মথি লেখ্যে গম্ হবর্ 18 - Chakma Bible

দাঙর্ কন্না?

¹ সে অক্তত্ শিচ্চ্যগুনে যীশু ইধু এইনে পুযোর্ গুরিলাক্, “স্বর্গ-রেজ্য ভিদিরে বেগত্তুন্ দাঙর্ কন্না?”

² সেক্কে যীশু এক্কো চিগোন্ গুড়োরে ডাগিলো আর তারা মুজুঙোত্ থিয়্যেই রাগেল,

³ মুই তমারে ঘেচ্চেক্‌গুরি কঙর্, যুনি তুমি মনানি ফিরেইনে চিগোন্ গুরোগুনো ধোক্ক্যেন্ ন-অ সালে কনবাবদে স্বর্গ-রেজ্যত্ সোমেই ন-পারিবা।

⁴ যে কনজনে এ চিগোন গুরোগুনো ধোক্ক্যেন্ নিজোরে চিগোন গরন্ তেয়ই স্বর্গ-রেজ্য ভিদিরে বেগত্তুন্ দাঙর্।

⁵ আর যে কেঅ ইবে ধোক্ক্যেন্ কনঅ চিগোন্ গুরোরে মঅ নাঙে ভালেদি জানায় তে মরে ভালেদি জানায়।

পাপঅ পদত্ নেযানা

⁶ মঅ উগুরে বিশ্বেজি এই চিগোনুনো ভিদিরে কাররে যুনি কেঅ পাপ পধেদি নেযায় সালে তা গত্তনাত্ এক্কো দাঙর্ পাত্তর্ বানিনে তারে সাগর গভীন্ পানিত্ ভুরোনা বরং তা পক্ষে গম্।

⁷ কদক্ দর্‌গরেপারা এই পিত্‌থিমীগান পাপ পধেদি নেযেবাত্তে তারার্ বিশ্বেজ্‌চানি আরেই ফেলাদন! অবুচ্চ্যই সিয়েনি দঅ ঘুদিবো; মাত্তর্ কত্তমান দর্‌গরেপারা যিবেলোই সিয়েনি ঘদে!

⁸ তঅ আঢ্‌তানি বা টেঙানিয়ে যুনি তঅ বিশ্বেজ্‌চান আরেই দে সালে সিয়েনি কাবিনে ফেলেই দে। দ্বিয়েন্ আঢ্ আর দ্বিয়েন্ টেঙোই জনমত্তে আগুনোত্ পড়ানাত্তুন্ বরং লেং বা আঢুড়্ ওইনে জিংকানিত্ সমানা তত্যেই গম্।

⁹ তঅ চোগ্‌কুনে যুনি তঅ বিশ্বেজ্‌চানরে আরেই দে সালে সিগুন উগুরেনে ফেলেই দে। দ্বি'বে চোগ্‌কোই নরগ আগুনোত্ পড়ানাত্তুন্ বরং চোখ কান্ ওইনে জিংকানিত্ সমানা তঅ পক্ষে গম্।

¹⁰ চেয়ো, তুমি যেন এ চিগোন্ গুরোগুনো ভিদিরে একজনরেয়ো ঈচ্ ন-গরঅ। মুই তমারে কঙর্, স্বর্গত্ তারার্ দূত্‌তুনে নিত্য মঅ স্বর্গর্ বাপ্পো মুয়োন্ দেগদন্।

¹¹ যিয়েনি আযি যেইয়্যে সিয়েনি উদ্ধোর্ গুরিবাত্তে মান্‌জ্য পুয়োবো এচ্চ্যে। তুমি কি মনে গরঅ?

¹² ধোজ্য, এক্কো মান্‌জ্যর্ একশত্তো ভেড়া আঘন্। সিগুনো ভিদিরেত্তুন্ যুনি এক্কো ভুল্ পধেদি যায় সালে তে কি নিরেনব্বইবো মুড়ো কাজাত্ থোইনে সে ভেড়াবো তোগেবাত্তে ন-যায়?

¹³ মুই তমারে ঘেচ্চ্যেকগুরি কঙর্, যুনি তে সিবে পায় সালে যে নিরেনব্বইবো ভুল্ পধেদি ন-যান্, তারাত্তুন্ যিবে ভুল্ পধেদি যেইয়্যে সিবেত্তে তে আরঅ বেশ্ হুজি অয়।

¹⁴ ঠিগ্ সেবাবোত্যেগুরি, তমা স্বর্গর্ বাপ্পোর্ আওজ্ নয় যে, এ চিগোন্ গুরোগুনো ভিদিরে একজন্অ বর্‌বাত্ যায়।

যে ভেইবো অন্যেয় গরে

¹⁵ তঅ ভেইবো যুনি তঅ বিরুদ্ধে অন্যেয় গরে সালে তাইধু যেইনে যেক্কে আর্ কনজন ন-থেবাক্ সেক্কে তা দুষ্‌চান দেগেই দে। যুনি তে তঅ কধানি শুনে সালে তুই দঅ তঅ ভেইবোরে ফিরি পেলে।

¹⁶ মাত্তর্ যুনি তে ন-শুনে সালে অন্য দ্বিএকজনরে তমা লগে নেযেয়ো, যেন দুই বা তিনজন সাক্ষীর্ কধালোই এ বেপারানি সত্য বিলিনে প্রমান্ অয়।

¹⁷ যুনি তে তারা কধা ন-শুনে সালে মন্ডলীরে কঅ। তে যুনি মন্ডলীর কধায়ো ন-শুনে সালে তে তইধু অযিহূদী বা খাজানা-তুলিয়্যে ধোক্ক্যেন্ ওক্।

