅ আর সে পরেদি শেজ্ সময় আজির্ অবঅ। শেজ্ দিনোত্ অমকদ দুঘ্ ( মার্ক ১৩:১৪-২৩ ; লূক ২১:২০-২৪ ) 15 ভাববাদী দানিয়েল মাধ্যমে যে সর্বনাজ ঘিনাইদ্যে জিনিজোর্ কধা কুয়ো ওইয়্যে সিয়েন্ তুমি পবিত্র জাগাত্ থুয়ো ওইয়্যে দেগিবা। (যে পড়ে তে বুঝোক্।) 16 সে অক্তত্ যিগুনে যিহূদিয়াত্ থেবাক্ তারা মুড়োমুড়ি চাগালাত্ ধেই যাদোক্। 17 যে ছাল উগুরে থেবঅ তে ঘরত্তুন্ পযাপিরা নিবাত্তে তলে ন-লামোক্। 18 খেদ ভিদিরে যে থেবঅ তে তার্ কিয়্যের্ কাবড়ান্ নিবাত্তে ন-ফিরোক্। 19 সেক্কে যিগুনে পিদিলী আর যিগুনে চিগোন্ গুরোরে বুগো দুধ হাবান্ তারার্ অবস্থা কিবাবোত্যে অবঅ! 20 গোজেন ইধু তবনা গরঅ যেন জার্কাল্যে বা জিরেবার্ দিনোত্ তমাত্তুন্ ধেইযা ন-পড়ে! 21 সেক্কে এমন্ দুঘ্ অবঅ যিয়েন্ জগদর্ আরাম্ভত্তুন্ ধুরি এ সময়ান সং কনদিন্অ ন-অয় আর নয়ো অবঅ। 22 মাত্তর্ সেই দুঘোর্ দিনুন্ যুনি গোজেনে কোমেই ন-দিদো সালে কনজনে ন-বাঁজিদাক্। মাত্তর্ তার্ বেঈ লোইয়্যে মানুচ্চুনোত্তে গোজেনে সেই দিনুন্ কোমেই দিবো। 23 সে অক্তত্ যুনি কেঅ তমারে কন্, চঅ, মশীহ ইয়েনত্ বা চঅ, মশীহ উবোনত্, সালে সিয়েন্ বিশ্বেজ্ ন-গোজ্য; 24 সেনত্যে সেক্কে বোউত্ ফক্কর্ মশীহ আর ফক্কর্ ভাববাদী এবাক্ আর আমক্ অবার্ চিহ্নো কাম্ গুরিবাক্ যেন সম্ভব অলে গোজেনর্ বেঈ লোইয়্যে মানুচ্চুনোরেয়ো তারা ঠোগেই পারন্। 25 শুনো, মুই আগেদি তমারে ইয়েনি বেক্কানি কোই রাগেলুং। 26 সেনত্তে মান্জ্যে যুনি তমারে কন্, তে ধূল্যেচর-চাগালাত্ আঘে, তুমি বারেদি ন-যেয়ো। যুনি কন্, তে ভিদিরে ঘরত্ আঘে, বিশ্বেজ্ ন-গোজ্য। 27 দেবা ঝিমিলেনি যেবাবোত্যেগুরি পূগেদি দেগা দিইনে পোজিমেদি সং ঝিমিলায় মান্জ্য পুয়োবোর্ এজানায়ো সেবাবোত্যে অবঅ। 28 যিয়েনত্ মরা কিয়্যে থেবঅ সিয়েনত্ শকুনুনে এইনে এক সমারে থুবেবাক্। মান্জ্য পুয়োবো যেবাবোত্যেগুরি এবঅ ( মার্ক ১৩:২৪-৩১ ; লূক ২১:২৫-৩৩ ) 29 সেই সময়োত্ দুঘোর্ ঠিগ্ পরেদি বেলান্ আন্ধার্ ওই যেবঅ, চানানে আর পহর্ ন-দিবো, তারাগুন্ আগাজত্তুন্ খুয়োই পড়িবাক্ আর চানান্-বেলান্-তারাগুন্ আর থির্ ন-থেবাক্। 30 এমন্ সময়োত্ আগাজত্ মান্জ্য পুয়োবোর্ চিহ্নো দেগা দিবো। সেক্কে পিত্থিমীর্ বেক্ মানুচ্চুনে দুঘে বুগ্ চাবেড়েবাক্। তারা মান্জ্য পুয়োবোরে খেমতা আর মহিমার লগে মেঘ ভিদিরে এত্তে দেগিবাক্। 31 দাঙর্ দাঙর্ গুরি তূরী বাঁজি উদিবো আর সমারে সমারে মান্জ্য পুয়োবো তা স্বর্গদূত্তুনোরে চেরোকিত্তেত্তুন্ পাধেই দিবো। সেই দূত্তুনে পিত্থিমীর এক কিত্তেত্তুন্ ধুরি অন্য কিত্তেদি সং চেরোকিত্তেত্তুন্ তার বেঈ লোইয়্যে মানুচ্চুনোরে এক সমারে থুবেবাক্। 32 ডোমোর্ গাজ্ দেগিনে শিক্ষ্যে লঅ। যেক্কে তা ডেলাগুন্ নরম ওইনে সিগুনোত্ পাদা নিগিলে সেক্কে তুমি কোই পারিবা যে খরান্কাল্ কায়কুরে লুম্মেগি। 