মথি লেখ্যে গম্ হবর্ 21 - Chakma Bible

যিরূশালেমত্ সমানা

¹ যীশু আর তা শিচ্চ্যগুনে যিরূশালেম কায়-কুরে লুমিনে জৈতুন্ মুড়োবো উগুরে বৈৎফগী আদাম ইধু এলাক্,

² “এ শিক্ষ্যে মজিম তুমি সেই মুজুঙেদি আদামানত্ যঅ। সিদু গেলে দেগিবাদে এক্কো গাদা বান্যে আঘে আর এক্কো ছয়ো তা লগে আঘে। সেই দ্বিবে খুলিনে ইধু আনঅ।

³ কনজনে যুনি কিজু কন্ সালে কোয়ো, ‘প্রভুর দরকার্ আঘে।’ পরেদি তে সিবেরে যাদিমাদি ফিরেই দিবো।”

⁴ ইয়েন্ অলঅ যেন ভাববাদীর্ মাধ্যমে এই যে কধানি কুয়ো ওইয়্যে সিয়েনি পূরোণ অয়:

⁵ “তুমি সিয়োন ঝিবোরে কঅ, তঅ রাজাবো তইধু এজের্। তে চিদে। তে গাধা উগুরে, গাধী ছঅ উগুরে চড়িনে এজের্।”

⁶ যীশু সে শিচ্চ্যগুনোরে যেবাবোত্যে উগুম দিয়্যে তারা যেইনে সেবাবোত্যে গুরিলাক্।

⁷ তারা সেই গাধা আর গাধী ছবুয়ো আনিনে তারা উগুরে নিজোর্ কিয়্যে কাবড়ানি বিজেই দেনার্ পরেদি যীশু বজিলো।

⁸ বোউত্ মান্‌জ্যে পধ উগুরে তারার্ কিয়্যের্ কাবড়ানি বিজেই দিলাক্। অন্যগুনে গাজ ডেলা কাবিনে পধ উগুরে ছিদি দিলাক্।

⁹ যিগুনে যীশু মুজুঙোত্ আর পিজেদি যাদন্ তারা রঅ ছাড়িনে কুয়ো ধুরিলাক্, “হোশান্না, দায়ূদো গুট্টি! প্রভুর্ নাঙে যিবে এজের্ তার্ বাঈনী ওক্। স্বর্গত্অ হোশান্না!”

¹⁰ যীশু যিরূশালেমত্ সমানার্ পরেদি গোদা শঅরানত্ রঅ রঅ সঅ সঅ পড়ি গেলঅ। বেক্কুনে পুযোর্ গরা ধুরিলাক্, “ইবে কন্না?”

¹¹ মানুচ্চুনে কলাক্, “তে গালীলোর্ নাসরত্ আদামর্ ভাববাদী যীশু।”

উবোসনা-ঘরত্ প্রভু যীশু

¹² পরেদি যীশু উবোসনা-ঘরত্ সোমেল আর সিয়েনত্ যিগুনে বেজা-কিনে গত্তন্ তারারে বেক্কুনোরে ধাবেই দিলো। তে টেঙা বদলেদে মানুচ্চুনোর্ টেবিলানি আর যিগুনে কোদোর্ বেজদন্ তারার্ বুজিবার জাগায়ান্ উল্ল্যে দিইনে কলঅ,

¹³ “পবিত্র বোইবোত্ গোজেনে কোইয়্যেদে, ‘মঅ উবোসনা ঘরানরে তবনার্ ঘর কুয়ো অবঅ,’ মাত্তর্ তুমি ইয়েনরে ডাগেদর্ আড্ডাজাগা বানেয়ো।”

¹⁴ ইয়েনর্ পরেদি কান্ আর লেং মানুচ্চুনে উবোসনা-ঘরত্ যীশু ইধু এলঅ, আর তে তারারে গম্ গুরিলো।

¹⁵ তে যেদক্কানি আমক্ অবার্ কাম্ গোজ্যে আজল্ ধর্মগুরুগুনে আর ধর্ম-মাষ্টরুনে সিয়েনি দেগিলাক্। তারা উবোসনা-ঘর ভিদিরে চিগোন্ গুরোগুনে রঅ ছাড়িনে কদে শুনিলাক্, “হোশান্না, দায়ূদো গুট্টি!”

