মথি লেখ্যে গম্ হবর্ 20 - Chakma Bible

আংগুর্ খেদঅ চাগরুনে

¹ স্বর্গ-রেজ্যগান্ এক্কো ঘর গিরোজ ধোক্ক্যেন্। তে একদিনে বেন্যেমাদান্ খেদ কামত্ চাগর্ কাদেবাত্তে বারেদি গেলঅ।

² তে চাগরুনো লগে ঠিগ্ গুরিলোদে, দিনে এক দীনার্ গুরি দিবো। ইয়েনর্ পরেদি তে তারারে তা আংগুর-খেদত্ পাধেই দিলো।

³ প্রায় নটা সময় আরঅ তে বারেদি গেলঅ আহ্ বাজারত্ আরঅ কয়েকজনরে কাম্ নেই গুরি থিয়্যেই থাগদে দেগিলো।

⁴ তে তারারে কলঅ, তুমিয়ো মঅ আংগুর খেদত্ কাম্ গুরিবাত্তে যঅ। মুই তমারে যগাজ্যেগুরি বেতন্ দিম্।

⁵ সেক্কে সে মানুচ্চুনেয়ো কাম্ গুরিবাত্তে গেলাক্। সে ঘর গিরোজ্‌সো আরঅ প্রায় বারটায় আহ্ তিনটায় বারেদি যেইনে তে আগ ধোক্ক্যেন্ গুরিলো।

⁶ প্রায় পাচটা সময় বারেদি যেইনে অন্য কয়েক জনরে থিয়্যেই থাগদে দেগিনে তে তারারে কলঅ, তুমি কাম্ ন-গুরিনে গোদা দিন্নো ইয়োত্ থিয়্যেই আঘ কিত্তে?

⁷ তারা তারে কলাক্, কেঅ আমারে কামত্ ন- লাগায়। তে সে মানুচ্চুনোরে কলঅ, তুমিয়ো মঅ আংগুর খেদর্ কামত্ যঅ।

⁸ পরেদি সাজোন্যে অলে আংগুর খেদ গিরোজ্‌সো তা চাগর্‌বোরে কলঅ, কাম্ গুরিয়্যেগুনোরে ডাগিনে বেগ যেরেদি মানুচ্চোত্তুন ধুরি আরাম্ভ গুরিনে পৌইল্যাবো সং পত্তিজনরে বেতন দে।

⁹ বেল্যে পাচটা সময় যে চাগরুনোরে কামত্ লাগা ওইয়্যে তারা এইনে পত্তিজনে এক এক দীনার গুরি নেযেলাক্।

¹⁰ ইয়েন্দোই যিগুনোরে পৌইল্যাদি কামত্ লাগা ওইয়্যে তারা বেশ্ পেবাক্ বিলি মনে গুরিলাক্, মাত্তর্ তারায়ো পত্তিজনে এক দীনার গুরিনে পেলাক্।

¹¹ সেক্কে তারা সে গিরোজ্‌সো বিরুদ্ধে মনত্ দুঘে কুয়ো ধুরিলাক্,

¹² আমি গোদা দিন্নো রোদোত্ পুড়িনে কাম্ গোজ্যেই। মাত্তর্ যিগুনোরে যেরেদি কামত্ লাগা ওইয়্যে তারা বানা এক ঘন্টা কাম্ গোজ্যন্, অদচ তারারে তুই আমা সং সং বেতন দিলে।

¹³ “সেক্কে গিরোজ্‌সো তারা ভিদিরেত্তুন্ একজনরে কলঅ, ‘মঅ সমাজ্যেবো, মুই তঅ উগুরে দঅ অন্যেয় ন-গরং। তুই কি এক দিনারে কাম্ গুরিবাত্তে রাজী ন-অচ্?

¹⁴ তর্ পাইদ্যে টেঙাগুন্ লোইনে যাগোই। তরে যেবাবোত্তে দুয়োং, এই যেরেদি মানুচ্চোরেয়ো সেবাবোত্যে দিবাত্তে মর্ আওজ্।

¹⁵ যিয়েন্ মর্ নিজোর্, সিয়েন মর্ হুজি মজিম্ বেবহার গুরিবার অধিকার কি মর্ নেই? নাহি মুই দোয়্যেলু বিলি তঅ চোগোত্ ইংসে লাগের্।’ ”

¹⁶ কিত্ত্যবোর্ শেজদি যীশু কলঅ, “সেনত্যে যিগুনে বেগ যেরেদি আগন্ তারা পত্তম্ অবাক্, আর পত্তমে যিগুনে তারা বেগ যেরেদি পড়িবাক্।”

আরঅ তার্ মরণর্ কধা

¹⁷ যীশু যিরূশালেমত্ যেবার পদথ্ তার বারজন শিচ্চ্যরে এক কিত্তেদি ডাগিনে নিজেই কধা কলঅ, তারা যাহ্ ধুরিলাক্।

