মথি লেখ্যে গম্ হবর্ 22 - Chakma Bible

মেলা হানার্ হিত্ত্য

¹ শিক্ষ্যে দিবাত্তে যীশু আরঅ সেই মানুচ্চুনো ইধু এ হিত্ত্যবো কলঅ,

² স্বর্গ-রেজ্যগান্ এমন্ এক্কো রাজা ধোক্ক্যেন্ যিবে তার্ পুয়োবো মেলাত্ হানা যুক্কোল্ গুরিলো।

³ সেই মেলানত্ বাত্ত্যেয়ে মানুচ্চুনোরে ডাগিবাত্তে তে তা চাগর্‌বোরে পাধেই দিলো, মাত্তর্ তারা এবাত্তে ন-চেলাক্।

⁴ সেক্কে তে আরঅ অন্য চাগরুনোরে দিইনে বাত্ত্যেয়্যেগুনোরে কোই পাধেল, চঅ, মুই মঅ বলদ্ আর পক্তামক্তা ছঅগুনোরে কাবিনে হানা যুক্কোল্ গোজ্যং। ইক্কিনে বেক্কানি যুক্কোল্, তুমি হানাত্ এজঅ।

⁵ মাত্তর্ বোলেয়্যে মানুচ্চুনে সেই চাগরুনোর কধা ন-শুনিনে তারা যার্ যার্ কামত্ গেলাক্: একজনে খামারত্ গেলঅ, আর একজনে মাল্ গুদোমত্ গেলঅ,

⁶ বাদ্‌‌‌বাগি বেক্কুনে রাজার চাগরুনোরে ধুরিনে অগমান গুরিলাক্ আর মারে ফেলেলাক্।

⁷ সেক্কে রাজার অমকদ রাগ্ উদিলো; সেনত্যে তে সৈন্য পাধেইনে সেই খুনীগুনোরে মারে ফেলেল আর তারা শঅরান্ পুড়ি দিলাক্।

⁸ পরেদি তে তার্ চাগরুনোরে ডাগিনে কলঅ, মেলার্ হানা যুক্কোল্, মাত্তর্ যিগুনোরে মুই বাত্যেয়োং তারা ইয়েনর্ যগাজ্যে নয়।

⁹ ইক্কিনে তুমি দাঙর্ পধত্ যঅ, আর যেদক্ জনর্ দেগা পঅ বেক্কুনোরে মেলার্ হানাত্ ডাগি আনঅ।

¹⁰ সেক্কেনে সেই চাগরুনে বারেদি পধত্ যেইনে গম্-বজং যিগুনোরে পেলাক্ বেক্কুনোরে ডাগি আনিলাক্। সেক্কে মেলা-ঘরান্ সেই গর্বালোই ভুরি গেলঅ।

¹¹ “ইয়েনর্ পরেদি রাজা গর্বাগুনোরে চেবাত্তে ভিদিরে এইনে চেলঅ,

¹² এক্কো মানুচ্ মেলা কাবড়্ ন-পিনিনে সিধু এচ্চ্যে। রাজা তারে পুযোর্ গুরিলো, ‘সমাজ্যেবো, মেলা কাবড়্ ন-পিনিনে কেধোক্ক্যেন্ গুরি ইধু সুমিলে?’ তে ইয়েনর্ কনঅ জোব্ দি ন-পারিলো।

¹³ সেক্কে রাজা চাগরুনোরে কলঅ, ‘ইবের্ আঢ্-টেঙানি বানিনে বারেদি আন্ধারত্ ফেলেই দুয়ো। সেই জাগানত্ মান্‌জ্যে কানাকুদি গুরিবাক্ আর যন্ত্রণালোই দাত্ কামেরেবাক্।’ ”

¹⁴ হিত্ত্যবোর্ শেজদি যীশু কলঅ, “ইয়েনত্তে কং, বোউত্ মান্‌জ্যরে ডাগা ওইয়্যে মাত্তর্ কম্ মান্‌জ্যরে বেঈ নেযা ওইয়্যে।”