¹⁸ সেনত্যে মুই তমারে বেক্কুনোরে কঙর্, তুমি পিত্‌থিমীত্ যিয়েনি থুবেবা স্বর্গত্অ বানি থুয়ো অবঅ, আর যিয়েনি খুলিবা সিয়েনি স্বর্গত্অ খুলি দিয়্যে অবঅ।

¹⁹ “মুই তমারে আরঅ কঙর্, তমা ভিদিরে দ্বিজন্ যুনি একমন্ ওইনে কনঅ পৌইদ্যেনে তবনা গরে সালে মর্ স্বর্গর্ বাপ্পো তমাত্তে সিয়েন্ গুরিবো,

²⁰ কিয়া যিয়েনত্ দুই বা তিনজন মঅ নাঙে এগত্তর্ অন্ সিয়েনত্ মুই তারা ভিদিরে থাং।”

যে কাম্ গুরিয়্যেবো খেমা ন-গরে

²¹ সেক্কে পিতরে এইনে যীশুরে কলঅ, “প্রভু, মঅ ভেইবো মঅ বিরুদ্ধে অন্যেয় গুরিলে মুই কয়বার্ তারে খেমা গুরিম? সাত বার্ নাকি?”

²² যীশু তারে কলঅ, বানা সাত বার্ নয়, মাত্তর্ মুই তরে সত্তুর্ গুণ সাত বার্ সং খেমা গুরিবাত্তে কোম্।

²³ চাহ্, স্বর্গ-রেজ্যগান এমন্ এক্কো রাজা ধোক্ক্যেন্ যিবে তা কাম্ গুরিয়্যেগুনো ইধু ইজেব্ চেলঅ।

²⁴ তে যেক্কে ইজেব্ নিবাত্তে আরাম্ভ গুরিলো সেক্কে তারা ভিদিরেত্তুন্ এন্ এক্কো কাম্ গুরিয়্যেরে আনা অলঅ, রাজা ইধু যাত্তুন্ লাখ্ লাখ্ দীনার্ কজ্জ এলঅ।

²⁵ তা কজ্জ শুজিবার্ খেমতা ন-এলঅ। সেক্কে সে গিরোজ্‌সো উগুম গুরিলো যেন সে মানুচ্চোরে আর তা মোক্কোরে আহ্ পুয়ো-ঝিগুনোরে আর তার্ যিয়েনি আঘে বেক্কানি বিজিনে পাওনা উজোল্ গরা অয়।

²⁶ সেক্কে সে কাম্ গুরিয়্যেবো মাদিত্ পড়িনে গিরোজ্‌সো টেঙত্ ধুরিনে কলঅ, ও প্রভু, মঅ উগুরে ধোজ্জ্য ধর্, তরে মুই বেক্কুন্ শুজি দিম্।

²⁷ সেক্কে গিরোজ্‌সো চিত্ পরিনে সে কাম্ গুরিয়্যেবোরে ইরি দিলো আর তা কজ্জগুন্ খেমা গুরি দিলো।

²⁸ পরেদি সে চাগর্‌বো বারেদি যেইনে তার্ এক্কো সমাজ্যে-চাগররে দেগিলো। তাইধু সে সমাজ্যে-চাগর্‌বোর প্রায় একশ দীনার্ কজ্জ এলঅ। সে চাগর্‌বো তা সমাজ্যেবোর্ তদাবো চিবি ধুরিনে কলঅ, তুই যে টেঙাগুন্ উদোর্ লোইয়োচ্ সিগুন শুজ্।

²⁹ সমাজ্যে-চাগর্‌বো সেক্কে তা টেঙত্ পড়িনে তারে কোজোলী গুরি কলঅ, মঅ উগুরে ধোজ্জ্য ধর্, মুই বেক্কুন্ শুজি দিম্।

³⁰ মাত্তর্ তে রাজি ন-অলঅ বরং কজ্জ ন-শুজোনা সং তারে জেলোত্ রাগেল।

³¹ এই বেক্ ঘটনাগানি দেগিনে তার্ অন্য সমাজ্যে-চাগরুনে অমকদ মনত্ দুঘ্ পেলাক্। তারা যেইনে তারার্ গিরোজ্‌সো ইধু বেক্ কধানি জানেলাক্।

³² সেক্কে গিরোজ্‌সো সে চাগর্‌বোরে ডাগিনে কলঅ, পাজি চাগর্‌বো! তুই মরে কোজোলী গোজ্যস্ বিলি মুই তর্ বেক কজ্জগুন্ খেমা গোজ্যং।

³³ মুই যেবাবোত্যেগুরি তরে দোয়্যে গোজ্যং সেবাবোত্যেগুরি তঅ সমাজ্যে-চাগর্‌বোরে দোয়্যে গরানা কি তর্ উচিত্ ন-এলঅ?

³⁴ পরেদি তা গিরোজ্‌সো রাগ্ গুরিনে তার বেক্ কজ্জগুন্ ন-শুজোনা সং তারে দুঘ্ দিবাত্তে জেলখানা মানুচ্চুনো আঢত্ তুলি দিলো।

³⁵ “ঠিগ্ সেবাবোত্যেগুরি, তুমি পত্তিজনে যুনি তমা ভেইয়ুনোরে মনেদি খেমা ন-গরঅ সালে মর্ স্বর্গর্ বাপ্পোয়ো তমা উগুরে এবাবোত্যে গুরিবো।”