¹⁸ “শুনো, তে তারারে কলঅ, আমি যিরূশালেমত্ যের্। সিধু মান্‌জ্যপুয়োবোরে আজল্ ধর্মগুরু আর ধর্ম-মাষ্টরুনো আঢত্ ধোরেই দিয়্যে অবঅ।

¹⁹ তারা তা বিচের্ গুরিনে তারে মরণর যোগাজ্যে বিলি থির্ গুরিবাক্। তারা তারে ঠাট্টা-মশকারী গুরিবাক্ আর চাবুক্ মারিবাক্ আর ক্রুশোত্ দিবাত্তে অযিহূদীগুনো আঢত্ দিবাক্; পরেদি তিন দিনোত্ তে মরণত্তুন্ জেঈ উদিবো।”

যাকোব আর যোহন মাবোর্ কোজোলী

²⁰ পরেদি সিবদিয় মোক্কো দ্বিবে পুয়োরে সমারে লোইনে যীশু ইধু এলঅ আর তাইধু কিজু চেবার্ আজায় তারে সালাম গুরিলো।

²¹ যীশু তারে কলঅ, “তুই কি চাজ্?” তে কলঅ, “মরে কধা দে যেক্কেনে তুই রাজা অবে এই দ্বিবে পুয়োত্তুন্ এক্কো তঅ ডেনেদি আর এক্কো বাঙেদি বৈই পারে।”

²² জোবত্ যীশু পুয়োগুনোরে কলঅ, “তুমি কি পুযোর্ গরর্ সিয়েন্ ন-জান। যে দুঘোর্ গলজত্ মুই হেবাত্তে যাঙর্ সিবেত্ কি তুমি হেই পারিবা?” তারা জোবত্ কলাক্, “পারিবোং।”

²³ সেক্কে যীশু তারারে কলঅ, “ঘেচ্চেকগুরি তুমি মঅ গলজ্‌সোত্ হেবা, মাত্তর্ মঅ ডেনেদি বা বাঙেদি বুজিবাত্তে দিবার্ অধিকার মর্ নেই। মঅ বাপ্পো যিগুনোত্তে সিয়েন ঠিগ্ গুরি রাগেয়্যে তারা সিয়েন্ পেবাক্।”

²⁴ যেক্কেনে এই কধানি অন্য দশজন শিচ্চ্যই শুনিলাক্, তারা সেই দ্বিভেইয়ো উগুরে রাগ গুরিলাক্।

²⁵ সেক্কে যীশু বেক্ থুবেয়্যে গুনোরে ডাগিনে কলঅ, “তুমি এ কধাগান হবর্ পঅ, অযিহূদীগুনো ভিদিরে শাসন গুরিয়্যেগুনে তারার্ প্রভু অন্ আর নেতাগুনে তারা উগুরে উগুম চালান্।

²⁶ মাত্তর্ তমা ভিদিরে সেধোক্ক্যেন্ অনা উচিত নয়। তমা ভিদিরে যে দাঙর্ অবাত্তে চায় তাত্তুন্ তমার সেবাগুরিয়্যে উয়ো পড়িবো,

²⁷ আর যে পত্তম অবাত্তে চায় তাত্তুন্ তমার চাগর্ উয়ো পড়িবো।

²⁸ ইদোত্ রাগেয়ো, মান্‌জ্যপুয়োবো সেবা পেবাত্তে ন-এজে বরং সেবা গুরিবাত্তে এচ্চ্যে আর ভালোক্কুন্ মান্‌জ্যর্ উদ্ধোরর্ দাম্ ইজেবে তারা পরাণানির্ বদলে নিজো পরাণান্ দিবাত্তে এচ্চ্যে।”

দ্বিজন কানা গম্ অলাক্

²⁹ যীশু আর তা শিচ্চ্যগুনে যিরীহো শঅরান্ ফেলেই যেবার্ অক্তত্ বোউত্ মানুচ্ যীশুর পিজে পিজে গেলাক্।

³⁰ পধ পাজারত্ দ্বিবে কান্ মানুচ্ বুয়োই এলাক্। যীশু সে পধেদি যার্ শুনিনে তারা রঅ ছাড়িনে কলাক্, “প্রভু, দায়ূদোর বংশধর, আমারে দোয়্যে গর্।”

³¹ তারা যেন অলর্ অন্ সেনত্তে মানুচ্চুনে তারারে ধমক্ দিলাক্। মাত্তর্ তারা আরঅ রঅ ছাড়িনে কলাক্, “প্রভু, দায়ূদোর বংশধর, আমারে দোয়্যে গর্।”

³² সেক্কে যীশু থিয়্যেল আর তারারে ডাগিনে কলঅ, “তুমি কি চঅ? মুই তমাত্তে কি গুরিম?”

³³ তারা তারে কলাক্, “প্রভু, আমা চোখ্‌কুন খুলি দে।”

³⁴ তারা উগুরে যীশুর দোয়্যে অলঅ আর তারার্ চোগ্‌কুন ধুরিলো; আর সেক্কেনে তারা চোগেদি দেগিলাক্ আর তা পিজে পিজে যাহ্ ধুরিলাক্।