খাজানা দেনা পৌইদ্যেনে

¹⁵ সেক্কে ফরীশীগুনে গেলাক্কোই আর কেধোক্ক্যেন্ গুরি যীশুরে তা কধা ফালত্ ফেলা যায় সে সল্লাগান্ গরা ধুরিলাক্।

¹⁶ তারা হেরোদ দলর্ কয়েক্কো মান্‌জ্য লগে নিজোর্ কয়েক্কো শিচ্চ্যরে যীশু ইধু পাধেলাক। তারা যীশুরে কলাক্, “মাষ্টরবাবু, আমি হবর্ পেই তুই এক্কো গম্ মানুচ্। গোজেন পথ্‌তান পৌইদ্যেনে তুই সত্য শিক্ষ্যে দি থাচ্। মান্‌জ্যে কি মনে গুরিবাক্ ন-গুরিবাক্ সিয়েনিলোই তর্ কি অয়, কিয়া তুই কারঅ মু চেইনে কিচ্ছু ন-গরচ্।

¹⁷ সালে তুই কঅ, মোশির রীতি-সুদোম মজিম্ রোম-সম্রাটরে কি খাজানা দিয়্যে পড়ে? তর্ কি মনে অয়?”

¹⁸ তারার্ ভান্ন্যেই উদ্দেচ্চ্য বুঝি পারিনে যীশু কলঅ, “ভণ্ডগুন্, তুমি কিত্তেই মরে যগা চর্?

¹⁹ যে টেঙাগুন্ খাজানা দিবা সিত্তুন্ এক্কো মরে দেগঅ।” তারা এক্কো দীনার্ যীশু ইধু আনিলাক্।

²⁰ সেক্কে যীশু তারারে কলঅ, “ইবে উগুরে এ ফটুবো আর নাঙান্ কার্?”

²¹ তারা কলাক্, “রোম-সম্রাটর্।” যীশু তারারে কলঅ, “সালে যিবে সম্রাটর্ সিবে সম্রাটরে দুয়ো, আর যিবে গোজেনর্ সিবে গোজেনরে দুয়ো।”

²² এ কধাগান্ শুনিনে তারা আমক্ অলাক্ আর তারে ফেলেই গেলাক্।

জেদা ওই উদোনা পৌইদ্যেনে

²³ সেদিন্নোত্ কয়েক্কো সদ্দূকী যীশু ইধু এলাক্। সদ্দূকিগুনো সুদোমে মরাগুনোর্ জেদা ওই উদোনা বিলি কিচ্ছু নেই।

²⁴ ইয়েনত্তে তারা যীশুরে পুজোর্ গুরিলাক্, “মাষ্টরবাবু, মোশি কোইয়্যেদে, যুনি কনঅ মানুচ্ পুয়ো-ছা নেই গুরি মুরি যায় সালে তা ভেইবো তা মোক্কোরে লোইনে ভেইয়োর্ ওইনে তা বংশবো রোক্ষ্যে গুরিবো।

²⁵ ইক্কিনে আমা ইধু সাত্ ভেই বজত্তি গরন্। পত্তম্ ভেইবো মোগ্ লোইনে পুয়ো-ছা নেইয়্যে গুরি মুরি গেলঅ, সেনত্যে তে তা মোক্কোরে নিজো ভেইয়োত্যে থোই গেলঅ।

²⁶ এবাবোত্যেগুরি দ্বিলম্বর্ ভেইবো, তিন লম্বর্ ভেইবো আর সাত লম্বর্ ভেইবো সং সেই মিলেবোরে ললাক্।

²⁷ যেরেদি সেই মিলেবোয়ো মুরি গেলঅ।

²⁸ ইক্কিনে, মরাগুনে যেক্কে জেদা ওই উদিবাক্ সেক্কে সেই সাত্ ভেইয়ো ভিদিরে এ মিলেবো কার্ মোগ্ অবঅ? তারা বেক্কুনে দঅ তারে লোইয়োন।”

²⁹ যীশু তারারে কলঅ, “তুমি ভুল্ গরর্, কিয়া তুমি পবিত্র বোইয়ো ন-জানঅ, গোজেন খেমতার্ পৌইদ্যেনেয়ো ন-জানঅ।

³⁰ যেক্কেনে মরাগুনে জেদা ওই উদিবাক্, তারা মেলা ন-গুরিবাক্ আর তারা স্বর্গদূদো ধোক্ক্যেন্ অবাক্।

³¹ মরাগুনোর্ জেদা ওই উদোনা পৌইদ্যেনে গোজেনে যে কধাগান্ তমারে কোইয়্যে সে কধাগান্ কি তুমি বোইয়োত্ ন-পড়?