¹⁶ ইয়েনি দেগিনে-শুনিনে তারা বিরক্ত ওইনে যীশুরে কলাক্, “তারা যিয়েন কদন্ সিয়েন তুই শুনোর্?” যীশু তারারে কলঅ, “অয়, শুনোঙর্। বোইয়োত্ তুমি কি কনদিন্অ ন-পড়: চিগোন্ পুয়ো-ঝি আর চিগোন্ চিজিগুনো কধানি ভিদিরে তুই নিজোত্তে বাঈনী গুরিবার্ বেবস্থা গোজ্যস্?”

¹⁷ ইয়েনর্ পরেদি যীশু তারারে ফেলেইনে শঅরর্ বারেদি বৈথনিয়া আদামত্ গেলঅ আর সিধু রেত্‌টো কাদেল।

ডোমোর্ গাজ্‌সো

¹⁸ তার্ কেল্যে বেন্যে শঅরত্ ফিরি এবার্ অক্তত্ যীশুর পেট্ পুড়িলো।

¹⁹ পধ পাজারাত্ এক্কো ডোমোর্ গাজ্ দেগিনে তে গাজ্‌সো ইধু গেলঅ, মাত্তর্ সিবেত্ পাদা বাদে আর কিচ্চু ন-দেগিলো। সেক্কে তে গাজ্‌সোরে কলঅ, “আর কনদিন্অ তইধু গুলোগুলি ন-ধোরোদোক্।” আর সেক্কে ডোমোর্ গাজ্‌সো শুগেই গেলঅ।

²⁰ শিচ্চ্যগুনে সিয়েন্ দেগিনে আমক্ ওইনে কলাক্, “ডোমোর্ গাজ্‌সো এদক্ যাদিমাদি কেধোক্ক্যেন্ গুরি শুগেই গেলঅ?”

²¹ জোবত্ যীশু তারারে কলঅ, “মুই তমারে ঘেচ্চেকগুরি কঙর্, তুমি সন্দেহ ন গুরিনে যুনি বিশ্বেজ্ গরঅ সালে ডোমোর্ গাজ্‌সো উগুরে মুই যিয়েন্ গোজ্যং তুমিয়ো সিয়েন্ গুরি পারিবা। বানা সিয়েন নয়, মাত্তর্ যুনি এই মুড়োবোরে কঅ, ‘উদিনে সাগরত্ যেইনে পড়্,’ সালে সিয়েন্অ অবঅ।

²² তুমি যুনি বিশ্বেজ্ গুরিনে তবনা গরঅ সালে তুমি যিয়েন্ চেবা সিয়েনই পেবা।”

প্রভু যীশু আর ধর্ম-নেতাগুন

²³ যীশু উবোসনা-ঘরত্ ফিরি গেলঅ। যেক্কে তে সিয়েনত্ শিক্ষ্যে দের্ সেক্কে আজল্ ধর্মগুরুগুনে আর যিহূদীগুনোর্ বুড়ো নেতাগুনে তাইধু এইনে পুযোর্ গুরিলাক্, “তুই কন্ অধিকারে ইয়েনি গরর্? কন্না তরে এই অধিকারান্ দিয়্যে?”

²⁴ যীশু তারারে কলঅ, “মুইয়ো তমারে এক্কান্ কধা পুযোর্ গুরিম। তুমি যুনি মরে সিয়েনর্ জোব্ দি পারঅ সালে মুইয়ো তমারে কোম্ মুই কন্ অধিকারে ইয়েনি গরঙর্।

²⁵ কদে চাং, বাপ্তিস্ম দেনার্ অধিকারান্ যোহনে কুত্তুন্ পেইয়্যে? গোজেনত্তুন্, না মান্‌জ্যত্তুন্?” সেক্কে তারা নিজো ভিদিরে এ তেম্মাঙান্ গুরিলাক্, “আমি যুনি কোই, ‘গোজেনত্তুন্,’ সালে তে আমারে কবঅ, ‘সালে কিত্তে তুমি যোহনরে বিশ্বেজ্ ন-গরঅ?’