33 সেবাবোত্যেগুরি তুমি এই বেক্ ঘটনাগানি দেগানার্ পরেদি তুমি বুঝি পারিবা যে সময়ান কায়কুরে লুম্মেগি, এন্ কি, দোরানত্ লুম্মেগি। 34 মুই তমারে ঘেচ্চেক্গুরি কঙর্, যেক্কে ইয়েনি অবঅ সেক্কেয়ো এই কালর্ কিজু মানুচ্ বাঁজি থেবাক্। 35 আগাজ্ আর পিত্থিমীগান্ শেজ্ অবঅ, মাত্তর্ মঅ কধানি উমরত্তে থেবঅ। মান্জ্য পুয়োবো কক্কে এবঅ ( মার্ক ১৩:৩২-৩৭ ; লূক ১৭:২৬-৩০ , ৩৪-৩৬ ) 36 সেই দিন্নো আর সেই সময়বোর্ কধা কেঅ হবর্ ন-পায়, স্বর্গর্ দূত্তুনেয়ো ন-পান্, পুয়োবোয়ো ন-পায়; বানা স্বর্গীয় বাবা হবর্ পায়। 37 নোহ সময়োত্ যে অবস্থা ওইয়্যে মান্জ্য পুয়োবোর্ এবার্ অক্তত্ অ ঠিগ্ সেই অবস্থা অবঅ। 38 পানিবান্ অবার্ আগেদি দিনুনোত্ নোহ জাহাজত্ ন-সমানা সং মান্জ্যে হানা-দানা গোজ্যন্, মিলে-মরদে লোলি গোজ্যন্। 39 যেদক্ বিলোন্ সং বান পানিগান্ এইনে তারারে বেক্কুনোরে ভাজেই ন-নেযেল সেদক্ বিলোন্ সং তারা কিচ্চু বুঝি ন-পারিলাক্। মান্জ্য পুয়োবোর্ এজানাগান ঠিগ্ সেবাবোত্যে অবঅ। 40 সেক্কে দ্বিজন্ মানুচ্ মাদত্ কাম গুরিবাক্; একজনরে নেযা অবঅ আর একজনরে ফেলেই যাহ্ অবঅ। 41 দ্বিজন্ মিলেই মেশিন্ ঘুরেবাক্; একজনরে নেযা অবঅ, অন্যজনরে ফেলেই যাহ্ অবঅ। 42 তুমি সজাগ্ থাগঅ, কিয়া তমা জিংকানির গিরোজ্সো কমলে এবঅ সিয়েন্ তুমি হবর্ ন-পঅ। 43 ঘর গিরোজ্সো যুনি হবর্ পেদঅ কন্ সময় চুর্ এবঅ সালে তে জাগি থেদঅ, নিজো ঘরত্ তে চুর্ সোমেবাত্তে ন-দিদো। 44 সেনত্তে তুমিয়ো হামাক্কায় যুক্কোল্ থাগঅ, কিয়া যে সময়ানর্ কধা তুমি আজায়ো ন-গরঅ সেই সময়ানত্ মান্জ্য পুয়োবো এবঅ। বিশ্বেজি অনার্ উপদেজ্ ( লূক ১২:৪১-৪৮ ) 45 সেই বিশ্বেজি আর বুদ্ধিবলা চাগর্বো কন্না, যিবেরে তা গিরোজ্সো তার্ অন্য চাগরুনোরে ঠিগ্ সময়োত্ হানা দিবাত্তে কামর্ ভারান্ দিয়্যে? 46 সেই চাগর্বো বর্পেইয়্যে, যিবেরে তা গিরোজ্সো তোগেইনে পেইয়্যে আর ঘরত্ এইনে কাম্ গত্তে দেগিবো। 47 মুই তমারে ঘেচ্চেক্গুরি কঙর্, তে সেই চাগর্বোরে তার বেক্ সোম্বোত্তিগানির্ কামর্ ভারান্ দিবো। 48 মাত্তর্ যুনি সেই চাগর্বো পাজি, তে নিজে মনে মনে কয়, মঅ গিরোজ্সো ফিরি এত্তে বোউত্ দেরি অবঅ । 49 সে জুবোত্ তে তার্ সমাজ্যে-চাগরুনোরে মার্পিট্ গরানা আরাম্ভ গুরিলো আর মাত্তলুনো সমারে মদ হা ধুরিলো। 50 মাত্তর্ যেদিন্নো আর যে অক্তবোর্ কধা সেই চাগর্বো আজায়ো ন-গরে, নয়ো জানিবো, সেদিন্যে আর সে সময়োত্ তা গিরোজ্সো এইনে আজির্ অবঅ। 51 সেক্কে তে তারে কাবিনে দি'কট্টা গুরি ফক্করুনো সমারে তা জাগায়ান্ ঠিগ্ গুরিবো। সিয়েনত্ মানুচ্চুনে কানাকুদি গুরিবাক্ আর যন্ত্রণালোই দাত্ কামেরেবাক্। |
Copyright © 2021 Bangladesh Bible Society
Bangladesh Bible Society