³² সিয়েনত্ লেগা আঘে, ‘মুই অব্রাহামর্ গোজেন, ইস্‌হাকর্ গোজেন আর যাকোবর্ গোজেন।’ মাত্তর্ গোজেনে দঅ মরাগুনোর্ গোজেন নয়, তে জেদাগুনোর্ গোজেন।”

³³ এ কধাগান্ শুনিনে মানুচ্চুনে তা শিক্ষ্যেলোই আমক্ অলাক্।

বেগত্তুন্ দাঙর্ উগুম

³⁴ যীশু সদ্দূকীগুনোর্ মুয়োন্ নাঢি দিয়্যে শুনিনে ফরীশীগুনে এগত্তর্ অলাক্।

³⁵ তারা ভিদিরে এক্কো ধর্ম-মাষ্টর্ যীশুরে যগা চেবাত্তে পুযোর্ গুরিলো,

³⁶ “মাষ্টর বাবু, মোশির রীতি-সুদোম ভিদিরে বেগত্তুন্ দাঙর্ উগুম কুবোন্?”

^37-38 যীশু তারে কলঅ, “বেগত্তুন্ দাঙর্ আর বেগত্তুন্ দরকারী উগুম অলঅ, ‘তুমি পত্তিজনে তমার্ রিবেঙান্, পরাণান্ আর বেক্ মনান্দোই তমা প্রভু গোজেনরে কোচ্‌পেবা।’

³⁹ সে পরেদি দরকারী উগুমান্ পত্তমান ধোক্ক্যেন্- ‘তমা পাড়াল্যেগুনোরে নিজো ধোক্ক্যেন্ কোচ্‌পেবা।’

⁴⁰ মোশির বেক্ রীতি-সুদোমানি আর ভাববাদীগুনোর্ বেক্ শিক্ষ্যেনি এ দ্বিয়েন্ উগুমো উগুরে নির্ভর গুরি আঘে।”

ধর্ম-মাষ্টরুনো ইধু প্রভু যীশুর প্রশ্ন

⁴¹ ফরীশীগুনে সেক্কেয়ো একসমারে এলাক্, এন্ সময়োত্ যীশু তারারে পুযোর্ গুরিলো,

⁴² “তুমি মশীহ পৌইদ্যেনে কি মনে গরঅ? তে কাহ্ বংশধর্?” তারা কলাক্, “তে দায়ূদ বংশধর্।”

⁴³ সেক্কে যীশু তারারে কলঅ, “সালে দায়ূদে কেধোক্ক্যেন্ গুরি মশীহরে পবিত্র আত্মার্ পরিচালনায় প্রভু বিলি ডাক্যে? তে কোইয়্যেদে,

⁴⁴ ‘লগেপ্রভু মঅ প্রভুরে কোইয়্যেদে, যেদক্ষণ্ সং মুই তঅ শত্রুগুনোরে তঅ টেঙত্ তলে ন-রাগাং, সেদক্ষণ্ সং তুই মঅ ডেনেদি বস্।’

⁴⁵ সালে দায়ূদে যেক্কে মশীহরে প্রভু বিলি ডাক্যে সেক্কে মশীহ কেধোক্ক্যেন্ গুরি দায়ূদ বংশধর্ ওই পারে?”

⁴⁶ ইয়েনর্ জোবত্ কেঅ এক্কান্ কধায়ো তারে কোই ন-পারিলাক্ আর সেদিন্ন্যেত্তুন্ ধুরি কেঅ তারে আর কিচ্ছু পুযোর্ গুরিবাত্তেয়ো সাহস ন-গুরিলাক্।