²⁶ মাত্তর্ যুনি কোই, ‘মান্‌জ্যত্তুন্,’ সালে মানুচ্চুনোত্তুন্ আমার দর্ আঘে কক্কে কি গরন্, কিত্তে যোহনরে বেক্কুনে ভাববাদী বিলি মনে গুরিদাক্।”

²⁷ ইয়েনত্তে জোবত্ তারা যীশুরে কলাক্, “আমি হবর্ ন-পেই।” সেক্কে যীশু তারারে কলঅ, “সালে মুইয়ো তমারে ন-কোম্ মুই কন্ অধিকারে ইয়েনি গরঙর্।”

দ্বিবে পুয়োর্ কিত্ত্য

²⁸ সে পরেদি যীশু কলঅ, “আচ্ছা, তুমি কি মনে গরঅ? ধোজ্জ্য, এক্কো মান্‌জ্যর্ দ্বিবে পুয়ো এলঅ। মানুচ্চো তার্ দাঙর্ পুয়োবো ইধু যেইনে কলঅ, ‘এইচ্চ্যে তুই আংগুর খেদত্ যেইনে কাম্ গর্।’

²⁹ জোবত্ পুয়োবো কলঅ, ‘মুই ন-যেম্।’ মাত্তর্ পরেদি তে মনান্ ফিরেইনে কামত্ গেলঅ।

³⁰ মানুচ্চো পরেদি অন্য পুয়োবো ইধু যেইনে সেই একই কধা কলঅ। অন্য পুয়োবো জোবত্ কলঅ, ‘মুই যাঙর্,’ মাত্তর্ ন-গেলঅ।

³¹ এই দ্বিজন ভিদিরে কন্না বাব আওজ্‌চান পালন গল্ল?” সেক্কে ধর্ম-নেতাগুনে জোব্ দিলাক্, “পত্তম্ মানুচ্চো।” যীশু তারারে কলঅ, মুই তমারে ঘেচ্চেকগুরি কঙর্, খাজানা-দিয়্যেগুনে আর বেশ্যেগুনে তমা আগেদি গোজেন রেজ্যত্ সমদন্,

³² কিয়া যোহনে গোজেনর্ আওজ্ মজিম আঢিবার্ পথ্‌তান দেগেবাত্তে তমা ইধু এইচ্চ্যে, আর তুমি তারে বিশ্বেজ্ ন-গরঅ। মাত্তর্ খাজানা-তুলিয়্যেগুনে আর বেশ্যেগুনে তারে বিশ্বেজ্ গোজ্যন্। ইয়েন্ দেগিনেয়ো তুমি মনানি ফিরেইনে তারে বিশ্বেজ্ ন-গরঅ।

আংগুর খেদ চাষাবলা গুনোর কিত্ত্য

³³ “যীশু কলঅ, আর এক্কান্ উপমা দুয়োং, শুনো। এক্কো ভূইয়ো গিরোজে এক্কান্ আংগুর খেত্ গুরিনে সিয়েনর্ চেরোকিত্তে ঘিরি দিলো। পরেদি সেই খেদ ভিদিরে আংগুর-রস বানেবাত্তে গাঢ্ খুড়িলো আর এক্কান্ অজল্ চুগিদার ঘর বানেল। ইয়েনর্ পরেদি তে কয়েক্কো চাষাবলা ইধু সেই আংগুর খেদ্‌তান বাগা দিইনে বিদেশত্ গেলঅ।

³⁴ যেক্কে আংগুরুন পাগিবার্ অক্ত ওই এলঅ সেক্কে তে সেই আংগুরোর্ ভাগ্‌কুন আনিবাত্তে তা চাগরুনোরে সেই চাষাবলাগুনো ইধু পাধেই দিলো।

³⁵ চাষাবলাগুনে তা চাগরুনোত্তুন্ একজনরে ধুরিনে মারিলাক্, একজনরে খুন্ গুরিলাক্ আর অন্য আর একজনরে পাত্তর্ মারিলাক্।

³⁶ পরেদি তে পৌইল্যাত্তুন্ আরঅ বেশ্ অন্য চাগর্ পাধেই দিলো, মাত্তর্ চাষাবলাগুনে সে চাগরুনো সমারে আগ ধোক্ক্যেন্ বেবহার গুরিলাক্।

³⁷ আংগুর খেদ গিরোজ্‌সো বেগ যেরেদি নিজো পুয়োবোরে তারা ইধু পাধেল। তে ভাবিলোদে, তারা অন্তত: তা পুয়োবোরে সর্মান গুরিবাক্।

³⁸ মাত্তর্ সেই চাষাবলাগুনে পুয়োবোরে দেগিনে নিজো ভিদিরে কুয়ো-কি গুরিলাক্, ‘ইবেই দঅ সোম্বোত্তির্ গিরোজ পুয়োবো। যেই, আমি তারে মারে ফেলেই, সেক্কে আমি সোম্বোত্তির্ গিরোজ্ অবং।’

³⁹ সেক্কে তারা সেই পুয়োবোরে ধুরিনে আংগুর খেদত্তুন্ বারেদি নেযেইনে মারে ফেলেলাক্।

⁴⁰ সালে কদে চাং, আংগুর খেদ গিরোজ্‌সো যেক্কে নিজে এবঅ সেক্কে তে সেই চাষাবলাগুনোরে কি গুরিবো?”

⁴¹ সেই ধর্ম-নেতাগুনে যীশুরে কলাক্, “তে সেই পাজি মানুচ্চুনোরে এক্কুবারে ভস্ত গুরিবো আর যে চাষাবলাগুনে তারে সময় মজিম্ ফসলর্ ভাগ্ দিবাক্ তারা ইধু সেই আংগুর খেদ্‌তান বাগা দিবো।”

⁴² সেক্কে যীশু তারারে কলঅ, “তুমি কি পবিত্র বোইয়ো ভিদিরে কনদিন্অ ন-পড়অ, ‘রাজমিস্ত্রিগুনে যে পাত্তর্‌বো বাদ্ দুয়োন্, সিবেই বেগত্তুন্ দরকারী পাত্তর্ ওই উদিলো; প্রভুই ইয়েন্ গুরিলো, আর সিয়েন্ আমা চোগোত্ অমকদ আমক্ লাগে’?

⁴³ ইয়েনত্তে তমারে কঙর্, গোজেন রেজ্যগান্ তমাত্তুন্ নেযা অবঅ আর এমন্ মানুচ্চুনোরে দিয়্যে অবঅ যিগুনো জিংকানিত্ সেই রেজ্যর্ যগাজ্যে ফল দেগা যেবঅ।

⁴⁴ যে এই পাত্তর্‌‍বো উগুরে পড়িবো তে ভাঙিনে কট্টা কট্টা ওই যেবঅ আর সেই পাত্তর্‌বো যিবে উগুরে পড়িবো তে ভস্ত ওই যেবঅ।”

⁴⁵ আজল্ ধর্মগুরুগুন আর ফরীশীগুনে যীশুর হিত্ত্যবো শুনিনে বুঝি পারিলাক্ তে তারা পৌইদ্যেনে কধা কর্।

⁴⁶ সেক্কে তারা যীশুরে ধুরিবাত্তে চেলাক্, মাত্তর্ মানুচ্চুনো দরে সিয়েন্ ন-গুরিলাক্, কিয়া মান্‌জ্যে তারে ভাববাদী বিলি মনে গুরিদাক্।